೧೮. ಅಟ್ಠಾರಸಮವಗ್ಗೋ

(೧೮೦) ೪. ಗನ್ಧಜಾತಿಕಥಾ

೮೦೯. ಬುದ್ಧಸ್ಸ ಭಗವತೋ ಉಚ್ಚಾರಪಸ್ಸಾವೋ ಅತಿವಿಯ ಅಞ್ಞೇ ಗನ್ಧಜಾತೇ ಅಧಿಗ್ಗಣ್ಹಾತೀತಿ? ಆಮನ್ತಾ. ಭಗವಾ ಗನ್ಧಭೋಜೀತಿ? ನ ಹೇವಂ ವತ್ತಬ್ಬೇ…ಪೇ… ನನು ಭಗವಾ ಓದನಕುಮ್ಮಾಸಂ ಭುಞ್ಜತೀತಿ? ಆಮನ್ತಾ. ಹಞ್ಚಿ ಭಗವಾ ಓದನಕುಮ್ಮಾಸಂ ಭುಞ್ಜತಿ, ನೋ ಚ ವತ ರೇ ವತ್ತಬ್ಬೇ – ‘‘ಬುದ್ಧಸ್ಸ ಭಗವತೋ ಉಚ್ಚಾರಪಸ್ಸಾವೋ ಅತಿವಿಯ ಅಞ್ಞೇ ಗನ್ಧಜಾತೇ ಅಧಿಗ್ಗಣ್ಹಾತೀ’’ತಿ.

ಬುದ್ಧಸ್ಸ ಭಗವತೋ ಉಚ್ಚಾರಪಸ್ಸಾವೋ ಅತಿವಿಯ ಅಞ್ಞೇ ಗನ್ಧಜಾತೇ ಅಧಿಗ್ಗಣ್ಹಾತೀತಿ? ಆಮನ್ತಾ. ಅತ್ಥಿ ಕೇಚಿ ಬುದ್ಧಸ್ಸ ಭಗವತೋ ಉಚ್ಚಾರಪಸ್ಸಾವಂ ನ್ಹಾಯನ್ತಿ ವಿಲಿಮ್ಪನ್ತಿ ಉಚ್ಛಾದೇನ್ತಿ [ಉಚ್ಚಾರೇನ್ತಿ (ಸೀ. ಪೀ. ಕ.)] ಪೇಳಾಯ ಪಟಿಸಾಮೇನ್ತಿ ಕರಣ್ಡಾಯ ನಿಕ್ಖಿಪನ್ತಿ ಆಪಣೇ ಪಸಾರೇನ್ತಿ, ತೇನ ಚ ಗನ್ಧೇನ ಗನ್ಧಕರಣೀಯಂ ಕರೋನ್ತೀತಿ? ನ ಹೇವಂ ವತ್ತಬ್ಬೇ…ಪೇ….

ಗನ್ಧಜಾತಿಕಥಾ ನಿಟ್ಠಿತಾ.