(೧೮೧) ೫. ಏಕಮಗ್ಗಕಥಾ

೮೧೦. ಏಕೇನ ಅರಿಯಮಗ್ಗೇನ ಚತ್ತಾರಿ ಸಾಮಞ್ಞಫಲಾನಿ ಸಚ್ಛಿಕರೋತೀತಿ? ಆಮನ್ತಾ. ಚತುನ್ನಂ ಫಸ್ಸಾನಂ…ಪೇ… ಚತುನ್ನಂ ಸಞ್ಞಾನಂ ಸಮೋಧಾನಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ… ಏಕೇನ ಅರಿಯಮಗ್ಗೇನ ಚತ್ತಾರಿ ಸಾಮಞ್ಞಫಲಾನಿ ಸಚ್ಛಿಕರೋತೀತಿ? ಆಮನ್ತಾ. ಸೋತಾಪತ್ತಿಮಗ್ಗೇನಾತಿ? ನ ಹೇವಂ ವತ್ತಬ್ಬೇ…ಪೇ… ಸಕದಾಗಾಮಿ…ಪೇ… ಅನಾಗಾಮಿಮಗ್ಗೇನಾತಿ? ನ ಹೇವಂ ವತ್ತಬ್ಬೇ…ಪೇ….

ಕತಮೇನ ಮಗ್ಗೇನಾತಿ? ಅರಹತ್ತಮಗ್ಗೇನಾತಿ. ಅರಹತ್ತಮಗ್ಗೇನ ಸಕ್ಕಾಯದಿಟ್ಠಿಂ ವಿಚಿಕಿಚ್ಛಂ ಸೀಲಬ್ಬತಪರಾಮಾಸಂ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ… ಅರಹತ್ತಮಗ್ಗೇನ ಸಕ್ಕಾಯದಿಟ್ಠಿಂ ವಿಚಿಕಿಚ್ಛಂ ಸೀಲಬ್ಬತಪರಾಮಾಸಂ ಜಹತೀತಿ? ಆಮನ್ತಾ. ನನು ತಿಣ್ಣಂ ಸಂಯೋಜನಾನಂ ಪಹಾನಂ ಸೋತಾಪತ್ತಿಫಲಂ ವುತ್ತಂ ಭಗವತಾತಿ? ಆಮನ್ತಾ. ಹಞ್ಚಿ ತಿಣ್ಣಂ ಸಂಯೋಜನಾನಂ ಪಹಾನಂ ಸೋತಾಪತ್ತಿಫಲಂ ವುತ್ತಂ ಭಗವತಾ, ನೋ ಚ ವತ ರೇ ವತ್ತಬ್ಬೇ – ‘‘ಅರಹತ್ತಮಗ್ಗೇನ ಸಕ್ಕಾಯದಿಟ್ಠಿಂ ವಿಚಿಕಿಚ್ಛಂ ಸೀಲಬ್ಬತಪರಾಮಾಸಂ ಜಹತೀ’’ತಿ.

ಅರಹತ್ತಮಗ್ಗೇನ ಓಳಾರಿಕಂ ಕಾಮರಾಗಂ ಓಳಾರಿಕಂ ಬ್ಯಾಪಾದಂ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ… ಅರಹತ್ತಮಗ್ಗೇನ ಓಳಾರಿಕಂ ಕಾಮರಾಗಂ ಓಳಾರಿಕಂ ಬ್ಯಾಪಾದಂ ಜಹತೀತಿ? ಆಮನ್ತಾ. ನನು ಕಾಮರಾಗಬ್ಯಾಪಾದಾನಂ ತನುಭಾವಂ ಸಕದಾಗಾಮಿಫಲಂ ವುತ್ತಂ ಭಗವತಾತಿ? ಆಮನ್ತಾ. ಹಞ್ಚಿ ಕಾಮರಾಗಬ್ಯಾಪಾದಾನಂ ತನುಭಾವಂ ಸಕದಾಗಾಮಿಫಲಂ ವುತ್ತಂ ಭಗವತಾ, ನೋ ಚ ವತ ರೇ ವತ್ತಬ್ಬೇ – ‘‘ಅರಹತ್ತಮಗ್ಗೇನ ಓಳಾರಿಕಂ ಕಾಮರಾಗಂ ಓಳಾರಿಕಂ ಬ್ಯಾಪಾದಂ ಜಹತೀ’’ತಿ.

ಅರಹತ್ತಮಗ್ಗೇನ ಅಣುಸಹಗತಂ ಕಾಮರಾಗಂ ಅಣುಸಹಗತಂ ಬ್ಯಾಪಾದಂ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ… ಅರಹತ್ತಮಗ್ಗೇನ ಅಣುಸಹಗತಂ ಕಾಮರಾಗಂ ಅಣುಸಹಗತಂ ಬ್ಯಾಪಾದಂ ಜಹತೀತಿ? ಆಮನ್ತಾ. ನನು ಕಾಮರಾಗಬ್ಯಾಪಾದಾನಂ ಅನವಸೇಸಪ್ಪಹಾನಂ ಅನಾಗಾಮಿಫಲಂ ವುತ್ತಂ ಭಗವತಾತಿ? ಆಮನ್ತಾ. ಹಞ್ಚಿ ಕಾಮರಾಗಬ್ಯಾಪಾದಾನಂ ಅನವಸೇಸಪ್ಪಹಾನಂ ಅನಾಗಾಮಿಫಲಂ ವುತ್ತಂ ಭಗವತಾ, ನೋ ಚ ವತ ರೇ ವತ್ತಬ್ಬೇ – ‘‘ಅರಹತ್ತಮಗ್ಗೇನ ಅಣುಸಹಗತಂ ಕಾಮರಾಗಂ ಅಣುಸಹಗತಂ ಬ್ಯಾಪಾದಂ ಜಹತೀ’’ತಿ.

೮೧೧. ನ ವತ್ತಬ್ಬಂ – ‘‘ಏಕೇನ ಅರಿಯಮಗ್ಗೇನ ಚತ್ತಾರಿ ಸಾಮಞ್ಞಫಲಾನಿ ಸಚ್ಛಿಕರೋತೀ’’ತಿ? ಆಮನ್ತಾ. ಭಗವತಾ ಸೋತಾಪತ್ತಿಮಗ್ಗೋ ಭಾವಿತೋತಿ? ಆಮನ್ತಾ. ಭಗವಾ ಸೋತಾಪನ್ನೋತಿ? ನ ಹೇವಂ ವತ್ತಬ್ಬೇ…ಪೇ… ಭಗವತಾ ಸಕದಾಗಾಮಿ…ಪೇ… ಅನಾಗಾಮಿಮಗ್ಗೋ ಭಾವಿತೋತಿ? ಆಮನ್ತಾ. ಭಗವಾ ಅನಾಗಾಮೀತಿ? ನ ಹೇವಂ ವತ್ತಬ್ಬೇ…ಪೇ….

೮೧೨. ಭಗವಾ ಏಕೇನ ಅರಿಯಮಗ್ಗೇನ ಚತ್ತಾರಿ ಸಾಮಞ್ಞಫಲಾನಿ ಸಚ್ಛಿಕರೋತಿ, ಸಾವಕಾ ಚತೂಹಿ ಅರಿಯಮಗ್ಗೇಹಿ ಚತ್ತಾರಿ ಸಾಮಞ್ಞಫಲಾನಿ ಸಚ್ಛಿಕರೋನ್ತೀತಿ? ಆಮನ್ತಾ. ಸಾವಕಾ ಬುದ್ಧಸ್ಸ ಭಗವತೋ ಅದಿಟ್ಠಂ ದಕ್ಖನ್ತಿ ಅನಧಿಗತಂ ಅಧಿಗಚ್ಛನ್ತಿ ಅಸಚ್ಛಿಕತಂ ಸಚ್ಛಿಕರೋನ್ತೀತಿ? ನ ಹೇವಂ ವತ್ತಬ್ಬೇ…ಪೇ….

ಏಕಮಗ್ಗಕಥಾ ನಿಟ್ಠಿತಾ.