(೧೩೩) ೮. ಅಸಾತರಾಗಕಥಾ

೬೭೪. ಅತ್ಥಿ ಅಸಾತರಾಗೋತಿ? ಆಮನ್ತಾ. ದುಕ್ಖಾಭಿನನ್ದಿನೋ ಸತ್ತಾ, ಅತ್ಥಿ ಕೇಚಿ ದುಕ್ಖಂ ಪತ್ಥೇನ್ತಿ ಪಿಹೇನ್ತಿ ಏಸನ್ತಿ ಗವೇಸನ್ತಿ ಪರಿಯೇಸನ್ತಿ, ದುಕ್ಖಂ ಅಜ್ಝೋಸಾಯ ತಿಟ್ಠನ್ತೀತಿ? ನ ಹೇವಂ ವತ್ತಬ್ಬೇ…ಪೇ… ನನು ಸುಖಾಭಿನನ್ದಿನೋ ಸತ್ತಾ, ಅತ್ಥಿ ಕೇಚಿ ಸುಖಂ ಪತ್ಥೇನ್ತಿ ಪಿಹೇನ್ತಿ ಏಸನ್ತಿ ಗವೇಸನ್ತಿ ಪರಿಯೇಸನ್ತಿ, ಸುಖಂ ಅಜ್ಝೋಸಾಯ ತಿಟ್ಠನ್ತೀತಿ? ಆಮನ್ತಾ. ಹಞ್ಚಿ ಸುಖಾಭಿನನ್ದಿನೋ ಸತ್ತಾ, ಅತ್ಥಿ ಕೇಚಿ ಸುಖಂ ಪತ್ಥೇನ್ತಿ ಪಿಹೇನ್ತಿ ಏಸನ್ತಿ ಗವೇಸನ್ತಿ ಪರಿಯೇಸನ್ತಿ, ಸುಖಂ ಅಜ್ಝೋಸಾಯ ತಿಟ್ಠನ್ತಿ, ನೋ ಚ ವತ ರೇ ವತ್ತಬ್ಬೇ – ‘‘ಅತ್ಥಿ ಅಸಾತರಾಗೋ’’ತಿ.

ಅತ್ಥಿ ಅಸಾತರಾಗೋತಿ? ಆಮನ್ತಾ. ದುಕ್ಖಾಯ ವೇದನಾಯ ರಾಗಾನುಸಯೋ ಅನುಸೇತಿ, ಸುಖಾಯ ವೇದನಾಯ ಪಟಿಘಾನುಸಯೋ ಅನುಸೇತೀತಿ? ನ ಹೇವಂ ವತ್ತಬ್ಬೇ…ಪೇ… ನನು ಸುಖಾಯ ವೇದನಾಯ ರಾಗಾನುಸಯೋ ಅನುಸೇತಿ, ದುಕ್ಖಾಯ ವೇದನಾಯ ಪಟಿಘಾನುಸಯೋ ಅನುಸೇತೀತಿ? ಆಮನ್ತಾ. ಹಞ್ಚಿ ಸುಖಾಯ ವೇದನಾಯ ರಾಗಾನುಸಯೋ ಅನುಸೇತಿ, ದುಕ್ಖಾಯ ವೇದನಾಯ ಪಟಿಘಾನುಸಯೋ ಅನುಸೇತಿ, ನೋ ಚ ವತ ರೇ ವತ್ತಬ್ಬೇ – ‘‘ಅತ್ಥಿ ಅಸಾತರಾಗೋ’’ತಿ.

೬೭೫. ನ ವತ್ತಬ್ಬಂ – ‘‘ಅತ್ಥಿ ಅಸಾತರಾಗೋ’’ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಸೋ ಏವಂ ಅನುರೋಧವಿರೋಧಂ ಸಮಾಪನ್ನೋ ಯಂ ಕಿಞ್ಚಿ ವೇದನಂ ವೇದಯತಿ ಸುಖಂ ವಾ ದುಕ್ಖಂ ವಾ ಅದುಕ್ಖಮಸುಖಂ ವಾ, ಸೋ ತಂ ವೇದನಂ ಅಭಿನನ್ದತಿ ಅಭಿವದತಿ ಅಜ್ಝೋಸಾಯ ತಿಟ್ಠತೀ’’ತಿ [ಮ. ನಿ. ೩.೪೦೯ ಮಹಾತಣ್ಹಾಸಙ್ಖಯೇ]! ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ಅತ್ಥಿ ಅಸಾತರಾಗೋತಿ.

ಅಸಾತರಾಗಕಥಾ ನಿಟ್ಠಿತಾ.