(೧೨೬) ೧. ಕಪ್ಪಟ್ಠಕಥಾ

೬೫೪. ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ. ಕಪ್ಪೋ ಚ ಸಣ್ಠಾತಿ ಬುದ್ಧೋ ಚ ಲೋಕೇ ಉಪ್ಪಜ್ಜತೀತಿ? ನ ಹೇವಂ ವತ್ತಬ್ಬೇ…ಪೇ…. ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ. ಕಪ್ಪೋ ಚ ಸಣ್ಠಾತಿ ಸಙ್ಘೋ ಚ ಭಿಜ್ಜತೀತಿ? ನ ಹೇವಂ ವತ್ತಬ್ಬೇ…ಪೇ… ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ. ಕಪ್ಪೋ ಚ ಸಣ್ಠಾತಿ ಕಪ್ಪಟ್ಠೋ ಚ ಕಪ್ಪಟ್ಠಿಯಂ ಕಮ್ಮಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ… ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ. ಕಪ್ಪೋ ಚ ಸಣ್ಠಾತಿ ಕಪ್ಪಟ್ಠೋ ಚ ಪುಗ್ಗಲೋ ಕಾಲಂ ಕರೋತೀತಿ? ನ ಹೇವಂ ವತ್ತಬ್ಬೇ…ಪೇ….

೬೫೫. ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ. ಅತೀತಂ ಕಪ್ಪಂ ತಿಟ್ಠೇಯ್ಯ, ಅನಾಗತಂ ಕಪ್ಪಂ ತಿಟ್ಠೇಯ್ಯಾತಿ? ನ ಹೇವಂ ವತ್ತಬ್ಬೇ…ಪೇ… ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ. ದ್ವೇ ಕಪ್ಪೇ ತಿಟ್ಠೇಯ್ಯ… ತಯೋ ಕಪ್ಪೇ ತಿಟ್ಠೇಯ್ಯ… ಚತ್ತಾರೋ ಕಪ್ಪೇ ತಿಟ್ಠೇಯ್ಯಾತಿ? ನ ಹೇವಂ ವತ್ತಬ್ಬೇ…ಪೇ….

೬೫೬. ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ. ಕಪ್ಪಟ್ಠೋ ಕಪ್ಪೇ ಡಯ್ಹನ್ತೇ ಕತ್ಥ ಗಚ್ಛತೀತಿ? ಅಞ್ಞಂ ಲೋಕಧಾತುಂ ಗಚ್ಛತೀತಿ. ಮತೋ ಗಚ್ಛತಿ, ವೇಹಾಸಂ ಗಚ್ಛತೀತಿ? ಮತೋ ಗಚ್ಛತೀತಿ. ಕಪ್ಪಟ್ಠಿಯಂ ಕಮ್ಮಂ ಅಪರಾಪರಿಯವೇಪಕ್ಕನ್ತಿ? ನ ಹೇವಂ ವತ್ತಬ್ಬೇ…ಪೇ… [ವೇಹಾಸಂ ಗಚ್ಛತೀತಿ (?) ಅಯಂ ಹಿ ಪರವಾದಿಸ್ಸ ಪಟಿಞ್ಞಾಯೇವ, ಕಥಾ. ೬೨೧-೬೨೩ ನವಮಪನ್ತಿಯಂ ವಿಯ] ವೇಹಾಸಂ ಗಚ್ಛತೀತಿ? ಆಮನ್ತಾ [ವೇಹಾಸಂ ಗಚ್ಛತೀತಿ (?) ಅಯಂ ಹಿ ಪರವಾದಿಸ್ಸ ಪಟಿಞ್ಞಾಯೇವ, ಕಥಾ. ೬೨೧-೬೨೩ ನವಮಪನ್ತಿಯಂ ವಿಯ]. ಕಪ್ಪಟ್ಠೋ ಇದ್ಧಿಮಾತಿ? ನ ಹೇವಂ ವತ್ತಬ್ಬೇ…ಪೇ… ಕಪ್ಪಟ್ಠೋ ಇದ್ಧಿಮಾತಿ? ಆಮನ್ತಾ. ಕಪ್ಪಟ್ಠೇನ ಛನ್ದಿದ್ಧಿಪಾದೋ ಭಾವಿತೋ ವೀರಿಯಿದ್ಧಿಪಾದೋ ಭಾವಿತೋ ಚಿತ್ತಿದ್ಧಿಪಾದೋ ಭಾವಿತೋ ವೀಮಂಸಿದ್ಧಿಪಾದೋ ಭಾವಿತೋತಿ? ನ ಹೇವಂ ವತ್ತಬ್ಬೇ…ಪೇ….

೬೫೭. ನ ವತ್ತಬ್ಬಂ – ‘‘ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾ’’ತಿ? ಆಮನ್ತಾ. ನನು ವುತ್ತಂ ಭಗವತಾ –

‘‘ಆಪಾಯಿಕೋ ನೇರಯಿಕೋ, ಕಪ್ಪಟ್ಠೋ ಸಙ್ಘಭೇದಕೋ;

ವಗ್ಗರತೋ ಅಧಮ್ಮಟ್ಠೋ, ಯೋಗಕ್ಖೇಮಾ ಪಧಂಸತಿ;

ಸಙ್ಘಂ ಸಮಗ್ಗಂ ಭೇತ್ವಾನ [ಭಿನ್ದಿತ್ವಾ (ಸೀ. ಕ.)], ಕಪ್ಪಂ ನಿರಯಮ್ಹಿ ಪಚ್ಚತೀ’’ತಿ [ಚೂಳವ. ೩೫೪; ಅ. ನಿ. ೧೦.೩೯; ಇತಿವು. ೧೮].

ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ಕಪ್ಪಟ್ಠೋ ಕಪ್ಪಂ ತಿಟ್ಠೇಯ್ಯಾತಿ.

ಕಪ್ಪಟ್ಠಕಥಾ ನಿಟ್ಠಿತಾ.