೯. ನವಮವಗ್ಗೋ

(೮೫) ೨. ಅಮತಾರಮ್ಮಣಕಥಾ

೫೪೯. ಅಮತಾರಮ್ಮಣಂ ಸಂಯೋಜನನ್ತಿ? ಆಮನ್ತಾ. ಅಮತಂ ಸಂಯೋಜನಿಯಂ ಗನ್ಥನಿಯಂ ಓಘನಿಯಂ ಯೋಗನಿಯಂ ನೀವರಣಿಯಂ ಪರಾಮಟ್ಠಂ ಉಪಾದಾನಿಯಂ ಸಂಕಿಲೇಸಿಯನ್ತಿ? ನ ಹೇವಂ ವತ್ತಬ್ಬೇ…ಪೇ… ನನು ಅಮತಂ ಅಸಂಯೋಜನಿಯಂ ಅಗನ್ಥನಿಯಂ…ಪೇ… ಅಸಂಕಿಲೇಸಿಯನ್ತಿ? ಆಮನ್ತಾ. ಹಞ್ಚಿ ಅಮತಂ ಅಸಂಯೋಜನಿಯಂ…ಪೇ… ಅಸಂಕಿಲೇಸಿಯಂ, ನೋ ಚ ವತ ರೇ ವತ್ತಬ್ಬೇ – ‘‘ಅಮತಾರಮ್ಮಣಂ ಸಂಯೋಜನ’’ನ್ತಿ.

ಅಮತಂ ಆರಬ್ಭ ರಾಗೋ ಉಪ್ಪಜ್ಜತೀತಿ? ಆಮನ್ತಾ. ಅಮತಂ ರಾಗಟ್ಠಾನಿಯಂ ರಜನಿಯಂ ಕಮನಿಯಂ ಮದನಿಯಂ ಬನ್ಧನಿಯಂ ಮುಚ್ಛನಿಯನ್ತಿ? ನ ಹೇವಂ ವತ್ತಬ್ಬೇ…ಪೇ… ನನು ಅಮತಂ ನ ರಾಗಟ್ಠಾನಿಯಂ ನ ರಜನಿಯಂ ನ ಕಮನಿಯಂ ನ ಮದನಿಯಂ ನ ಬನ್ಧನಿಯಂ ನ ಮುಚ್ಛನಿಯನ್ತಿ? ಆಮನ್ತಾ. ಹಞ್ಚಿ ಅಮತಂ ನ ರಾಗಟ್ಠಾನಿಯಂ ನ ರಜನಿಯಂ ನ ಕಮನಿಯಂ ನ ಮದನಿಯಂ ನ ಬನ್ಧನಿಯಂ ನ ಮುಚ್ಛನಿಯಂ, ನೋ ಚ ವತ ರೇ ವತ್ತಬ್ಬೇ – ‘‘ಅಮತಂ ಆರಬ್ಭ ರಾಗೋ ಉಪ್ಪಜ್ಜತೀ’’ತಿ.

ಅಮತಂ ಆರಬ್ಭ ದೋಸೋ ಉಪ್ಪಜ್ಜತೀತಿ? ಆಮನ್ತಾ. ಅಮತಂ ದೋಸಟ್ಠಾನಿಯಂ ಕೋಪಟ್ಠಾನಿಯಂ ಪಟಿಘಟ್ಠಾನಿಯನ್ತಿ? ನ ಹೇವಂ ವತ್ತಬ್ಬೇ…ಪೇ… ನನು ಅಮತಂ ನ ದೋಸಟ್ಠಾನಿಯಂ ನ ಕೋಪಟ್ಠಾನಿಯಂ ನ ಪಟಿಘಟ್ಠಾನಿಯನ್ತಿ? ಆಮನ್ತಾ. ಹಞ್ಚಿ ಅಮತಂ ನ ದೋಸಟ್ಠಾನಿಯಂ ನ ಕೋಪಟ್ಠಾನಿಯಂ ನ ಪಟಿಘಟ್ಠಾನಿಯಂ, ನೋ ಚ ವತ ರೇ ವತ್ತಬ್ಬೇ – ‘‘ಅಮತಂ ಆರಬ್ಭ ದೋಸೋ ಉಪ್ಪಜ್ಜತೀ’’ತಿ.

ಅಮತಂ ಆರಬ್ಭ ಮೋಹೋ ಉಪ್ಪಜ್ಜತೀತಿ? ಆಮನ್ತಾ. ಅಮತಂ ಮೋಹಟ್ಠಾನಿಯಂ ಅಞ್ಞಾಣಕರಣಂ ಅಚಕ್ಖುಕರಣಂ ಪಞ್ಞಾನಿರೋಧಿಯಂ ವಿಘಾತಪಕ್ಖಿಯಂ ಅನಿಬ್ಬಾನಸಂವತ್ತನಿಯನ್ತಿ? ನ ಹೇವಂ ವತ್ತಬ್ಬೇ…ಪೇ… ನನು ಅಮತಂ ನ ಮೋಹಟ್ಠಾನಿಯಂ ನ ಅಞ್ಞಾಣಕರಣಂ ನ ಅಚಕ್ಖುಕರಣಂ ಪಞ್ಞಾಬುದ್ಧಿಯಂ ಅವಿಘಾತಪಕ್ಖಿಯಂ ನಿಬ್ಬಾನಸಂವತ್ತನಿಯನ್ತಿ? ಆಮನ್ತಾ. ಹಞ್ಚಿ ಅಮತಂ ನ ಮೋಹಟ್ಠಾನಿಯಂ ನ ಅಞ್ಞಾಣಕರಣಂ…ಪೇ… ನಿಬ್ಬಾನಸಂವತ್ತನಿಯಂ, ನೋ ಚ ವತ ರೇ ವತ್ತಬ್ಬೇ – ‘‘ಅಮತಂ ಆರಬ್ಭ ಮೋಹೋ ಉಪ್ಪಜ್ಜತೀ’’ತಿ.

೫೫೦. ರೂಪಂ ಆರಬ್ಭ ಸಂಯೋಜನಾ ಉಪ್ಪಜ್ಜನ್ತಿ, ರೂಪಂ ಸಂಯೋಜನಿಯಂ ಗನ್ಥನಿಯಂ…ಪೇ… ಸಂಕಿಲೇಸಿಯನ್ತಿ? ಆಮನ್ತಾ. ಅಮತಂ ಆರಬ್ಭ ಸಂಯೋಜನಾ ಉಪ್ಪಜ್ಜನ್ತಿ, ಅಮತಂ ಸಂಯೋಜನಿಯಂ…ಪೇ… ಸಂಕಿಲೇಸಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ರೂಪಂ ಆರಬ್ಭ ರಾಗೋ ಉಪ್ಪಜ್ಜತಿ, ರೂಪಂ ರಾಗಟ್ಠಾನಿಯಂ ರಜನಿಯಂ ಕಮನಿಯಂ ಮದನಿಯಂ ಬನ್ಧನಿಯಂ ಮುಚ್ಛನಿಯನ್ತಿ? ಆಮನ್ತಾ. ಅಮತಂ ಆರಬ್ಭ ರಾಗೋ ಉಪ್ಪಜ್ಜತಿ, ಅಮತಂ ರಾಗಟ್ಠಾನಿಯಂ…ಪೇ… ಮುಚ್ಛನಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ರೂಪಂ ಆರಬ್ಭ ದೋಸೋ ಉಪ್ಪಜ್ಜತಿ, ರೂಪಂ ದೋಸಟ್ಠಾನಿಯಂ ಕೋಪಟ್ಠಾನಿಯಂ ಪಟಿಘಟ್ಠಾನಿಯನ್ತಿ? ಆಮನ್ತಾ. ಅಮತಂ ಆರಬ್ಭ ದೋಸೋ ಉಪ್ಪಜ್ಜತಿ, ಅಮತಂ ದೋಸಟ್ಠಾನಿಯಂ ಕೋಪಟ್ಠಾನಿಯಂ ಪಟಿಘಟ್ಠಾನಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ರೂಪಂ ಆರಬ್ಭ ಮೋಹೋ ಉಪ್ಪಜ್ಜತಿ, ರೂಪಂ ಮೋಹಟ್ಠಾನಿಯಂ ಅಞ್ಞಾಣಕರಣಂ…ಪೇ… ಅನಿಬ್ಬಾನಸಂವತ್ತನಿಯನ್ತಿ? ಆಮನ್ತಾ. ಅಮತಂ ಆರಬ್ಭ ಮೋಹೋ ಉಪ್ಪಜ್ಜತಿ, ಅಮತಂ ಮೋಹಟ್ಠಾನಿಯಂ ಅಞ್ಞಾಣಕರಣಂ…ಪೇ… ಅನಿಬ್ಬಾನಸಂವತ್ತನಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅಮತಂ ಆರಬ್ಭ ಸಂಯೋಜನಾ ಉಪ್ಪಜ್ಜನ್ತಿ, ಅಮತಂ ಅಸಂಯೋಜನಿಯಂ ಅಗನ್ಥನಿಯಂ ಅನೋಘನಿಯಂ ಅಯೋಗನಿಯಂ ಅನೀವರಣಿಯಂ ಅಪರಾಮಟ್ಠಂ ಅನುಪಾದಾನಿಯಂ ಅಸಂಕಿಲೇಸಿಯನ್ತಿ? ಆಮನ್ತಾ. ರೂಪಂ ಆರಬ್ಭ ಸಂಯೋಜನಾ ಉಪ್ಪಜ್ಜನ್ತಿ, ರೂಪಂ ಅಸಂಯೋಜನಿಯಂ ಅಗನ್ಥನಿಯಂ…ಪೇ… ಅಸಂಕಿಲೇಸಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅಮತಂ ಆರಬ್ಭ ರಾಗೋ ಉಪ್ಪಜ್ಜತಿ, ಅಮತಂ ನ ರಾಗಟ್ಠಾನಿಯಂ ನ ರಜನಿಯಂ ನ ಕಮನಿಯಂ ನ ಮದನಿಯಂ ನ ಬನ್ಧನಿಯಂ ನ ಮುಚ್ಛನಿಯನ್ತಿ? ಆಮನ್ತಾ. ರೂಪಂ ಆರಬ್ಭ ರಾಗೋ ಉಪ್ಪಜ್ಜತಿ, ರೂಪಂ ನ ರಾಗಟ್ಠಾನಿಯಂ…ಪೇ… ನ ಮುಚ್ಛನಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅಮತಂ ಆರಬ್ಭ ದೋಸೋ ಉಪ್ಪಜ್ಜತಿ, ಅಮತಂ ನ ದೋಸಟ್ಠಾನಿಯಂ ನ ಕೋಪಟ್ಠಾನಿಯಂ ನ ಪಟಿಘಟ್ಠಾನಿಯನ್ತಿ? ಆಮನ್ತಾ. ರೂಪಂ ಆರಬ್ಭ ದೋಸೋ ಉಪ್ಪಜ್ಜತಿ, ರೂಪಂ ನ ದೋಸಟ್ಠಾನಿಯಂ ನ ಕೋಪಟ್ಠಾನಿಯಂ ನ ಪಟಿಘಟ್ಠಾನಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ಅಮತಂ ಆರಬ್ಭ ಮೋಹೋ ಉಪ್ಪಜ್ಜತಿ, ಅಮತಂ ನ ಮೋಹಟ್ಠಾನಿಯಂ ನ ಅಞ್ಞಾಣಕರಣಂ…ಪೇ… ನಿಬ್ಬಾನಸಂವತ್ತನಿಯನ್ತಿ? ಆಮನ್ತಾ. ರೂಪಂ ಆರಬ್ಭ ಮೋಹೋ ಉಪ್ಪಜ್ಜತಿ, ರೂಪಂ ನ ಮೋಹಟ್ಠಾನಿಯಂ ನ ಅಞ್ಞಾಣಕರಣಂ…ಪೇ… ನಿಬ್ಬಾನಸಂವತ್ತನಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

೫೫೧. ನ ವತ್ತಬ್ಬಂ – ‘‘ಅಮತಾರಮ್ಮಣಂ ಸಂಯೋಜನ’’ನ್ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ನಿಬ್ಬಾನಂ ನಿಬ್ಬಾನತೋ ಸಞ್ಜಾನಾತಿ, ನಿಬ್ಬಾನಂ ನಿಬ್ಬಾನತೋ ಸಞ್ಜಾನಿತ್ವಾ ನಿಬ್ಬಾನಂ ಮಞ್ಞತಿ, ನಿಬ್ಬಾನಸ್ಮಿಂ ಮಞ್ಞತಿ, ನಿಬ್ಬಾನತೋ ಮಞ್ಞತಿ, ನಿಬ್ಬಾನಂ ಮೇತಿ ಮಞ್ಞತಿ, ನಿಬ್ಬಾನಂ ಅಭಿನನ್ದತೀ’’ತಿ [ಮ. ನಿ. ೧.೬]! ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ಅಮತಾರಮ್ಮಣಂ ಸಂಯೋಜನನ್ತಿ.

ಅಮತಾರಮ್ಮಣಕಥಾ ನಿಟ್ಠಿತಾ.