೧. ವಿಭಙ್ಗವಾರೋ

ಹೇತುಪಚ್ಚಯೋ

೩೩೮. ಕುಸಲಂ ಧಮ್ಮಂ ಸಂಸಟ್ಠೋ ಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಕುಸಲಂ ಏಕಂ ಖನ್ಧಂ ಸಂಸಟ್ಠಾ ತಯೋ ಖನ್ಧಾ, ತಯೋ ಖನ್ಧೇ ಸಂಸಟ್ಠೋ ಏಕೋ ಖನ್ಧೋ, ದ್ವೇ ಖನ್ಧೇ ಸಂಸಟ್ಠಾ ದ್ವೇ ಖನ್ಧಾ. (೧)

ಅಕುಸಲಂ ಧಮ್ಮಂ ಸಂಸಟ್ಠೋ ಅಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಅಕುಸಲಂ ಏಕಂ ಖನ್ಧಂ ಸಂಸಟ್ಠಾ ತಯೋ ಖನ್ಧಾ, ತಯೋ ಖನ್ಧೇ ಸಂಸಟ್ಠೋ ಏಕೋ ಖನ್ಧೋ, ದ್ವೇ ಖನ್ಧೇ ಸಂಸಟ್ಠಾ ದ್ವೇ ಖನ್ಧಾ. (೧)

ಅಬ್ಯಾಕತಂ ಧಮ್ಮಂ ಸಂಸಟ್ಠೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ವಿಪಾಕಾಬ್ಯಾಕತಂ ಕಿರಿಯಾಬ್ಯಾಕತಂ ಏಕಂ ಖನ್ಧಂ ಸಂಸಟ್ಠಾ ತಯೋ ಖನ್ಧಾ, ತಯೋ ಖನ್ಧೇ ಸಂಸಟ್ಠೋ ಏಕೋ ಖನ್ಧೋ, ದ್ವೇ ಖನ್ಧೇ ಸಂಸಟ್ಠಾ ದ್ವೇ ಖನ್ಧಾ; ಪಟಿಸನ್ಧಿಕ್ಖಣೇ ವಿಪಾಕಾಬ್ಯಾಕತಂ ಏಕಂ ಖನ್ಧಂ ಸಂಸಟ್ಠಾ ತಯೋ ಖನ್ಧಾ, ತಯೋ ಖನ್ಧೇ ಸಂಸಟ್ಠೋ ಏಕೋ ಖನ್ಧೋ, ದ್ವೇ ಖನ್ಧೇ ಸಂಸಟ್ಠಾ ದ್ವೇ ಖನ್ಧಾ. (೧)

ಆರಮ್ಮಣಾದಿಪಚ್ಚಯಾ

೩೩೯. ಕುಸಲಂ ಧಮ್ಮಂ ಸಂಸಟ್ಠೋ ಕುಸಲೋ ಧಮ್ಮೋ ಉಪ್ಪಜ್ಜತಿ ಆರಮ್ಮಣಪಚ್ಚಯಾ… ಅಧಿಪತಿಪಚ್ಚಯಾ… (ಅಧಿಪತಿ ಪಟಿಸನ್ಧಿಕ್ಖಣೇ ನತ್ಥಿ.) ಅನನ್ತರಪಚ್ಚಯಾ… ಸಮನನ್ತರಪಚ್ಚಯಾ… ಸಹಜಾತಪಚ್ಚಯಾ… ಅಞ್ಞಮಞ್ಞಪಚ್ಚಯಾ… ನಿಸ್ಸಯಪಚ್ಚಯಾ… ಉಪನಿಸ್ಸಯಪಚ್ಚಯಾ. (ಸಬ್ಬಾನಿ ಪದಾನಿ ಹೇತುಮೂಲಕಸದಿಸಾನಿ).

ಪುರೇಜಾತಪಚ್ಚಯೋ

೩೪೦. ಕುಸಲಂ ಧಮ್ಮಂ ಸಂಸಟ್ಠೋ ಕುಸಲೋ ಧಮ್ಮೋ ಉಪ್ಪಜ್ಜತಿ ಪುರೇಜಾತಪಚ್ಚಯಾ – ಕುಸಲಂ ಏಕಂ ಖನ್ಧಂ ಸಂಸಟ್ಠಾ ತಯೋ ಖನ್ಧಾ, ತಯೋ ಖನ್ಧೇ ಸಂಸಟ್ಠೋ ಏಕೋ ಖನ್ಧೋ, ದ್ವೇ ಖನ್ಧೇ ಸಂಸಟ್ಠಾ ದ್ವೇ ಖನ್ಧಾ, ವತ್ಥುಂ ಪುರೇಜಾತಪಚ್ಚಯಾ. (೧)

ಅಕುಸಲಂ ಧಮ್ಮಂ ಸಂಸಟ್ಠೋ ಅಕುಸಲೋ ಧಮ್ಮೋ ಉಪ್ಪಜ್ಜತಿ ಪುರೇಜಾತಪಚ್ಚಯಾ – ಅಕುಸಲಂ ಏಕಂ ಖನ್ಧಂ ಸಂಸಟ್ಠಾ ತಯೋ ಖನ್ಧಾ, ತಯೋ ಖನ್ಧೇ ಸಂಸಟ್ಠೋ ಏಕೋ ಖನ್ಧೋ, ದ್ವೇ ಖನ್ಧೇ ಸಂಸಟ್ಠಾ ದ್ವೇ ಖನ್ಧಾ; ವತ್ಥುಂ ಪುರೇಜಾತಪಚ್ಚಯಾ. (೧)

ಅಬ್ಯಾಕತಂ ಧಮ್ಮಂ ಸಂಸಟ್ಠೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಪುರೇಜಾತಪಚ್ಚಯಾ – ವಿಪಾಕಾಬ್ಯಾಕತಂ ಕಿರಿಯಾಬ್ಯಾಕತಂ ಏಕಂ ಖನ್ಧಂ ಸಂಸಟ್ಠಾ ತಯೋ ಖನ್ಧಾ, ತಯೋ ಖನ್ಧೇ ಸಂಸಟ್ಠೋ ಏಕೋ ಖನ್ಧೋ, ದ್ವೇ ಖನ್ಧೇ ಸಂಸಟ್ಠಾ ದ್ವೇ ಖನ್ಧಾ; ವತ್ಥುಂ ಪುರೇಜಾತಪಚ್ಚಯಾ. (೧)

ಆಸೇವನಪಚ್ಚಯೋ

೩೪೧. ಕುಸಲಂ ಧಮ್ಮಂ ಸಂಸಟ್ಠೋ…ಪೇ… ಅಕುಸಲಂ ಧಮ್ಮಂ…ಪೇ… ಅಬ್ಯಾಕತಂ ಧಮ್ಮಂ ಸಂಸಟ್ಠೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಆಸೇವನಪಚ್ಚಯಾ – ಕಿರಿಯಾಬ್ಯಾಕತಂ ಏಕಂ ಖನ್ಧಂ ಸಂಸಟ್ಠಾ…ಪೇ….

ಕಮ್ಮಪಚ್ಚಯೋ

೩೪೨. ಕುಸಲಂ ಧಮ್ಮಂ ಸಂಸಟ್ಠೋ ಕುಸಲೋ ಧಮ್ಮೋ ಉಪ್ಪಜ್ಜತಿ ಕಮ್ಮಪಚ್ಚಯಾ…ಪೇ… ಅಕುಸಲಂ ಧಮ್ಮಂ ಸಂಸಟ್ಠೋ…ಪೇ… ಅಬ್ಯಾಕತಂ ಧಮ್ಮಂ ಸಂಸಟ್ಠೋ…ಪೇ….

ವಿಪಾಕಪಚ್ಚಯೋ

೩೪೩. ಅಬ್ಯಾಕತಂ ಧಮ್ಮಂ ಸಂಸಟ್ಠೋ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ವಿಪಾಕಪಚ್ಚಯಾ – ವಿಪಾಕಾಬ್ಯಾಕತಂ…ಪೇ….

ಆಹಾರಾದಿಪಚ್ಚಯಾ

೩೪೪. ಕುಸಲಂ ಧಮ್ಮಂ ಸಂಸಟ್ಠೋ ಕುಸಲೋ ಧಮ್ಮೋ ಉಪ್ಪಜ್ಜತಿ ಆಹಾರಪಚ್ಚಯಾ… ಇನ್ದ್ರಿಯಪಚ್ಚಯಾ … ಝಾನಪಚ್ಚಯಾ… ಮಗ್ಗಪಚ್ಚಯಾ… ಸಮ್ಪಯುತ್ತಪಚ್ಚಯಾ. (ಇಮಾನಿ ಪದಾನಿ ಹೇತುಪಚ್ಚಯಸದಿಸಾನಿ.)

ವಿಪ್ಪಯುತ್ತಪಚ್ಚಯೋ

೩೪೫. ಕುಸಲಂ ಧಮ್ಮಂ ಸಂಸಟ್ಠೋ ಕುಸಲೋ ಧಮ್ಮೋ ಉಪ್ಪಜ್ಜತಿ ವಿಪ್ಪಯುತ್ತಪಚ್ಚಯಾ – ಕುಸಲಂ ಏಕಂ ಖನ್ಧಂ ಸಂಸಟ್ಠಾ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಸಂಸಟ್ಠಾ ದ್ವೇ ಖನ್ಧಾ; ವತ್ಥುಂ ವಿಪ್ಪಯುತ್ತಪಚ್ಚಯಾ.

ಅಕುಸಲಂ ಧಮ್ಮಂ…ಪೇ… ವತ್ಥುಂ ವಿಪ್ಪಯುತ್ತಪಚ್ಚಯಾ.

ಅಬ್ಯಾಕತಂ ಧಮ್ಮಂ…ಪೇ… ವತ್ಥುಂ ವಿಪ್ಪಯುತ್ತಪಚ್ಚಯಾ.

ಅತ್ಥಿಆದಿಪಚ್ಚಯಾ

೩೪೬. ಕುಸಲಂ ಧಮ್ಮಂ ಸಂಸಟ್ಠೋ ಕುಸಲೋ ಧಮ್ಮೋ ಉಪ್ಪಜ್ಜತಿ ಅತ್ಥಿಪಚ್ಚಯಾ… ನತ್ಥಿಪಚ್ಚಯಾ… ವಿಗತಪಚ್ಚಯಾ… ಅವಿಗತಪಚ್ಚಯಾ (ಹೇತುಪಚ್ಚಯಸದಿಸಂ).