೨. ಕಾಲಸಂಸನ್ದನಾ

೨೮೩. ಅತೀತಂ ಅತ್ಥೀತಿ? ಆಮನ್ತಾ. ನನು ಅತೀತಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತನ್ತಿ? ಆಮನ್ತಾ. ಹಞ್ಚಿ ಅತೀತಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತಂ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತಂ ಅತ್ಥೀ’’ತಿ.

ಅನಾಗತಂ ಅತ್ಥೀತಿ? ಆಮನ್ತಾ. ನನು ಅನಾಗತಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತನ್ತಿ? ಆಮನ್ತಾ. ಹಞ್ಚಿ ಅನಾಗತಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತಂ, ನೋ ಚ ವತ ರೇ ವತ್ತಬ್ಬೇ – ‘‘ಅನಾಗತಂ ಅತ್ಥೀ’’ತಿ.

ಪಚ್ಚುಪ್ಪನ್ನಂ ಅತ್ಥಿ ಪಚ್ಚುಪ್ಪನ್ನಂ ಅನಿರುದ್ಧಂ ಅವಿಗತಂ ಅವಿಪರಿಣತಂ ನ ಅತ್ಥಙ್ಗತಂ ನ ಅಬ್ಭತ್ಥಙ್ಗತನ್ತಿ? ಆಮನ್ತಾ. ಅತೀತಂ ಅತ್ಥಿ ಅತೀತಂ ಅನಿರುದ್ಧಂ ಅವಿಗತಂ ಅವಿಪರಿಣತಂ ನ ಅತ್ಥಙ್ಗತಂ ನ ಅಬ್ಭತ್ಥಙ್ಗತನ್ತಿ? ನ ಹೇವಂ ವತ್ತಬ್ಬೇ…ಪೇ… ಪಚ್ಚುಪ್ಪನ್ನಂ ಅತ್ಥಿ ಪಚ್ಚುಪ್ಪನ್ನಂ ಜಾತಂ ಭೂತಂ ಸಞ್ಜಾತಂ ನಿಬ್ಬತ್ತಂ ಅಭಿನಿಬ್ಬತ್ತಂ ಪಾತುಭೂತನ್ತಿ? ಆಮನ್ತಾ. ಅನಾಗತಂ ಅತ್ಥಿ ಅನಾಗತಂ ಜಾತಂ ಭೂತಂ ಸಞ್ಜಾತಂ ನಿಬ್ಬತ್ತಂ ಅಭಿನಿಬ್ಬತ್ತಂ ಪಾತುಭೂತನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಂ ಅತ್ಥಿ ಅತೀತಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತನ್ತಿ? ಆಮನ್ತಾ. ಪಚ್ಚುಪ್ಪನ್ನಂ ಅತ್ಥಿ ಪಚ್ಚುಪ್ಪನ್ನಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತನ್ತಿ? ನ ಹೇವಂ ವತ್ತಬ್ಬೇ…ಪೇ… ಅನಾಗತಂ ಅತ್ಥಿ ಅನಾಗತಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತನ್ತಿ? ಆಮನ್ತಾ. ಪಚ್ಚುಪ್ಪನ್ನಂ ಅತ್ಥಿ ಪಚ್ಚುಪ್ಪನ್ನಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತನ್ತಿ? ನ ಹೇವಂ ವತ್ತಬ್ಬೇ.

೨೮೪. ಅತೀತಂ ರೂಪಂ ಅತ್ಥೀತಿ? ಆಮನ್ತಾ. ನನು ಅತೀತಂ ರೂಪಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತನ್ತಿ? ಆಮನ್ತಾ. ಹಞ್ಚಿ ಅತೀತಂ ರೂಪಂ ನಿರುದ್ಧಂ…ಪೇ… ಅಬ್ಭತ್ಥಙ್ಗತಂ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತಂ ರೂಪಂ ಅತ್ಥೀ’’ತಿ.

ಅನಾಗತಂ ರೂಪಂ ಅತ್ಥೀತಿ? ಆಮನ್ತಾ. ನನು ಅನಾಗತಂ ರೂಪಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತನ್ತಿ? ಆಮನ್ತಾ. ಹಞ್ಚಿ ಅನಾಗತಂ ರೂಪಂ ಅಜಾತಂ…ಪೇ… ಅಪಾತುಭೂತಂ, ನೋ ಚ ವತ ರೇ ವತ್ತಬ್ಬೇ – ‘‘ಅನಾಗತಂ ರೂಪಂ ಅತ್ಥೀ’’ತಿ.

ಪಚ್ಚುಪ್ಪನ್ನಂ ರೂಪಂ ಅತ್ಥಿ ಪಚ್ಚುಪ್ಪನ್ನಂ ರೂಪಂ ಅನಿರುದ್ಧಂ ಅವಿಗತಂ ಅವಿಪರಿಣತಂ ನ ಅತ್ಥಙ್ಗತಂ ನ ಅಬ್ಭತ್ಥಙ್ಗತನ್ತಿ? ಆಮನ್ತಾ. ಅತೀತಂ ರೂಪಂ ಅತ್ಥಿ ಅತೀತಂ ರೂಪಂ ಅನಿರುದ್ಧಂ ಅವಿಗತಂ ಅವಿಪರಿಣತಂ ನ ಅತ್ಥಙ್ಗತಂ ನ ಅಬ್ಭತ್ಥಙ್ಗತನ್ತಿ? ನ ಹೇವಂ ವತ್ತಬ್ಬೇ.

ಪಚ್ಚುಪ್ಪನ್ನಂ ರೂಪಂ ಅತ್ಥಿ ಪಚ್ಚುಪ್ಪನ್ನಂ ರೂಪಂ ಜಾತಂ ಭೂತಂ ಸಞ್ಜಾತಂ ನಿಬ್ಬತ್ತಂ ಅಭಿನಿಬ್ಬತ್ತಂ ಪಾತುಭೂತನ್ತಿ? ಆಮನ್ತಾ. ಅನಾಗತಂ ರೂಪಂ ಅತ್ಥಿ ಅನಾಗತಂ ರೂಪಂ ಜಾತಂ ಭೂತಂ ಸಞ್ಜಾತಂ ನಿಬ್ಬತ್ತಂ ಅಭಿನಿಬ್ಬತ್ತಂ ಪಾತುಭೂತನ್ತಿ? ನ ಹೇವಂ ವತ್ತಬ್ಬೇ.

ಅತೀತಂ ರೂಪಂ ಅತ್ಥಿ ಅತೀತಂ ರೂಪಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತನ್ತಿ? ಆಮನ್ತಾ. ಪಚ್ಚುಪ್ಪನ್ನಂ ರೂಪಂ ಅತ್ಥಿ ಪಚ್ಚುಪ್ಪನ್ನಂ ರೂಪಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತನ್ತಿ? ನ ಹೇವಂ ವತ್ತಬ್ಬೇ.

ಅನಾಗತಂ ರೂಪಂ ಅತ್ಥಿ ಅನಾಗತಂ ರೂಪಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತನ್ತಿ? ಆಮನ್ತಾ. ಪಚ್ಚುಪ್ಪನ್ನಂ ರೂಪಂ ಅತ್ಥಿ ಪಚ್ಚುಪ್ಪನ್ನಂ ರೂಪಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತನ್ತಿ? ನ ಹೇವಂ ವತ್ತಬ್ಬೇ.

ಅತೀತಾ ವೇದನಾ ಅತ್ಥಿ…ಪೇ… ಸಞ್ಞಾ ಅತ್ಥಿ, ಸಙ್ಖಾರಾ ಅತ್ಥಿ, ವಿಞ್ಞಾಣಂ ಅತ್ಥೀತಿ? ಆಮನ್ತಾ. ನನು ಅತೀತಂ ವಿಞ್ಞಾಣಂ ನಿರುದ್ಧಂ ವಿಗತಂ ವಿಪರಿಣತಂ ಅತ್ಥಙ್ಗತಂ ಅಬ್ಭತ್ಥಙ್ಗತನ್ತಿ? ಆಮನ್ತಾ. ಹಞ್ಚಿ ಅತೀತಂ ವಿಞ್ಞಾಣಂ ನಿರುದ್ಧಂ…ಪೇ… ಅಬ್ಭತ್ಥಙ್ಗತಂ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತಂ ವಿಞ್ಞಾಣಂ ಅತ್ಥೀ’’ತಿ.

ಅನಾಗತಂ ವಿಞ್ಞಾಣಂ ಅತ್ಥೀತಿ? ಆಮನ್ತಾ. ನನು ಅನಾಗತಂ ವಿಞ್ಞಾಣಂ ಅಜಾತಂ ಅಭೂತಂ ಅಸಞ್ಜಾತಂ ಅನಿಬ್ಬತ್ತಂ ಅನಭಿನಿಬ್ಬತ್ತಂ ಅಪಾತುಭೂತನ್ತಿ? ಆಮನ್ತಾ. ಹಞ್ಚಿ ಅನಾಗತಂ ವಿಞ್ಞಾಣಂ ಅಜಾತಂ…ಪೇ… ಅಪಾತುಭೂತಂ, ನೋ ಚ ವತ ರೇ ವತ್ತಬ್ಬೇ – ‘‘ಅನಾಗತಂ ವಿಞ್ಞಾಣಂ ಅತ್ಥೀ’’ತಿ.

ಪಚ್ಚುಪ್ಪನ್ನಂ ವಿಞ್ಞಾಣಂ ಅತ್ಥಿ ಪಚ್ಚುಪ್ಪನ್ನಂ ವಿಞ್ಞಾಣಂ ಅನಿರುದ್ಧಂ…ಪೇ… ನ ಅಬ್ಭತ್ಥಙ್ಗತನ್ತಿ? ಆಮನ್ತಾ. ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ಅನಿರುದ್ಧಂ…ಪೇ… ನ ಅಬ್ಭತ್ಥಙ್ಗತನ್ತಿ? ನ ಹೇವಂ ವತ್ತಬ್ಬೇ.

ಪಚ್ಚುಪ್ಪನ್ನಂ ವಿಞ್ಞಾಣಂ ಅತ್ಥಿ ಪಚ್ಚುಪ್ಪನ್ನಂ ವಿಞ್ಞಾಣಂ ಜಾತಂ…ಪೇ… ಪಾತುಭೂತನ್ತಿ? ಆಮನ್ತಾ. ಅನಾಗತಂ ವಿಞ್ಞಾಣಂ ಅತ್ಥಿ ಅನಾಗತಂ ವಿಞ್ಞಾಣಂ ಜಾತಂ…ಪೇ… ಪಾತುಭೂತನ್ತಿ? ನ ಹೇವಂ ವತ್ತಬ್ಬೇ.

ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ನಿರುದ್ಧಂ…ಪೇ… ಅಬ್ಭತ್ಥಙ್ಗತನ್ತಿ? ಆಮನ್ತಾ. ಪಚ್ಚುಪ್ಪನ್ನಂ ವಿಞ್ಞಾಣಂ ಅತ್ಥಿ ಪಚ್ಚುಪ್ಪನ್ನಂ ವಿಞ್ಞಾಣಂ ನಿರುದ್ಧಂ…ಪೇ… ಅಬ್ಭತ್ಥಙ್ಗತನ್ತಿ? ನ ಹೇವಂ ವತ್ತಬ್ಬೇ. ಅನಾಗತಂ ವಿಞ್ಞಾಣಂ ಅತ್ಥಿ ಅನಾಗತಂ ವಿಞ್ಞಾಣಂ ಅಜಾತಂ…ಪೇ… ಅಪಾತುಭೂತನ್ತಿ? ಆಮನ್ತಾ.

ಪಚ್ಚುಪ್ಪನ್ನಂ ವಿಞ್ಞಾಣಂ ಅತ್ಥಿ ಪಚ್ಚುಪ್ಪನ್ನಂ ವಿಞ್ಞಾಣಂ ಅಜಾತಂ…ಪೇ… ಅಪಾತುಭೂತನ್ತಿ? ನ ಹೇವಂ ವತ್ತಬ್ಬೇ.

೨೮೫. ‘‘ಪಚ್ಚುಪ್ಪನ್ನನ್ತಿ ವಾ ರೂಪ’’ನ್ತಿ ವಾ, ‘‘ರೂಪನ್ತಿ ವಾ ಪಚ್ಚುಪ್ಪನ್ನ’’ನ್ತಿ ವಾ ಪಚ್ಚುಪ್ಪನ್ನಂ ರೂಪಂ ಅಪ್ಪಿಯಂ ಕರಿತ್ವಾ ಏಸೇಸೇ ಏಕಟ್ಠೇ ಸಮೇ ಸಮಭಾಗೇ ತಜ್ಜಾತೇತಿ? ಆಮನ್ತಾ. ಪಚ್ಚುಪ್ಪನ್ನಂ ರೂಪಂ ನಿರುಜ್ಝಮಾನಂ ಪಚ್ಚುಪ್ಪನ್ನಭಾವಂ ಜಹತೀತಿ? ಆಮನ್ತಾ. ರೂಪಭಾವಂ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ….

‘‘ಪಚ್ಚುಪ್ಪನ್ನನ್ತಿ ವಾ ರೂಪ’’ನ್ತಿ ವಾ, ‘‘ರೂಪನ್ತಿ ವಾ ಪಚ್ಚುಪ್ಪನ್ನ’’ನ್ತಿ ವಾ ಪಚ್ಚುಪ್ಪನ್ನಂ ರೂಪಂ ಅಪ್ಪಿಯಂ ಕರಿತ್ವಾ ಏಸೇಸೇ ಏಕಟ್ಠೇ ಸಮೇ ಸಮಭಾಗೇ ತಜ್ಜಾತೇತಿ? ಆಮನ್ತಾ. ಪಚ್ಚುಪ್ಪನ್ನಂ ರೂಪಂ ನಿರುಜ್ಝಮಾನಂ ರೂಪಭಾವಂ ನ ಜಹತೀತಿ? ಆಮನ್ತಾ. ಪಚ್ಚುಪ್ಪನ್ನಭಾವಂ ನ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ….

‘‘ಓದಾತನ್ತಿ ವಾ ವತ್ಥ’’ನ್ತಿ ವಾ, ‘‘ವತ್ಥನ್ತಿ ವಾ ಓದಾತ’’ನ್ತಿ ವಾ ಓದಾತಂ ವತ್ಥಂ ಅಪ್ಪಿಯಂ ಕರಿತ್ವಾ ಏಸೇಸೇ ಏಕಟ್ಠೇ ಸಮೇ ಸಮಭಾಗೇ ತಜ್ಜಾತೇತಿ? ಆಮನ್ತಾ. ಓದಾತಂ ವತ್ಥಂ ರಜ್ಜಮಾನಂ ಓದಾತಭಾವಂ ಜಹತೀತಿ? ಆಮನ್ತಾ. ವತ್ಥಭಾವಂ ಜಹತೀತಿ? ನ ಹೇವಂ ವತ್ತಬ್ಬೇ.

‘‘ಓದಾತನ್ತಿ ವಾ ವತ್ಥ’’ನ್ತಿ ವಾ, ‘‘ವತ್ಥನ್ತಿ ವಾ ಓದಾತ’’ನ್ತಿ ವಾ ಓದಾತಂ ವತ್ಥಂ ಅಪ್ಪಿಯಂ ಕರಿತ್ವಾ ಏಸೇಸೇ ಏಕಟ್ಠೇ ಸಮೇ ಸಮಭಾಗೇ ತಜ್ಜಾತೇತಿ? ಆಮನ್ತಾ. ಓದಾತಂ ವತ್ಥಂ ರಜ್ಜಮಾನಂ ವತ್ಥಭಾವಂ ನ ಜಹತೀತಿ? ಆಮನ್ತಾ. ಓದಾತಭಾವಂ ನ ಜಹತೀತಿ? ನ ಹೇವಂ ವತ್ತಬ್ಬೇ.…ಪೇ….

೨೮೬. ರೂಪಂ ರೂಪಭಾವಂ ನ ಜಹತೀತಿ? ಆಮನ್ತಾ. ರೂಪಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ. ನನು ರೂಪಂ ರೂಪಭಾವಂ ನ ಜಹತೀತಿ ರೂಪಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ಆಮನ್ತಾ. ಹಞ್ಚಿ ರೂಪಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮಂ, ನೋ ಚ ವತ ರೇ ವತ್ತಬ್ಬೇ – ‘‘ರೂಪಂ ರೂಪಭಾವಂ ನ ಜಹತೀ’’ತಿ.

ನಿಬ್ಬಾನಂ ನಿಬ್ಬಾನಭಾವಂ ನ ಜಹತೀತಿ ನಿಬ್ಬಾನಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ಆಮನ್ತಾ. ರೂಪಂ ರೂಪಭಾವಂ ನ ಜಹತೀತಿ [ನ ಜಹತಿ (ಸೀ. ಕ.)] ರೂಪಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ… ರೂಪಂ ರೂಪಭಾವಂ ನ ಜಹತಿ ರೂಪಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ಆಮನ್ತಾ. ನಿಬ್ಬಾನಂ ನಿಬ್ಬಾನಭಾವಂ ನ ಜಹತಿ ನಿಬ್ಬಾನಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಂ ಅತ್ಥಿ ಅತೀತಂ ಅತೀತಭಾವಂ ನ ಜಹತೀತಿ? ಆಮನ್ತಾ. ಅನಾಗತಂ ಅತ್ಥಿ ಅನಾಗತಂ ಅನಾಗತಭಾವಂ ನ ಜಹತೀತಿ? ನ ಹೇವಂ ವತ್ತಬ್ಬೇ. ಅತೀತಂ ಅತ್ಥಿ ಅತೀತಂ ಅತೀತಭಾವಂ ನ ಜಹತೀತಿ? ಆಮನ್ತಾ. ಪಚ್ಚುಪ್ಪನ್ನಂ ಅತ್ಥಿ ಪಚ್ಚುಪ್ಪನ್ನಂ ಪಚ್ಚುಪ್ಪನ್ನಭಾವಂ ನ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗತಂ ಅತ್ಥಿ ಅನಾಗತಂ ಅನಾಗತಭಾವಂ ಜಹತೀತಿ [ನ ಜಹತೀತಿ (ಬಹೂಸು) ಅಟ್ಠಕಥಾ ಓಲೋಕೇತಬ್ಬಾ]? ಆಮನ್ತಾ. ಅತೀತಂ ಅತ್ಥಿ ಅತೀತಂ ಅತೀತಭಾವಂ ಜಹತೀತಿ [ನ ಜಹತೀತಿ (ಬಹೂಸು) ಅಟ್ಠಕಥಾ ಓಲೋಕೇತಬ್ಬಾ]? ನ ಹೇವಂ ವತ್ತಬ್ಬೇ…ಪೇ….

ಪಚ್ಚುಪ್ಪನ್ನಂ ಅತ್ಥಿ ಪಚ್ಚುಪ್ಪನ್ನಂ ಪಚ್ಚುಪ್ಪನ್ನಭಾವಂ ಜಹತೀತಿ [ನ ಜಹತೀತಿ (ಬಹೂಸು) ಅಟ್ಠಕಥಾ ಓಲೋಕೇತಬ್ಬಾ]? ಆಮನ್ತಾ. ಅತೀತಂ ಅತ್ಥಿ ಅತೀತಂ ಅತೀತಭಾವಂ ಜಹತೀತಿ [ನ ಜಹತೀತಿ (ಬಹೂಸು) ಅಟ್ಠಕಥಾ ಓಲೋಕೇತಬ್ಬಾ]? ನ ಹೇವಂ ವತ್ತಬ್ಬೇ.

ಅತೀತಂ ಅತ್ಥಿ ಅತೀತಂ ಅತೀತಭಾವಂ ನ ಜಹತೀತಿ? ಆಮನ್ತಾ. ಅತೀತಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ… ನನು ಅತೀತಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ಆಮನ್ತಾ. ಹಞ್ಚಿ ಅತೀತಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮಂ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತಂ ಅತ್ಥಿ ಅತೀತಂ ಅತೀತಭಾವಂ ನ ಜಹತೀ’’ತಿ.

ನಿಬ್ಬಾನಂ ಅತ್ಥಿ ನಿಬ್ಬಾನಂ ನಿಬ್ಬಾನಭಾವಂ ನ ಜಹತೀತಿ ನಿಬ್ಬಾನಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ಆಮನ್ತಾ. ಅತೀತಂ ಅತ್ಥಿ ಅತೀತಂ ಅತೀತಭಾವಂ ನ ಜಹತೀತಿ ಅತೀತಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಂ ಅತ್ಥಿ ಅತೀತಂ ಅತೀತಭಾವಂ ನ ಜಹತಿ ಅತೀತಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ಆಮನ್ತಾ. ನಿಬ್ಬಾನಂ ಅತ್ಥಿ ನಿಬ್ಬಾನಂ ನಿಬ್ಬಾನಭಾವಂ ನ ಜಹತಿ ನಿಬ್ಬಾನಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ….

೨೮೭. ಅತೀತಂ ರೂಪಂ ಅತ್ಥಿ ಅತೀತಂ ರೂಪಂ ಅತೀತಭಾವಂ ನ ಜಹತೀತಿ? ಆಮನ್ತಾ. ಅನಾಗತಂ ರೂಪಂ ಅತ್ಥಿ ಅನಾಗತಂ ರೂಪಂ ಅನಾಗತಭಾವಂ ನ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತಂ ರೂಪಂ ಅತ್ಥಿ ಅತೀತಂ ರೂಪಂ ಅತೀತಭಾವಂ ನ ಜಹತೀತಿ? ಆಮನ್ತಾ. ಪಚ್ಚುಪ್ಪನ್ನಂ ರೂಪಂ ಅತ್ಥಿ ಪಚ್ಚುಪ್ಪನ್ನಂ ರೂಪಂ ಪಚ್ಚುಪ್ಪನ್ನಭಾವಂ ನ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗತಂ ರೂಪಂ ಅತ್ಥಿ ಅನಾಗತಂ ರೂಪಂ ಅನಾಗತಭಾವಂ ಜಹತೀತಿ [ನ ಜಹತೀತಿ (ಬಹೂಸು) ಅನುಲೋಮಪಞ್ಹೋಯೇವ]? ಆಮನ್ತಾ. ಅತೀತಂ ರೂಪಂ ಅತ್ಥಿ ಅತೀತಂ ರೂಪಂ ಅತೀತಭಾವಂ ಜಹತೀತಿ [ನ ಜಹತೀತಿ (ಬಹೂಸು) ಅನುಲೋಮಪಞ್ಹೋಯೇವ]? ನ ಹೇವಂ ವತ್ತಬ್ಬೇ…ಪೇ….

ಪಚ್ಚುಪ್ಪನ್ನಂ ರೂಪಂ ಅತ್ಥಿ ಪಚ್ಚುಪ್ಪನ್ನಂ ರೂಪಂ ಪಚ್ಚುಪ್ಪನ್ನಭಾವಂ ಜಹತೀತಿ [ನ ಜಹತೀತಿ (ಬಹೂಸು) ಅನುಲೋಮಪಞ್ಹೋಯೇವ]? ಆಮನ್ತಾ. ಅತೀತಂ ರೂಪಂ ಅತ್ಥಿ ಅತೀತಂ ರೂಪಂ ಅತೀತಭಾವಂ ಜಹತೀತಿ [ನ ಜಹತೀತಿ (ಬಹೂಸು) ಅನುಲೋಮಪಞ್ಹೋಯೇವ]? ನ ಹೇವಂ ವತ್ತಬ್ಬೇ…ಪೇ….

ಅತೀತಂ ರೂಪಂ ಅತ್ಥಿ ಅತೀತಂ ರೂಪಂ ಅತೀತಭಾವಂ ನ ಜಹತೀತಿ? ಆಮನ್ತಾ. ಅತೀತಂ ರೂಪಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ… ನನು ಅತೀತಂ ರೂಪಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ಆಮನ್ತಾ. ಹಞ್ಚಿ ಅತೀತಂ ರೂಪಂ ಅನಿಚ್ಚಂ…ಪೇ… ವಿಪರಿಣಾಮಧಮ್ಮಂ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತಂ ರೂಪಂ ಅತ್ಥಿ ಅತೀತಂ ರೂಪಂ ಅತೀತಭಾವಂ ನ ಜಹತೀ’’ತಿ.

ನಿಬ್ಬಾನಂ ಅತ್ಥಿ ನಿಬ್ಬಾನಂ ನಿಬ್ಬಾನಭಾವಂ ನ ಜಹತಿ [ನ ಜಹತೀತಿ (?) ಪುರಿಮಪಞ್ಹೇಹಿ ಸಂಸನ್ದೇತಬ್ಬಂ] ನಿಬ್ಬಾನಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ಆಮನ್ತಾ. ಅತೀತಂ ರೂಪಂ ಅತ್ಥಿ ಅತೀತಂ ರೂಪಂ ಅತೀತಭಾವಂ ನ ಜಹತಿ [ನ ಜಹತೀತಿ (?) ಪುರಿಮಞ್ಹೇಹಿ ಸಂಸನ್ದೇತಬ್ಬಂ] ಅತೀತಂ ರೂಪಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಂ ರೂಪಂ ಅತ್ಥಿ ಅತೀತಂ ರೂಪಂ ಅತೀತಭಾವಂ ನ ಜಹತಿ ಅತೀತಂ ರೂಪಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ಆಮನ್ತಾ. ನಿಬ್ಬಾನಂ ಅತ್ಥಿ ನಿಬ್ಬಾನಂ ನಿಬ್ಬಾನಭಾವಂ ನ ಜಹತಿ ನಿಬ್ಬಾನಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಾ ವೇದನಾ ಅತ್ಥಿ… ಅತೀತಾ ಸಞ್ಞಾ ಅತ್ಥಿ… ಅತೀತಾ ಸಙ್ಖಾರಾ ಅತ್ಥಿ… ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ಅತೀತಭಾವಂ ನ ಜಹತೀತಿ? ಆಮನ್ತಾ. ಅನಾಗತಂ ವಿಞ್ಞಾಣಂ ಅತ್ಥಿ ಅನಾಗತಂ ವಿಞ್ಞಾಣಂ ಅನಾಗತಭಾವಂ ನ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ಅತೀತಭಾವಂ ನ ಜಹತೀತಿ? ಆಮನ್ತಾ. ಪಚ್ಚುಪ್ಪನ್ನಂ ವಿಞ್ಞಾಣಂ ಅತ್ಥಿ ಪಚ್ಚುಪ್ಪನ್ನಂ ವಿಞ್ಞಾಣಂ ಪಚ್ಚುಪ್ಪನ್ನಭಾವಂ ನ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗತಂ ವಿಞ್ಞಾಣಂ ಅತ್ಥಿ ಅನಾಗತಂ ವಿಞ್ಞಾಣಂ ಅನಾಗತಭಾವಂ ಜಹತೀತಿ? ಆಮನ್ತಾ. ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ಅತೀತಭಾವಂ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ….

ಪಚ್ಚುಪ್ಪನ್ನಂ ವಿಞ್ಞಾಣಂ ಅತ್ಥಿ ಪಚ್ಚುಪ್ಪನ್ನಂ ವಿಞ್ಞಾಣಂ ಪಚ್ಚುಪ್ಪನ್ನಭಾವಂ ಜಹತೀತಿ [ನ ಜಹತೀತಿ (ಬಹೂಸು) ಅನುಲೋಮಪಞ್ಹೋಯೇವ]? ಆಮನ್ತಾ. ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ಅತೀತಭಾವಂ ಜಹತೀತಿ [ನ ಜಹತೀತಿ (ಬಹೂಸು) ಅನುಲೋಮಪಞ್ಹೋಯೇವ]? ನ ಹೇವಂ ವತ್ತಬ್ಬೇ…ಪೇ….

ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ಅತೀತಭಾವಂ ನ ಜಹತೀತಿ? ಆಮನ್ತಾ. ಅತೀತಂ ವಿಞ್ಞಾಣಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ… ನನು ಅತೀತಂ ವಿಞ್ಞಾಣಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ಆಮನ್ತಾ. ಹಞ್ಚಿ ಅತೀತಂ ವಿಞ್ಞಾಣಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮಂ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ಅತೀತಭಾವಂ ನ ಜಹತೀ’’ತಿ.

ನಿಬ್ಬಾನಂ ಅತ್ಥಿ ನಿಬ್ಬಾನಂ ನಿಬ್ಬಾನಭಾವಂ ನ ಜಹತಿ [ನ ಜಹತೀತಿ (?) ಪುರಿಮಪಞ್ಹೇಹಿ ಸಂಸನ್ದೇತಬ್ಬಂ] ನಿಬ್ಬಾನಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ಆಮನ್ತಾ. ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ಅತೀತಭಾವಂ ನ ಜಹತಿ [ನ ಜಹತೀತಿ (?) ಪುರಿಮಪಞ್ಹೇಹಿ ಸಂಸನ್ದೇತಬ್ಬಂ] ಅತೀತಂ ವಿಞ್ಞಾಣಂ ನಿಚ್ಚಂ ಧುವಂ ಸಸ್ಸತಂ ಅವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಂ ವಿಞ್ಞಾಣಂ ಅತ್ಥಿ ಅತೀತಂ ವಿಞ್ಞಾಣಂ ಅತೀತಭಾವಂ ನ ಜಹತಿ ಅತೀತಂ ವಿಞ್ಞಾಣಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ಆಮನ್ತಾ. ನಿಬ್ಬಾನಂ ಅತ್ಥಿ ನಿಬ್ಬಾನಂ ನಿಬ್ಬಾನಭಾವಂ ನ ಜಹತಿ ನಿಬ್ಬಾನಂ ಅನಿಚ್ಚಂ ಅಧುವಂ ಅಸಸ್ಸತಂ ವಿಪರಿಣಾಮಧಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ….

ವಚನಸೋಧನಾ

೨೮೮. ಅತೀತಂ ನ್ವತ್ಥೀತಿ? ಆಮನ್ತಾ. ಹಞ್ಚಿ ಅತೀತಂ ನ್ವತ್ಥಿ, ಅತೀತಂ ಅತ್ಥೀತಿ ಮಿಚ್ಛಾ. ಹಞ್ಚಿ ವಾ ಪನ ಅತ್ಥಿ ನ್ವಾತೀತಂ, ಅತ್ಥಿ ಅತೀತನ್ತಿ ಮಿಚ್ಛಾ. ಅನಾಗತಂ ನ್ವತ್ಥೀತಿ? ಆಮನ್ತಾ. ಹಞ್ಚಿ ಅನಾಗತಂ ನ್ವತ್ಥಿ, ಅನಾಗತಂ ಅತ್ಥೀತಿ ಮಿಚ್ಛಾ. ಹಞ್ಚಿ ವಾ ಪನ ಅತ್ಥಿ ನ್ವಾನಾಗತಂ, ಅತ್ಥಿ ಅನಾಗತನ್ತಿ ಮಿಚ್ಛಾ.

ಅನಾಗತಂ ಹುತ್ವಾ ಪಚ್ಚುಪ್ಪನ್ನಂ ಹೋತೀತಿ? ಆಮನ್ತಾ. ತಞ್ಞೇವ ಅನಾಗತಂ ತಂ ಪಚ್ಚುಪ್ಪನ್ನನ್ತಿ? ನ ಹೇವಂ ವತ್ತಬ್ಬೇ…ಪೇ… ತಞ್ಞೇವ ಅನಾಗತಂ ತಂ ಪಚ್ಚುಪ್ಪನ್ನನ್ತಿ? ಆಮನ್ತಾ. ಹುತ್ವಾ ಹೋತಿ ಹುತ್ವಾ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ… ಹುತ್ವಾ ಹೋತಿ ಹುತ್ವಾ ಹೋತೀತಿ? ಆಮನ್ತಾ. ನ ಹುತ್ವಾ ನ ಹೋತಿ ನ ಹುತ್ವಾ ನ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಪಚ್ಚುಪ್ಪನ್ನಂ ಹುತ್ವಾ ಅತೀತಂ ಹೋತೀತಿ? ಆಮನ್ತಾ. ತಞ್ಞೇವ ಪಚ್ಚುಪ್ಪನ್ನಂ ತಂ ಅತೀತನ್ತಿ? ನ ಹೇವಂ ವತ್ತಬ್ಬೇ…ಪೇ… ತಞ್ಞೇವ ಪಚ್ಚುಪ್ಪನ್ನಂ ತಂ ಅತೀತನ್ತಿ? ಆಮನ್ತಾ. ಹುತ್ವಾ ಹೋತಿ ಹುತ್ವಾ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ… ಹುತ್ವಾ ಹೋತಿ ಹುತ್ವಾ ಹೋತೀತಿ? ಆಮನ್ತಾ. ನ ಹುತ್ವಾ ನ ಹೋತಿ ನ ಹುತ್ವಾ ನ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗತಂ ಹುತ್ವಾ ಪಚ್ಚುಪ್ಪನ್ನಂ ಹೋತಿ, ಪಚ್ಚುಪ್ಪನ್ನಂ ಹುತ್ವಾ ಅತೀತಂ ಹೋತೀತಿ? ಆಮನ್ತಾ. ತಞ್ಞೇವ ಅನಾಗತಂ ತಂ ಪಚ್ಚುಪ್ಪನ್ನಂ ತಂ ಅತೀತನ್ತಿ? ನ ಹೇವಂ ವತ್ತಬ್ಬೇ…ಪೇ… ತಞ್ಞೇವ ಅನಾಗತಂ ತಂ ಪಚ್ಚುಪ್ಪನ್ನಂ ತಂ ಅತೀತನ್ತಿ? ಆಮನ್ತಾ. ಹುತ್ವಾ ಹೋತಿ ಹುತ್ವಾ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ… ಹುತ್ವಾ ಹೋತಿ ಹುತ್ವಾ ಹೋತೀತಿ? ಆಮನ್ತಾ. ನ ಹುತ್ವಾ ನ ಹೋತಿ ನ ಹುತ್ವಾ ನ ಹೋತೀತಿ? ನ ಹೇವಂ ವತ್ತಬ್ಬೇ.

ಅತೀತಚಕ್ಖುರೂಪಾದಿಕಥಾ

೨೮೯. ಅತೀತಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥೀತಿ? ಆಮನ್ತಾ. ಅತೀತೇನ ಚಕ್ಖುನಾ ಅತೀತಂ ರೂಪಂ ಪಸ್ಸತೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತಂ ಸೋತಂ ಅತ್ಥಿ ಸದ್ದಾ ಅತ್ಥಿ ಸೋತವಿಞ್ಞಾಣಂ ಅತ್ಥಿ ಆಕಾಸೋ ಅತ್ಥಿ ಮನಸಿಕಾರೋ ಅತ್ಥೀತಿ? ಆಮನ್ತಾ. ಅತೀತೇನ ಸೋತೇನ ಅತೀತಂ ಸದ್ದಂ ಸುಣಾತೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತಂ ಘಾನಂ ಅತ್ಥಿ ಗನ್ಧಾ ಅತ್ಥಿ ಘಾನವಿಞ್ಞಾಣಂ ಅತ್ಥಿ ವಾಯೋ ಅತ್ಥಿ ಮನಸಿಕಾರೋ ಅತ್ಥೀತಿ? ಆಮನ್ತಾ. ಅತೀತೇನ ಘಾನೇನ ಅತೀತಂ ಗನ್ಧಂ ಘಾಯತೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತಾ ಜಿವ್ಹಾ ಅತ್ಥಿ ರಸಾ ಅತ್ಥಿ ಜಿವ್ಹಾವಿಞ್ಞಾಣಂ ಅತ್ಥಿ ಆಪೋ ಅತ್ಥಿ ಮನಸಿಕಾರೋ ಅತ್ಥೀತಿ? ಆಮನ್ತಾ. ಅತೀತಾಯ ಜಿವ್ಹಾಯ ಅತೀತಂ ರಸಂ ಸಾಯತೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತೋ ಕಾಯೋ ಅತ್ಥಿ ಫೋಟ್ಠಬ್ಬಾ ಅತ್ಥಿ ಕಾಯವಿಞ್ಞಾಣಂ ಅತ್ಥಿ ಪಥವೀ ಅತ್ಥಿ ಮನಸಿಕಾರೋ ಅತ್ಥೀತಿ? ಆಮನ್ತಾ. ಅತೀತೇನ ಕಾಯೇನ ಅತೀತಂ ಫೋಟ್ಠಬ್ಬಂ ಫುಸತೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತೋ ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥೀತಿ? ಆಮನ್ತಾ. ಅತೀತೇನ ಮನೇನ ಅತೀತಂ ಧಮ್ಮಂ ವಿಜಾನಾತೀತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗತಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥೀತಿ? ಆಮನ್ತಾ. ಅನಾಗತೇನ ಚಕ್ಖುನಾ ಅನಾಗತಂ ರೂಪಂ ಪಸ್ಸತೀತಿ? ನ ಹೇವಂ ವತ್ತಬ್ಬೇ…ಪೇ… ಅನಾಗತಂ ಸೋತಂ ಅತ್ಥಿ… ಘಾನಂ ಅತ್ಥಿ… ಜಿವ್ಹಾ ಅತ್ಥಿ… ಕಾಯೋ ಅತ್ಥಿ … ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥೀತಿ? ಆಮನ್ತಾ. ಅನಾಗತೇನ ಮನೇನ ಅನಾಗತಂ ಧಮ್ಮಂ ವಿಜಾನಾತೀತಿ? ನ ಹೇವಂ ವತ್ತಬ್ಬೇ…ಪೇ….

ಪಚ್ಚುಪ್ಪನ್ನಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥಿ, ಪಚ್ಚುಪ್ಪನ್ನೇನ ಚಕ್ಖುನಾ ಪಚ್ಚುಪ್ಪನ್ನಂ ರೂಪಂ ಪಸ್ಸತೀತಿ? ಆಮನ್ತಾ. ಅತೀತಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥಿ, ಅತೀತೇನ ಚಕ್ಖುನಾ ಅತೀತಂ ರೂಪಂ ಪಸ್ಸತೀತಿ? ನ ಹೇವಂ ವತ್ತಬ್ಬೇ…ಪೇ…. ಪಚ್ಚುಪ್ಪನ್ನಂ ಸೋತಂ ಅತ್ಥಿ… ಘಾನಂ ಅತ್ಥಿ… ಜಿವ್ಹಾ ಅತ್ಥಿ… ಕಾಯೋ ಅತ್ಥಿ… ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥಿ, ಪಚ್ಚುಪ್ಪನ್ನೇನ ಮನೇನ ಪಚ್ಚುಪ್ಪನ್ನಂ ಧಮ್ಮಂ ವಿಜಾನಾತೀತಿ? ಆಮನ್ತಾ. ಅತೀತೋ ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥಿ, ಅತೀತೇನ ಮನೇನ ಅತೀತಂ ಧಮ್ಮಂ ವಿಜಾನಾತೀತಿ? ನ ಹೇವಂ ವತ್ತಬ್ಬೇ…ಪೇ….

ಪಚ್ಚುಪ್ಪನ್ನಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥಿ, ಪಚ್ಚುಪ್ಪನ್ನೇನ ಚಕ್ಖುನಾ ಪಚ್ಚುಪ್ಪನ್ನಂ ರೂಪಂ ಪಸ್ಸತೀತಿ? ಆಮನ್ತಾ. ಅನಾಗತಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥಿ, ಅನಾಗತೇನ ಚಕ್ಖುನಾ ಅನಾಗತಂ ರೂಪಂ ಪಸ್ಸತೀತಿ? ನ ಹೇವಂ ವತ್ತಬ್ಬೇ…ಪೇ… ಪಚ್ಚುಪ್ಪನ್ನಂ ಸೋತಂ ಅತ್ಥಿ… ಘಾನಂ ಅತ್ಥಿ… ಜಿವ್ಹಾ ಅತ್ಥಿ… ಕಾಯೋ ಅತ್ಥಿ… ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥಿ, ಪಚ್ಚುಪ್ಪನ್ನೇನ ಮನೇನ ಪಚ್ಚುಪ್ಪನ್ನಂ ಧಮ್ಮಂ ವಿಜಾನಾತೀತಿ? ಆಮನ್ತಾ. ಅನಾಗತೋ ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥಿ, ಅನಾಗತೇನ ಮನೇನ ಅನಾಗತಂ ಧಮ್ಮಂ ವಿಜಾನಾತೀತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥಿ, ನ ಚ ಅತೀತೇನ ಚಕ್ಖುನಾ ಅತೀತಂ ರೂಪಂ ಪಸ್ಸತೀತಿ? ಆಮನ್ತಾ. ಪಚ್ಚುಪ್ಪನ್ನಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥಿ, ನ ಚ ಪಚ್ಚುಪ್ಪನ್ನೇನ ಚಕ್ಖುನಾ ಪಚ್ಚುಪ್ಪನ್ನಂ ರೂಪಂ ಪಸ್ಸತೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತಂ ಸೋತಂ ಅತ್ಥಿ… ಘಾನಂ ಅತ್ಥಿ… ಜಿವ್ಹಾ ಅತ್ಥಿ… ಕಾಯೋ ಅತ್ಥಿ… ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥಿ, ನ ಚ ಅತೀತೇನ ಮನೇನ ಅತೀತಂ ಧಮ್ಮಂ ವಿಜಾನಾತೀತಿ? ಆಮನ್ತಾ. ಪಚ್ಚುಪ್ಪನ್ನೋ ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥಿ, ನ ಚ ಪಚ್ಚುಪ್ಪನ್ನೇನ ಮನೇನ ಪಚ್ಚುಪ್ಪನ್ನಂ ಧಮ್ಮಂ ವಿಜಾನಾತೀತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗತಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥಿ, ನ ಚ ಅನಾಗತೇನ ಚಕ್ಖುನಾ ಅನಾಗತಂ ರೂಪಂ ಪಸ್ಸತೀತಿ? ಆಮನ್ತಾ. ಪಚ್ಚುಪ್ಪನ್ನಂ ಚಕ್ಖುಂ ಅತ್ಥಿ ರೂಪಾ ಅತ್ಥಿ ಚಕ್ಖುವಿಞ್ಞಾಣಂ ಅತ್ಥಿ ಆಲೋಕೋ ಅತ್ಥಿ ಮನಸಿಕಾರೋ ಅತ್ಥಿ, ನ ಚ ಪಚ್ಚುಪ್ಪನ್ನೇನ ಚಕ್ಖುನಾ ಪಚ್ಚುಪ್ಪನ್ನಂ ರೂಪಂ ಪಸ್ಸತೀತಿ? ನ ಹೇವಂ ವತ್ತಬ್ಬೇ…ಪೇ… ಅನಾಗತಂ ಸೋತಂ ಅತ್ಥಿ… ಘಾನಂ ಅತ್ಥಿ… ಜಿವ್ಹಾ ಅತ್ಥಿ… ಕಾಯೋ ಅತ್ಥಿ… ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥಿ, ನ ಚ ಅನಾಗತೇನ ಮನೇನ ಅನಾಗತಂ ಧಮ್ಮಂ ವಿಜಾನಾತೀತಿ? ಆಮನ್ತಾ. ಪಚ್ಚುಪ್ಪನ್ನೋ ಮನೋ ಅತ್ಥಿ ಧಮ್ಮಾ ಅತ್ಥಿ ಮನೋವಿಞ್ಞಾಣಂ ಅತ್ಥಿ ವತ್ಥುಂ ಅತ್ಥಿ ಮನಸಿಕಾರೋ ಅತ್ಥಿ, ನ ಚ ಪಚ್ಚುಪ್ಪನ್ನೇನ ಮನೇನ ಪಚ್ಚುಪ್ಪನ್ನಂ ಧಮ್ಮಂ ವಿಜಾನಾತೀತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಞಾಣಾದಿಕಥಾ

೨೯೦. ಅತೀತಂ ಞಾಣಂ ಅತ್ಥೀತಿ? ಆಮನ್ತಾ. ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ… ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ಆಮನ್ತಾ. ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗತಂ ಞಾಣಂ ಅತ್ಥೀತಿ? ಆಮನ್ತಾ. ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ… ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ಆಮನ್ತಾ. ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ನ ಹೇವಂ ವತ್ತಬ್ಬೇ…ಪೇ….

ಪಚ್ಚುಪ್ಪನ್ನಂ ಞಾಣಂ ಅತ್ಥಿ, ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ಆಮನ್ತಾ. ಅತೀತಂ ಞಾಣಂ ಅತ್ಥಿ, ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ… ಪಚ್ಚುಪ್ಪನ್ನಂ ಞಾಣಂ ಅತ್ಥಿ, ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ಆಮನ್ತಾ. ಅತೀತಂ ಞಾಣಂ ಅತ್ಥಿ, ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ನ ಹೇವಂ ವತ್ತಬ್ಬೇ…ಪೇ… ಪಚ್ಚುಪ್ಪನ್ನಂ ಞಾಣಂ ಅತ್ಥಿ, ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ಆಮನ್ತಾ. ಅನಾಗತಂ ಞಾಣಂ ಅತ್ಥಿ, ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ… ಪಚ್ಚುಪ್ಪನ್ನಂ ಞಾಣಂ ಅತ್ಥಿ, ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ಆಮನ್ತಾ. ಅನಾಗತಂ ಞಾಣಂ ಅತ್ಥಿ, ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಂ ಞಾಣಂ ಅತ್ಥಿ, ನ ಚ ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ಆಮನ್ತಾ. ಪಚ್ಚುಪ್ಪನ್ನಂ ಞಾಣಂ ಅತ್ಥಿ, ನ ಚ ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತಂ ಞಾಣಂ ಅತ್ಥಿ, ನ ಚ ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ಆಮನ್ತಾ. ಪಚ್ಚುಪ್ಪನ್ನಂ ಞಾಣಂ ಅತ್ಥಿ, ನ ಚ ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗತಂ ಞಾಣಂ ಅತ್ಥಿ, ನ ಚ ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ಆಮನ್ತಾ. ಪಚ್ಚುಪ್ಪನ್ನಂ ಞಾಣಂ ಅತ್ಥಿ, ನ ಚ ತೇನ ಞಾಣೇನ ಞಾಣಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ…. ಅನಾಗತಂ ಞಾಣಂ ಅತ್ಥಿ, ನ ಚ ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ಆಮನ್ತಾ. ಪಚ್ಚುಪ್ಪನ್ನಂ ಞಾಣಂ ಅತ್ಥಿ, ನ ಚ ತೇನ ಞಾಣೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ನ ಹೇವಂ ವತ್ತಬ್ಬೇ…ಪೇ….

ಅರಹನ್ತಾದಿಕಥಾ

೨೯೧. ಅರಹತೋ ಅತೀತೋ ರಾಗೋ ಅತ್ಥೀತಿ? ಆಮನ್ತಾ. ಅರಹಾ ತೇನ ರಾಗೇನ ಸರಾಗೋತಿ? ನ ಹೇವಂ ವತ್ತಬ್ಬೇ…ಪೇ… ಅರಹತೋ ಅತೀತೋ ದೋಸೋ ಅತ್ಥೀತಿ? ಆಮನ್ತಾ. ಅರಹಾ ತೇನ ದೋಸೇನ ಸದೋಸೋತಿ? ನ ಹೇವಂ ವತ್ತಬ್ಬೇ…ಪೇ… ಅರಹತೋ ಅತೀತೋ ಮೋಹೋ ಅತ್ಥೀತಿ? ಆಮನ್ತಾ. ಅರಹಾ ತೇನ ಮೋಹೇನ ಸಮೋಹೋತಿ? ನ ಹೇವಂ ವತ್ತಬ್ಬೇ…ಪೇ… ಅರಹತೋ ಅತೀತೋ ಮಾನೋ ಅತ್ಥೀತಿ? ಆಮನ್ತಾ. ಅರಹಾ ತೇನ ಮಾನೇನ ಸಮಾನೋತಿ? ನ ಹೇವಂ ವತ್ತಬ್ಬೇ…ಪೇ… ಅರಹತೋ ಅತೀತಾ ದಿಟ್ಠಿ ಅತ್ಥೀತಿ? ಆಮನ್ತಾ. ಅರಹಾ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ… ಅರಹತೋ ಅತೀತಾ ವಿಚಿಕಿಚ್ಛಾ ಅತ್ಥೀತಿ? ಆಮನ್ತಾ. ಅರಹಾ ತಾಯ ವಿಚಿಕಿಚ್ಛಾಯ ಸವಿಚಿಕಿಚ್ಛೋತಿ? ನ ಹೇವಂ ವತ್ತಬ್ಬೇ…ಪೇ… ಅರಹತೋ ಅತೀತಂ ಥಿನಂ ಅತ್ಥೀತಿ? ಆಮನ್ತಾ. ಅರಹಾ ತೇನ ಥಿನೇನ ಸಥಿನೋತಿ? ನ ಹೇವಂ ವತ್ತಬ್ಬೇ…ಪೇ… ಅರಹತೋ ಅತೀತಂ ಉದ್ಧಚ್ಚಂ ಅತ್ಥೀತಿ? ಆಮನ್ತಾ. ಅರಹಾ ತೇನ ಉದ್ಧಚ್ಚೇನ ಸಉದ್ಧಚ್ಚೋತಿ? ನ ಹೇವಂ ವತ್ತಬ್ಬೇ…ಪೇ… ಅರಹತೋ ಅತೀತಂ ಅಹಿರಿಕಂ ಅತ್ಥೀತಿ? ಆಮನ್ತಾ. ಅರಹಾ ತೇನ ಅಹಿರಿಕೇನ ಸಅಹಿರಿಕೋತಿ? ನ ಹೇವಂ ವತ್ತಬ್ಬೇ…ಪೇ… ಅರಹತೋ ಅತೀತಂ ಅನೋತ್ತಪ್ಪಂ ಅತ್ಥೀತಿ? ಆಮನ್ತಾ. ಅರಹಾ ತೇನ ಅನೋತ್ತಪ್ಪೇನ ಸಅನೋತ್ತಪ್ಪೀತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗಾಮಿಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥೀತಿ? ಆಮನ್ತಾ. ಅನಾಗಾಮೀ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ… ಅನಾಗಾಮಿಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ… ಅತೀತೋ ಸೀಲಬ್ಬತಪರಾಮಾಸೋ ಅತ್ಥಿ… ಅತೀತೋ ಅಣುಸಹಗತೋ ಕಾಮರಾಗೋ ಅತ್ಥಿ… ಅತೀತೋ ಅಣುಸಹಗತೋ ಬ್ಯಾಪಾದೋ ಅತ್ಥೀತಿ? ಆಮನ್ತಾ. ಅನಾಗಾಮೀ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

ಸಕದಾಗಾಮಿಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥೀತಿ? ಆಮನ್ತಾ. ಸಕದಾಗಾಮೀ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ… ಸಕದಾಗಾಮಿಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ… ಅತೀತೋ ಸೀಲಬ್ಬತಪರಾಮಾಸೋ ಅತ್ಥಿ… ಅತೀತೋ ಓಳಾರಿಕೋ ಕಾಮರಾಗೋ ಅತ್ಥಿ… ಅತೀತೋ ಓಳಾರಿಕೋ ಬ್ಯಾಪಾದೋ ಅತ್ಥೀತಿ? ಆಮನ್ತಾ. ಸಕದಾಗಾಮೀ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

ಸೋತಾಪನ್ನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥೀತಿ? ಆಮನ್ತಾ. ಸೋತಾಪನ್ನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ… ಸೋತಾಪನ್ನಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ… ಅತೀತೋ ಸೀಲಬ್ಬತಪರಾಮಾಸೋ ಅತ್ಥಿ… ಅತೀತೋ ಅಪಾಯಗಮನೀಯೋ ರಾಗೋ ಅತ್ಥಿ… ಅತೀತೋ ಅಪಾಯಗಮನೀಯೋ ದೋಸೋ ಅತ್ಥಿ… ಅತೀತೋ ಅಪಾಯಗಮನೀಯೋ ಮೋಹೋ ಅತ್ಥೀತಿ? ಆಮನ್ತಾ. ಸೋತಾಪನ್ನೋ ತೇನ ಮೋಹೇನ ಸಮೋಹೋತಿ? ನ ಹೇವಂ ವತ್ತಬ್ಬೇ…ಪೇ….

೨೯೨. ಪುಥುಜ್ಜನಸ್ಸ ಅತೀತೋ ರಾಗೋ ಅತ್ಥಿ, ಪುಥುಜ್ಜನೋ ತೇನ ರಾಗೇನ ಸರಾಗೋತಿ? ಆಮನ್ತಾ. ಅರಹತೋ ಅತೀತೋ ರಾಗೋ ಅತ್ಥಿ, ಅರಹಾ ತೇನ ರಾಗೇನ ಸರಾಗೋತಿ? ನ ಹೇವಂ ವತ್ತಬ್ಬೇ…ಪೇ… ಪುಥುಜ್ಜನಸ್ಸ ಅತೀತೋ ದೋಸೋ ಅತ್ಥಿ…ಪೇ… ಅತೀತಂ ಅನೋತ್ತಪ್ಪಂ ಅತ್ಥಿ ಪುಥುಜ್ಜನೋ ತೇನ ಅನೋತ್ತಪ್ಪೇನ ಅನೋತ್ತಪ್ಪೀತಿ? ಆಮನ್ತಾ. ಅರಹತೋ ಅತೀತಂ ಅನೋತ್ತಪ್ಪಂ ಅತ್ಥಿ, ಅರಹಾ ತೇನ ಅನೋತ್ತಪ್ಪೇನ ಅನೋತ್ತಪ್ಪೀತಿ? ನ ಹೇವಂ ವತ್ತಬ್ಬೇ…ಪೇ….

ಪುಥುಜ್ಜನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ಪುಥುಜ್ಜನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ಆಮನ್ತಾ. ಅನಾಗಾಮಿಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ಅನಾಗಾಮೀ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ… ಪುಥುಜ್ಜನಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ…ಪೇ… ಅತೀತೋ ಅಣುಸಹಗತೋ ಬ್ಯಾಪಾದೋ ಅತ್ಥಿ, ಪುಥುಜ್ಜನೋ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ಆಮನ್ತಾ. ಅನಾಗಾಮಿಸ್ಸ ಅತೀತೋ ಅಣುಸಹಗತೋ ಬ್ಯಾಪಾದೋ ಅತ್ಥಿ, ಅನಾಗಾಮೀ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

ಪುಥುಜ್ಜನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ಪುಥುಜ್ಜನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ಆಮನ್ತಾ. ಸಕದಾಗಾಮಿಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ಸಕದಾಗಾಮೀ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ… ಪುಥುಜ್ಜನಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ… ಅತೀತೋ ಓಳಾರಿಕೋ ಬ್ಯಾಪಾದೋ ಅತ್ಥಿ, ಪುಥುಜ್ಜನೋ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ಆಮನ್ತಾ. ಸಕದಾಗಾಮಿಸ್ಸ ಅತೀತೋ ಓಳಾರಿಕೋ ಬ್ಯಾಪಾದೋ ಅತ್ಥಿ, ಸಕದಾಗಾಮೀ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

ಪುಥುಜ್ಜನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ಪುಥುಜ್ಜನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ಆಮನ್ತಾ. ಸೋತಾಪನ್ನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ಸೋತಾಪನ್ನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ… ಪುಥುಜ್ಜನಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ…ಪೇ… ಅತೀತೋ ಅಪಾಯಗಮನೀಯೋ ಮೋಹೋ ಅತ್ಥಿ, ಪುಥುಜ್ಜನೋ ತೇನ ಮೋಹೇನ ಸಮೋಹೋತಿ? ಆಮನ್ತಾ. ಸೋತಾಪನ್ನಸ್ಸ ಅತೀತೋ ಅಪಾಯಗಮನೀಯೋ ಮೋಹೋ ಅತ್ಥಿ, ಸೋತಾಪನ್ನೋ ತೇನ ಮೋಹೇನ ಸಮೋಹೋತಿ? ನ ಹೇವಂ ವತ್ತಬ್ಬೇ…ಪೇ….

ಅರಹತೋ ಅತೀತೋ ರಾಗೋ ಅತ್ಥಿ, ನ ಚ ಅರಹಾ ತೇನ ರಾಗೇನ ಸರಾಗೋತಿ? ಆಮನ್ತಾ. ಪುಥುಜ್ಜನಸ್ಸ ಅತೀತೋ ರಾಗೋ ಅತ್ಥಿ, ನ ಚ ಪುಥುಜ್ಜನೋ ತೇನ ರಾಗೇನ ಸರಾಗೋತಿ? ನ ಹೇವಂ ವತ್ತಬ್ಬೇ…ಪೇ… ಅರಹತೋ ಅತೀತೋ ದೋಸೋ ಅತ್ಥಿ…ಪೇ… ಅತೀತಂ ಅನೋತ್ತಪ್ಪಂ ಅತ್ಥಿ, ನ ಚ ಅರಹಾ ತೇನ ಅನೋತ್ತಪ್ಪೇನ ಅನೋತ್ತಪ್ಪೀತಿ? ಆಮನ್ತಾ. ಪುಥುಜ್ಜನಸ್ಸ ಅತೀತಂ ಅನೋತ್ತಪ್ಪಂ ಅತ್ಥಿ, ನ ಚ ಪುಥುಜ್ಜನೋ ತೇನ ಅನೋತ್ತಪ್ಪೇನ ಅನೋತ್ತಪ್ಪೀತಿ? ನ ಹೇವಂ ವತ್ತಬ್ಬೇ…ಪೇ….

ಅನಾಗಾಮಿಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ನ ಚ ಅನಾಗಾಮೀ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ಆಮನ್ತಾ. ಪುಥುಜ್ಜನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ನ ಚ ಪುಥುಜ್ಜನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ… ಅನಾಗಾಮಿಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ…ಪೇ… ಅತೀತೋ ಅಣುಸಹಗತೋ ಬ್ಯಾಪಾದೋ ಅತ್ಥಿ, ನ ಚ ಅನಾಗಾಮೀ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ಆಮನ್ತಾ. ಪುಥುಜ್ಜನಸ್ಸ ಅತೀತೋ ಅಣುಸಹಗತೋ ಬ್ಯಾಪಾದೋ ಅತ್ಥಿ, ನ ಚ ಪುಥುಜ್ಜನೋ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

ಸಕದಾಗಾಮಿಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ನ ಚ ಸಕದಾಗಾಮೀ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ಆಮನ್ತಾ. ಪುಥುಜ್ಜನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ನ ಚ ಪುಥುಜ್ಜನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ… ಸಕದಾಗಾಮಿಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ…ಪೇ… ಅತೀತೋ ಓಳಾರಿಕೋ ಬ್ಯಾಪಾದೋ ಅತ್ಥಿ, ನ ಚ ಸಕದಾಗಾಮೀ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ಆಮನ್ತಾ. ಪುಥುಜ್ಜನಸ್ಸ ಅತೀತೋ ಓಳಾರಿಕೋ ಬ್ಯಾಪಾದೋ ಅತ್ಥಿ, ನ ಚ ಪುಥುಜ್ಜನೋ ತೇನ ಬ್ಯಾಪಾದೇನ ಬ್ಯಾಪನ್ನಚಿತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

ಸೋತಾಪನ್ನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ನ ಚ ಸೋತಾಪನ್ನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ಆಮನ್ತಾ. ಪುಥುಜ್ಜನಸ್ಸ ಅತೀತಾ ಸಕ್ಕಾಯದಿಟ್ಠಿ ಅತ್ಥಿ, ನ ಚ ಪುಥುಜ್ಜನೋ ತಾಯ ದಿಟ್ಠಿಯಾ ಸದಿಟ್ಠಿಕೋತಿ? ನ ಹೇವಂ ವತ್ತಬ್ಬೇ…ಪೇ… ಸೋತಾಪನ್ನಸ್ಸ ಅತೀತಾ ವಿಚಿಕಿಚ್ಛಾ ಅತ್ಥಿ…ಪೇ… ಅತೀತೋ ಅಪಾಯಗಮನೀಯೋ ಮೋಹೋ ಅತ್ಥಿ, ನ ಚ ಸೋತಾಪನ್ನೋ ತೇನ ಮೋಹೇನ ಸಮೋಹೋತಿ? ಆಮನ್ತಾ. ಪುಥುಜ್ಜನಸ್ಸ ಅತೀತೋ ಅಪಾಯಗಮನೀಯೋ ಮೋಹೋ ಅತ್ಥಿ, ನ ಚ ಪುಥುಜ್ಜನೋ ತೇನ ಮೋಹೇನ ಸಮೋಹೋತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಹತ್ಥಾದಿಕಥಾ

೨೯೩. ಅತೀತಾ ಹತ್ಥಾ ಅತ್ಥೀತಿ? ಆಮನ್ತಾ. ಅತೀತೇಸು ಹತ್ಥೇಸು ಸತಿ ಆದಾನನಿಕ್ಖೇಪನಂ ಪಞ್ಞಾಯತೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತಾ ಪಾದಾ ಅತ್ಥೀತಿ? ಆಮನ್ತಾ. ಅತೀತೇಸು ಪಾದೇಸು ಸತಿ ಅಭಿಕ್ಕಮಪಟಿಕ್ಕಮೋ ಪಞ್ಞಾಯತೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತಾ ಪಬ್ಬಾ ಅತ್ಥೀತಿ? ಆಮನ್ತಾ. ಅತೀತೇಸು ಪಬ್ಬೇಸು ಸತಿ ಸಮಿಞ್ಜನಪಸಾರಣಂ ಪಞ್ಞಾಯತೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತೋ ಕುಚ್ಛಿ ಅತ್ಥೀತಿ? ಆಮನ್ತಾ. ಅತೀತಸ್ಮಿಂ ಕುಚ್ಛಿಸ್ಮಿಂ ಸತಿ ಜಿಘಚ್ಛಾ ಪಿಪಾಸಾ ಪಞ್ಞಾಯತೀತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತೋ ಕಾಯೋ ಅತ್ಥೀತಿ? ಆಮನ್ತಾ. ಅತೀತೋ ಕಾಯೋ ಪಗ್ಗಹನಿಗ್ಗಹುಪಗೋ ಛೇದನಭೇದನುಪಗೋ ಕಾಕೇಹಿ ಗಿಜ್ಝೇಹಿ ಕುಲಲೇಹಿ ಸಾಧಾರಣೋತಿ? ನ ಹೇವಂ ವತ್ತಬ್ಬೇ…ಪೇ… ಅತೀತೇ ಕಾಯೇ ವಿಸಂ ಕಮೇಯ್ಯ, ಸತ್ಥಂ ಕಮೇಯ್ಯ, ಅಗ್ಗಿ ಕಮೇಯ್ಯಾತಿ? ನ ಹೇವಂ ವತ್ತಬ್ಬೇ…ಪೇ… ಲಬ್ಭಾ ಅತೀತೋ ಕಾಯೋ ಅದ್ದುಬನ್ಧನೇನ ಬನ್ಧಿತುಂ, ರಜ್ಜುಬನ್ಧನೇನ ಬನ್ಧಿತುಂ, ಸಙ್ಖಲಿಕಬನ್ಧನೇನ ಬನ್ಧಿತುಂ, ಗಾಮಬನ್ಧನೇನ ಬನ್ಧಿತುಂ, ನಿಗಮಬನ್ಧನೇನ ಬನ್ಧಿತುಂ, ನಗರಬನ್ಧನೇನ ಬನ್ಧಿತುಂ, ಜನಪದಬನ್ಧನೇನ ಬನ್ಧಿತುಂ, ಕಣ್ಠಪಞ್ಚಮೇಹಿ ಬನ್ಧನೇಹಿ ಬನ್ಧಿತುನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತೋ ಆಪೋ ಅತ್ಥೀತಿ? ಆಮನ್ತಾ. ತೇನ ಆಪೇನ ಆಪಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತೋ ತೇಜೋ ಅತ್ಥೀತಿ? ಆಮನ್ತಾ. ತೇನ ತೇಜೇನ ತೇಜಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತೋ ವಾಯೋ ಅತ್ಥೀತಿ? ಆಮನ್ತಾ. ತೇನ ವಾಯೇನ ವಾಯಕರಣೀಯಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಕ್ಖನ್ಧಾದಿಸಮೋಧಾನಕಥಾ

೨೯೪. ಅತೀತೋ ರೂಪಕ್ಖನ್ಧೋ ಅತ್ಥಿ, ಅನಾಗತೋ ರೂಪಕ್ಖನ್ಧೋ ಅತ್ಥಿ, ಪಚ್ಚುಪ್ಪನ್ನೋ ರೂಪಕ್ಖನ್ಧೋ ಅತ್ಥೀತಿ? ಆಮನ್ತಾ. ತಯೋ ರೂಪಕ್ಖನ್ಧಾತಿ? ನ ಹೇವಂ ವತ್ತಬ್ಬೇ …ಪೇ… ಅತೀತಾ ಪಞ್ಚಕ್ಖನ್ಧಾ ಅತ್ಥಿ, ಅನಾಗತಾ ಪಞ್ಚಕ್ಖನ್ಧಾ ಅತ್ಥಿ, ಪಚ್ಚುಪ್ಪನ್ನಾ ಪಞ್ಚಕ್ಖನ್ಧಾ ಅತ್ಥೀತಿ? ಆಮನ್ತಾ. ಪನ್ನರಸಕ್ಖನ್ಧಾತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಂ ಚಕ್ಖಾಯತನಂ ಅತ್ಥಿ, ಅನಾಗತಂ ಚಕ್ಖಾಯತನಂ ಅತ್ಥಿ, ಪಚ್ಚುಪ್ಪನ್ನಂ ಚಕ್ಖಾಯತನಂ ಅತ್ಥೀತಿ? ಆಮನ್ತಾ. ತೀಣಿ ಚಕ್ಖಾಯತನಾನೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತಾನಿ ದ್ವಾದಸಾಯತನಾನಿ ಅತ್ಥಿ, ಅನಾಗತಾನಿ ದ್ವಾದಸಾಯತನಾನಿ ಅತ್ಥಿ, ಪಚ್ಚುಪ್ಪನ್ನಾನಿ ದ್ವಾದಸಾಯತನಾನಿ ಅತ್ಥೀತಿ? ಆಮನ್ತಾ. ಛತ್ತಿಂಸಾಯತನಾನೀತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಾ ಚಕ್ಖುಧಾತು ಅತ್ಥಿ, ಅನಾಗತಾ ಚಕ್ಖುಧಾತು ಅತ್ಥಿ, ಪಚ್ಚುಪ್ಪನ್ನಾ ಚಕ್ಖುಧಾತು ಅತ್ಥೀತಿ? ಆಮನ್ತಾ. ತಿಸ್ಸೋ ಚಕ್ಖುಧಾತುಯೋತಿ? ನ ಹೇವಂ ವತ್ತಬ್ಬೇ…ಪೇ… ಅತೀತಾ ಅಟ್ಠಾರಸ ಧಾತುಯೋ ಅತ್ಥಿ, ಅನಾಗತಾ ಅಟ್ಠಾರಸ ಧಾತುಯೋ ಅತ್ಥಿ, ಪಚ್ಚುಪ್ಪನ್ನಾ ಅಟ್ಠಾರಸ ಧಾತುಯೋ ಅತ್ಥೀತಿ? ಆಮನ್ತಾ. ಚತುಪಞ್ಞಾಸ ಧಾತುಯೋತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತಂ ಚಕ್ಖುನ್ದ್ರಿಯಂ ಅತ್ಥಿ, ಅನಾಗತಂ ಚಕ್ಖುನ್ದ್ರಿಯಂ ಅತ್ಥಿ, ಪಚ್ಚುಪ್ಪನ್ನಂ ಚಕ್ಖುನ್ದ್ರಿಯಂ ಅತ್ಥೀತಿ? ಆಮನ್ತಾ. ತೀಣಿ ಚಕ್ಖುನ್ದ್ರಿಯಾನೀತಿ? ನ ಹೇವಂ ವತ್ತಬ್ಬೇ…ಪೇ… ಅತೀತಾನಿ ಬಾವೀಸತಿನ್ದ್ರಿಯಾನಿ ಅತ್ಥಿ, ಅನಾಗತಾನಿ ಬಾವೀಸತಿನ್ದ್ರಿಯಾನಿ ಅತ್ಥಿ, ಪಚ್ಚುಪ್ಪನ್ನಾನಿ ಬಾವೀಸತಿನ್ದ್ರಿಯಾನಿ ಅತ್ಥೀತಿ? ಆಮನ್ತಾ. ಛಸಟ್ಠಿನ್ದ್ರಿಯಾನೀತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತೋ ರಾಜಾ ಚಕ್ಕವತ್ತೀ ಅತ್ಥಿ, ಅನಾಗತೋ ರಾಜಾ ಚಕ್ಕವತ್ತೀ ಅತ್ಥಿ, ಪಚ್ಚುಪ್ಪನ್ನೋ ರಾಜಾ ಚಕ್ಕವತ್ತೀ ಅತ್ಥೀತಿ? ಆಮನ್ತಾ. ತಿಣ್ಣನ್ನಂ ರಾಜೂನಂ ಚಕ್ಕವತ್ತೀನಂ ಸಮ್ಮುಖೀಭಾವೋ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಅತೀತೋ ಸಮ್ಮಾಸಮ್ಮುದ್ಧೋ ಅತ್ಥಿ, ಅನಾಗತೋ ಸಮ್ಮಾಸಮ್ಬುದ್ಧೋ ಅತ್ಥಿ, ಪಚ್ಚುಪ್ಪನ್ನೋ ಸಮ್ಮಾಸಮ್ಬುದ್ಧೋ ಅತ್ಥೀತಿ? ಆಮನ್ತಾ. ತಿಣ್ಣನ್ನಂ ಸಮ್ಮಾಸಮ್ಬುದ್ಧಾನಂ ಸಮ್ಮುಖೀಭಾವೋ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಪದಸೋಧನಕಥಾ

೨೯೫. ಅತೀತಂ ಅತ್ಥೀತಿ? ಆಮನ್ತಾ. ಅತ್ಥಿ ಅತೀತನ್ತಿ? ಅತ್ಥಿ ಸಿಯಾ ಅತೀತಂ, ಸಿಯಾ ನ್ವಾತೀತನ್ತಿ.

ಆಜಾನಾಹಿ ನಿಗ್ಗಹಂ. ಹಞ್ಚಿ ಅತೀತಂ ಅತ್ಥಿ, ಅತ್ಥಿ ಸಿಯಾ ಅತೀತಂ, ಸಿಯಾ ನ್ವಾತೀತಂ, ತೇನಾತೀತಂ ನ್ವಾತೀತಂ, ನ್ವಾತೀತಂ ಅತೀತನ್ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಅತೀತಂ ಅತ್ಥಿ ಅತ್ಥಿ ಸಿಯಾ ಅತೀತಂ, ಸಿಯಾ ನ್ವಾತೀತಂ, ತೇನಾತೀತಂ ನ್ವಾತೀತಂ, ನ್ವಾತೀತಂ ಅತೀತ’’’ನ್ತಿ ಮಿಚ್ಛಾ.

ನೋ ಚೇ ಪನ ಅತೀತಂ ನ್ವಾತೀತಂ ನ್ವಾತೀತಂ ಅತೀತನ್ತಿ, ನೋ ಚ ವತ ರೇ ವತ್ತಬ್ಬೇ – ‘‘ಅತೀತಂ ಅತ್ಥಿ ಅತ್ಥಿ ಸಿಯಾ ಅತೀತಂ, ಸಿಯಾ ನ್ವಾತೀತ’’ನ್ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಅತೀತಂ ಅತ್ಥಿ ಅತ್ಥಿ ಸಿಯಾ ಅತೀತಂ, ಸಿಯಾ ನ್ವಾತೀತಂ, ತೇನಾತೀತಂ ನ್ವಾತೀತಂ, ನ್ವಾತೀತಂ ಅತೀತ’’’ನ್ತಿ ಮಿಚ್ಛಾ.

ಅನಾಗತಂ ಅತ್ಥೀತಿ? ಆಮನ್ತಾ. ಅತ್ಥಿ ಅನಾಗತನ್ತಿ? ಅತ್ಥಿ ಸಿಯಾ ಅನಾಗತಂ, ಸಿಯಾ ನ್ವಾನಾಗತನ್ತಿ.

ಆಜಾನಾಹಿ ನಿಗ್ಗಹಂ. ಹಞ್ಚಿ ಅನಾಗತಂ ಅತ್ಥಿ ಅತ್ಥಿ ಸಿಯಾ ಅನಾಗತಂ ಸಿಯಾ ನ್ವಾನಾಗತಂ, ತೇನಾನಾಗತಂ ನ್ವಾನಾಗತಂ, ನ್ವಾನಾಗತಂ ಅನಾಗತನ್ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಅನಾಗತಂ ಅತ್ಥಿ ಅತ್ಥಿ ಸಿಯಾ ಅನಾಗತಂ, ಸಿಯಾ ನ್ವಾನಾಗತಂ, ತೇನಾನಾಗತಂ ನ್ವಾನಾಗತಂ, ನ್ವಾನಾಗತಂ ಅನಾಗತ’’’ನ್ತಿ ಮಿಚ್ಛಾ.

ನೋ ಚೇ ಪನಾನಾಗತಂ ನ್ವಾನಾಗತಂ ನ್ವಾನಾಗತಂ ಅನಾಗತನ್ತಿ, ನೋ ಚ ವತ ರೇ ವತ್ತಬ್ಬೇ – ‘‘ಅನಾಗತಂ ಅತ್ಥಿ ಅತ್ಥಿ ಸಿಯಾ ಅನಾಗತಂ, ಸಿಯಾ ನ್ವಾನಾಗತ’’ನ್ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಅನಾಗತಂ ಅತ್ಥಿ ಅತ್ಥಿ ಸಿಯಾ ಅನಾಗತಂ, ಸಿಯಾ ನ್ವಾನಾಗತಂ, ತೇನಾನಾಗತಂ ನ್ವಾನಾಗತಂ, ನ್ವಾನಾಗತಂ ಅನಾಗತ’’’ನ್ತಿ ಮಿಚ್ಛಾ.

ಪಚ್ಚುಪ್ಪನ್ನಂ ಅತ್ಥೀತಿ, ಆಮನ್ತಾ. ಅತ್ಥಿ ಪಚ್ಚುಪ್ಪನ್ನನ್ತಿ? ಅತ್ಥಿ ಸಿಯಾ ಪಚ್ಚುಪ್ಪನ್ನಂ, ಸಿಯಾ ನೋ ಪಚ್ಚುಪ್ಪನ್ನನ್ತಿ.

ಆಜಾನಾಹಿ ನಿಗ್ಗಹಂ. ಹಞ್ಚಿ ಪಚ್ಚುಪ್ಪನ್ನಂ ಅತ್ಥಿ ಅತ್ಥಿ ಸಿಯಾ ಪಚ್ಚುಪ್ಪನ್ನಂ, ಸಿಯಾ ನೋ ಪಚ್ಚುಪ್ಪನ್ನಂ, ತೇನ ಪಚ್ಚುಪ್ಪನ್ನಂ, ನೋ ಪಚ್ಚುಪ್ಪನ್ನಂ, ನೋ ಪಚ್ಚುಪ್ಪನ್ನಂ ಪಚ್ಚುಪ್ಪನ್ನನ್ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಪಚ್ಚುಪ್ಪನ್ನಂ ಅತ್ಥಿ ಅತ್ಥಿ ಸಿಯಾ ಪಚ್ಚುಪ್ಪನ್ನಂ, ಸಿಯಾ ನೋ ಪಚ್ಚುಪ್ಪನ್ನಂ, ತೇನ ಪಚ್ಚುಪ್ಪನ್ನಂ ನೋ ಪಚ್ಚುಪ್ಪನ್ನಂ, ನೋ ಪಚ್ಚುಪ್ಪನ್ನಂ ಪಚ್ಚುಪ್ಪನ್ನ’’’ನ್ತಿ ಮಿಚ್ಛಾ.

ನೋ ಚೇ ಪನ ಪಚ್ಚುಪ್ಪನ್ನಂ ನೋ ಪಚ್ಚುಪ್ಪನ್ನಂ, ನೋ ಪಚ್ಚುಪ್ಪನ್ನಂ ಪಚ್ಚುಪ್ಪನ್ನನ್ತಿ, ನೋ ಚ ವತ ರೇ ವತ್ತಬ್ಬೇ – ‘‘ಪಚ್ಚುಪ್ಪನ್ನಂ ಅತ್ಥಿ ಅತ್ಥಿ ಸಿಯಾ ಪಚ್ಚುಪ್ಪನ್ನಂ, ಸಿಯಾ ನೋ ಪಚ್ಚುಪ್ಪನ್ನ’’ನ್ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಪಚ್ಚುಪ್ಪನ್ನಂ ಅತ್ಥಿ ಅತ್ಥಿ ಸಿಯಾ ಪಚ್ಚುಪ್ಪನ್ನಂ, ಸಿಯಾ ನೋ ಪಚ್ಚುಪ್ಪನ್ನಂ, ತೇನ ಪಚ್ಚುಪ್ಪನ್ನಂ ನೋ ಪಚ್ಚುಪ್ಪನ್ನಂ, ನೋ ಪಚ್ಚುಪ್ಪನ್ನಂ ಪಚ್ಚುಪ್ಪನ್ನ’’’ನ್ತಿ ಮಿಚ್ಛಾ.

ನಿಬ್ಬಾನಂ ಅತ್ಥೀತಿ? ಆಮನ್ತಾ. ಅತ್ಥಿ ನಿಬ್ಬಾನನ್ತಿ? ಅತ್ಥಿ ಸಿಯಾ ನಿಬ್ಬಾನಂ ಸಿಯಾ ನೋ ನಿಬ್ಬಾನನ್ತಿ.

ಆಜಾನಾಹಿ ನಿಗ್ಗಹಂ. ಹಞ್ಚಿ ನಿಬ್ಬಾನಂ ಅತ್ಥಿ ಅತ್ಥಿ ಸಿಯಾ ನಿಬ್ಬಾನಂ, ಸಿಯಾ ನೋ ನಿಬ್ಬಾನಂ, ತೇನ ನಿಬ್ಬಾನಂ ನೋ ನಿಬ್ಬಾನಂ, ನೋ ನಿಬ್ಬಾನಂ ನಿಬ್ಬಾನನ್ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ನಿಬ್ಬಾನಂ ಅತ್ಥಿ ಅತ್ಥಿ ಸಿಯಾ ನಿಬ್ಬಾನಂ, ಸಿಯಾ ನೋ ನಿಬ್ಬಾನಂ, ತೇನ ನಿಬ್ಬಾನಂ ನೋ ನಿಬ್ಬಾನಂ, ನೋ ನಿಬ್ಬಾನಂ ನಿಬ್ಬಾನ’’’ನ್ತಿ ಮಿಚ್ಛಾ.

ನೋ ಚೇ ಪನ ನಿಬ್ಬಾನಂ ನೋ ನಿಬ್ಬಾನಂ, ನೋ ನಿಬ್ಬಾನಂ ನಿಬ್ಬಾನನ್ತಿ, ನೋ ಚ ವತ ರೇ ವತ್ತಬ್ಬೇ – ‘‘ನಿಬ್ಬಾನಂ ಅತ್ಥಿ ಅತ್ಥಿ ಸಿಯಾ ನಿಬ್ಬಾನಂ, ಸಿಯಾ ನೋ ನಿಬ್ಬಾನ’’ನ್ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ನಿಬ್ಬಾನಂ ಅತ್ಥಿ ಅತ್ಥಿ ಸಿಯಾ ನಿಬ್ಬಾನಂ, ಸಿಯಾ ನೋ ನಿಬ್ಬಾನಂ, ತೇನ ನಿಬ್ಬಾನಂ ನೋ ನಿಬ್ಬಾನಂ, ನೋ ನಿಬ್ಬಾನಂ ನಿಬ್ಬಾನ’’’ನ್ತಿ ಮಿಚ್ಛಾ.

ಸುತ್ತಸಾಧನಂ

೨೯೬. ನ ವತ್ತಬ್ಬಂ – ‘‘ಅತೀತಂ ಅತ್ಥಿ, ಅನಾಗತಂ ಅತ್ಥೀ’’ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಯಂ ಕಿಞ್ಚಿ, ಭಿಕ್ಖವೇ, ರೂಪಂ ಅತೀತಾನಾಗತಪಚ್ಚುಪ್ಪನ್ನಂ ಅಜ್ಝತ್ತಂ ವಾ ಬಹಿದ್ಧಾ ವಾ ಓಳಾರಿಕಂ ವಾ ಸುಖುಮಂ ವಾ ಹೀನಂ ವಾ ಪಣೀತಂ ವಾ ಯಂ ದೂರೇ ಸನ್ತಿಕೇ ವಾ – ಅಯಂ ವುಚ್ಚತಿ ರೂಪಕ್ಖನ್ಧೋ. ಯಾ ಕಾಚಿ ವೇದನಾ… ಯಾ ಕಾಚಿ ಸಞ್ಞಾ… ಯೇ ಕೇಚಿ ಸಙ್ಖಾರಾ… ಯಂ ಕಿಞ್ಚಿ ವಿಞ್ಞಾಣಂ ಅತೀತಾನಾಗತಪಚ್ಚುಪ್ಪನ್ನಂ ಅಜ್ಝತ್ತಂ ವಾ ಬಹಿದ್ಧಾ ವಾ ಓಳಾರಿಕಂ ವಾ ಸುಖುಮಂ ವಾ ಹೀನಂ ವಾ ಪಣೀತಂ ವಾ ಯಂ ದೂರೇ ಸನ್ತಿಕೇ ವಾ – ಅಯಂ ವುಚ್ಚತಿ ವಿಞ್ಞಾಣಕ್ಖನ್ಧೋ’’ತಿ [ಸಂ. ನಿ. ೩.೪೮]. ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ಅತೀತಂ ಅತ್ಥಿ, ಅನಾಗತಂ ಅತ್ಥೀತಿ.

ಅತೀತಂ ಅತ್ಥಿ, ಅನಾಗತಂ ಅತ್ಥೀತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ತಯೋಮೇ, ಭಿಕ್ಖವೇ, ನಿರುತ್ತಿಪಥಾ ಅಧಿವಚನಪಥಾ ಪಞ್ಞತ್ತಿಪಥಾ ಅಸಙ್ಕಿಣ್ಣಾ ಅಸಙ್ಕಿಣ್ಣಪುಬ್ಬಾ ನ ಸಙ್ಕಿಯನ್ತಿ ನ ಸಙ್ಕಿಯಿಸ್ಸನ್ತಿ ಅಪ್ಪಟಿಕುಟ್ಠಾ ಸಮಣೇಹಿ ಬ್ರಾಹ್ಮಣೇಹಿ ವಿಞ್ಞೂಹಿ. ಕತಮೇ ತಯೋ? ಯಂ, ಭಿಕ್ಖವೇ, ರೂಪಂ ಅತೀತಂ ನಿರುದ್ಧಂ ವಿಗತಂ ವಿಪರಿಣತಂ ‘ಅಹೋಸೀ’ತಿ ತಸ್ಸ ಸಙ್ಖಾ, ‘ಅಹೋಸೀ’ತಿ ತಸ್ಸ ಸಮಞ್ಞಾ, ‘ಅಹೋಸೀ’ತಿ ತಸ್ಸ ಪಞ್ಞತ್ತಿ; ನ ತಸ್ಸ ಸಙ್ಖಾ ‘ಅತ್ಥೀ’ತಿ, ನ ತಸ್ಸ ಸಙ್ಖಾ ‘ಭವಿಸ್ಸತೀ’ತಿ. ಯಾ ವೇದನಾ…ಪೇ… ಯಾ ಸಞ್ಞಾ… ಯೇ ಸಙ್ಖಾರಾ… ಯಂ ವಿಞ್ಞಾಣಂ ಅತೀತಂ ನಿರುದ್ಧಂ ವಿಗತಂ ವಿಪರಿಣತಂ ‘ಅಹೋಸೀ’ತಿ ತಸ್ಸ ಸಙ್ಖಾ, ‘ಅಹೋಸೀ’ತಿ ತಸ್ಸ ಸಮಞ್ಞಾ, ‘ಅಹೋಸೀ’ತಿ ತಸ್ಸ ಪಞ್ಞತ್ತಿ; ನ ತಸ್ಸ ಸಙ್ಖಾ ‘ಅತ್ಥೀ’ತಿ, ನ ತಸ್ಸ ಸಙ್ಖಾ ‘ಭವಿಸ್ಸತೀ’ತಿ.

‘‘ಯಂ, ಭಿಕ್ಖವೇ, ರೂಪಂ ಅಜಾತಂ ಅಪಾತುಭೂತಂ ‘ಭವಿಸ್ಸತೀ’ತಿ ತಸ್ಸ ಸಙ್ಖಾ, ‘ಭವಿಸ್ಸತೀ’ತಿ ತಸ್ಸ ಸಮಞ್ಞಾ, ‘ಭವಿಸ್ಸತೀ’ತಿ ತಸ್ಸ ಪಞ್ಞತ್ತಿ; ನ ತಸ್ಸ ಸಙ್ಖಾ ‘ಅತ್ಥೀ’ತಿ, ನ ತಸ್ಸ ಸಙ್ಖಾ ‘ಅಹೋಸೀ’ತಿ. ಯಾ ವೇದನಾ…ಪೇ… ಯಾ ಸಞ್ಞಾ… ಯೇ ಸಙ್ಖಾರಾ… ಯಂ ವಿಞ್ಞಾಣಂ ಅಜಾತಂ ಅಪಾತುಭೂತಂ ‘ಭವಿಸ್ಸತೀ’ತಿ ತಸ್ಸ ಸಙ್ಖಾ, ‘ಭವಿಸ್ಸತೀ’ತಿ ತಸ್ಸ ಸಮಞ್ಞಾ, ‘ಭವಿಸ್ಸತೀ’ತಿ ತಸ್ಸ ಪಞ್ಞತ್ತಿ; ನ ತಸ್ಸ ಸಙ್ಖಾ ‘ಅತ್ಥೀ’ತಿ, ನ ತಸ್ಸ ಸಙ್ಖಾ ‘ಅಹೋಸೀ’ತಿ.

‘‘ಯಂ, ಭಿಕ್ಖವೇ, ರೂಪಂ ಜಾತಂ ಪಾತುಭೂತಂ ‘ಅತ್ಥೀ’ತಿ ತಸ್ಸ ಸಙ್ಖಾ, ‘ಅತ್ಥೀ’ತಿ ತಸ್ಸ ಸಮಞ್ಞಾ, ‘ಅತ್ಥೀ’ತಿ ತಸ್ಸ ಪಞ್ಞತ್ತಿ; ನ ತಸ್ಸ ಸಙ್ಖಾ ‘ಅಹೋಸೀ’ತಿ, ನ ತಸ್ಸ ಸಙ್ಖಾ ‘ಭವಿಸ್ಸತೀ’ತಿ. ಯಾ ವೇದನಾ…ಪೇ… ಯಾ ಸಞ್ಞಾ… ಯೇ ಸಙ್ಖಾರಾ… ಯಂ ವಿಞ್ಞಾಣಂ ಜಾತಂ ಪಾತುಭೂತಂ ‘ಅತ್ಥೀ’ತಿ ತಸ್ಸ ಸಙ್ಖಾ, ‘ಅತ್ಥೀ’ತಿ ತಸ್ಸ ಸಮಞ್ಞಾ, ‘ಅತ್ಥೀ’ತಿ ತಸ್ಸ ಪಞ್ಞತ್ತಿ; ನ ತಸ್ಸ ಸಙ್ಖಾ ‘ಅಹೋಸೀ’ತಿ, ನ ತಸ್ಸ ಸಙ್ಖಾ ‘ಭವಿಸ್ಸತೀ’ತಿ. ಇಮೇ ಖೋ, ಭಿಕ್ಖವೇ, ತಯೋ ನಿರುತ್ತಿಪಥಾ ಅಧಿವಚನಪಥಾ ಪಞ್ಞತ್ತಿಪಥಾ ಅಸಙ್ಕಿಣ್ಣಾ ಅಸಙ್ಕಿಣ್ಣಪುಬ್ಬಾ ನ ಸಙ್ಕಿಯನ್ತಿ ನ ಸಙ್ಕಿಯಿಸ್ಸನ್ತಿ ಅಪ್ಪಟಿಕುಟ್ಠಾ ಸಮಣೇಹಿ ಬ್ರಾಹ್ಮಣೇಹಿ ವಿಞ್ಞೂಹಿ.

‘‘ಯೇಪಿ ತೇ, ಭಿಕ್ಖವೇ, ಅಹೇಸುಂ ಉಕ್ಕಲಾ ವಸ್ಸಭಞ್ಞಾ ಅಹೇತುಕವಾದಾ ಅಕಿರಿಯವಾದಾ ನತ್ಥಿಕವಾದಾ, ತೇಪಿಮೇ ತಯೋ ನಿರುತ್ತಿಪಥೇ ಅಧಿವಚನಪಥೇ ಪಞ್ಞತ್ತಿಪಥೇ ನ ಗರಹಿತಬ್ಬಂ ನ ಪಟಿಕ್ಕೋಸಿತಬ್ಬಂ ಅಮಞ್ಞಿಂಸು. ತಂ ಕಿಸ್ಸ ಹೇತು? ನಿನ್ದಾಬ್ಯಾರೋಸಉಪಾರಮ್ಭಭಯಾ’’ತಿ [ಸಂಯುತ್ತನಿಕಾಯೇ]. ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ಅತೀತಂ ಅತ್ಥಿ, ಅನಾಗತಂ ಅತ್ಥೀ’’ತಿ.

ಅತೀತಂ ಅತ್ಥೀತಿ? ಆಮನ್ತಾ. ನನು ಆಯಸ್ಮಾ ಫಗ್ಗುನೋ ಭಗವನ್ತಂ ಏತದವೋಚ – ‘‘ಅತ್ಥಿ ನು ಖೋ ತಂ, ಭನ್ತೇ, ಚಕ್ಖುಂ ಯೇನ ಚಕ್ಖುನಾ ಅತೀತೇ ಬುದ್ಧೇ ಪರಿನಿಬ್ಬುತೇ ಛಿನ್ನಪಪಞ್ಚೇ ಛಿನ್ನವಟುಮೇ ಪರಿಯಾದಿನ್ನವಟ್ಟೇ ಸಬ್ಬದುಕ್ಖವೀತಿವತ್ತೇ ಪಞ್ಞಾಪಯಮಾನೋ ಪಞ್ಞಾಪೇಯ್ಯಾತಿ. ಅತ್ಥಿ ನು ಖೋ ಸಾ, ಭನ್ತೇ, ಜಿವ್ಹಾ…ಪೇ… ಅತ್ಥಿ ನು ಖೋ ಸೋ, ಭನ್ತೇ, ಮನೋ ಯೇನ ಮನೇನ ಅತೀತೇ ಬುದ್ಧೇ ಪರಿನಿಬ್ಬುತೇ ಛಿನ್ನಪಪಞ್ಚೇ ಛಿನ್ನವಟುಮೇ ಪರಿಯಾದಿನ್ನವಟ್ಟೇ ಸಬ್ಬದುಕ್ಖವೀತಿವತ್ತೇ ಪಞ್ಞಾಪಯಮಾನೋ ಪಞ್ಞಾಪೇಯ್ಯಾ’’ತಿ.

‘‘ನತ್ಥಿ ಖೋ ತಂ, ಫಗ್ಗುನ, ಚಕ್ಖುಂ ಯೇನ ಚಕ್ಖುನಾ ಅತೀತೇ ಬುದ್ಧೇ ಪರಿನಿಬ್ಬುತೇ ಛಿನ್ನಪಪಞ್ಚೇ ಛಿನ್ನವಟುಮೇ ಪರಿಯಾದಿನ್ನವಟ್ಟೇ ಸಬ್ಬದುಕ್ಖವೀತಿವತ್ತೇ ಪಞ್ಞಾಪಯಮಾನೋ ಪಞ್ಞಾಪೇಯ್ಯ. ನತ್ಥಿ ಖೋ ಸಾ, ಫಗ್ಗುನ, ಜಿವ್ಹಾ…ಪೇ… ನತ್ಥಿ ನು ಖೋ ಸೋ, ಫಗ್ಗುನ, ಮನೋ ಯೇನ ಮನೇನ ಅತೀತೇ ಬುದ್ಧೇ ಪರಿನಿಬ್ಬುತೇ ಛಿನ್ನಪಪಞ್ಚೇ ಛಿನ್ನವಟುಮೇ ಪರಿಯಾದಿನ್ನವಟ್ಟೇ ಸಬ್ಬದುಕ್ಖವೀತಿವತ್ತೇ ಪಞ್ಞಾಪಯಮಾನೋ ಪಞ್ಞಾಪೇಯ್ಯಾ’’ತಿ [ಸಂ. ನಿ. ೪.೮೩]. ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ಅತೀತಂ ಅತ್ಥೀ’’ತಿ.

ಅತೀತಂ ಅತ್ಥೀತಿ? ಆಮನ್ತಾ. ನನು ಆಯಸ್ಮಾ ನನ್ದಕೋ ಏತದವೋಚ – ‘‘ಅಹು ಪುಬ್ಬೇ ಲೋಭೋ ತದಹು ಅಕುಸಲಂ, ಸೋ ಏತರಹಿ ನತ್ಥಿ, ಇಚ್ಚೇತಂ ಕುಸಲಂ. ಅಹು ಪುಬ್ಬೇ ದೋಸೋ… ಅಹು ಪುಬ್ಬೇ ಮೋಹೋ, ತದಹು ಅಕುಸಲಂ, ಸೋ ಏತರಹಿ ನತ್ಥಿ, ಇಚ್ಚೇತಂ ಕುಸಲ’’ನ್ತಿ [ಅಙ್ಗುತ್ತರನಿಕಾಯೇ]. ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ಅತೀತಂ ಅತ್ಥೀ’’ತಿ.

ನ ವತ್ತಬ್ಬಂ – ‘‘ಅನಾಗತಂ ಅತ್ಥೀ’’ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಕಬಳೀಕಾರೇ ಚೇ, ಭಿಕ್ಖವೇ, ಆಹಾರೇ ಅತ್ಥಿ ರಾಗೋ, ಅತ್ಥಿ ನನ್ದೀ, ಅತ್ಥಿ ತಣ್ಹಾ; ಪತಿಟ್ಠಿತಂ ತತ್ಥ ವಿಞ್ಞಾಣಂ ವಿರೂಳ್ಹಂ. ಯತ್ಥ ಪತಿಟ್ಠಿತಂ ವಿಞ್ಞಾಣಂ ವಿರೂಳ್ಹಂ, ಅತ್ಥಿ ತತ್ಥ ನಾಮರೂಪಸ್ಸ ಅವಕ್ಕನ್ತಿ. ಯತ್ಥ ಅತ್ಥಿ ನಾಮರೂಪಸ್ಸ ಅವಕ್ಕನ್ತಿ, ಅತ್ಥಿ ತತ್ಥ ಸಙ್ಖಾರಾನಂ ವುದ್ಧಿ. ಯತ್ಥ ಅತ್ಥಿ ಸಙ್ಖಾರಾನಂ ವುದ್ಧಿ, ಅತ್ಥಿ ತತ್ಥ ಆಯತಿಂ ಪುನಬ್ಭವಾಭಿನಿಬ್ಬತ್ತಿ. ಯತ್ಥ ಅತ್ಥಿ ಆಯತಿಂ ಪುನಬ್ಭವಾಭಿನಿಬ್ಬತ್ತಿ, ಅತ್ಥಿ ತತ್ಥ ಆಯತಿಂ ಜಾತಿಜರಾಮರಣಂ. ಯತ್ಥ ಅತ್ಥಿ ಆಯತಿಂ ಜಾತಿಜರಾಮರಣಂ, ಸಸೋಕಂ ತಂ, ಭಿಕ್ಖವೇ, ಸರಜಂ [ಸದರಂ (ಸಂ. ನಿ. ೨.೬೪) ತದೇವ ಯುತ್ತತರಂ] ಸಉಪಾಯಾಸನ್ತಿ ವದಾಮಿ.

‘‘ಫಸ್ಸೇ ಚೇ, ಭಿಕ್ಖವೇ, ಆಹಾರೇ… ಮನೋಸಞ್ಚೇತನಾಯ ಚೇ, ಭಿಕ್ಖವೇ, ಆಹಾರೇ… ವಿಞ್ಞಾಣೇ ಚೇ, ಭಿಕ್ಖವೇ, ಆಹಾರೇ ಅತ್ಥಿ ರಾಗೋ, ಅತ್ಥಿ ನನ್ದೀ…ಪೇ… ಸರಜಂ ಸಉಪಾಯಾಸನ್ತಿ ವದಾಮೀ’’ತಿ [ಸಂ. ನಿ. ೨.೬೪]. ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ಅನಾಗತಂ ಅತ್ಥೀತಿ.

ಅನಾಗತಂ ಅತ್ಥೀತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಕಬಳೀಕಾರೇ ಚೇ, ಭಿಕ್ಖವೇ, ಆಹಾರೇ ನತ್ಥಿ ರಾಗೋ, ನತ್ಥಿ ನನ್ದೀ, ನತ್ಥಿ ತಣ್ಹಾ; ಅಪ್ಪತಿಟ್ಠಿತಂ ತತ್ಥ ವಿಞ್ಞಾಣಂ ಅವಿರೂಳ್ಹಂ. ಯತ್ಥ ವಿಞ್ಞಾಣಂ ಅಪ್ಪತಿಟ್ಠಿತಂ ಅವಿರೂಳ್ಹಂ, ನತ್ಥಿ ತತ್ಥ ನಾಮರೂಪಸ್ಸ ಅವಕ್ಕನ್ತಿ. ಯತ್ಥ ನತ್ಥಿ ನಾಮರೂಪಸ್ಸ ಅವಕ್ಕನ್ತಿ, ನತ್ಥಿ ತತ್ಥ ಸಙ್ಖಾರಾನಂ ವುದ್ಧಿ. ಯತ್ಥ ನತ್ಥಿ ಸಙ್ಖಾರಾನಂ ವುದ್ಧಿ, ನತ್ಥಿ ತತ್ಥ ಆಯತಿಂ ಪುನಬ್ಭವಾಭಿನಿಬ್ಬತ್ತಿ. ಯತ್ಥ ನತ್ಥಿ ಆಯತಿಂ ಪುನಬ್ಭವಾಭಿನಿಬ್ಬತ್ತಿ, ನತ್ಥಿ ತತ್ಥ ಆಯತಿಂ ಜಾತಿಜರಾಮರಣಂ. ಯತ್ಥ ನತ್ಥಿ ಆಯತಿಂ ಜಾತಿಜರಾಮರಣಂ, ಅಸೋಕಂ ತಂ, ಭಿಕ್ಖವೇ, ಅರಜಂ ಅನುಪಾಯಾಸನ್ತಿ ವದಾಮಿ.

‘‘ಫಸ್ಸೇ ಚೇ, ಭಿಕ್ಖವೇ, ಆಹಾರೇ… ಮನೋಸಞ್ಚೇತನಾಯ ಚೇ, ಭಿಕ್ಖವೇ, ಆಹಾರೇ… ವಿಞ್ಞಾಣೇ ಚೇ, ಭಿಕ್ಖವೇ, ಆಹಾರೇ ನತ್ಥಿ ರಾಗೋ, ನತ್ಥಿ ನನ್ದೀ…ಪೇ… ಅರಜಂ ಅನುಪಾಯಾಸನ್ತಿ ವದಾಮೀ’’ತಿ [ಸಂ. ನಿ. ೨.೬೪]. ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ಅನಾಗತಂ ಅತ್ಥೀ’’ತಿ.

ಸಬ್ಬಮತ್ಥೀತಿಕಥಾ ನಿಟ್ಠಿತಾ.