(೯೧) ೮. ವಿತಕ್ಕವಿಪ್ಫಾರಸದ್ದಕಥಾ

೫೬೩. ಸಬ್ಬಸೋ ವಿತಕ್ಕಯತೋ ವಿಚಾರಯತೋ ವಿತಕ್ಕವಿಪ್ಫಾರೋ ಸದ್ದೋತಿ? ಆಮನ್ತಾ. ಸಬ್ಬಸೋ ಫುಸಯತೋ ಫಸ್ಸವಿಪ್ಫಾರೋ ಸದ್ದೋ, ಸಬ್ಬಸೋ ವೇದಯತೋ ವೇದನಾವಿಪ್ಫಾರೋ ಸದ್ದೋ, ಸಬ್ಬಸೋ ಸಞ್ಜಾನತೋ ಸಞ್ಞಾವಿಪ್ಫಾರೋ ಸದ್ದೋ, ಸಬ್ಬಸೋ ಚೇತಯತೋ ಚೇತನಾವಿಪ್ಫಾರೋ ಸದ್ದೋ, ಸಬ್ಬಸೋ ಚಿನ್ತಯತೋ ಚಿತ್ತವಿಪ್ಫಾರೋ ಸದ್ದೋ, ಸಬ್ಬಸೋ ಸರತೋ ಸತಿವಿಪ್ಫಾರೋ ಸದ್ದೋ, ಸಬ್ಬಸೋ ಪಜಾನತೋ ಪಞ್ಞಾವಿಪ್ಫಾರೋ ಸದ್ದೋತಿ? ನ ಹೇವಂ ವತ್ತಬ್ಬೇ…ಪೇ….

ಸಬ್ಬಸೋ ವಿತಕ್ಕಯತೋ ವಿಚಾರಯತೋ ವಿತಕ್ಕವಿಪ್ಫಾರೋ ಸದ್ದೋತಿ? ಆಮನ್ತಾ. ವಿತಕ್ಕವಿಪ್ಫಾರೋ ಸದ್ದೋ ಸೋತವಿಞ್ಞೇಯ್ಯೋ ಸೋತಸ್ಮಿಂ ಪಟಿಹಞ್ಞತಿ ಸೋತಸ್ಸ ಆಪಾಥಂ ಆಗಚ್ಛತೀತಿ? ನ ಹೇವಂ ವತ್ತಬ್ಬೇ…ಪೇ…. ನನು ವಿತಕ್ಕವಿಪ್ಫಾರೋ ಸದ್ದೋ ನ ಸೋತವಿಞ್ಞೇಯ್ಯೋ ನ ಸೋತಸ್ಮಿಂ ಪಟಿಹಞ್ಞತಿ ನ ಸೋತಸ್ಸ ಆಪಾಥಂ ಆಗಚ್ಛತೀತಿ? ಆಮನ್ತಾ. ಹಞ್ಚಿ ವಿತಕ್ಕವಿಪ್ಫಾರೋ ಸದ್ದೋ ನ ಸೋತವಿಞ್ಞೇಯ್ಯೋ ನ ಸೋತಸ್ಮಿಂ ಪಟಿಹಞ್ಞತಿ ನ ಸೋತಸ್ಸ ಆಪಾಥಂ ಆಗಚ್ಛತಿ, ನೋ ಚ ವತ ರೇ ವತ್ತಬ್ಬೇ – ‘‘ಸಬ್ಬಸೋ ವಿತಕ್ಕಯತೋ ವಿಚಾರಯತೋ ವಿತಕ್ಕವಿಪ್ಫಾರೋ ಸದ್ದೋ’’ತಿ.

ವಿತಕ್ಕವಿಪ್ಫಾರಸದ್ದಕಥಾ ನಿಟ್ಠಿತಾ.