೧. ವಿಭಙ್ಗವಾರೋ

ಹೇತುಪಚ್ಚಯೋ

೩೨೯. ಕುಸಲಂ ಧಮ್ಮಂ ನಿಸ್ಸಾಯ ಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಕುಸಲಂ ಏಕಂ ಖನ್ಧಂ ನಿಸ್ಸಾಯ ತಯೋ ಖನ್ಧಾ, ತಯೋ ಖನ್ಧೇ ನಿಸ್ಸಾಯ ಏಕೋ ಖನ್ಧೋ, ದ್ವೇ ಖನ್ಧೇ ನಿಸ್ಸಾಯ ದ್ವೇ ಖನ್ಧಾ. ಕುಸಲಂ ಧಮ್ಮಂ ನಿಸ್ಸಾಯ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಕುಸಲೇ ಖನ್ಧೇ ನಿಸ್ಸಾಯ ಚಿತ್ತಸಮುಟ್ಠಾನಂ ರೂಪಂ. ಕುಸಲಂ ಧಮ್ಮಂ ನಿಸ್ಸಾಯ ಕುಸಲೋ ಚ ಅಬ್ಯಾಕತೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ. ಕುಸಲಂ ಏಕಂ ಖನ್ಧಂ ನಿಸ್ಸಾಯ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ, ತಯೋ ಖನ್ಧೇ ನಿಸ್ಸಾಯ ಏಕೋ ಖನ್ಧೋ ಚಿತ್ತಸಮುಟ್ಠಾನಞ್ಚ ರೂಪಂ, ದ್ವೇ ಖನ್ಧೇ ನಿಸ್ಸಾಯ ದ್ವೇ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ. (೩)

೩೩೦. ಅಕುಸಲಂ ಧಮ್ಮಂ ನಿಸ್ಸಾಯ ಅಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಅಕುಸಲಂ ಏಕಂ ಖನ್ಧಂ ನಿಸ್ಸಾಯ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ನಿಸ್ಸಾಯ ದ್ವೇ ಖನ್ಧಾ. ಅಕುಸಲಂ ಧಮ್ಮಂ ನಿಸ್ಸಾಯ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಅಕುಸಲೇ ಖನ್ಧೇ ನಿಸ್ಸಾಯ ಚಿತ್ತಸಮುಟ್ಠಾನಂ ರೂಪಂ. ಅಕುಸಲಂ ಧಮ್ಮಂ ನಿಸ್ಸಾಯ ಅಕುಸಲೋ ಚ ಅಬ್ಯಾಕತೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಅಕುಸಲಂ ಏಕಂ ಖನ್ಧಂ ನಿಸ್ಸಾಯ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ…ಪೇ… ದ್ವೇ ಖನ್ಧೇ ನಿಸ್ಸಾಯ ದ್ವೇ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ. (೩)

೩೩೧. ಅಬ್ಯಾಕತಂ ಧಮ್ಮಂ ನಿಸ್ಸಾಯ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ವಿಪಾಕಾಬ್ಯಾಕತಂ ಕಿರಿಯಾಬ್ಯಾಕತಂ ಏಕಂ ಖನ್ಧಂ ನಿಸ್ಸಾಯ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ, ತಯೋ ಖನ್ಧೇ ನಿಸ್ಸಾಯ ಏಕೋ ಖನ್ಧೋ ಚಿತ್ತಸಮುಟ್ಠಾನಞ್ಚ ರೂಪಂ, ದ್ವೇ ಖನ್ಧೇ ನಿಸ್ಸಾಯ ದ್ವೇ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪಂ; ಪಟಿಸನ್ಧಿಕ್ಖಣೇ ವಿಪಾಕಾಬ್ಯಾಕತಂ ಏಕಂ ಖನ್ಧಂ ನಿಸ್ಸಾಯ ತಯೋ ಖನ್ಧಾ ಕಟತ್ತಾ ಚ ರೂಪಂ, ತಯೋ ಖನ್ಧೇ ನಿಸ್ಸಾಯ ಏಕೋ ಖನ್ಧೋ ಕಟತ್ತಾ ಚ ರೂಪಂ, ದ್ವೇ ಖನ್ಧೇ ನಿಸ್ಸಾಯ ದ್ವೇ ಖನ್ಧಾ ಕಟತ್ತಾ ಚ ರೂಪಂ; ಖನ್ಧೇ ನಿಸ್ಸಾಯ ವತ್ಥು, ವತ್ಥುಂ ನಿಸ್ಸಾಯ ಖನ್ಧಾ; ಏಕಂ ಮಹಾಭೂತಂ ನಿಸ್ಸಾಯ ತಯೋ ಮಹಾಭೂತಾ, ತಯೋ ಮಹಾಭೂತೇ ನಿಸ್ಸಾಯ ಏಕಂ ಮಹಾಭೂತಂ, ದ್ವೇ ಮಹಾಭೂತೇ ನಿಸ್ಸಾಯ ದ್ವೇ ಮಹಾಭೂತಾ, ಮಹಾಭೂತೇ ನಿಸ್ಸಾಯ ಚಿತ್ತಸಮುಟ್ಠಾನಂ ರೂಪಂ ಕಟತ್ತಾರೂಪಂ ಉಪಾದಾರೂಪಂ; ವತ್ಥುಂ ನಿಸ್ಸಾಯ ವಿಪಾಕಾಬ್ಯಾಕತಾ ಕಿರಿಯಾಬ್ಯಾಕತಾ ಖನ್ಧಾ. (೧)

ಅಬ್ಯಾಕತಂ ಧಮ್ಮಂ ನಿಸ್ಸಾಯ ಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ವತ್ಥುಂ ನಿಸ್ಸಾಯ ಕುಸಲಾ ಖನ್ಧಾ. (೨)

ಅಬ್ಯಾಕತಂ ಧಮ್ಮಂ ನಿಸ್ಸಾಯ ಅಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ವತ್ಥುಂ ನಿಸ್ಸಾಯ ಅಕುಸಲಾ ಖನ್ಧಾ. (೩)

ಅಬ್ಯಾಕತಂ ಧಮ್ಮಂ ನಿಸ್ಸಾಯ ಕುಸಲೋ ಚ ಅಬ್ಯಾಕತೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ವತ್ಥುಂ ನಿಸ್ಸಾಯ ಕುಸಲಾ ಖನ್ಧಾ, ಮಹಾಭೂತೇ ನಿಸ್ಸಾಯ ಚಿತ್ತಸಮುಟ್ಠಾನಂ ರೂಪಂ. (೪)

ಅಬ್ಯಾಕತಂ ಧಮ್ಮಂ ನಿಸ್ಸಾಯ ಅಕುಸಲೋ ಚ ಅಬ್ಯಾಕತೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ವತ್ಥುಂ ನಿಸ್ಸಾಯ ಅಕುಸಲಾ ಖನ್ಧಾ, ಮಹಾಭೂತೇ ನಿಸ್ಸಾಯ ಚಿತ್ತಸಮುಟ್ಠಾನಂ ರೂಪಂ. (೫)

೩೩೨. ಕುಸಲಞ್ಚ ಅಬ್ಯಾಕತಞ್ಚ ಧಮ್ಮಂ ನಿಸ್ಸಾಯ ಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಕುಸಲಂ ಏಕಂ ಖನ್ಧಞ್ಚ ವತ್ಥುಞ್ಚ ನಿಸ್ಸಾಯ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಚ ವತ್ಥುಞ್ಚ ನಿಸ್ಸಾಯ ದ್ವೇ ಖನ್ಧಾ. ಕುಸಲಞ್ಚ ಅಬ್ಯಾಕತಞ್ಚ ಧಮ್ಮಂ ನಿಸ್ಸಾಯ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಕುಸಲೇ ಖನ್ಧೇ ಚ ಮಹಾಭೂತೇ ಚ ನಿಸ್ಸಾಯ ಚಿತ್ತಸಮುಟ್ಠಾನಂ ರೂಪಂ. ಕುಸಲಞ್ಚ ಅಬ್ಯಾಕತಞ್ಚ ಧಮ್ಮಂ ನಿಸ್ಸಾಯ ಕುಸಲೋ ಚ ಅಬ್ಯಾಕತೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಕುಸಲಂ ಏಕಂ ಖನ್ಧಞ್ಚ ವತ್ಥುಞ್ಚ ನಿಸ್ಸಾಯ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಚ ವತ್ಥುಞ್ಚ ನಿಸ್ಸಾಯ ದ್ವೇ ಖನ್ಧಾ, ಕುಸಲೇ ಖನ್ಧೇ ಚ ಮಹಾಭೂತೇ ಚ ನಿಸ್ಸಾಯ ಚಿತ್ತಸಮುಟ್ಠಾನಂ ರೂಪಂ. (೩)

ಅಕುಸಲಞ್ಚ ಅಬ್ಯಾಕತಞ್ಚ ಧಮ್ಮಂ ನಿಸ್ಸಾಯ ಅಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಅಕುಸಲಂ ಏಕಂ ಖನ್ಧಞ್ಚ ವತ್ಥುಞ್ಚ ನಿಸ್ಸಾಯ ತಯೋ ಖನ್ಧಾ …ಪೇ… ದ್ವೇ ಖನ್ಧೇ ಚ ವತ್ಥುಞ್ಚ ನಿಸ್ಸಾಯ ದ್ವೇ ಖನ್ಧಾ. ಅಕುಸಲಞ್ಚ ಅಬ್ಯಾಕತಞ್ಚ ಧಮ್ಮಂ ನಿಸ್ಸಾಯ ಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಅಕುಸಲೇ ಖನ್ಧೇ ಚ ಮಹಾಭೂತೇ ಚ ನಿಸ್ಸಾಯ ಚಿತ್ತಸಮುಟ್ಠಾನಂ ರೂಪಂ. ಅಕುಸಲಞ್ಚ ಅಬ್ಯಾಕತಞ್ಚ ಧಮ್ಮಂ ನಿಸ್ಸಾಯ ಅಕುಸಲೋ ಚ ಅಬ್ಯಾಕತೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಅಕುಸಲಂ ಏಕಂ ಖನ್ಧಞ್ಚ ವತ್ಥುಞ್ಚ ನಿಸ್ಸಾಯ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಚ ವತ್ಥುಞ್ಚ ನಿಸ್ಸಾಯ ದ್ವೇ ಖನ್ಧಾ, ಅಕುಸಲೇ ಖನ್ಧೇ ಚ ಮಹಾಭೂತೇ ಚ ನಿಸ್ಸಾಯ ಚಿತ್ತಸಮುಟ್ಠಾನಂ ರೂಪಂ. (೩)

(ಯಥಾ ಪಚ್ಚಯವಾರೇ, ಏವಂ ವಿತ್ಥಾರೇತಬ್ಬಂ.)