(೧೩೪) ೯. ಧಮ್ಮತಣ್ಹಾ ಅಬ್ಯಾಕತಾತಿಕಥಾ

೬೭೬. ಧಮ್ಮತಣ್ಹಾ ಅಬ್ಯಾಕತಾತಿ? ಆಮನ್ತಾ. ವಿಪಾಕಾಬ್ಯಾಕತಾ ಕಿರಿಯಾಬ್ಯಾಕತಾ ರೂಪಂ ನಿಬ್ಬಾನಂ ಚಕ್ಖಾಯತನಂ…ಪೇ… ಫೋಟ್ಠಬ್ಬಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ….

ಧಮ್ಮತಣ್ಹಾ ಅಬ್ಯಾಕತಾತಿ? ಆಮನ್ತಾ. ರೂಪತಣ್ಹಾ ಅಬ್ಯಾಕತಾತಿ? ನ ಹೇವಂ ವತ್ತಬ್ಬೇ …ಪೇ… ಧಮ್ಮತಣ್ಹಾ ಅಬ್ಯಾಕತಾತಿ? ಆಮನ್ತಾ. ಸದ್ದತಣ್ಹಾ…ಪೇ… ಗನ್ಧತಣ್ಹಾ…ಪೇ… ರಸತಣ್ಹಾ…ಪೇ… ಫೋಟ್ಠಬ್ಬತಣ್ಹಾ ಅಬ್ಯಾಕತಾತಿ? ನ ಹೇವಂ ವತ್ತಬ್ಬೇ…ಪೇ….

ರೂಪತಣ್ಹಾ ಅಕುಸಲಾತಿ? ಆಮನ್ತಾ. ಧಮ್ಮತಣ್ಹಾ ಅಕುಸಲಾತಿ? ನ ಹೇವಂ ವತ್ತಬ್ಬೇ…ಪೇ… ಸದ್ದತಣ್ಹಾ…ಪೇ… ಫೋಟ್ಠಬ್ಬತಣ್ಹಾ ಅಕುಸಲಾತಿ? ಆಮನ್ತಾ. ಧಮ್ಮತಣ್ಹಾ ಅಕುಸಲಾತಿ? ನ ಹೇವಂ ವತ್ತಬ್ಬೇ…ಪೇ….

೬೭೭. ಧಮ್ಮತಣ್ಹಾ ಅಬ್ಯಾಕತಾತಿ? ಆಮನ್ತಾ. ನನು ತಣ್ಹಾ ಅಕುಸಲಾ ವುತ್ತಾ ಭಗವತಾತಿ? ಆಮನ್ತಾ. ಹಞ್ಚಿ ತಣ್ಹಾ ಅಕುಸಲಾ ವುತ್ತಾ ಭಗವತಾ, ನೋ ಚ ವತ ರೇ ವತ್ತಬ್ಬೇ – ‘‘ಧಮ್ಮತಣ್ಹಾ ಅಬ್ಯಾಕತಾ’’ತಿ.

ಧಮ್ಮತಣ್ಹಾ ಅಬ್ಯಾಕತಾತಿ? ಆಮನ್ತಾ. ನನು ಲೋಭೋ ಅಕುಸಲೋ ವುತ್ತೋ ಭಗವತಾ, ಧಮ್ಮತಣ್ಹಾ ಲೋಭೋತಿ? ಆಮನ್ತಾ. ಹಞ್ಚಿ ಲೋಭೋ ಅಕುಸಲೋ ವುತ್ತೋ ಭಗವತಾ, ಧಮ್ಮತಣ್ಹಾ ಲೋಭೋ, ನೋ ಚ ವತ ರೇ ವತ್ತಬ್ಬೇ – ‘‘ಧಮ್ಮತಣ್ಹಾ ಅಬ್ಯಾಕತಾ’’ತಿ.

೬೭೮. ಧಮ್ಮತಣ್ಹಾ ಲೋಭೋ ಅಬ್ಯಾಕತೋತಿ? ಆಮನ್ತಾ. ರೂಪತಣ್ಹಾ ಲೋಭೋ ಅಬ್ಯಾಕತೋತಿ? ನ ಹೇವಂ ವತ್ತಬ್ಬೇ…ಪೇ… ಧಮ್ಮತಣ್ಹಾ ಲೋಭೋ ಅಬ್ಯಾಕತೋತಿ? ಆಮನ್ತಾ. ಸದ್ದತಣ್ಹಾ…ಪೇ… ಫೋಟ್ಠಬ್ಬತಣ್ಹಾ ಲೋಭೋ ಅಬ್ಯಾಕತೋತಿ? ನ ಹೇವಂ ವತ್ತಬ್ಬೇ…ಪೇ….

ರೂಪತಣ್ಹಾ ಲೋಭೋ ಅಕುಸಲೋತಿ? ಆಮನ್ತಾ. ಧಮ್ಮತಣ್ಹಾ ಲೋಭೋ ಅಕುಸಲೋತಿ? ನ ಹೇವಂ ವತ್ತಬ್ಬೇ…ಪೇ… ಸದ್ದತಣ್ಹಾ…ಪೇ… ಫೋಟ್ಠಬ್ಬತಣ್ಹಾ ಲೋಭೋ ಅಕುಸಲೋತಿ? ಆಮನ್ತಾ. ಧಮ್ಮತಣ್ಹಾ ಲೋಭೋ ಅಕುಸಲೋತಿ? ನ ಹೇವಂ ವತ್ತಬ್ಬೇ…ಪೇ….

೬೭೯. ಧಮ್ಮತಣ್ಹಾ ಅಬ್ಯಾಕತಾತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಯಾಯಂ ತಣ್ಹಾ ಪೋನೋಬ್ಭವಿಕಾ ನನ್ದೀರಾಗಸಹಗತಾ ತತ್ರತತ್ರಾಭಿನನ್ದಿನೀ, ಸೇಯ್ಯಥಿದಂ – ಕಾಮತಣ್ಹಾ, ಭವತಣ್ಹಾ, ವಿಭವತಣ್ಹಾ’’ತಿ [ಮಹಾವ. ೧೪; ದೀ. ನಿ. ೨.೪೦೦]! ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ಧಮ್ಮತಣ್ಹಾ ಅಬ್ಯಾಕತಾ’’ತಿ.

೬೮೦. ನ ವತ್ತಬ್ಬಂ – ‘‘ಧಮ್ಮತಣ್ಹಾ ಅಬ್ಯಾಕತಾ’’ತಿ? ಆಮನ್ತಾ. ನನು ಸಾ ಧಮ್ಮತಣ್ಹಾತಿ? ಆಮನ್ತಾ. ಹಞ್ಚಿ ಸಾ ಧಮ್ಮತಣ್ಹಾ, ತೇನ ವತ ರೇ ವತ್ತಬ್ಬೇ – ‘‘ಧಮ್ಮತಣ್ಹಾ ಅಬ್ಯಾಕತಾ’’ತಿ.

ಧಮ್ಮತಣ್ಹಾ ಅಬ್ಯಾಕತಾತಿಕಥಾ ನಿಟ್ಠಿತಾ.