(೮೦) ೮. ಅರೂಪೇ ರೂಪಕಥಾ

೫೨೪. ಅತ್ಥಿ ರೂಪಂ ಅರೂಪೇಸೂತಿ? ಆಮನ್ತಾ. ರೂಪಭವೋ ರೂಪಗತಿ ರೂಪಸತ್ತಾವಾಸೋ ರೂಪಸಂಸಾರೋ ರೂಪಯೋನಿ ರೂಪತ್ತಭಾವಪಟಿಲಾಭೋತಿ? ನ ಹೇವಂ ವತ್ತಬ್ಬೇ…ಪೇ… ನನು ಅರೂಪಭವೋ ಅರೂಪಗತಿ ಅರೂಪಸತ್ತಾವಾಸೋ ಅರೂಪಸಂಸಾರೋ ಅರೂಪಯೋನಿ ಅರೂಪತ್ತಭಾವಪಟಿಲಾಭೋತಿ? ಆಮನ್ತಾ. ಹಞ್ಚಿ ಅರೂಪಭವೋ…ಪೇ… ಅರೂಪತ್ತಭಾವಪಟಿಲಾಭೋ, ನೋ ಚ ವತ ರೇ ವತ್ತಬ್ಬೇ – ‘‘ಅತ್ಥಿ ರೂಪಂ ಅರೂಪೇಸೂ’’ತಿ.

ಅತ್ಥಿ ರೂಪಂ ಅರೂಪೇಸೂತಿ? ಆಮನ್ತಾ. ಪಞ್ಚವೋಕಾರಭವೋ ಗತಿ ಸತ್ತಾವಾಸೋ ಸಂಸಾರೋ ಯೋನಿ ವಿಞ್ಞಾಣಟ್ಠಿತಿ ಅತ್ತಭಾವಪಟಿಲಾಭೋತಿ? ನ ಹೇವಂ ವತ್ತಬ್ಬೇ…ಪೇ… ನನು ಚತುವೋಕಾರಭವೋ…ಪೇ… ಅತ್ತಭಾವಪಟಿಲಾಭೋತಿ? ಆಮನ್ತಾ. ಹಞ್ಚಿ ಚತುವೋಕಾರಭವೋ ಗತಿ…ಪೇ… ಅತ್ತಭಾವಪಟಿಲಾಭೋ, ನೋ ಚ ವತ ರೇ ವತ್ತಬ್ಬೇ – ‘‘ಅತ್ಥಿ ರೂಪಂ ಅರೂಪೇಸೂ’’ತಿ.

೫೨೫. ಅತ್ಥಿ ರೂಪಂ ರೂಪಧಾತುಯಾ, ಸೋ ಚ ರೂಪಭವೋ ರೂಪಗತಿ ರೂಪಸತ್ತಾವಾಸೋ ರೂಪಸಂಸಾರೋ ರೂಪಯೋನಿ ರೂಪತ್ತಭಾವಪಟಿಲಾಭೋತಿ? ಆಮನ್ತಾ. ಅತ್ಥಿ ರೂಪಂ ಅರೂಪೇಸು, ಸೋ ಚ ರೂಪಭವೋ ರೂಪಗತಿ…ಪೇ… ರೂಪತ್ತಭಾವಪಟಿಲಾಭೋತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ರೂಪಂ ರೂಪಧಾತುಯಾ, ಸೋ ಚ ಪಞ್ಚವೋಕಾರಭವೋ ಗತಿ…ಪೇ… ಅತ್ತಭಾವಪಟಿಲಾಭೋತಿ? ಆಮನ್ತಾ. ಅತ್ಥಿ ರೂಪಂ ಅರೂಪೇಸು, ಸೋ ಚ ಪಞ್ಚವೋಕಾರಭವೋ ಗತಿ…ಪೇ… ಅತ್ತಭಾವಪಟಿಲಾಭೋತಿ? ನ ಹೇವಂ ವತ್ತಬ್ಬೇ…ಪೇ…. ಅತ್ಥಿ ರೂಪಂ ಅರೂಪೇಸು, ಸೋ ಚ ಅರೂಪಭವೋ ಅರೂಪಗತಿ ಅರೂಪಸತ್ತಾವಾಸೋ ಅರೂಪಸಂಸಾರೋ ಅರೂಪಯೋನಿ ಅರೂಪತ್ತಭಾವಪಟಿಲಾಭೋತಿ? ಆಮನ್ತಾ. ಅತ್ಥಿ ರೂಪಂ ರೂಪಧಾತುಯಾ [ಅರೂಪಧಾತುಯಾ (ಸಬ್ಬತ್ಥ)], ಸೋ ಚ ಅರೂಪಭವೋ ಅರೂಪಗತಿ…ಪೇ… ಅರೂಪತ್ತಭಾವಪಟಿಲಾಭೋತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ರೂಪಂ ಅರೂಪೇಸು, ಸೋ ಚ ಚತುವೋಕಾರಭವೋ ಗತಿ…ಪೇ… ಅತ್ತಭಾವಪಟಿಲಾಭೋತಿ? ಆಮನ್ತಾ. ಅತ್ಥಿ ರೂಪಂ ರೂಪಧಾತುಯಾ [ಅರೂಪಧಾತುಯಾ (ಸಬ್ಬತ್ಥ)], ಸೋ ಚ ಚತುವೋಕಾರಭವೋ ಗತಿ…ಪೇ… ಅತ್ತಭಾವಪಟಿಲಾಭೋತಿ? ನ ಹೇವಂ ವತ್ತಬ್ಬೇ…ಪೇ….

೫೨೬. ಅತ್ಥಿ ರೂಪಂ ಅರೂಪೇಸೂತಿ? ಆಮನ್ತಾ. ನನು ರೂಪಾನಂ ನಿಸ್ಸರಣಂ ಅರೂಪಂ [ಇತಿವು. ೭೨; ಅ. ನಿ. ೫.೨೦೦; ದೀ. ನಿ. ೩.೩೨೧] ವುತ್ತಂ ಭಗವತಾತಿ? ಆಮನ್ತಾ. ಹಞ್ಚಿ ರೂಪಾನಂ ನಿಸ್ಸರಣಂ ಅರೂಪಂ [ಇತಿವು. ೭೨; ಅ. ನಿ. ೫.೨೦೦; ದೀ. ನಿ. ೩.೩೨೧] ವುತ್ತಂ ಭಗವತಾ, ನೋ ಚ ವತ ರೇ ವತ್ತಬ್ಬೇ – ‘‘ಅತ್ಥಿ ರೂಪಂ ಅರೂಪೇಸೂ’’ತಿ.

ರೂಪಾನಂ ನಿಸ್ಸರಣಂ ಅರೂಪಂ ವುತ್ತಂ ಭಗವತಾ, ಅತ್ಥಿ ರೂಪಂ ಅರೂಪೇಸೂತಿ? ಆಮನ್ತಾ. ಕಾಮಾನಂ ನಿಸ್ಸರಣಂ ನೇಕ್ಖಮ್ಮಂ ವುತ್ತಂ ಭಗವತಾ, ಅತ್ಥಿ ನೇಕ್ಖಮ್ಮೇಸು ಕಾಮಾ, ಅತ್ಥಿ ಅನಾಸವೇಸು ಆಸವಾ, ಅತ್ಥಿ ಅಪರಿಯಾಪನ್ನೇಸು ಪರಿಯಾಪನ್ನಾತಿ? ನ ಹೇವಂ ವತ್ತಬ್ಬೇ…ಪೇ….

ಅರೂಪೇ ರೂಪಕಥಾ ನಿಟ್ಠಿತಾ.