೮. ಅಟ್ಠಮವಗ್ಗೋ

(೭೪) ೨. ಅನ್ತರಾಭವಕಥಾ

೫೦೫. ಅತ್ಥಿ ಅನ್ತರಾಭವೋತಿ? ಆಮನ್ತಾ. ಕಾಮಭವೋತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಅನ್ತರಾಭವೋತಿ? ಆಮನ್ತಾ. ರೂಪಭವೋತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಅನ್ತರಾಭವೋತಿ? ಆಮನ್ತಾ. ಅರೂಪಭವೋತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಅನ್ತರಾಭವೋತಿ? ಆಮನ್ತಾ. ಕಾಮಭವಸ್ಸ ಚ ರೂಪಭವಸ್ಸ ಚ ಅನ್ತರೇ ಅತ್ಥಿ ಅನ್ತರಾಭವೋತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಅನ್ತರಾಭವೋತಿ? ಆಮನ್ತಾ. ರೂಪಭವಸ್ಸ ಚ ಅರೂಪಭವಸ್ಸ ಚ ಅನ್ತರೇ ಅತ್ಥಿ ಅನ್ತರಾಭವೋತಿ? ನ ಹೇವಂ ವತ್ತಬ್ಬೇ…ಪೇ….

ಕಾಮಭವಸ್ಸ ಚ ರೂಪಭವಸ್ಸ ಚ ಅನ್ತರೇ ನತ್ಥಿ ಅನ್ತರಾಭವೋತಿ? ಆಮನ್ತಾ. ಹಞ್ಚಿ ಕಾಮಭವಸ್ಸ ಚ ರೂಪಭವಸ್ಸ ಚ ಅನ್ತರೇ ನತ್ಥಿ ಅನ್ತರಾಭವೋ, ನೋ ಚ ವತ ರೇ ವತ್ತಬ್ಬೇ – ‘‘ಅತ್ಥಿ ಅನ್ತರಾಭವೋ’’ತಿ. ರೂಪಭವಸ್ಸ ಚ ಅರೂಪಭವಸ್ಸ ಚ ಅನ್ತರೇ ನತ್ಥಿ ಅನ್ತರಾಭವೋತಿ? ಆಮನ್ತಾ. ಹಞ್ಚಿ ರೂಪಭವಸ್ಸ ಚ ಅರೂಪಭವಸ್ಸ ಚ ಅನ್ತರೇ ನತ್ಥಿ ಅನ್ತರಾಭವೋ, ನೋ ಚ ವತ ರೇ ವತ್ತಬ್ಬೇ – ‘‘ಅತ್ಥಿ ಅನ್ತರಾಭವೋ’’ತಿ.

೫೦೬. ಅತ್ಥಿ ಅನ್ತರಾಭವೋತಿ? ಆಮನ್ತಾ. ಪಞ್ಚಮೀ ಸಾ ಯೋನಿ, ಛಟ್ಠಮೀ ಸಾ ಗತಿ, ಅಟ್ಠಮೀ ಸಾ ವಿಞ್ಞಾಣಟ್ಠಿತಿ, ದಸಮೋ ಸೋ ಸತ್ತಾವಾಸೋತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಅನ್ತರಾಭವೋತಿ? ಆಮನ್ತಾ. ಅನ್ತರಾಭವೋ ಭವೋ ಗತಿ ಸತ್ತಾವಾಸೋ ಸಂಸಾರೋ ಯೋನಿ ವಿಞ್ಞಾಣಟ್ಠಿತಿ ಅತ್ತಭಾವಪಟಿಲಾಭೋತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಅನ್ತರಾಭವೂಪಗಂ ಕಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಅನ್ತರಾಭವೂಪಗಾ ಸತ್ತಾತಿ? ನ ಹೇವಂ ವತ್ತಬ್ಬೇ…ಪೇ… ಅನ್ತರಾಭವೇ ಸತ್ತಾ ಜಾಯನ್ತಿ ಜೀಯನ್ತಿ ಮೀಯನ್ತಿ ಚವನ್ತಿ ಉಪಪಜ್ಜನ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಅನ್ತರಾಭವೇ ಅತ್ಥಿ ರೂಪಂ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣನ್ತಿ? ನ ಹೇವಂ ವತ್ತಬ್ಬೇ…ಪೇ… ಅನ್ತರಾಭವೋ ಪಞ್ಚವೋಕಾರಭವೋತಿ? ನ ಹೇವಂ ವತ್ತಬ್ಬೇ…ಪೇ….

೫೦೭. ಅತ್ಥಿ ಕಾಮಭವೋ, ಕಾಮಭವೋ ಭವೋ ಗತಿ ಸತ್ತಾವಾಸೋ ಸಂಸಾರೋ ಯೋನಿ ವಿಞ್ಞಾಣಟ್ಠಿತಿ ಅತ್ತಭಾವಪಟಿಲಾಭೋತಿ? ಆಮನ್ತಾ. ಅತ್ಥಿ ಅನ್ತರಾಭವೋ, ಅನ್ತರಾಭವೋ ಭವೋ ಗತಿ ಸತ್ತಾವಾಸೋ ಸಂಸಾರೋ ಯೋನಿ ವಿಞ್ಞಾಣಟ್ಠಿತಿ ಅತ್ತಭಾವಪಟಿಲಾಭೋತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಕಾಮಭವೂಪಗಂ ಕಮ್ಮನ್ತಿ? ಆಮನ್ತಾ. ಅತ್ಥಿ ಅನ್ತರಾಭವೂಪಗಂ ಕಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಕಾಮಭವೂಪಗಾ ಸತ್ತಾತಿ? ಆಮನ್ತಾ. ಅತ್ಥಿ ಅನ್ತರಾಭವೂಪಗಾ ಸತ್ತಾತಿ? ನ ಹೇವಂ ವತ್ತಬ್ಬೇ…ಪೇ… ಕಾಮಭವೇ ಸತ್ತಾ ಜಾಯನ್ತಿ ಜೀಯನ್ತಿ ಮೀಯನ್ತಿ ಚವನ್ತಿ ಉಪಪಜ್ಜನ್ತೀತಿ? ಆಮನ್ತಾ. ಅನ್ತರಾಭವೇ ಸತ್ತಾ ಜಾಯನ್ತಿ ಜೀಯನ್ತಿ ಮೀಯನ್ತಿ ಚವನ್ತಿ ಉಪಪಜ್ಜನ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಕಾಮಭವೇ ಅತ್ಥಿ ರೂಪಂ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣನ್ತಿ? ಆಮನ್ತಾ. ಅನ್ತರಾಭವೇ ಅತ್ಥಿ ರೂಪಂ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣನ್ತಿ? ನ ಹೇವಂ ವತ್ತಬ್ಬೇ…ಪೇ… ಕಾಮಭವೋ ಪಞ್ಚವೋಕಾರಭವೋತಿ? ಆಮನ್ತಾ. ಅನ್ತರಾಭವೋ ಪಞ್ಚವೋಕಾರಭವೋತಿ? ನ ಹೇವಂ ವತ್ತಬ್ಬೇ…ಪೇ….

ಅತ್ಥಿ ರೂಪಭವೋ, ರೂಪಭವೋ ಭವೋ ಗತಿ ಸತ್ತಾವಾಸೋ ಸಂಸಾರೋ ಯೋನಿ ವಿಞ್ಞಾಣಟ್ಠಿತಿ ಅತ್ತಭಾವಪಟಿಲಾಭೋತಿ? ಆಮನ್ತಾ. ಅತ್ಥಿ ಅನ್ತರಾಭವೋ, ಅನ್ತರಾಭವೋ ಭವೋ ಗತಿ ಸತ್ತಾವಾಸೋ ಸಂಸಾರೋ ಯೋನಿ ವಿಞ್ಞಾಣಟ್ಠಿತಿ ಅತ್ತಭಾವಪಟಿಲಾಭೋತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ರೂಪಭವೂಪಗಂ ಕಮ್ಮನ್ತಿ? ಆಮನ್ತಾ. ಅತ್ಥಿ ಅನ್ತರಾಭವೂಪಗಂ ಕಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ರೂಪಭವೂಪಗಾ ಸತ್ತಾತಿ? ಆಮನ್ತಾ. ಅತ್ಥಿ ಅನ್ತರಾಭವೂಪಗಾ ಸತ್ತಾತಿ? ನ ಹೇವಂ ವತ್ತಬ್ಬೇ…ಪೇ… ರೂಪಭವೇ ಸತ್ತಾ ಜಾಯನ್ತಿ ಜೀಯನ್ತಿ ಮೀಯನ್ತಿ ಚವನ್ತಿ ಉಪಪಜ್ಜನ್ತೀತಿ? ಆಮನ್ತಾ. ಅನ್ತರಾಭವೇ ಸತ್ತಾ ಜಾಯನ್ತಿ ಜೀಯನ್ತಿ ಮೀಯನ್ತಿ ಚವನ್ತಿ ಉಪಪಜ್ಜನ್ತೀತಿ? ನ ಹೇವಂ ವತ್ತಬ್ಬೇ…ಪೇ… ರೂಪಭವೇ ಅತ್ಥಿ ರೂಪಂ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣನ್ತಿ? ಆಮನ್ತಾ. ಅನ್ತರಾಭವೇ ಅತ್ಥಿ ರೂಪಂ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣನ್ತಿ? ನ ಹೇವಂ ವತ್ತಬ್ಬೇ…ಪೇ… ರೂಪಭವೋ ಪಞ್ಚವೋಕಾರಭವೋತಿ? ಆಮನ್ತಾ. ಅನ್ತರಾಭವೋ ಪಞ್ಚವೋಕಾರಭವೋತಿ? ನ ಹೇವಂ ವತ್ತಬ್ಬೇ…ಪೇ….

ಅತ್ಥಿ ಅರೂಪಭವೋ, ಅರೂಪಭವೋ ಭವೋ ಗತಿ ಸತ್ತಾವಾಸೋ ಸಂಸಾರೋ ಯೋನಿ ವಿಞ್ಞಾಣಟ್ಠಿತಿ ಅತ್ತಭಾವಪಟಿಲಾಭೋತಿ? ಆಮನ್ತಾ. ಅತ್ಥಿ ಅನ್ತರಾಭವೋ, ಅನ್ತರಾಭವೋ ಭವೋ ಗತಿ ಸತ್ತಾವಾಸೋ ಸಂಸಾರೋ ಯೋನಿ ವಿಞ್ಞಾಣಟ್ಠಿತಿ ಅತ್ತಭಾವಪಟಿಲಾಭೋತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಅರೂಪಭವೂಪಗಂ ಕಮ್ಮನ್ತಿ? ಆಮನ್ತಾ. ಅತ್ಥಿ ಅನ್ತರಾಭವೂಪಗಂ ಕಮ್ಮನ್ತಿ? ನ ಹೇವಂ ವತ್ತಬ್ಬೇ…ಪೇ… ಅತ್ಥಿ ಅರೂಪಭವೂಪಗಾ ಸತ್ತಾತಿ? ಆಮನ್ತಾ. ಅತ್ಥಿ ಅನ್ತರಾಭವೂಪಗಾ ಸತ್ತಾತಿ? ನ ಹೇವಂ ವತ್ತಬ್ಬೇ…ಪೇ… ಅರೂಪಭವೇ ಸತ್ತಾ ಜಾಯನ್ತಿ ಜೀಯನ್ತಿ ಮೀಯನ್ತಿ ಚವನ್ತಿ ಉಪಪಜ್ಜನ್ತೀತಿ? ಆಮನ್ತಾ. ಅನ್ತರಾಭವೇ ಸತ್ತಾ ಜಾಯನ್ತಿ ಜೀಯನ್ತಿ ಮೀಯನ್ತಿ ಚವನ್ತಿ ಉಪಪಜ್ಜನ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಅರೂಪಭವೇ ಅತ್ಥಿ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣನ್ತಿ? ಆಮನ್ತಾ. ಅನ್ತರಾಭವೇ ಅತ್ಥಿ ವೇದನಾ ಸಞ್ಞಾ ಸಙ್ಖಾರಾ ವಿಞ್ಞಾಣನ್ತಿ? ನ ಹೇವಂ ವತ್ತಬ್ಬೇ…ಪೇ… ಅರೂಪಭವೋ ಚತುವೋಕಾರಭವೋತಿ? ಆಮನ್ತಾ. ಅನ್ತರಾಭವೋ ಚತುವೋಕಾರಭವೋತಿ? ನ ಹೇವಂ ವತ್ತಬ್ಬೇ…ಪೇ….

೫೦೮. ಅತ್ಥಿ ಅನ್ತರಾಭವೋತಿ? ಆಮನ್ತಾ. ಸಬ್ಬೇಸಞ್ಞೇವ ಸತ್ತಾನಂ ಅತ್ಥಿ ಅನ್ತರಾಭವೋತಿ? ನ ಹೇವಂ ವತ್ತಬ್ಬೇ …ಪೇ… ಸಬ್ಬೇಸಞ್ಞೇವ ಸತ್ತಾನಂ ನತ್ಥಿ ಅನ್ತರಾಭವೋತಿ? ಆಮನ್ತಾ. ಹಞ್ಚಿ ಸಬ್ಬೇಸಞ್ಞೇವ ಸತ್ತಾನಂ ನತ್ಥಿ ಅನ್ತರಾಭವೋ, ನೋ ಚ ವತ ರೇ ವತ್ತಬ್ಬೇ – ‘‘ಅತ್ಥಿ ಅನ್ತರಾಭವೋ’’ತಿ.

ಅತ್ಥಿ ಅನ್ತರಾಭವೋತಿ? ಆಮನ್ತಾ. ಆನನ್ತರಿಯಸ್ಸ ಪುಗ್ಗಲಸ್ಸ ಅತ್ಥಿ ಅನ್ತರಾಭವೋತಿ? ನ ಹೇವಂ ವತ್ತಬ್ಬೇ…ಪೇ… ಆನನ್ತರಿಯಸ್ಸ ಪುಗ್ಗಲಸ್ಸ ನತ್ಥಿ ಅನ್ತರಾಭವೋತಿ? ಆಮನ್ತಾ. ಹಞ್ಚಿ ಆನನ್ತರಿಯಸ್ಸ ಪುಗ್ಗಲಸ್ಸ ನತ್ಥಿ ಅನ್ತರಾಭವೋ, ನೋ ಚ ವತ ರೇ ವತ್ತಬ್ಬೇ – ‘‘ಅತ್ಥಿ ಅನ್ತರಾಭವೋ’’ತಿ.

ನ ಆನನ್ತರಿಯಸ್ಸ ಪುಗ್ಗಲಸ್ಸ ಅತ್ಥಿ ಅನ್ತರಾಭವೋತಿ? ಆಮನ್ತಾ. ಆನನ್ತರಿಯಸ್ಸ ಪುಗ್ಗಲಸ್ಸ ಅತ್ಥಿ ಅನ್ತರಾಭವೋತಿ? ನ ಹೇವಂ ವತ್ತಬ್ಬೇ…ಪೇ… ಆನನ್ತರಿಯಸ್ಸ ಪುಗ್ಗಲಸ್ಸ ನತ್ಥಿ ಅನ್ತರಾಭವೋತಿ? ಆಮನ್ತಾ. ನ ಆನನ್ತರಿಯಸ್ಸ ಪುಗ್ಗಲಸ್ಸ ನತ್ಥಿ ಅನ್ತರಾಭವೋತಿ? ನ ಹೇವಂ ವತ್ತಬ್ಬೇ…ಪೇ… ನಿರಯೂಪಗಸ್ಸ ಪುಗ್ಗಲಸ್ಸ…ಪೇ… ಅಸಞ್ಞಸತ್ತೂಪಗಸ್ಸ ಪುಗ್ಗಲಸ್ಸ …ಪೇ… ಅರೂಪೂಪಗಸ್ಸ ಪುಗ್ಗಲಸ್ಸ ಅತ್ಥಿ ಅನ್ತರಾಭವೋತಿ? ನ ಹೇವಂ ವತ್ತಬ್ಬೇ…ಪೇ… ಅರೂಪೂಪಗಸ್ಸ ಪುಗ್ಗಲಸ್ಸ ನತ್ಥಿ ಅನ್ತರಾಭವೋತಿ? ಆಮನ್ತಾ. ಹಞ್ಚಿ ಅರೂಪೂಪಗಸ್ಸ ಪುಗ್ಗಲಸ್ಸ ನತ್ಥಿ ಅನ್ತರಾಭವೋ, ನೋ ಚ ವತ ರೇ ವತ್ತಬ್ಬೇ – ‘‘ಅತ್ಥಿ ಅನ್ತರಾಭವೋ’’ತಿ.

ನ ಅರೂಪೂಪಗಸ್ಸ ಪುಗ್ಗಲಸ್ಸ ಅತ್ಥಿ ಅನ್ತರಾಭವೋತಿ? ಆಮನ್ತಾ. ಅರೂಪೂಪಗಸ್ಸ ಪುಗ್ಗಲಸ್ಸ ಅತ್ಥಿ ಅನ್ತರಾಭವೋತಿ? ನ ಹೇವಂ ವತ್ತಬ್ಬೇ…ಪೇ… ಅರೂಪೂಪಗಸ್ಸ ಪುಗ್ಗಲಸ್ಸ ನತ್ಥಿ ಅನ್ತರಾಭವೋತಿ? ಆಮನ್ತಾ. ನ ಅರೂಪೂಪಗಸ್ಸ ಪುಗ್ಗಲಸ್ಸ ನತ್ಥಿ ಅನ್ತರಾಭವೋತಿ? ನ ಹೇವಂ ವತ್ತಬ್ಬೇ…ಪೇ….

೫೦೯. ನ ವತ್ತಬ್ಬಂ ಅತ್ಥಿ ಅನ್ತರಾಭವೋತಿ? ಆಮನ್ತಾ. ನನು ಅನ್ತರಾಪರಿನಿಬ್ಬಾಯೀ ಪುಗ್ಗಲೋ ಅತ್ಥೀತಿ? ಆಮನ್ತಾ. ಹಞ್ಚಿ ಅನ್ತರಾಪರಿನಿಬ್ಬಾಯೀ ಪುಗ್ಗಲೋ ಅತ್ಥಿ, ತೇನ ವತ ರೇ [ನೋ ಚ ವತ ರೇ (ಸೀ. ಕ.), ನೋ ವತ ರೇ (ಸ್ಯಾ.)] ವತ್ತಬ್ಬೇ – ‘‘ಅತ್ಥಿ ಅನ್ತರಾಭವೋ’’ತಿ.

ಅನ್ತರಾಪರಿನಿಬ್ಬಾಯೀ ಪುಗ್ಗಲೋ ಅತ್ಥೀತಿ ಕತ್ವಾ ಅತ್ಥಿ ಅನ್ತರಾಭವೋತಿ? ಆಮನ್ತಾ. ಉಪಹಚ್ಚಪರಿನಿಬ್ಬಾಯೀ ಪುಗ್ಗಲೋ ಅತ್ಥೀತಿ ಕತ್ವಾ ಅತ್ಥಿ ಉಪಹಚ್ಚಭವೋತಿ? ನ ಹೇವಂ ವತ್ತಬ್ಬೇ…ಪೇ… ಅನ್ತರಾಪರಿನಿಬ್ಬಾಯೀ ಪುಗ್ಗಲೋ ಅತ್ಥೀತಿ ಕತ್ವಾ ಅತ್ಥಿ ಅನ್ತರಾಭವೋತಿ? ಆಮನ್ತಾ. ಅಸಙ್ಖಾರಪರಿನಿಬ್ಬಾಯೀ ಪುಗ್ಗಲೋ…ಪೇ… ಸಸಙ್ಖಾರಪರಿನಿಬ್ಬಾಯೀ ಪುಗ್ಗಲೋ ಅತ್ಥೀತಿ ಕತ್ವಾ ಅತ್ಥಿ ಸಸಙ್ಖಾರಭವೋತಿ? ನ ಹೇವಂ ವತ್ತಬ್ಬೇ…ಪೇ….

ಅನ್ತರಾಭವಕಥಾ ನಿಟ್ಠಿತಾ.