(೧೭೮) ೨. ಧಮ್ಮದೇಸನಾಕಥಾ

೮೦೪. ನ ವತ್ತಬ್ಬಂ – ‘‘ಬುದ್ಧೇನ ಭಗವತಾ ಧಮ್ಮೋ ದೇಸಿತೋ’’ತಿ? ಆಮನ್ತಾ. ಕೇನ ದೇಸಿತೋತಿ? ಅಭಿನಿಮ್ಮಿತೇನ ದೇಸಿತೋತಿ. ಅಭಿನಿಮ್ಮಿತೋ ಜಿನೋ ಸತ್ಥಾ ಸಮ್ಮಾಸಮ್ಬುದ್ಧೋ ಸಬ್ಬಞ್ಞೂ ಸಬ್ಬದಸ್ಸಾವೀ ಧಮ್ಮಸ್ಸಾಮೀ ಧಮ್ಮಪ್ಪಟಿಸರಣೋತಿ? ನ ಹೇವಂ ವತ್ತಬ್ಬೇ…ಪೇ….

ನ ವತ್ತಬ್ಬಂ – ‘‘ಬುದ್ಧೇನ ಭಗವತಾ ಧಮ್ಮೋ ದೇಸಿತೋ’’ತಿ? ಆಮನ್ತಾ. ಕೇನ ದೇಸಿತೋತಿ? ಆಯಸ್ಮತಾ ಆನನ್ದೇನ ದೇಸಿತೋತಿ. ಆಯಸ್ಮಾ ಆನನ್ದೋ ಜಿನೋ ಸತ್ಥಾ ಸಮ್ಮಾಸಮ್ಬುದ್ಧೋ ಸಬ್ಬಞ್ಞೂ ಸಬ್ಬದಸ್ಸಾವೀ ಧಮ್ಮಸ್ಸಾಮೀ ಧಮ್ಮಪ್ಪಟಿಸರಣೋತಿ? ನ ಹೇವಂ ವತ್ತಬ್ಬೇ…ಪೇ….

೮೦೫. ನ ವತ್ತಬ್ಬಂ – ‘‘ಬುದ್ಧೇನ ಭಗವತಾ ಧಮ್ಮೋ ದೇಸಿತೋ’’ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಸಂಖಿತ್ತೇನಪಿ ಖೋ ಅಹಂ, ಸಾರಿಪುತ್ತ, ಧಮ್ಮಂ ದೇಸೇಯ್ಯಂ; ವಿತ್ಥಾರೇನಪಿ ಖೋ ಅಹಂ, ಸಾರಿಪುತ್ತ, ಧಮ್ಮಂ ದೇಸೇಯ್ಯಂ; ಸಂಖಿತ್ತವಿತ್ಥಾರೇನಪಿ ಖೋ ಅಹಂ, ಸಾರಿಪುತ್ತ, ಧಮ್ಮಂ ದೇಸೇಯ್ಯಂ; ಅಞ್ಞಾತಾರೋ ಚ ದುಲ್ಲಭಾ’’ತಿ [ಅ. ನಿ. ೩.೩೩ ಸಾರಿಪುತ್ತಸುತ್ತೇ]! ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ಬುದ್ಧೇನ ಭಗವತಾ ಧಮ್ಮೋ ದೇಸಿತೋತಿ.

೮೦೬. ನ ವತ್ತಬ್ಬಂ – ‘‘ಬುದ್ಧೇನ ಭಗವತಾ ಧಮ್ಮೋ ದೇಸಿತೋ’’ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘‘ಅಭಿಞ್ಞಾಯಾಹಂ, ಭಿಕ್ಖವೇ, ಧಮ್ಮಂ ದೇಸೇಮಿ, ನೋ ಅನಭಿಞ್ಞಾಯ; ಸನಿದಾನಾಹಂ, ಭಿಕ್ಖವೇ, ಧಮ್ಮಂ ದೇಸೇಮಿ, ನೋ ಅನಿದಾನಂ; ಸಪ್ಪಾಟಿಹಾರಿಯಾಹಂ, ಭಿಕ್ಖವೇ, ಧಮ್ಮಂ ದೇಸೇಮಿ, ನೋ ಅಪ್ಪಾಟಿಹಾರಿಯಂ; ತಸ್ಸ [ಯಞ್ಚಸ್ಸ (ಸೀ. ಪೀ. ಕ.)] ಮಯ್ಹಂ, ಭಿಕ್ಖವೇ, ಅಭಿಞ್ಞಾಯ ಧಮ್ಮಂ ದೇಸಯತೋ ನೋ ಅನಭಿಞ್ಞಾಯ, ಸನಿದಾನಂ ಧಮ್ಮಂ ದೇಸಯತೋ ನೋ ಅನಿದಾನಂ, ಸಪ್ಪಾಟಿಹಾರಿಯಂ ಧಮ್ಮಂ ದೇಸಯತೋ ನೋ ಅಪ್ಪಾಟಿಹಾರಿಯಂ ಕರಣೀಯೋ ಓವಾದೋ ಕರಣೀಯಾ ಅನುಸಾಸನೀ; ಅಲಞ್ಚ ಪನ ವೋ, ಭಿಕ್ಖವೇ, ತುಟ್ಠಿಯಾ ಅಲಂ ಅತ್ತಮನತಾಯ ಅಲಂ ಸೋಮನಸ್ಸಾಯ – ಸಮ್ಮಾಸಮ್ಬುದ್ಧೋ ಭಗವಾ, ಸ್ವಾಕ್ಖಾತೋ ಧಮ್ಮೋ, ಸುಪ್ಪಟಿಪನ್ನೋ ಸಙ್ಘೋ’ತಿ. ಇಮಸ್ಮಿಞ್ಚ ಪನ ವೇಯ್ಯಾಕರಣಸ್ಮಿಂ ಭಞ್ಞಮಾನೇ ದಸಸಹಸ್ಸಿಲೋಕಧಾತು ಅಕಮ್ಪಿತ್ಥಾ’’ತಿ [ಅ. ನಿ. ೩.೧೨೬]! ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ಬುದ್ಧೇನ ಭಗವತಾ ಧಮ್ಮೋ ದೇಸಿತೋತಿ.

ಧಮ್ಮದೇಸನಾಕಥಾ ನಿಟ್ಠಿತಾ.