೧೩. ತೇರಸಮವಗ್ಗೋ

(೧೨೮) ೩. ಅನನ್ತರಾಪಯುತ್ತಕಥಾ

೬೬೦. ಅನನ್ತರಾಪಯುತ್ತೋ ಪುಗ್ಗಲೋ ಸಮ್ಮತ್ತನಿಯಾಮಂ ಓಕ್ಕಮೇಯ್ಯಾತಿ? ಆಮನ್ತಾ. ಮಿಚ್ಛತ್ತನಿಯಾಮಞ್ಚ ಸಮ್ಮತ್ತನಿಯಾಮಞ್ಚ ಉಭೋ ಓಕ್ಕಮೇಯ್ಯಾತಿ? ನ ಹೇವಂ ವತ್ತಬ್ಬೇ…ಪೇ… ಅನನ್ತರಾಪಯುತ್ತೋ ಪುಗ್ಗಲೋ ಸಮ್ಮತ್ತನಿಯಾಮಂ ಓಕ್ಕಮೇಯ್ಯಾತಿ? ಆಮನ್ತಾ. ನನು ತಂ ಕಮ್ಮಂ ಪಯುತ್ತಂ ಕುಕ್ಕುಚ್ಚಂ ಉಪ್ಪಾದಿತಂ ವಿಪ್ಪಟಿಸಾರಿಯಂ ಜನಿತನ್ತಿ? ಆಮನ್ತಾ. ಹಞ್ಚಿ ತಂ ಕಮ್ಮಂ ಪಯುತ್ತಂ ಕುಕ್ಕುಚ್ಚಂ ಉಪ್ಪಾದಿತಂ ವಿಪ್ಪಟಿಸಾರಿಯಂ ಜನಿತಂ, ನೋ ಚ ವತ ರೇ ವತ್ತಬ್ಬೇ – ‘‘ಅನನ್ತರಾಪಯುತ್ತೋ ಪುಗ್ಗಲೋ ಸಮ್ಮತ್ತನಿಯಾಮಂ ಓಕ್ಕಮೇಯ್ಯಾ’’ತಿ.

೬೬೧. ಅನನ್ತರಾಪಯುತ್ತೋ ಪುಗ್ಗಲೋ ಅಭಬ್ಬೋ ಸಮ್ಮತ್ತನಿಯಾಮಂ ಓಕ್ಕಮಿತುನ್ತಿ? ಆಮನ್ತಾ. ಮಾತಾ ಜೀವಿತಾ ವೋರೋಪಿತಾ… ಪಿತಾ ಜೀವಿತಾ ವೋರೋಪಿತೋ… ಅರಹಾ ಜೀವಿತಾ ವೋರೋಪಿತೋ… ದುಟ್ಠೇನ ಚಿತ್ತೇನ ತಥಾಗತಸ್ಸ ಲೋಹಿತಂ ಉಪ್ಪಾದಿತಂ… ಸಙ್ಘೋ ಭಿನ್ನೋತಿ? ನ ಹೇವಂ ವತ್ತಬ್ಬೇ…ಪೇ….

ಅನನ್ತರಾಪಯುತ್ತೋ ಪುಗ್ಗಲೋ ತಂ ಕಮ್ಮಂ ಪಟಿಸಂಹರಿತ್ವಾ ಕುಕ್ಕುಚ್ಚಂ ಪಟಿವಿನೋದೇತ್ವಾ ವಿಪ್ಪಟಿಸಾರಿಯಂ ಪಟಿವಿನೇತ್ವಾ [ಪಟಿವಿನೋದೇತ್ವಾ (ಸೀ. ಪೀ. ಕ.)] ಅಭಬ್ಬೋ ಸಮ್ಮತ್ತನಿಯಾಮಂ ಓಕ್ಕಮಿತುನ್ತಿ? ಆಮನ್ತಾ. ಮಾತಾ ಜೀವಿತಾ ವೋರೋಪಿತಾ… ಪಿತಾ ಜೀವಿತಾ ವೋರೋಪಿತೋ…ಪೇ… ಸಙ್ಘೋ ಭಿನ್ನೋತಿ? ನ ಹೇವಂ ವತ್ತಬ್ಬೇ…ಪೇ….

ಅನನ್ತರಾಪಯುತ್ತೋ ಪುಗ್ಗಲೋ ತಂ ಕಮ್ಮಂ ಪಟಿಸಂಹರಿತ್ವಾ ಕುಕ್ಕುಚ್ಚಂ ಪಟಿವಿನೋದೇತ್ವಾ ವಿಪ್ಪಟಿಸಾರಿಯಂ ಪಟಿವಿನೇತ್ವಾ ಅಭಬ್ಬೋ ಸಮ್ಮತ್ತನಿಯಾಮಂ ಓಕ್ಕಮಿತುನ್ತಿ? ಆಮನ್ತಾ. ನನು ತಂ ಕಮ್ಮಂ ಪಟಿಸಂಹಟಂ ಕುಕ್ಕುಚ್ಚಂ ಪಟಿವಿನೋದಿತಂ ವಿಪ್ಪಟಿಸಾರಿಯಂ ಪಟಿವಿನೀತನ್ತಿ? ಆಮನ್ತಾ. ಹಞ್ಚಿ ತಂ ಕಮ್ಮಂ ಪಟಿಸಂಹಟಂ ಕುಕ್ಕುಚ್ಚಂ ಪಟಿವಿನೋದಿತಂ ವಿಪ್ಪಟಿಸಾರಿಯಂ ಪಟಿವಿನೀತಂ, ನೋ ಚ ವತ ರೇ ವತ್ತಬ್ಬೇ – ‘‘ಅನನ್ತರಾಪಯುತ್ತೋ ಪುಗ್ಗಲೋ ತಂ ಕಮ್ಮಂ ಪಟಿಸಂಹರಿತ್ವಾ ಕುಕ್ಕುಚ್ಚಂ ಪಟಿವಿನೋದೇತ್ವಾ ವಿಪ್ಪಟಿಸಾರಿಯಂ ಪಟಿವಿನೇತ್ವಾ ಅಭಬ್ಬೋ ಸಮ್ಮತ್ತನಿಯಾಮಂ ಓಕ್ಕಮಿತು’’ನ್ತಿ.

೬೬೨. ಅನನ್ತರಾಪಯುತ್ತೋ ಪುಗ್ಗಲೋ ಸಮ್ಮತ್ತನಿಯಾಮಂ ಓಕ್ಕಮೇಯ್ಯಾತಿ? ಆಮನ್ತಾ. ನನು ತಂ ಕಮ್ಮಂ ಪಯುತ್ತೋ ಆಸೀತಿ? ಆಮನ್ತಾ. ಹಞ್ಚಿ ತಂ ಕಮ್ಮಂ ಪಯುತ್ತೋ ಆಸಿ, ನೋ ಚ ವತ ರೇ ವತ್ತಬ್ಬೇ – ‘‘ಅನನ್ತರಾಪಯುತ್ತೋ ಪುಗ್ಗಲೋ ಸಮ್ಮತ್ತನಿಯಾಮಂ ಓಕ್ಕಮೇಯ್ಯಾ’’ತಿ.

ಅನನ್ತರಾಪಯುತ್ತಕಥಾ ನಿಟ್ಠಿತಾ.