(೭೭) ೫. ರೂಪಧಾತುಕಥಾ

೫೧೫. ರೂಪಿನೋ ಧಮ್ಮಾ ರೂಪಧಾತೂತಿ? ಆಮನ್ತಾ. ರೂಪಂ ಭವೋ ಗತಿ ಸತ್ತಾವಾಸೋ ಸಂಸಾರೋ ಯೋನಿ ವಿಞ್ಞಾಣಟ್ಠಿತಿ ಅತ್ತಭಾವಪಟಿಲಾಭೋತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ರೂಪೂಪಗಂ ಕಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ರೂಪೂಪಗಾ ಸತ್ತಾತಿ? ನ ಹೇವಂ ವತ್ತಬ್ಬೇ…ಪೇ… ರೂಪೇ ಸತ್ತಾ ಜಾಯನ್ತಿ ಜೀಯನ್ತಿ ಮೀಯನ್ತಿ ಚವನ್ತಿ ಉಪಪಜ್ಜನ್ತೀತಿ? ನ ಹೇವಂ ವತ್ತಬ್ಬೇ…ಪೇ… ರೂಪೇ ಅತ್ಥಿ ರೂಪಂ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣನ್ತಿ? ನ ಹೇವಂ ವತ್ತಬ್ಬೇ…ಪೇ… ರೂಪಂ ಪಞ್ಚವೋಕಾರಭವೋತಿ? ನ ಹೇವಂ ವತ್ತಬ್ಬೇ…ಪೇ….

ರೂಪಧಾತು ಭವೋ ಗತಿ…ಪೇ… ಅತ್ತಭಾವಪಟಿಲಾಭೋತಿ? ಆಮನ್ತಾ. ರೂಪಂ ಭವೋ ಗತಿ…ಪೇ… ಅತ್ತಭಾವಪಟಿಲಾಭೋತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ರೂಪಧಾತೂಪಗಂ ಕಮ್ಮನ್ತಿ? ಆಮನ್ತಾ. ಅತ್ಥಿ ರೂಪೂಪಗಂ ಕಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ರೂಪಧಾತೂಪಗಾ ಸತ್ತಾತಿ? ಆಮನ್ತಾ. ಅತ್ಥಿ ರೂಪೂಪಗಾ ಸತ್ತಾತಿ? ನ ಹೇವಂ ವತ್ತಬ್ಬೇ…ಪೇ….

ರೂಪಧಾತುಯಾ ಸತ್ತಾ ಜಾಯನ್ತಿ ಜೀಯನ್ತಿ ಮೀಯನ್ತಿ ಚವನ್ತಿ ಉಪಪಜ್ಜನ್ತೀತಿ? ಆಮನ್ತಾ. ರೂಪೇ ಸತ್ತಾ ಜಾಯನ್ತಿ ಜೀಯನ್ತಿ ಮೀಯನ್ತಿ ಚವನ್ತಿ ಉಪಪಜ್ಜನ್ತೀತಿ? ನ ಹೇವಂ ವತ್ತಬ್ಬೇ…ಪೇ… ರೂಪಧಾತುಯಾ ಅತ್ಥಿ ರೂಪಂ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣನ್ತಿ? ಆಮನ್ತಾ. ರೂಪೇ ಅತ್ಥಿ ರೂಪಂ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣನ್ತಿ? ನ ಹೇವಂ ವತ್ತಬ್ಬೇ…ಪೇ… ರೂಪಧಾತು ಪಞ್ಚವೋಕಾರಭವೋತಿ? ಆಮನ್ತಾ. ರೂಪಂ ಪಞ್ಚವೋಕಾರಭವೋತಿ? ನ ಹೇವಂ ವತ್ತಬ್ಬೇ…ಪೇ….

೫೧೬. ರೂಪಿನೋ ಧಮ್ಮಾ ರೂಪಧಾತು, ಕಾಮಧಾತುಯಾ ಅತ್ಥಿ ರೂಪನ್ತಿ? ಆಮನ್ತಾ. ಸಾವ ಕಾಮಧಾತು, ಸಾ ರೂಪಧಾತೂತಿ? ನ ಹೇವಂ ವತ್ತಬ್ಬೇ…ಪೇ… ಸಾವ ಕಾಮಧಾತು, ಸಾ ರೂಪಧಾತೂತಿ? ಆಮನ್ತಾ. ಕಾಮಭವೇನ ಸಮನ್ನಾಗತೋ ಪುಗ್ಗಲೋ ದ್ವೀಹಿ ಭವೇಹಿ ಸಮನ್ನಾಗತೋ ಹೋತಿ – ಕಾಮಭವೇನ ಚ ರೂಪಭವೇನ ಚಾತಿ? ನ ಹೇವಂ ವತ್ತಬ್ಬೇ.

ರೂಪಧಾತುಕಥಾ ನಿಟ್ಠಿತಾ.