೯. ಹೇವತ್ಥಿಕಥಾ

೩೦೪. ಅತೀತಂ ಅತ್ಥೀತಿ? ಹೇವತ್ಥಿ, ಹೇವ ನತ್ಥೀತಿ. ಸೇವತ್ಥಿ, ಸೇವ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ಸೇವತ್ಥಿ, ಸೇವ ನತ್ಥೀತಿ? ಆಮನ್ತಾ. ಅತ್ಥಟ್ಠೋ ನತ್ಥಟ್ಠೋ, ನತ್ಥಟ್ಠೋ ಅತ್ಥಟ್ಠೋ, ಅತ್ಥಿಭಾವೋ ನತ್ಥಿಭಾವೋ, ನತ್ಥಿಭಾವೋ ಅತ್ಥಿಭಾವೋ, ಅತ್ಥೀತಿ ವಾ ನತ್ಥೀತಿ ವಾ, ನತ್ಥೀತಿ ವಾ ಅತ್ಥೀತಿ ವಾ ಏಸೇಸೇ ಏಕಟ್ಠೇ ಸಮೇ ಸಮಭಾಗೇ ತಜ್ಜಾತೇತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗತಂ ಅತ್ಥೀತಿ? ಹೇವತ್ಥಿ, ಹೇವ ನತ್ಥೀತಿ. ಸೇವತ್ಥಿ, ಸೇವ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ಸೇವತ್ಥಿ, ಸೇವ ನತ್ಥೀತಿ? ಆಮನ್ತಾ. ಅತ್ಥಟ್ಠೋ ನತ್ಥಟ್ಠೋ, ನತ್ಥಟ್ಠೋ ಅತ್ಥಟ್ಠೋ, ಅತ್ಥಿಭಾವೋ ನತ್ಥಿಭಾವೋ, ನತ್ಥಿಭಾವೋ ಅತ್ಥಿಭಾವೋ, ಅತ್ಥೀತಿ ವಾ ನತ್ಥೀತಿ ವಾ, ನತ್ಥೀತಿ ವಾ ಅತ್ಥೀತಿ ವಾ ಏಸೇಸೇ ಏಕಟ್ಠೇ ಸಮೇ ಸಮಭಾಗೇ ತಜ್ಜಾತೇತಿ? ನ ಹೇವಂ ವತ್ತಬ್ಬೇ…ಪೇ….

ಪಚ್ಚುಪ್ಪನ್ನಂ ಅತ್ಥೀತಿ? ಹೇವತ್ಥಿ, ಹೇವ ನತ್ಥೀತಿ. ಸೇವತ್ಥಿ, ಸೇವ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ಸೇವತ್ಥಿ, ಸೇವ ನತ್ಥೀತಿ? ಆಮನ್ತಾ. ಅತ್ಥಟ್ಠೋ ನತ್ಥಟ್ಠೋ…ಪೇ… ಸಮೇ ಸಮಭಾಗೇ ತಜ್ಜಾತೇತಿ? ನ ಹೇವಂ ವತ್ತಬ್ಬೇ…ಪೇ….

೩೦೫. ಅತೀತಂ ಹೇವತ್ಥಿ, ಹೇವ ನತ್ಥೀತಿ? ಆಮನ್ತಾ. ಕಿನ್ತತ್ಥಿ, ಕಿನ್ತಿ ನತ್ಥೀತಿ? ಅತೀತಂ ಅತೀತನ್ತಿ ಹೇವತ್ಥಿ, ಅತೀತಂ ಅನಾಗತನ್ತಿ ಹೇವ ನತ್ಥಿ, ಅತೀತಂ ಪಚ್ಚುಪ್ಪನ್ನನ್ತಿ ಹೇವ ನತ್ಥೀತಿ. ಸೇವತ್ಥಿ, ಸೇವ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ಸೇವತ್ಥಿ, ಸೇವ ನತ್ಥೀತಿ? ಆಮನ್ತಾ. ಅತ್ಥಟ್ಠೋ ನತ್ಥಟ್ಠೋ, ನತ್ಥಟ್ಠೋ ಅತ್ಥಟ್ಠೋ, ಅತ್ಥಿಭಾವೋ ನತ್ಥಿಭಾವೋ, ನತ್ಥಿಭಾವೋ ಅತ್ಥಿಭಾವೋ, ಅತ್ಥೀತಿ ವಾ ನತ್ಥೀತಿ ವಾ, ನತ್ಥೀತಿ ವಾ ಅತ್ಥೀತಿ ವಾ ಏಸೇಸೇ ಏಕಟ್ಠೇ ಸಮೇ ಸಮಭಾಗೇ ತಜ್ಜಾತೇತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗತಂ ಹೇವತ್ಥಿ, ಹೇವ ನತ್ಥೀತಿ? ಆಮನ್ತಾ. ಕಿನ್ತತ್ಥಿ, ಕಿನ್ತಿ ನತ್ಥೀತಿ? ಅನಾಗತಂ ಅನಾಗತನ್ತಿ ಹೇವತ್ಥಿ, ಅನಾಗತಂ ಅತೀತನ್ತಿ ಹೇವ ನತ್ಥಿ, ಅನಾಗತಂ ಪಚ್ಚುಪ್ಪನ್ನನ್ತಿ ಹೇವ ನತ್ಥೀತಿ. ಸೇವತ್ಥಿ, ಸೇವ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ಸೇವತ್ಥಿ, ಸೇವ ನತ್ಥೀತಿ? ಆಮನ್ತಾ. ಅತ್ಥಟ್ಠೋ ನತ್ಥಟ್ಠೋ, ನತ್ಥಟ್ಠೋ ಅತ್ಥಟ್ಠೋ…ಪೇ… ಸಮೇ ಸಮಭಾಗೇ ತಜ್ಜಾತೇತಿ? ನ ಹೇವಂ ವತ್ತಬ್ಬೇ…ಪೇ….

ಪಚ್ಚುಪ್ಪನ್ನಂ ಹೇವತ್ಥಿ, ಹೇವ ನತ್ಥೀತಿ? ಆಮನ್ತಾ. ಕಿನ್ತತ್ಥಿ, ಕಿನ್ತಿ ನತ್ಥೀತಿ? ಪಚ್ಚುಪ್ಪನ್ನಂ ಪಚ್ಚುಪ್ಪನ್ನನ್ತಿ ಹೇವತ್ಥಿ, ಪಚ್ಚುಪ್ಪನ್ನಂ ಅತೀತನ್ತಿ ಹೇವ ನತ್ಥಿ, ಪಚ್ಚುಪ್ಪನ್ನಂ ಅನಾಗತನ್ತಿ ಹೇವ ನತ್ಥೀತಿ. ಸೇವತ್ಥಿ, ಸೇವ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ಸೇವತ್ಥಿ, ಸೇವ ನತ್ಥೀತಿ? ಆಮನ್ತಾ. ಅತ್ಥಟ್ಠೋ ನತ್ಥಟ್ಠೋ…ಪೇ… ಸಮೇ ಸಮಭಾಗೇ ತಜ್ಜಾತೇತಿ? ನ ಹೇವಂ ವತ್ತಬ್ಬೇ…ಪೇ….

ನ ವತ್ತಬ್ಬಂ – ‘‘ಅತೀತಂ ಹೇವತ್ಥಿ, ಹೇವ ನತ್ಥಿ; ಅನಾಗತಂ ಹೇವತ್ಥಿ, ಹೇವ ನತ್ಥಿ; ಪಚ್ಚುಪ್ಪನ್ನಂ ಹೇವತ್ಥಿ, ಹೇವ ನತ್ಥೀ’’ತಿ? ಆಮನ್ತಾ. ಅತೀತಂ ಅನಾಗತನ್ತಿ ಹೇವತ್ಥಿ, ಅತೀತಂ ಪಚ್ಚುಪ್ಪನ್ನನ್ತಿ ಹೇವತ್ಥಿ, ಅನಾಗತಂ ಅತೀತನ್ತಿ ಹೇವತ್ಥಿ, ಅನಾಗತಂ ಪಚ್ಚುಪ್ಪನ್ನನ್ತಿ ಹೇವತ್ಥಿ, ಪಚ್ಚುಪ್ಪನ್ನಂ ಅತೀತನ್ತಿ ಹೇವತ್ಥಿ, ಪಚ್ಚುಪ್ಪನ್ನಂ ಅನಾಗತನ್ತಿ ಹೇವತ್ಥೀತಿ? ನ ಹೇವಂ ವತ್ತಬ್ಬೇ.…ಪೇ…. ತೇನ ಹಿ ಅತೀತಂ ಹೇವತ್ಥಿ ಹೇವ ನತ್ಥಿ, ಅನಾಗತಂ ಹೇವತ್ಥಿ ಹೇವ ನತ್ಥಿ, ಪಚ್ಚುಪ್ಪನ್ನಂ ಹೇವತ್ಥಿ, ಹೇವ ನತ್ಥೀತಿ.

೩೦೬. ರೂಪಂ ಅತ್ಥೀತಿ? ಹೇವತ್ಥಿ, ಹೇವ ನತ್ಥೀತಿ. ಸೇವತ್ಥಿ, ಸೇವ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ಸೇವತ್ಥಿ, ಸೇವ ನತ್ಥೀತಿ? ಆಮನ್ತಾ. ಅತ್ಥಟ್ಠೋ ನತ್ಥಟ್ಠೋ, ನತ್ಥಟ್ಠೋ ಅತ್ಥಟ್ಠೋ, ಅತ್ಥಿಭಾವೋ ನತ್ಥಿಭಾವೋ, ನತ್ಥಿಭಾವೋ ಅತ್ಥಿಭಾವೋ, ಅತ್ಥೀತಿ ವಾ ನತ್ಥೀತಿ ವಾ, ನತ್ಥೀತಿ ವಾ ಅತ್ಥೀತಿ ವಾ ಏಸೇಸೇ ಏಕಟ್ಠೇ ಸಮೇ ಸಮಭಾಗೇ ತಜ್ಜಾತೇತಿ? ನ ಹೇವಂ ವತ್ತಬ್ಬೇ…ಪೇ….

ವೇದನಾ… ಸಞ್ಞಾ… ಸಙ್ಖಾರಾ… ವಿಞ್ಞಾಣಂ ಅತ್ಥೀತಿ? ಹೇವತ್ಥಿ, ಹೇವ ನತ್ಥೀತಿ. ಸೇವತ್ಥಿ, ಸೇವ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ಸೇವತ್ಥಿ, ಸೇವ ನತ್ಥೀತಿ? ಆಮನ್ತಾ. ಅತ್ಥಟ್ಠೋ ನತ್ಥಟ್ಠೋ…ಪೇ… ಸಮೇ ಸಮಭಾಗೇ ತಜ್ಜಾತೇತಿ? ನ ಹೇವಂ ವತ್ತಬ್ಬೇ…ಪೇ….

ರೂಪಂ ಹೇವತ್ಥಿ, ಹೇವ ನತ್ಥೀತಿ? ಆಮನ್ತಾ. ಕಿನ್ತತ್ಥಿ, ಕಿನ್ತಿ ನತ್ಥೀತಿ? ರೂಪಂ ರೂಪನ್ತಿ ಹೇವತ್ಥಿ, ರೂಪಂ ವೇದನಾತಿ ಹೇವಂ ನತ್ಥಿ…ಪೇ… ರೂಪಂ ಸಞ್ಞಾತಿ ಹೇವ ನತ್ಥಿ…ಪೇ… ರೂಪಂ ಸಙ್ಖಾರಾತಿ ಹೇವ ನತ್ಥಿ…ಪೇ… ರೂಪಂ ವಿಞ್ಞಾಣನ್ತಿ ಹೇವ ನತ್ಥೀತಿ. ಸೇವತ್ಥಿ, ಸೇವ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ಸೇವತ್ಥಿ, ಸೇವ ನತ್ಥೀತಿ? ಆಮನ್ತಾ. ಅತ್ಥಟ್ಠೋ ನತ್ಥಟ್ಠೋ…ಪೇ… ಸಮೇ ಸಮಭಾಗೇ ತಜ್ಜಾತೇತಿ? ನ ಹೇವಂ ವತ್ತಬ್ಬೇ…ಪೇ….

ವೇದನಾ… ಸಞ್ಞಾ… ಸಙ್ಖಾರಾ… ವಿಞ್ಞಾಣಂ ಹೇವತ್ಥಿ, ಹೇವ ನತ್ಥೀತಿ? ಆಮನ್ತಾ. ಕಿನ್ತತ್ಥಿ, ಕಿನ್ತಿ ನತ್ಥೀತಿ? ವಿಞ್ಞಾಣಂ ವಿಞ್ಞಾಣನ್ತಿ ಹೇವತ್ಥಿ. ವಿಞ್ಞಾಣಂ ರೂಪನ್ತಿ ಹೇವ ನತ್ಥಿ…ಪೇ… ವಿಞ್ಞಾಣಂ ವೇದನಾತಿ ಹೇವ ನತ್ಥಿ…ಪೇ… ವಿಞ್ಞಾಣಂ ಸಞ್ಞಾತಿ ಹೇವ ನತ್ಥಿ…ಪೇ… ವಿಞ್ಞಾಣಂ ಸಙ್ಖಾರಾತಿ ಹೇವ ನತ್ಥೀತಿ. ಸೇವತ್ಥಿ, ಸೇವ ನತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ಸೇವತ್ಥಿ, ಸೇವ ನತ್ಥೀತಿ? ಆಮನ್ತಾ. ಅತ್ಥಟ್ಠೋ ನತ್ಥಟ್ಠೋ…ಪೇ… ಸಮೇ ಸಮಭಾಗೇ ತಜ್ಜಾತೇತಿ? ನ ಹೇವಂ ವತ್ತಬ್ಬೇ…ಪೇ….

ನ ವತ್ತಬ್ಬಂ – ‘‘ರೂಪಂ ಹೇವತ್ಥಿ, ಹೇವ ನತ್ಥೀತಿ; ವೇದನಾ… ಸಞ್ಞಾ… ಸಙ್ಖಾರಾ… ವಿಞ್ಞಾಣಂ ಹೇವತ್ಥಿ, ಹೇವ ನತ್ಥೀತಿ? ಆಮನ್ತಾ. ರೂಪಂ ವೇದನಾತಿ ಹೇವತ್ಥಿ…ಪೇ… ರೂಪಂ ಸಞ್ಞಾತಿ ಹೇವತ್ಥಿ…ಪೇ… ರೂಪಂ ಸಙ್ಖಾರಾತಿ ಹೇವತ್ಥಿ…ಪೇ… ರೂಪಂ ವಿಞ್ಞಾಣನ್ತಿ ಹೇವತ್ಥಿ… ವೇದನಾ… ಸಞ್ಞಾ … ಸಙ್ಖಾರಾ… ವಿಞ್ಞಾಣಂ ರೂಪನ್ತಿ ಹೇವತ್ಥಿ… ವಿಞ್ಞಾಣಂ ವೇದನಾತಿ ಹೇವತ್ಥಿ… ವಿಞ್ಞಾಣಂ ಸಞ್ಞಾತಿ ಹೇವತ್ಥಿ… ವಿಞ್ಞಾಣಂ ಸಙ್ಖಾರಾತಿ ಹೇವತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ತೇನ ಹಿ ರೂಪಂ ಹೇವತ್ಥಿ, ಹೇವ ನತ್ಥಿ; ವೇದನಾ… ಸಞ್ಞಾ… ಸಙ್ಖಾರಾ… ವಿಞ್ಞಾಣಂ ಹೇವತ್ಥಿ, ಹೇವ ನತ್ಥೀತಿ.

ಹೇವತ್ಥಿಕಥಾ ನಿಟ್ಠಿತಾ.

ತಸ್ಸುದ್ದಾನಂ –

ಉಪಲಬ್ಭೋ ಪರಿಹಾನಿ, ಬ್ರಹ್ಮಚರಿಯವಾಸೋ ಓಧಿಸೋ;

ಪರಿಞ್ಞಾ ಕಾಮರಾಗಪ್ಪಹಾನಂ, ಸಬ್ಬತ್ಥಿವಾದೋ ಆಯತನಂ;

ಅತೀತಾನಾಗತೋ ಸುಭಙ್ಗೋ [ಅತೀತಾನಾಗತೇಸು ಭಾಗೋ (ಸ್ಯಾ.)], ಸಬ್ಬೇ ಧಮ್ಮಾ ಸತಿಪಟ್ಠಾನಾ.

ಹೇವತ್ಥಿ ಹೇವ ನತ್ಥೀತಿ.

ಪಠಮವಗ್ಗೋ

ಮಹಾವಗ್ಗೋ.