(೧೮೪) ೮. ಸದ್ದಂ ಸುಣಾತೀತಿಕಥಾ

೮೨೩. ಸಮಾಪನ್ನೋ ಸದ್ದಂ ಸುಣಾತೀತಿ? ಆಮನ್ತಾ. ಸಮಾಪನ್ನೋ ಚಕ್ಖುನಾ ರೂಪಂ ಪಸ್ಸತಿ…ಪೇ… ಸೋತೇನ…ಪೇ… ಘಾನೇನ…ಪೇ… ಜಿವ್ಹಾಯ…ಪೇ… ಕಾಯೇನ ಫೋಟ್ಠಬ್ಬಂ ಫುಸತೀತಿ? ನ ಹೇವಂ ವತ್ತಬ್ಬೇ…ಪೇ….

ಸಮಾಪನ್ನೋ ಸದ್ದಂ ಸುಣಾತೀತಿ? ಆಮನ್ತಾ. ಸೋತವಿಞ್ಞಾಣಸಮಙ್ಗೀ ಸಮಾಪನ್ನೋತಿ? ನ ಹೇವಂ ವತ್ತಬ್ಬೇ. ನನು ಸಮಾಧಿ ಮನೋವಿಞ್ಞಾಣಸಮಙ್ಗಿಸ್ಸಾತಿ? ಆಮನ್ತಾ. ಹಞ್ಚಿ ಸಮಾಧಿ ಮನೋವಿಞ್ಞಾಣಸಮಙ್ಗಿಸ್ಸ, ನೋ ಚ ವತ ರೇ ವತ್ತಬ್ಬೇ – ‘‘ಸಮಾಪನ್ನೋ ಸದ್ದಂ ಸುಣಾತೀ’’ತಿ.

ಸಮಾಧಿ ಮನೋವಿಞ್ಞಾಣಸಮಙ್ಗಿಸ್ಸ, ಸೋತವಿಞ್ಞಾಣಸಮಙ್ಗೀ ಸದ್ದಂ ಸುಣಾತೀತಿ? ಆಮನ್ತಾ. ಹಞ್ಚಿ ಸಮಾಧಿ ಮನೋವಿಞ್ಞಾಣಸಮಙ್ಗಿಸ್ಸ, ಸೋತವಿಞ್ಞಾಣಸಮಙ್ಗೀ ಸದ್ದಂ ಸುಣಾತಿ, ನೋ ಚ ವತ ರೇ ವತ್ತಬ್ಬೇ – ‘‘ಸಮಾಪನ್ನೋ ಸದ್ದಂ ಸುಣಾತೀ’’ತಿ. ಸಮಾಧಿ ಮನೋವಿಞ್ಞಾಣಸಮಙ್ಗಿಸ್ಸ, ಸೋತವಿಞ್ಞಾಣಸಮಙ್ಗೀ ಸದ್ದಂ ಸುಣಾತೀತಿ? ಆಮನ್ತಾ. ದ್ವಿನ್ನಂ ಫಸ್ಸಾನಂ…ಪೇ… ದ್ವಿನ್ನಂ ಚಿತ್ತಾನಂ ಸಮೋಧಾನಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

೮೨೪. ನ ವತ್ತಬ್ಬಂ – ‘‘ಸಮಾಪನ್ನೋ ಸದ್ದಂ ಸುಣಾತೀ’’ತಿ? ಆಮನ್ತಾ. ನನು ಪಠಮಸ್ಸ ಝಾನಸ್ಸ ಸದ್ದೋ ಕಣ್ಟಕೋ ವುತ್ತೋ ಭಗವತಾತಿ? ಆಮನ್ತಾ. ಹಞ್ಚಿ ಪಠಮಸ್ಸ ಝಾನಸ್ಸ ಸದ್ದೋ ಕಣ್ಟಕೋ ವುತ್ತೋ ಭಗವತಾ, ತೇನ ವತ ರೇ ವತ್ತಬ್ಬೇ – ‘‘ಸಮಾಪನ್ನೋ ಸದ್ದಂ ಸುಣಾತೀ’’ತಿ.

೮೨೫. ಪಠಮಸ್ಸ ಝಾನಸ್ಸ ಸದ್ದೋ ಕಣ್ಟಕೋ ವುತ್ತೋ ಭಗವತಾತಿ, ಸಮಾಪನ್ನೋ ಸದ್ದಂ ಸುಣಾತೀತಿ? ಆಮನ್ತಾ. ದುತಿಯಸ್ಸ ಝಾನಸ್ಸ ವಿತಕ್ಕೋ ವಿಚಾರೋ ಕಣ್ಟಕೋ ವುತ್ತೋ ಭಗವತಾ, ಅತ್ಥಿ ತಸ್ಸ ವಿತಕ್ಕವಿಚಾರಾತಿ? ನ ಹೇವಂ ವತ್ತಬ್ಬೇ…ಪೇ….

ಪಠಮಸ್ಸ ಝಾನಸ್ಸ ಸದ್ದೋ ಕಣ್ಟಕೋ ವುತ್ತೋ ಭಗವತಾತಿ, ಸಮಾಪನ್ನೋ ಸದ್ದಂ ಸುಣಾತೀತಿ? ಆಮನ್ತಾ. ತತಿಯಸ್ಸ ಝಾನಸ್ಸ ಪೀತಿ ಕಣ್ಟಕೋ…ಪೇ… ಚತುತ್ಥಸ್ಸ ಝಾನಸ್ಸ ಅಸ್ಸಾಸಪಸ್ಸಾಸೋ ಕಣ್ಟಕೋ … ಆಕಾಸಾನಞ್ಚಾಯತನಂ ಸಮಾಪನ್ನಸ್ಸ ರೂಪಸಞ್ಞಾ ಕಣ್ಟಕೋ… ವಿಞ್ಞಾಣಞ್ಚಾಯತನಂ ಸಮಾಪನ್ನಸ್ಸ ಆಕಾಸಾನಞ್ಚಾಯತನಸಞ್ಞಾ ಕಣ್ಟಕೋ… ಆಕಿಞ್ಚಞ್ಞಾಯತನಂ ಸಮಾಪನ್ನಸ್ಸ ವಿಞ್ಞಾಣಞ್ಚಾಯತನಸಞ್ಞಾ ಕಣ್ಟಕೋ… ನೇವಸಞ್ಞಾನಾಸಞ್ಞಾಯತನಂ ಸಮಾಪನ್ನಸ್ಸ ಆಕಿಞ್ಚಞ್ಞಾಯತನಸಞ್ಞಾ ಕಣ್ಟಕೋ… ಸಞ್ಞಾವೇದಯಿತನಿರೋಧಂ ಸಮಾಪನ್ನಸ್ಸ ಸಞ್ಞಾ ಚ ವೇದನಾ ಚ ಕಣ್ಟಕೋ ವುತ್ತೋ ಭಗವತಾ, ಅತ್ಥಿ ತಸ್ಸ ಸಞ್ಞಾ ಚ ವೇದನಾ ಚಾತಿ? ನ ಹೇವಂ ವತ್ತಬ್ಬೇ…ಪೇ….

ಸದ್ದಂ ಸುಣಾತೀತಿಕಥಾ ನಿಟ್ಠಿತಾ.