೧. ಸುದ್ಧಸಚ್ಚಿಕಟ್ಠೋ

೧. ಅನುಲೋಮಪಚ್ಚನೀಕಂ

೧. [ಇಮಿನಾ ಲಕ್ಖಣೇನ ಸಕವಾದೀಪುಚ್ಛಾ ದಸ್ಸಿತಾ] ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾತಿ [ಸಚ್ಚಿಕಟ್ಠಪರಮಟ್ಠೇನಾತಿ (ಸ್ಯಾ. ಪೀ. ಕ. ಸೀ.)]? ಆಮನ್ತಾ. ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾತಿ? ನ ಹೇವಂ ವತ್ತಬ್ಬೇ.

ಆಜಾನಾಹಿ ನಿಗ್ಗಹಂ. ಹಞ್ಚಿ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ, ತೇನ ವತ ರೇ ವತ್ತಬ್ಬೇ – ‘‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ,’ ನೋ ಚ ವತ್ತಬ್ಬೇ – ‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’’ತಿ ಮಿಚ್ಛಾ.

ನೋ ಚೇ ಪನ ವತ್ತಬ್ಬೇ – ‘‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ, ನೋ ಚ ವತ ರೇ [ನೋ ವತ ರೇ (ಸ್ಯಾ. ಪೀ.)] ವತ್ತಬ್ಬೇ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ,’ ನೋ ಚ ವತ್ತಬ್ಬೇ – ‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’’ತಿ ಮಿಚ್ಛಾ.

ಅನುಲೋಮಪಞ್ಚಕಂ.

೨. [ಇಮಿನಾ ಲಕ್ಖಣೇನ ಪರವಾದೀಪುಚ್ಛಾ ದಸ್ಸಿತಾ] ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾತಿ? ಆಮನ್ತಾ. ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾತಿ? ನ ಹೇವಂ ವತ್ತಬ್ಬೇ.

ಆಜಾನಾಹಿ ಪಟಿಕಮ್ಮಂ. ಹಞ್ಚಿ ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ, ತೇನ ವತ ರೇ ವತ್ತಬ್ಬೇ – ‘‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ,’ ನೋ ಚ ವತ್ತಬ್ಬೇ – ‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’’ತಿ ಮಿಚ್ಛಾ.

ನೋ ಚೇ ಪನ ವತ್ತಬ್ಬೇ – ‘‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ, ನೋ ಚ ವತ ರೇ ವತ್ತಬ್ಬೇ – ‘‘ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ,’ ನೋ ಚ ವತ್ತಬ್ಬೇ – ‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’’ತಿ ಮಿಚ್ಛಾ.

ಪಟಿಕಮ್ಮಚತುಕ್ಕಂ.

೩. ತ್ವಂ ಚೇ ಪನ ಮಞ್ಞಸಿ – ‘‘ವತ್ತಬ್ಬೇ ಖೋ – ‘ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ,’ ನೋ ಚ ವತ್ತಬ್ಬೇ – ‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’ತಿ, ತೇನ ತವ [ತ್ವಂ (ಸ್ಯಾ.) ಟೀಕಾ ಓಲೋಕೇತಬ್ಬಾ] ತತ್ಥ ಹೇತಾಯ ಪಟಿಞ್ಞಾಯ ಹೇವಂ ಪಟಿಜಾನನ್ತಂ [ಟೀಕಾ ಓಲೋಕೇತಬ್ಬಾ] ಹೇವಂ ನಿಗ್ಗಹೇತಬ್ಬೇ. ಅಥ ತಂ ನಿಗ್ಗಣ್ಹಾಮ. ಸುನಿಗ್ಗಹಿತೋ ಚ [ಸುನಿಗ್ಗಹಿತೋವ (ಸ್ಯಾ.)] ಹೋಸಿ.

ಹಞ್ಚಿ ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ, ತೇನ ವತ ರೇ ವತ್ತಬ್ಬೇ – ‘‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ,’ ನೋ ಚ ವತ್ತಬ್ಬೇ – ‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’’ತಿ ಮಿಚ್ಛಾ.

ನೋ ಚೇ ಪನ ವತ್ತಬ್ಬೇ – ‘‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ, ನೋ ಚ ವತ ರೇ ವತ್ತಬ್ಬೇ – ‘‘ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ,’ ನೋ ಚ ವತ್ತಬ್ಬೇ – ‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ನುಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’’ತಿ ಇದಂ ತೇ ಮಿಚ್ಛಾ.

ನಿಗ್ಗಹಚತುಕ್ಕಂ.

೪. ಏಸೇ ಚೇ ದುನ್ನಿಗ್ಗಹಿತೇ ಹೇವಮೇವಂ [ಹೇವಮೇವ (ಸ್ಯಾ.)] ತತ್ಥ ದಕ್ಖ. ವತ್ತಬ್ಬೇ ಖೋ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ,’’ ನೋ ಚ ವತ್ತಬ್ಬೇ – ‘‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ. ನೋ ಚ ಮಯಂ ತಯಾ ತತ್ಥ ಹೇತಾಯ ಪಟಿಞ್ಞಾಯ ಹೇವಂ ಪಟಿಜಾನನ್ತಾ ಹೇವಂ ನಿಗ್ಗಹೇತಬ್ಬಾ. ಅಥ ಮಂ ನಿಗ್ಗಣ್ಹಾಸಿ. ದುನ್ನಿಗ್ಗಹಿತಾ ಚ [ದುನ್ನಿಗ್ಗಹಿತಾವ (ಸ್ಯಾ.)] ಹೋಮ.

ಹಞ್ಚಿ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ, ತೇನ ವತ ರೇ ವತ್ತಬ್ಬೇ – ‘‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ,’ ನೋ ಚ ವತ್ತಬ್ಬೇ – ‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’’ತಿ ಮಿಚ್ಛಾ.

ನೋ ಚೇ ಪನ ವತ್ತಬ್ಬೇ – ‘‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ, ನೋ ಚ ವತ ರೇ ವತ್ತಬ್ಬೇ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ,’ ನೋ ಚ ವತ್ತಬ್ಬೇ – ‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’’ತಿ ಇದಂ ತೇ ಮಿಚ್ಛಾ.

ಉಪನಯನಚತುಕ್ಕಂ.

೫. ನ ಹೇವಂ ನಿಗ್ಗಹೇತಬ್ಬೇ. ತೇನ ಹಿ ಯಂ ನಿಗ್ಗಣ್ಹಾಸಿ – ‘‘ಹಞ್ಚಿ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ, ತೇನ ವತ ರೇ ವತ್ತಬ್ಬೇ – ‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ, ನೋ ಚ ವತ್ತಬ್ಬೇ – ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’’ತಿ ಮಿಚ್ಛಾ.

ನೋ ಚೇ ಪನ ವತ್ತಬ್ಬೇ – ‘‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ, ನೋ ಚ ವತ ರೇ ವತ್ತಬ್ಬೇ – ‘‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’ತಿ. ಯಂ ತತ್ಥ ವದೇಸಿ – ‘‘ವತ್ತಬ್ಬೇ ಖೋ – ‘ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನ,’ ನೋ ಚ ವತ್ತಬ್ಬೇ – ‘ಯೋ ಸಚ್ಚಿಕಟ್ಠೋ ಪರಮತ್ಥೋ, ತತೋ ಸೋ ಪುಗ್ಗಲೋ ಉಪಲಬ್ಭತಿ ಸಚ್ಚಿಕಟ್ಠಪರಮತ್ಥೇನಾ’’’ತಿ ಇದಂ ತೇ ಮಿಚ್ಛಾ. ತೇನ ಹಿ ಯೇ ಕತೇ ನಿಗ್ಗಹೇ ಸೇ ನಿಗ್ಗಹೇ ದುಕ್ಕಟೇ. ಸುಕತೇ ಪಟಿಕಮ್ಮೇ. ಸುಕತಾ ಪಟಿಪಾದನಾತಿ.

ನಿಗ್ಗಮನಚತುಕ್ಕಂ.

ಪಠಮೋ ನಿಗ್ಗಹೋ.