(೮೮) ೫. ಞಾಣಂ ಅನಾರಮ್ಮಣನ್ತಿಕಥಾ

೫೫೭. ಞಾಣಂ ಅನಾರಮ್ಮಣನ್ತಿ? ಆಮನ್ತಾ. ರೂಪಂ ನಿಬ್ಬಾನಂ ಚಕ್ಖಾಯತನಂ…ಪೇ… ಫೋಟ್ಠಬ್ಬಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ… ಞಾಣಂ ಅನಾರಮ್ಮಣನ್ತಿ? ಆಮನ್ತಾ. ಪಞ್ಞಾ ಪಞ್ಞಿನ್ದ್ರಿಯಂ ಪಞ್ಞಾಬಲಂ ಸಮ್ಮಾದಿಟ್ಠಿ ಧಮ್ಮವಿಚಯಸಮ್ಬೋಜ್ಝಙ್ಗೋ ಅನಾರಮ್ಮಣೋತಿ? ನ ಹೇವಂ ವತ್ತಬ್ಬೇ…ಪೇ… ಪಞ್ಞಾ ಪಞ್ಞಿನ್ದ್ರಿಯಂ ಪಞ್ಞಾಬಲಂ ಸಮ್ಮಾದಿಟ್ಠಿ ಧಮ್ಮವಿಚಯಸಮ್ಬೋಜ್ಝಙ್ಗೋ ಸಾರಮ್ಮಣೋತಿ? ಆಮನ್ತಾ. ಞಾಣಂ ಸಾರಮ್ಮಣನ್ತಿ? ನ ಹೇವಂ ವತ್ತಬ್ಬೇ…ಪೇ….

ಞಾಣಂ ಅನಾರಮ್ಮಣನ್ತಿ? ಆಮನ್ತಾ. ಕತಮಕ್ಖನ್ಧಪರಿಯಾಪನ್ನನ್ತಿ? ಸಙ್ಖಾರಕ್ಖನ್ಧಪರಿಯಾಪನ್ನನ್ತಿ. ಸಙ್ಖಾರಕ್ಖನ್ಧೋ ಅನಾರಮ್ಮಣೋತಿ? ನ ಹೇವಂ ವತ್ತಬ್ಬೇ…ಪೇ… ಸಙ್ಖಾರಕ್ಖನ್ಧೋ ಅನಾರಮ್ಮಣೋತಿ? ಆಮನ್ತಾ. ವೇದನಾಕ್ಖನ್ಧೋ ಸಞ್ಞಾಕ್ಖನ್ಧೋ ವಿಞ್ಞಾಣಕ್ಖನ್ಧೋ ಅನಾರಮ್ಮಣೋತಿ? ನ ಹೇವಂ ವತ್ತಬ್ಬೇ…ಪೇ… ಞಾಣಂ ಸಙ್ಖಾರಕ್ಖನ್ಧಪರಿಯಾಪನ್ನಂ ಅನಾರಮ್ಮಣನ್ತಿ? ಆಮನ್ತಾ. ಪಞ್ಞಾ ಸಙ್ಖಾರಕ್ಖನ್ಧಪರಿಯಾಪನ್ನಾ ಅನಾರಮ್ಮಣಾತಿ? ನ ಹೇವಂ ವತ್ತಬ್ಬೇ…ಪೇ… ಪಞ್ಞಾ ಸಙ್ಖಾರಕ್ಖನ್ಧಪರಿಯಾಪನ್ನಾ ಸಾರಮ್ಮಣಾತಿ? ಆಮನ್ತಾ. ಞಾಣಂ ಸಙ್ಖಾರಕ್ಖನ್ಧಪರಿಯಾಪನ್ನಂ ಸಾರಮ್ಮಣನ್ತಿ? ನ ಹೇವಂ ವತ್ತಬ್ಬೇ…ಪೇ….

ಞಾಣಂ ಸಙ್ಖಾರಕ್ಖನ್ಧಪರಿಯಾಪನ್ನಂ ಅನಾರಮ್ಮಣಂ, ಪಞ್ಞಾ ಸಙ್ಖಾರಕ್ಖನ್ಧಪರಿಯಾಪನ್ನಾ ಸಾರಮ್ಮಣಾತಿ? ಆಮನ್ತಾ. ಸಙ್ಖಾರಕ್ಖನ್ಧೋ ಏಕದೇಸೋ ಸಾರಮ್ಮಣೋ ಏಕದೇಸೋ ಅನಾರಮ್ಮಣೋತಿ? ನ ಹೇವಂ ವತ್ತಬ್ಬೇ…ಪೇ… ಸಙ್ಖಾರಕ್ಖನ್ಧೋ ಏಕದೇಸೋ ಸಾರಮ್ಮಣೋ ಏಕದೇಸೋ ಅನಾರಮ್ಮಣೋತಿ? ಆಮನ್ತಾ. ವೇದನಾಕ್ಖನ್ಧೋ ಸಞ್ಞಾಕ್ಖನ್ಧೋ ವಿಞ್ಞಾಣಕ್ಖನ್ಧೋ ಏಕದೇಸೋ ಸಾರಮ್ಮಣೋ ಏಕದೇಸೋ ಅನಾರಮ್ಮಣೋತಿ? ನ ಹೇವಂ ವತ್ತಬ್ಬೇ…ಪೇ….

೫೫೮. ನ ವತ್ತಬ್ಬಂ – ‘‘ಞಾಣಂ ಅನಾರಮ್ಮಣ’’ನ್ತಿ? ಆಮನ್ತಾ. ಅರಹಾ ಚಕ್ಖುವಿಞ್ಞಾಣಸಮಙ್ಗೀ ಞಾಣೀತಿ ವತ್ತಬ್ಬೋತಿ? ಆಮನ್ತಾ. ಅತ್ಥಿ ತಸ್ಸ ಞಾಣಸ್ಸ ಆರಮ್ಮಣನ್ತಿ? ನ ಹೇವಂ ವತ್ತಬ್ಬೇ…ಪೇ… ತೇನ ಹಿ ಞಾಣಂ ಅನಾರಮ್ಮಣನ್ತಿ. ಅರಹಾ ಚಕ್ಖುವಿಞ್ಞಾಣಸಮಙ್ಗೀ ಪಞ್ಞವಾತಿ ವತ್ತಬ್ಬೋತಿ? ಆಮನ್ತಾ. ಅತ್ಥಿ ತಾಯ ಪಞ್ಞಾಯ ಆರಮ್ಮಣನ್ತಿ? ನ ಹೇವಂ ವತ್ತಬ್ಬೇ…ಪೇ…. ತೇನ ಹಿ ಪಞ್ಞಾ ಅನಾರಮ್ಮಣಾತಿ.

ಞಾಣಂ ಅನಾರಮ್ಮಣನ್ತಿಕಥಾ ನಿಟ್ಠಿತಾ.