(೭೬) ೪. ಕಾಮಕಥಾ

೫೧೩. ಪಞ್ಚೇವಾಯತನಾ ಕಾಮಾತಿ? ಆಮನ್ತಾ. ನನು ಅತ್ಥಿ ತಪ್ಪಟಿಸಂಯುತ್ತೋ ಛನ್ದೋತಿ? ಆಮನ್ತಾ. ಹಞ್ಚಿ ಅತ್ಥಿ ತಪ್ಪಟಿಸಂಯುತ್ತೋ ಛನ್ದೋ, ನೋ ಚ ವತ ರೇ ವತ್ತಬ್ಬೇ – ‘‘ಪಞ್ಚೇವಾಯತನಾ ಕಾಮಾ’’ತಿ. ನನು ಅತ್ಥಿ ತಪ್ಪಟಿಸಂಯುತ್ತೋ ರಾಗೋ ತಪ್ಪಟಿಸಂಯುತ್ತೋ ಛನ್ದೋ ತಪ್ಪಟಿಸಂಯುತ್ತೋ ಛನ್ದರಾಗೋ ತಪ್ಪಟಿಸಂಯುತ್ತೋ ಸಙ್ಕಪ್ಪೋ ತಪ್ಪಟಿಸಂಯುತ್ತೋ ರಾಗೋ ತಪ್ಪಟಿಸಂಯುತ್ತೋ ಸಙ್ಕಪ್ಪರಾಗೋ ತಪ್ಪಟಿಸಂಯುತ್ತಾ ಪೀತಿ ತಪ್ಪಟಿಸಂಯುತ್ತಂ ಸೋಮನಸ್ಸಂ ತಪ್ಪಟಿಸಂಯುತ್ತಂ ಪೀತಿಸೋಮನಸ್ಸನ್ತಿ? ಆಮನ್ತಾ. ಹಞ್ಚಿ ಅತ್ಥಿ ತಪ್ಪಟಿಸಂಯುತ್ತಂ ಪೀತಿಸೋಮನಸ್ಸಂ, ನೋ ಚ ವತ ರೇ ವತ್ತಬ್ಬೇ – ‘‘ಪಞ್ಚೇವಾಯತನಾ ಕಾಮಾ’’ತಿ.

೫೧೪. ನ ವತ್ತಬ್ಬಂ – ‘‘ಪಞ್ಚೇವಾಯತನಾ ಕಾಮಾ’’ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಪಞ್ಚಿಮೇ, ಭಿಕ್ಖವೇ, ಕಾಮಗುಣಾ! ಕತಮೇ ಪಞ್ಚ? ಚಕ್ಖುವಿಞ್ಞೇಯ್ಯಾ ರೂಪಾ…ಪೇ… ಕಾಯವಿಞ್ಞೇಯ್ಯಾ ಫೋಟ್ಠಬ್ಬಾ ಇಟ್ಠಾ ಕನ್ತಾ ಮನಾಪಾ ಪಿಯರೂಪಾ ಕಾಮೂಪಸಂಹಿತಾ ರಜನೀಯಾ – ಇಮೇ ಖೋ, ಭಿಕ್ಖವೇ, ಪಞ್ಚ ಕಾಮಗುಣಾ’’ತಿ. ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ಪಞ್ಚೇವಾಯತನಾ ಕಾಮಾತಿ.

ಪಞ್ಚೇವಾಯತನಾ ಕಾಮಾತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಪಞ್ಚಿಮೇ, ಭಿಕ್ಖವೇ, ಕಾಮಗುಣಾ! ಕತಮೇ ಪಞ್ಚ? ಚಕ್ಖುವಿಞ್ಞೇಯ್ಯಾ ರೂಪಾ…ಪೇ… ಕಾಯವಿಞ್ಞೇಯ್ಯಾ ಫೋಟ್ಠಬ್ಬಾ ಇಟ್ಠಾ ಕನ್ತಾ ಮನಾಪಾ ಪಿಯರೂಪಾ ಕಾಮೂಪಸಂಹಿತಾ ರಜನೀಯಾ – ಇಮೇ ಖೋ, ಭಿಕ್ಖವೇ, ಪಞ್ಚ ಕಾಮಗುಣಾ. ಅಪಿ ಚ, ಭಿಕ್ಖವೇ, ನೇತೇ ಕಾಮಾ ಕಾಮಗುಣಾ ನಾಮೇತೇ ಅರಿಯಸ್ಸ ವಿನಯೇ ವುಚ್ಚ’’ನ್ತಿ –

‘‘ಸಙ್ಕಪ್ಪರಾಗೋ ಪುರಿಸಸ್ಸ ಕಾಮೋ,

ನ ತೇ ಕಾಮಾ ಯಾನಿ ಚಿತ್ರಾನಿ ಲೋಕೇ;

ಸಙ್ಕಪ್ಪರಾಗೋ ಪುರಿಸಸ್ಸ ಕಾಮೋ,

ತಿಟ್ಠನ್ತಿ ಚಿತ್ರಾನಿ ತಥೇವ ಲೋಕೇ;

ಅಥೇತ್ಥ ಧೀರಾ ವಿನಯನ್ತಿ ಛನ್ದ’’ನ್ತಿ [ಅ. ನಿ. ೬.೬೩ ನಿಬ್ಬೇಧಿಕಸುತ್ತೇ].

ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ಪಞ್ಚೇವಾಯತನಾ ಕಾಮಾ’’ತಿ.

ಕಾಮಕಥಾ ನಿಟ್ಠಿತಾ.