೨. ಸುತ್ತಸಾಧನಂ

೨೯೮. ನ ವತ್ತಬ್ಬಂ – ‘‘ಅತೀತಾನಾಗತಾ ಖನ್ಧಾ ಧಾತು ಆಯತನಂ ನತ್ಥಿ ಚೇತೇ’’ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ತಯೋಮೇ, ಭಿಕ್ಖವೇ, ನಿರುತ್ತಿಪಥಾ ಅಧಿವಚನಪಥಾ ಪಞ್ಞತ್ತಿ…ಪೇ… ವಿಞ್ಞೂಹೀತಿ…ಪೇ…’’. ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ಅತೀತಾನಾಗತಾ ಖನ್ಧಾ ಧಾತು ಆಯತನಂ ನತ್ಥಿ ಚೇತೇ’’ತಿ.

ಅತೀತಾನಾಗತಾ ಖನ್ಧಾ ಧಾತು ಆಯತನಂ ನತ್ಥಿ ಚೇತೇತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಯಂ ಕಿಞ್ಚಿ, ಭಿಕ್ಖವೇ, ರೂಪಂ ಅತೀತಾನಾಗತಪಚ್ಚುಪ್ಪನ್ನಂ ಅಜ್ಝತ್ತಂ ವಾ ಬಹಿದ್ಧಾ ವಾ ಓಳಾರಿಕಂ ವಾ ಸುಖುಮಂ ವಾ ಹೀನಂ ವಾ ಪಣೀತಂ ವಾ ಯಂ ದೂರೇ ಸನ್ತಿಕೇ ವಾ, ಅಯಂ ವುಚ್ಚತಿ ರೂಪಕ್ಖನ್ಧೋ. ಯಾ ಕಾಚಿ ವೇದನಾ… ಯಾ ಕಾಚಿ ಸಞ್ಞಾ… ಯೇ ಕೇಚಿ ಸಙ್ಖಾರಾ… ಯಂ ಕಿಞ್ಚಿ ವಿಞ್ಞಾಣಂ ಅತೀತಾನಾಗತಪಚ್ಚುಪ್ಪನ್ನಂ…ಪೇ… ಅಯಂ ವುಚ್ಚತಿ ವಿಞ್ಞಾಣಕ್ಖನ್ಧೋ’’ತಿ. ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ಅತೀತಾನಾಗತಾ ಖನ್ಧಾ ಧಾತು ಆಯತನಂ ನತ್ಥಿ ಚೇತೇ’’ತಿ.

ಅತೀತಕ್ಖನ್ಧಾದಿಕಥಾ ನಿಟ್ಠಿತಾ.