(೭೮) ೬. ಅರೂಪಧಾತುಕಥಾ

೫೧೭. ಅರೂಪಿನೋ ಧಮ್ಮಾ ಅರೂಪಧಾತೂತಿ? ಆಮನ್ತಾ. ವೇದನಾ ಭವೋ ಗತಿ ಸತ್ತಾವಾಸೋ ಸಂಸಾರೋ ಯೋನಿ ವಿಞ್ಞಾಣಟ್ಠಿತಿ ಅತ್ತಭಾವಪಟಿಲಾಭೋತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ವೇದನೂಪಗಂ ಕಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ವೇದನೂಪಗಾ ಸತ್ತಾತಿ? ನ ಹೇವಂ ವತ್ತಬ್ಬೇ…ಪೇ… ವೇದನಾಯ ಸತ್ತಾ ಜಾಯನ್ತಿ ಜೀಯನ್ತಿ ಮೀಯನ್ತಿ ಚವನ್ತಿ ಉಪಪಜ್ಜನ್ತೀತಿ? ನ ಹೇವಂ ವತ್ತಬ್ಬೇ…ಪೇ… ವೇದನಾಯ ಅತ್ಥಿ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣನ್ತಿ? ನ ಹೇವಂ ವತ್ತಬ್ಬೇ…ಪೇ… ವೇದನಾ ಚತುವೋಕಾರಭವೋತಿ? ನ ಹೇವಂ ವತ್ತಬ್ಬೇ…ಪೇ….

ಅರೂಪಧಾತು ಭವೋ ಗತಿ…ಪೇ… ಅತ್ತಭಾವಪಟಿಲಾಭೋತಿ? ಆಮನ್ತಾ. ವೇದನಾ ಭವೋ ಗತಿ…ಪೇ… ಅತ್ತಭಾವಪಟಿಲಾಭೋತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಅರೂಪಧಾತೂಪಗಂ ಕಮ್ಮನ್ತಿ? ಆಮನ್ತಾ. ಅತ್ಥಿ ವೇದನೂಪಗಂ ಕಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಅರೂಪಧಾತೂಪಗಾ ಸತ್ತಾತಿ? ಆಮನ್ತಾ. ಅತ್ಥಿ ವೇದನೂಪಗಾ ಸತ್ತಾತಿ? ನ ಹೇವಂ ವತ್ತಬ್ಬೇ…ಪೇ….

ಅರೂಪಧಾತುಯಾ ಸತ್ತಾ ಜಾಯನ್ತಿ ಜೀಯನ್ತಿ ಮೀಯನ್ತಿ ಚವನ್ತಿ ಉಪಪಜ್ಜನ್ತೀತಿ? ಆಮನ್ತಾ. ವೇದನಾಯ ಸತ್ತಾ ಜಾಯನ್ತಿ ಜೀಯನ್ತಿ ಮೀಯನ್ತಿ ಚವನ್ತಿ ಉಪಪಜ್ಜನ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಅರೂಪಧಾತುಯಾ ಅತ್ಥಿ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣನ್ತಿ? ಆಮನ್ತಾ. ವೇದನಾಯ ಅತ್ಥಿ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣನ್ತಿ? ನ ಹೇವಂ ವತ್ತಬ್ಬೇ…ಪೇ… ಅರೂಪಧಾತು ಚತುವೋಕಾರಭವೋತಿ? ಆಮನ್ತಾ. ವೇದನಾ ಚತುವೋಕಾರಭವೋತಿ? ನ ಹೇವಂ ವತ್ತಬ್ಬೇ…ಪೇ….

೫೧೮. ಅರೂಪಿನೋ ಧಮ್ಮಾ ಅರೂಪಧಾತು, ಕಾಮಧಾತುಯಾ ಅತ್ಥಿ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣನ್ತಿ? ಆಮನ್ತಾ. ಸಾವ ಕಾಮಧಾತು, ಸಾ ಅರೂಪಧಾತೂತಿ? ನ ಹೇವಂ ವತ್ತಬ್ಬೇ…ಪೇ… ಸಾವ ಕಾಮಧಾತು, ಸಾ ಅರೂಪಧಾತೂತಿ? ಆಮನ್ತಾ. ಕಾಮಭವೇನ ಸಮನ್ನಾಗತೋ ಪುಗ್ಗಲೋ ದ್ವೀಹಿ ಭವೇಹಿ ಸಮನ್ನಾಗತೋ ಹೋತಿ – ಕಾಮಭವೇನ ಚ ಅರೂಪಭವೇನ ಚಾತಿ? ನ ಹೇವಂ ವತ್ತಬ್ಬೇ…ಪೇ….

ರೂಪಿನೋ ಧಮ್ಮಾ ರೂಪಧಾತು, ಅರೂಪಿನೋ ಧಮ್ಮಾ ಅರೂಪಧಾತು, ಕಾಮಧಾತುಯಾ ಅತ್ಥಿ ರೂಪಂ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣನ್ತಿ? ಆಮನ್ತಾ. ಸಾವ ಕಾಮಧಾತು, ಸಾ ರೂಪಧಾತು, ಸಾ ಅರೂಪಧಾತೂತಿ? ನ ಹೇವಂ ವತ್ತಬ್ಬೇ…ಪೇ… ಸಾವ ಕಾಮಧಾತು, ಸಾ ರೂಪಧಾತು, ಸಾ ಅರೂಪಧಾತೂತಿ? ಆಮನ್ತಾ. ಕಾಮಭವೇನ ಸಮನ್ನಾಗತೋ ಪುಗ್ಗಲೋ ತೀಹಿ ಭವೇಹಿ ಸಮನ್ನಾಗತೋ ಹೋತಿ – ಕಾಮಭವೇನ ಚ ರೂಪಭವೇನ ಚ ಅರೂಪಭವೇನ ಚಾತಿ? ನ ಹೇವಂ ವತ್ತಬ್ಬೇ…ಪೇ….

ಅರೂಪಧಾತುಕಥಾ ನಿಟ್ಠಿತಾ.