೧೪. ಚುದ್ದಸಮವಗ್ಗೋ

(೧೩೯) ೪. ಅರಿಯರೂಪಕಥಾ

೬೯೮. ಅರಿಯರೂಪಂ ಮಹಾಭೂತಾನಂ ಉಪಾದಾಯಾತಿ? ಆಮನ್ತಾ. ಅರಿಯರೂಪಂ ಕುಸಲನ್ತಿ? ಆಮನ್ತಾ. ಮಹಾಭೂತಾ ಕುಸಲಾತಿ? ನ ಹೇವಂ ವತ್ತಬ್ಬೇ …ಪೇ… ಮಹಾಭೂತಾ ಅಬ್ಯಾಕತಾತಿ? ಆಮನ್ತಾ. ಅರಿಯರೂಪಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ… ಅರಿಯರೂಪಂ ಮಹಾಭೂತಾನಂ ಉಪಾದಾಯಾತಿ? ಆಮನ್ತಾ. ಅರಿಯರೂಪಂ ಅನಾಸವಂ ಅಸಂಯೋಜನಿಯಂ ಅಗನ್ಥನಿಯಂ ಅನೋಘನಿಯಂ ಅಯೋಗನಿಯಂ ಅನೀವರಣಿಯಂ ಅಪರಾಮಟ್ಠಂ ಅನುಪಾದಾನಿಯಂ ಅಸಂಕಿಲೇಸಿಯನ್ತಿ? ಆಮನ್ತಾ. ಮಹಾಭೂತಾ ಅನಾಸವಾ…ಪೇ… ಅಸಂಕಿಲೇಸಿಯಾತಿ? ನ ಹೇವಂ ವತ್ತಬ್ಬೇ…ಪೇ… ಮಹಾಭೂತಾ ಸಾಸವಾ ಸಂಯೋಜನಿಯಾ…ಪೇ… ಸಂಕಿಲೇಸಿಯಾತಿ? ಆಮನ್ತಾ. ಅರಿಯರೂಪಂ ಸಾಸವಂ ಸಂಯೋಜನಿಯಂ…ಪೇ… ಸಂಕಿಲೇಸಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

೬೯೯. ನ ವತ್ತಬ್ಬಂ – ‘‘ಅರಿಯರೂಪಂ ಮಹಾಭೂತಾನಂ ಉಪಾದಾಯಾ’’ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಯಂ ಕಿಞ್ಚಿ, ಭಿಕ್ಖವೇ, ರೂಪಂ ಚತ್ತಾರಿ ಮಹಾಭೂತಾನಿ ಚತುನ್ನಞ್ಚ ಮಹಾಭೂತಾನಂ ಉಪಾದಾಯರೂಪ’’ನ್ತಿ [ಮ. ನಿ. ೧.೩೪೭; ಅ. ನಿ. ೧೧.೧೫]! ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ಅರಿಯರೂಪಂ ಮಹಾಭೂತಾನಂ ಉಪಾದಾಯಾತಿ.

ಅರಿಯರೂಪಕಥಾ ನಿಟ್ಠಿತಾ.