೨. ಸಂಸನ್ದನಬ್ರಹ್ಮಚರಿಯಕಥಾ

೨೭೩. ಅನಾಗಾಮೀ ಪುಗ್ಗಲೋ ಇಧ ಭಾವಿತೇನ ಮಗ್ಗೇನ ತತ್ಥ ಫಲಂ ಸಚ್ಛಿಕರೋತೀತಿ? ಆಮನ್ತಾ. ಸೋತಾಪನ್ನೋ ಪುಗ್ಗಲೋ ತತ್ಥ ಭಾವಿತೇನ ಮಗ್ಗೇನ ಇಧ ಫಲಂ ಸಚ್ಛಿಕರೋತೀತಿ? ನ ಹೇವಂ ವತ್ತಬ್ಬೇ.

ಅನಾಗಾಮೀ ಪುಗ್ಗಲೋ ಇಧ ಭಾವಿತೇನ ಮಗ್ಗೇನ ತತ್ಥ ಫಲಂ ಸಚ್ಛಿಕರೋತೀತಿ? ಆಮನ್ತಾ. ಸಕದಾಗಾಮೀ ಪುಗ್ಗಲೋ ಇಧ ಪರಿನಿಬ್ಬಾಯಿಪುಗ್ಗಲೋ [ಇಧಪರಿನಿಬ್ಬಾಯೀ (?)] ತತ್ಥ ಭಾವಿತೇನ ಮಗ್ಗೇನ ಇಧ ಫಲಂ ಸಚ್ಛಿಕರೋತೀತಿ? ನ ಹೇವಂ ವತ್ತಬ್ಬೇ.

ಸೋತಾಪನ್ನೋ ಪುಗ್ಗಲೋ ಇಧ ಭಾವಿತೇನ ಮಗ್ಗೇನ ಇಧ ಫಲಂ ಸಚ್ಛಿಕರೋತೀತಿ? ಆಮನ್ತಾ. ಅನಾಗಾಮೀ ಪುಗ್ಗಲೋ ತತ್ಥ ಭಾವಿತೇನ ಮಗ್ಗೇನ ತತ್ಥ ಫಲಂ ಸಚ್ಛಿಕರೋತೀತಿ? ನ ಹೇವಂ ವತ್ತಬ್ಬೇ.

ಸಕದಾಗಾಮೀ ಪುಗ್ಗಲೋ ಇಧ ಪರಿನಿಬ್ಬಾಯಿಪುಗ್ಗಲೋ ಇಧ ಭಾವಿತೇನ ಮಗ್ಗೇನ ಇಧ ಫಲಂ ಸಚ್ಛಿಕರೋತೀತಿ? ಆಮನ್ತಾ. ಅನಾಗಾಮೀ ಪುಗ್ಗಲೋ ತತ್ಥ ಭಾವಿತೇನ ಮಗ್ಗೇನ ತತ್ಥ ಫಲಂ ಸಚ್ಛಿಕರೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಇಧ ವಿಹಾಯ ನಿಟ್ಠಸ್ಸ ಪುಗ್ಗಲಸ್ಸ ಮಗ್ಗೋ ಚ ಭಾವೀಯತಿ, ನ ಚ ಕಿಲೇಸಾ ಪಹೀಯನ್ತೀತಿ? ಆಮನ್ತಾ. ಸೋತಾಪತ್ತಿಫಲಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ ಮಗ್ಗೋ ಚ ಭಾವೀಯತಿ, ನ ಚ ಕಿಲೇಸಾ ಪಹೀಯನ್ತೀತಿ? ನ ಹೇವಂ ವತ್ತಬ್ಬೇ…ಪೇ….

ಇಧ ವಿಹಾಯ ನಿಟ್ಠಸ್ಸ ಪುಗ್ಗಲಸ್ಸ ಮಗ್ಗೋ ಚ ಭಾವೀಯತಿ, ನ ಚ ಕಿಲೇಸಾ ಪಹೀಯನ್ತೀತಿ? ಆಮನ್ತಾ. ಸಕದಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ…ಪೇ… ಅರಹತ್ತಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ ಮಗ್ಗೋ ಚ ಭಾವೀಯತಿ, ನ ಚ ಕಿಲೇಸಾ ಪಹೀಯನ್ತೀತಿ? ನ ಹೇವಂ ವತ್ತಬ್ಬೇ…ಪೇ….

ಸೋತಾಪತ್ತಿಫಲಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ ಅಪುಬ್ಬಂ ಅಚರಿಮಂ ಮಗ್ಗೋ ಚ ಭಾವೀಯತಿ, ಕಿಲೇಸಾ ಚ ಪಹೀಯನ್ತೀತಿ? ಆಮನ್ತಾ. ಇಧ ವಿಹಾಯ ನಿಟ್ಠಸ್ಸ ಪುಗ್ಗಲಸ್ಸ ಅಪುಬ್ಬಂ ಅಚರಿಮಂ ಮಗ್ಗೋ ಚ ಭಾವೀಯತಿ, ಕಿಲೇಸಾ ಚ ಪಹೀಯನ್ತೀತಿ? ನ ಹೇವಂ ವತ್ತಬ್ಬೇ.

ಸಕದಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ…ಪೇ… ಅರಹತ್ತಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ ಅಪುಬ್ಬಂ ಅಚರಿಮಂ ಮಗ್ಗೋ ಚ ಭಾವೀಯತಿ, ಕಿಲೇಸಾ ಚ ಪಹೀಯನ್ತೀತಿ? ಆಮನ್ತಾ. ಇಧ ವಿಹಾಯ ನಿಟ್ಠಸ್ಸ ಪುಗ್ಗಲಸ್ಸ ಅಪುಬ್ಬಂ ಅಚರಿಮಂ ಮಗ್ಗೋ ಚ ಭಾವೀಯತಿ, ಕಿಲೇಸಾ ಚ ಪಹೀಯನ್ತೀತಿ? ನ ಹೇವಂ ವತ್ತಬ್ಬೇ.

ಅನಾಗಾಮೀ ಪುಗ್ಗಲೋ ಕತಕರಣೀಯೋ ಭಾವಿತಭಾವನೋ ತತ್ಥ ಉಪಪಜ್ಜತೀತಿ? ಆಮನ್ತಾ. ಅರಹಾ ಉಪಪಜ್ಜತೀತಿ? ನ ಹೇವಂ ವತ್ತಬ್ಬೇ.

ಅರಹಾ ಉಪಪಜ್ಜತೀತಿ? ಆಮನ್ತಾ. ಅತ್ಥಿ ಅರಹತೋ ಪುನಬ್ಭವೋತಿ? ನ ಹೇವಂ ವತ್ತಬ್ಬೇ.

ಅತ್ಥಿ ಅರಹತೋ ಪುನಬ್ಭವೋತಿ? ಆಮನ್ತಾ. ಅರಹಾ ಭವೇನ ಭವಂ ಗಚ್ಛತಿ, ಗತಿಯಾ ಗತಿಂ ಗಚ್ಛತಿ, ಸಂಸಾರೇನ ಸಂಸಾರಂ ಗಚ್ಛತಿ, ಉಪಪತ್ತಿಯಾ ಉಪಪತ್ತಿಂ ಗಚ್ಛತೀತಿ? ನ ಹೇವಂ ವತ್ತಬ್ಬೇ.

ಅನಾಗಾಮೀ ಪುಗ್ಗಲೋ ಕತಕರಣೀಯೋ ಭಾವಿತಭಾವನೋ ಅನೋಹಟಭಾರೋ ತತ್ಥ ಉಪಪಜ್ಜತೀತಿ? ಆಮನ್ತಾ. ಭಾರೋಹರಣಾಯ ಪುನ ಮಗ್ಗಂ ಭಾವೇತೀತಿ? ನ ಹೇವಂ ವತ್ತಬ್ಬೇ.

ಅನಾಗಾಮೀ ಪುಗ್ಗಲೋ ಕತಕರಣೀಯೋ ಭಾವಿತಭಾವನೋ ಅಪರಿಞ್ಞಾತದುಕ್ಖೋ ಅಪ್ಪಹೀನಕಿಲೇಸೋ ಅಸಚ್ಛಿಕತನಿರೋಧೋ ಅಪ್ಪಟಿವಿದ್ಧಾಕುಪ್ಪೋ ತತ್ಥ ಉಪಪಜ್ಜತೀತಿ? ಆಮನ್ತಾ. ಅಕುಪ್ಪಪಟಿವೇಧಾಯ ಪುನ ಮಗ್ಗಂ ಭಾವೇತೀತಿ? ನ ಹೇವಂ ವತ್ತಬ್ಬೇ.

ಅನಾಗಾಮೀ ಪುಗ್ಗಲೋ ಕತಕರಣೀಯೋ ಭಾವಿತಭಾವನೋ ಅನೋಹಟಭಾರೋ ತತ್ಥ ಉಪಪಜ್ಜತಿ, ನ ಚ ಭಾರೋಹರಣಾಯ ಪುನ ಮಗ್ಗಂ ಭಾವೇತೀತಿ? ಆಮನ್ತಾ. ಅನೋಹಟಭಾರೋ ಚ ತತ್ಥ ಪರಿನಿಬ್ಬಾಯತೀತಿ? ನ ಹೇವಂ ವತ್ತಬ್ಬೇ.

ಅನಾಗಾಮೀ ಪುಗ್ಗಲೋ ಕತಕರಣೀಯೋ ಭಾವಿತಭಾವನೋ ಅಪರಿಞ್ಞಾತದುಕ್ಖೋ ಅಪ್ಪಹೀನಕಿಲೇಸೋ ಅಸಚ್ಛಿಕತನಿರೋಧೋ ಅಪ್ಪಟಿವಿದ್ಧಾಕುಪ್ಪೋ ತತ್ಥ ಉಪಪಜ್ಜತಿ, ನ ಚ ಅಕುಪ್ಪಪಟಿವೇಧಾಯ ಪುನ ಮಗ್ಗಂ ಭಾವೇತೀತಿ? ಆಮನ್ತಾ. ಅಪ್ಪಟಿವಿದ್ಧಾಕುಪ್ಪೋ ಚ ತತ್ಥ ಪರಿನಿಬ್ಬಾಯತೀತಿ? ನ ಹೇವಂ ವತ್ತಬ್ಬೇ. ಯಥಾ ಮಿಗೋ ಸಲ್ಲೇನ ವಿದ್ಧೋ ದೂರಮ್ಪಿ ಗನ್ತ್ವಾ ಕಾಲಂ ಕರೋತಿ, ಏವಮೇವಂ ಅನಾಗಾಮೀ ಪುಗ್ಗಲೋ ಇಧ ಭಾವಿತೇನ ಮಗ್ಗೇನ ತತ್ಥ ಫಲಂ ಸಚ್ಛಿಕರೋತೀತಿ.

ಯಥಾ ಮಿಗೋ ಸಲ್ಲೇನ ವಿದ್ಧೋ ದೂರಮ್ಪಿ ಗನ್ತ್ವಾ ಸಸಲ್ಲೋವ ಕಾಲಂ ಕರೋತಿ, ಏವಮೇವಂ ಅನಾಗಾಮೀ ಪುಗ್ಗಲೋ ಇಧ ಭಾವಿತೇನ ಮಗ್ಗೇನ ತತ್ಥ ಸಸಲ್ಲೋವ ಪರಿನಿಬ್ಬಾಯತೀತಿ? ನ ಹೇವಂ ವತ್ತಬ್ಬೇ…ಪೇ….

ಬ್ರಹ್ಮಚರಿಯಕಥಾ ನಿಟ್ಠಿತಾ.