(೧೩೧) ೬. ಸಮ್ಮುಖೀಭೂತಕಥಾ

೬೬೮. ಸಮ್ಮುಖೀಭೂತೋ ಸಂಯೋಜನಂ ಜಹತೀತಿ? ಆಮನ್ತಾ. ರತ್ತೋ ರಾಗಂ ಜಹತಿ, ದುಟ್ಠೋ ದೋಸಂ ಜಹತಿ, ಮೂಳ್ಹೋ ಮೋಹಂ ಜಹತಿ, ಕಿಲಿಟ್ಠೋ ಕಿಲೇಸೇ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ… ರಾಗೇನ ರಾಗಂ ಜಹತಿ, ದೋಸೇನ ದೋಸಂ ಜಹತಿ, ಮೋಹೇನ ಮೋಹಂ ಜಹತಿ, ಕಿಲೇಸೇಹಿ ಕಿಲೇಸೇ ಜಹತೀತಿ? ನ ಹೇವಂ ವತ್ತಬ್ಬೇ…ಪೇ….

ರಾಗೋ ಚಿತ್ತಸಮ್ಪಯುತ್ತೋ, ಮಗ್ಗೋ ಚಿತ್ತಸಮ್ಪಯುತ್ತೋತಿ? ಆಮನ್ತಾ. ದ್ವಿನ್ನಂ ಫಸ್ಸಾನಂ…ಪೇ… ದ್ವಿನ್ನಂ ಚಿತ್ತಾನಂ ಸಮೋಧಾನಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ… ರಾಗೋ ಅಕುಸಲೋ, ಮಗ್ಗೋ ಕುಸಲೋತಿ? ಆಮನ್ತಾ. ಕುಸಲಾಕುಸಲಾ ಸಾವಜ್ಜಾನವಜ್ಜಾ ಹೀನಪಣೀತಾ ಕಣ್ಹಸುಕ್ಕಸಪ್ಪಟಿಭಾಗಾ ಧಮ್ಮಾ ಸಮ್ಮುಖೀಭಾವಂ ಆಗಚ್ಛನ್ತೀತಿ? ನ ಹೇವಂ ವತ್ತಬ್ಬೇ…ಪೇ….

೬೬೯. ಕುಸಲಾಕುಸಲಾ…ಪೇ… ಸಮ್ಮುಖೀಭಾವಂ ಆಗಚ್ಛನ್ತೀತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಚತ್ತಾರಿಮಾನಿ, ಭಿಕ್ಖವೇ, ಸುವಿದೂರವಿದೂರಾನಿ! ಕತಮಾನಿ ಚತ್ತಾರಿ? ನಭಞ್ಚ, ಭಿಕ್ಖವೇ, ಪಥವೀ ಚ – ಇದಂ ಪಠಮಂ ಸುವಿದೂರವಿದೂರಂ…ಪೇ… ತಸ್ಮಾ ಸತಂ ಧಮ್ಮೋ ಅಸಬ್ಭಿ ಆರಕಾ’’ತಿ. ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ಕುಸಲಾಕುಸಲಾ…ಪೇ… ಸಮ್ಮುಖೀಭಾವಂ ಆಗಚ್ಛನ್ತೀ’’ತಿ.

ಸಮ್ಮುಖೀಭೂತೋ ಸಂಯೋಜನಂ ಜಹತೀತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಸೋ ಏವಂ ಸಮಾಹಿತೇ ಚಿತ್ತೇ…ಪೇ… ಆಸವಾನಂ ಖಯಞಾಣಾಯ ಚಿತ್ತಂ ಅಭಿನಿನ್ನಾಮೇತೀ’’ತಿ! ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ಸಮ್ಮುಖೀಭೂತೋ ಸಂಯೋಜನಂ ಜಹತೀ’’ತಿ.

೬೭೦. ನ ವತ್ತಬ್ಬಂ – ‘‘ಸಮ್ಮುಖೀಭೂತೋ ಸಂಯೋಜನಂ ಜಹತೀ’’ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ತಸ್ಸ ಏವಂ ಜಾನತೋ ಏವಂ ಪಸ್ಸತೋ ಕಾಮಾಸವಾಪಿ ಚಿತ್ತಂ ವಿಮುಚ್ಚತಿ…ಪೇ… ಅವಿಜ್ಜಾಸವಾಪಿ ಚಿತ್ತಂ ವಿಮುಚ್ಚತೀ’’ತಿ! ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ಸಮ್ಮುಖೀಭೂತೋ ಸಂಯೋಜನಂ ಜಹತೀತಿ.

ಸಮ್ಮುಖೀಭೂತಕಥಾ ನಿಟ್ಠಿತಾ.