(೯೦) ೭. ವಿತಕ್ಕಾನುಪತಿತಕಥಾ

೫೬೨. ಸಬ್ಬಂ ಚಿತ್ತಂ ವಿತಕ್ಕಾನುಪತಿತನ್ತಿ? ಆಮನ್ತಾ. ಸಬ್ಬಂ ಚಿತ್ತಂ ವಿಚಾರಾನುಪತಿತಂ ಪೀತಾನುಪತಿತಂ ಸುಖಾನುಪತಿತಂ ದುಕ್ಖಾನುಪತಿತಂ ಸೋಮನಸ್ಸಾನುಪತಿತಂ ದೋಮನಸ್ಸಾನುಪತಿತಂ ಉಪೇಕ್ಖಾನುಪತಿತಂ ಸದ್ಧಾನುಪತಿತಂ ವೀರಿಯಾನುಪತಿತಂ ಸತಾನುಪತಿತಂ ಸಮಾಧಾನುಪತಿತಂ ಪಞ್ಞಾನುಪತಿತಂ ರಾಗಾನುಪತಿತಂ ದೋಸಾನುಪತಿತಂ…ಪೇ… ಅನೋತ್ತಪ್ಪಾನುಪತಿತನ್ತಿ? ನ ಹೇವಂ ವತ್ತಬ್ಬೇ…ಪೇ….

ಸಬ್ಬಂ ಚಿತ್ತಂ ವಿತಕ್ಕಾನುಪತಿತನ್ತಿ? ಆಮನ್ತಾ. ನನು ಅತ್ಥಿ ಅವಿತಕ್ಕೋ ವಿಚಾರಮತ್ತೋ ಸಮಾಧೀತಿ? ಆಮನ್ತಾ. ಹಞ್ಚಿ ಅತ್ಥಿ ಅವಿತಕ್ಕೋ ವಿಚಾರಮತ್ತೋ ಸಮಾಧಿ, ನೋ ಚ ವತ ರೇ ವತ್ತಬ್ಬೇ – ‘‘ಸಬ್ಬಂ ಚಿತ್ತಂ ವಿತಕ್ಕಾನುಪತಿತ’’ನ್ತಿ.

ಸಬ್ಬಂ ಚಿತ್ತಂ ವಿತಕ್ಕಾನುಪತಿತನ್ತಿ? ಆಮನ್ತಾ. ನನು ಅತ್ಥಿ ಅವಿತಕ್ಕೋ ಅವಿಚಾರೋ ಸಮಾಧೀತಿ? ಆಮನ್ತಾ. ಹಞ್ಚಿ ಅತ್ಥಿ ಅವಿತಕ್ಕೋ ಅವಿಚಾರೋ ಸಮಾಧಿ, ನೋ ಚ ವತ ರೇ ವತ್ತಬ್ಬೇ – ‘‘ಸಬ್ಬಂ ಚಿತ್ತಂ ವಿತಕ್ಕಾನುಪತಿತ’’ನ್ತಿ. ಸಬ್ಬಂ ಚಿತ್ತಂ ವಿತಕ್ಕಾನುಪತಿತನ್ತಿ? ಆಮನ್ತಾ. ನನು ತಯೋ ಸಮಾಧೀ ವುತ್ತಾ ಭಗವತಾ – ಸವಿತಕ್ಕೋ ಸವಿಚಾರೋ ಸಮಾಧಿ, ಅವಿತಕ್ಕೋ ವಿಚಾರಮತ್ತೋ ಸಮಾಧಿ, ಅವಿತಕ್ಕೋ ಅವಿಚಾರೋ ಸಮಾಧೀತಿ [ದೀ. ನಿ. ೩.೩೦೫, ೩೫೩]? ಆಮನ್ತಾ. ಹಞ್ಚಿ ತಯೋ ಸಮಾಧೀ ವುತ್ತಾ ಭಗವತಾ – ಸವಿತಕ್ಕೋ ಸವಿಚಾರೋ ಸಮಾಧಿ, ಅವಿತಕ್ಕೋ ವಿಚಾರಮತ್ತೋ ಸಮಾಧಿ, ಅವಿತಕ್ಕೋ ಅವಿಚಾರೋ ಸಮಾಧಿ, ನೋ ಚ ವತ ರೇ ವತ್ತಬ್ಬೇ – ‘‘ಸಬ್ಬಂ ಚಿತ್ತಂ ವಿತಕ್ಕಾನುಪತಿತ’’ನ್ತಿ.

ವಿತಕ್ಕಾನುಪತಿತಕಥಾ ನಿಟ್ಠಿತಾ.