೧೪. ಅಭಿಞ್ಞಾನುಯೋಗೋ

೧೯೩. ನ ವತ್ತಬ್ಬಂ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ? ಆಮನ್ತಾ. ನನು ಅತ್ಥಿ ಕೋಚಿ ಇದ್ಧಿಂ ವಿಕುಬ್ಬತೀತಿ? ಆಮನ್ತಾ. ಹಞ್ಚಿ ಅತ್ಥಿ ಕೋಚಿ ಇದ್ಧಿಂ ವಿಕುಬ್ಬತಿ, ತೇನ ವತ ರೇ ವತ್ತಬ್ಬೇ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ.

೧೯೪. ನ ವತ್ತಬ್ಬಂ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ? ಆಮನ್ತಾ. ನನು ಅತ್ಥಿ ಕೋಚಿ ದಿಬ್ಬಾಯ ಸೋತಧಾತುಯಾ ಸದ್ದಂ ಸುಣಾತಿ…ಪೇ… ಪರಚಿತ್ತಂ ವಿಜಾನಾತಿ… ಪುಬ್ಬೇನಿವಾಸಂ ಅನುಸ್ಸರತಿ… ದಿಬ್ಬೇನ ಚಕ್ಖುನಾ ರೂಪಂ ಪಸ್ಸತಿ… ಆಸವಾನಂ ಖಯಂ ಸಚ್ಛಿಕರೋತೀತಿ? ಆಮನ್ತಾ. ಹಞ್ಚಿ ಅತ್ಥಿ ಕೋಚಿ ಆಸವಾನಂ ಖಯಂ ಸಚ್ಛಿಕರೋತಿ, ತೇನ ವತ ರೇ ವತ್ತಬ್ಬೇ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ.

೧೯೫. ಅತ್ಥಿ ಕೋಚಿ ಇದ್ಧಿಂ ವಿಕುಬ್ಬತೀತಿ ಕತ್ವಾ ತೇನ ಚ ಕಾರಣೇನ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾತಿ? ಆಮನ್ತಾ. ಯೋ ಇದ್ಧಿಂ ವಿಕುಬ್ಬತಿ, ಸ್ವೇವ ಪುಗ್ಗಲೋ? ಯೋ ಇದ್ಧಿಂ ನ ವಿಕುಬ್ಬತಿ, ನ ಸೋ ಪುಗ್ಗಲೋತಿ? ನ ಹೇವಂ ವತ್ತಬ್ಬೇ…ಪೇ….

೧೯೬. ಯೋ ದಿಬ್ಬಾಯ ಸೋತಧಾತುಯಾ ಸದ್ದಂ ಸುಣಾತಿ…ಪೇ… ಯೋ ಪರಚಿತ್ತಂ ವಿಜಾನಾತಿ… ಯೋ ಪುಬ್ಬೇನಿವಾಸಂ ಅನುಸ್ಸರತಿ… ಯೋ ದಿಬ್ಬೇನ ಚಕ್ಖುನಾ ರೂಪಂ ಪಸ್ಸತಿ… ಯೋ ಆಸವಾನಂ ಖಯಂ ಸಚ್ಛಿಕರೋತಿ, ಸ್ವೇವ ಪುಗ್ಗಲೋ? ಯೋ ಆಸವಾನಂ ಖಯಂ ನ ಸಚ್ಛಿಕರೋತಿ, ನ ಸೋ ಪುಗ್ಗಲೋತಿ? ನ ಹೇವಂ ವತ್ತಬ್ಬೇ…ಪೇ….

ಅಭಿಞ್ಞಾನುಯೋಗೋ.