೬. ದುಕಂ

೨೭೭. ಹೇತೂ ಧಮ್ಮಾ… ಹೇತೂ ಚೇವ ಸಹೇತುಕಾ ಚ ಧಮ್ಮಾ… ಹೇತೂ ಚೇವ ಹೇತುಸಮ್ಪಯುತ್ತಾ ಚ ಧಮ್ಮಾ ತೀಹಿ ಖನ್ಧೇಹಿ ಏಕೇನಾಯತನೇನ ಏಕಾಯ ಧಾತುಯಾ ಸಮ್ಪಯುತ್ತಾ; ಏಕೇನ ಖನ್ಧೇನ ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ಸಮ್ಪಯುತ್ತಾ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ಸೋಳಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೨೭೮. ಸಹೇತುಕಾ ಧಮ್ಮಾ… ಹೇತುಸಮ್ಪಯುತ್ತಾ ಧಮ್ಮಾ…ಪೇ… ಸಮ್ಪಯುತ್ತಾತಿ? ನತ್ಥಿ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ಸೋಳಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೨೭೯. ಸಹೇತುಕಾ ಚೇವ ನ ಚ ಹೇತೂ ಧಮ್ಮಾ… ಹೇತುಸಮ್ಪಯುತ್ತಾ ಚೇವ ನ ಚ ಹೇತೂ ಧಮ್ಮಾ… ನ ಹೇತುಸಹೇತುಕಾ ಧಮ್ಮಾ ಏಕೇನ ಖನ್ಧೇನ ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ಸಮ್ಪಯುತ್ತಾ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ಸೋಳಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೨೮೦. ಅಪ್ಪಚ್ಚಯಾ ಧಮ್ಮಾ… ಅಸಙ್ಖತಾ ಧಮ್ಮಾ… ಸನಿದಸ್ಸನಾ ಧಮ್ಮಾ… ಸಪ್ಪಟಿಘಾ ಧಮ್ಮಾ… ರೂಪಿನೋ ಧಮ್ಮಾ…ಪೇ… ಸಮ್ಪಯುತ್ತಾತಿ? ನತ್ಥಿ. ಕತಿಹಿ ವಿಪ್ಪಯುತ್ತಾ? ಚತೂಹಿ ಖನ್ಧೇಹಿ ಏಕೇನಾಯತನೇನ ಸತ್ತಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೨೮೧. ಲೋಕುತ್ತರಾ ಧಮ್ಮಾ…ಪೇ… ಸಮ್ಪಯುತ್ತಾತಿ? ನತ್ಥಿ. ಕತಿಹಿ ವಿಪ್ಪಯುತ್ತಾ? ನ ಕೇಹಿಚಿ ಖನ್ಧೇಹಿ ನ ಕೇಹಿಚಿ ಆಯತನೇಹಿ ಛಹಿ ಧಾತೂಹಿ ವಿಪ್ಪಯುತ್ತಾ.

೨೮೨. ಆಸವಾ ಧಮ್ಮಾ… ಆಸವಾ ಚೇವ ಸಾಸವಾ ಚ ಧಮ್ಮಾ… ಆಸವಾ ಚೇವ ಆಸವಸಮ್ಪಯುತ್ತಾ ಚ ಧಮ್ಮಾ ತೀಹಿ ಖನ್ಧೇಹಿ ಏಕೇನಾಯತನೇನ ಏಕಾಯ ಧಾತುಯಾ ಸಮ್ಪಯುತ್ತಾ; ಏಕೇನ ಖನ್ಧೇನ ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ಸಮ್ಪಯುತ್ತಾ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ಸೋಳಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೨೮೩. ಅನಾಸವಾ ಧಮ್ಮಾ… ಆಸವವಿಪ್ಪಯುತ್ತಾ ಅನಾಸವಾ ಧಮ್ಮಾ…ಪೇ… ಸಮ್ಪಯುತ್ತಾತಿ? ನತ್ಥಿ. ಕತಿಹಿ ವಿಪ್ಪಯುತ್ತಾ? ನ ಕೇಹಿಚಿ ಖನ್ಧೇಹಿ ನ ಕೇಹಿಚಿ ಆಯತನೇಹಿ ಛಹಿ ಧಾತೂಹಿ ವಿಪ್ಪಯುತ್ತಾ.

೨೮೪. ಆಸವಸಮ್ಪಯುತ್ತಾ ಧಮ್ಮಾ…ಪೇ… ಸಮ್ಪಯುತ್ತಾತಿ? ನತ್ಥಿ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ಸೋಳಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೨೮೫. ಆಸವಸಮ್ಪಯುತ್ತಾ ಚೇವ ನೋ ಚ ಆಸವಾ ಧಮ್ಮಾ ಏಕೇನ ಖನ್ಧೇನ ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ಸಮ್ಪಯುತ್ತಾ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ಸೋಳಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೨೮೬. ಸಂಯೋಜನಾ ಧಮ್ಮಾ… ಗನ್ಥಾ ಧಮ್ಮಾ… ಓಘಾ ಧಮ್ಮಾ… ಯೋಗಾ ಧಮ್ಮಾ… ನೀವರಣಾ ಧಮ್ಮಾ… ಪರಾಮಾಸಾ ಧಮ್ಮಾ… ಪರಾಮಾಸಾ ಚೇವ ಪರಾಮಟ್ಠಾ ಚ ಧಮ್ಮಾ ತೀಹಿ ಖನ್ಧೇಹಿ ಏಕೇನಾಯತನೇನ ಏಕಾಯ ಧಾತುಯಾ ಸಮ್ಪಯುತ್ತಾ; ಏಕೇನ ಖನ್ಧೇನ ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ಸಮ್ಪಯುತ್ತಾ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ಸೋಳಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೨೮೭. ಅಪರಾಮಟ್ಠಾ ಧಮ್ಮಾ… ಪರಾಮಾಸವಿಪ್ಪಯುತ್ತಾ ಅಪರಾಮಟ್ಠಾ ಧಮ್ಮಾ ಸಮ್ಪಯುತ್ತಾತಿ? ನತ್ಥಿ. ಕತಿಹಿ ವಿಪ್ಪಯುತ್ತಾ? ನ ಕೇಹಿಚಿ ಖನ್ಧೇಹಿ ನ ಕೇಹಿಚಿ ಆಯತನೇಹಿ ಛಹಿ ಧಾತೂಹಿ ವಿಪ್ಪಯುತ್ತಾ.

೨೮೮. ಪರಾಮಾಸಸಮ್ಪಯುತ್ತಾ ಧಮ್ಮಾ ಏಕೇನ ಖನ್ಧೇನ ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ಸಮ್ಪಯುತ್ತಾ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ಸೋಳಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೨೮೯. ಸಾರಮ್ಮಣಾ ಧಮ್ಮಾ…ಪೇ… ಸಮ್ಪಯುತ್ತಾತಿ? ನತ್ಥಿ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ದಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೨೯೦. ಅನಾರಮ್ಮಣಾ ಧಮ್ಮಾ… ಚಿತ್ತವಿಪ್ಪಯುತ್ತಾ ಧಮ್ಮಾ… ಚಿತ್ತವಿಸಂಸಟ್ಠಾ ಧಮ್ಮಾ… ಉಪಾದಾ ಧಮ್ಮಾ…ಪೇ… ಸಮ್ಪಯುತ್ತಾತಿ? ನತ್ಥಿ. ಕತಿಹಿ ವಿಪ್ಪಯುತ್ತಾ? ಚತೂಹಿ ಖನ್ಧೇಹಿ ಏಕೇನಾಯತನೇನ ಸತ್ತಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೨೯೧. ಚಿತ್ತಾ ಧಮ್ಮಾ ತೀಹಿ ಖನ್ಧೇಹಿ ಸಮ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ಸಮ್ಪಯುತ್ತಾ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ದಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೨೯೨. ಚೇತಸಿಕಾ ಧಮ್ಮಾ… ಚಿತ್ತಸಮ್ಪಯುತ್ತಾ ಧಮ್ಮಾ… ಚಿತ್ತಸಂಸಟ್ಠಾ ಧಮ್ಮಾ… ಚಿತ್ತಸಂಸಟ್ಠಸಮುಟ್ಠಾನಾ ಧಮ್ಮಾ… ಚಿತ್ತಸಂಸಟ್ಠಸಮುಟ್ಠಾನಸಹಭುನೋ ಧಮ್ಮಾ… ಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತಿನೋ ಧಮ್ಮಾ ಏಕೇನ ಖನ್ಧೇನ ಏಕೇನಾಯತನೇನ ಸತ್ತಹಿ ಧಾತೂಹಿ ಸಮ್ಪಯುತ್ತಾ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ದಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೨೯೩. ಅನುಪಾದಿನ್ನಾ ಧಮ್ಮಾ…ಪೇ… ಸಮ್ಪಯುತ್ತಾತಿ? ನತ್ಥಿ. ಕತಿಹಿ ವಿಪ್ಪಯುತ್ತಾ? ನ ಕೇಹಿಚಿ ಖನ್ಧೇಹಿ ನ ಕೇಹಿಚಿ ಆಯತನೇಹಿ ಪಞ್ಚಹಿ ಧಾತೂಹಿ ವಿಪ್ಪಯುತ್ತಾ.

೨೯೪. ಉಪಾದಾನಾ ಧಮ್ಮಾ… ಕಿಲೇಸಾ ಧಮ್ಮಾ… ಕಿಲೇಸಾ ಚೇವ ಸಂಕಿಲೇಸಿಕಾ ಚ ಧಮ್ಮಾ… ಕಿಲೇಸಾ ಚೇವ ಸಂಕಿಲಿಟ್ಠಾ ಚ ಧಮ್ಮಾ… ಕಿಲೇಸಾ ಚೇವ ಕಿಲೇಸಸಮ್ಪಯುತ್ತಾ ಚ ಧಮ್ಮಾ ತೀಹಿ ಖನ್ಧೇಹಿ ಏಕೇನಾಯತನೇನ ಏಕಾಯ ಧಾತುಯಾ ಸಮ್ಪಯುತ್ತಾ; ಏಕೇನ ಖನ್ಧೇನ ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ಸಮ್ಪಯುತ್ತಾ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ಸೋಳಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೨೯೫. ಅಸಂಕಿಲೇಸಿಕಾ ಧಮ್ಮಾ… ಕಿಲೇಸವಿಪ್ಪಯುತ್ತಾ ಅಸಂಕಿಲೇಸಿಕಾ ಧಮ್ಮಾ…ಪೇ… ಸಮ್ಪಯುತ್ತಾತಿ? ನತ್ಥಿ. ಕತಿಹಿ ವಿಪ್ಪಯುತ್ತಾ? ನ ಕೇಹಿಚಿ ಖನ್ಧೇಹಿ ನ ಕೇಹಿಚಿ ಆಯತನೇಹಿ ಛಹಿ ಧಾತೂಹಿ ವಿಪ್ಪಯುತ್ತಾ.

೨೯೬. ಸಂಕಿಲಿಟ್ಠಾ ಧಮ್ಮಾ… ಕಿಲೇಸಸಮ್ಪಯುತ್ತಾ ಧಮ್ಮಾ…ಪೇ… ಸಮ್ಪಯುತ್ತಾತಿ? ನತ್ಥಿ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ಸೋಳಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೨೯೭. ಸಂಕಿಲಿಟ್ಠಾ ಚೇವ ನೋ ಚ ಕಿಲೇಸಾ ಧಮ್ಮಾ… ಕಿಲೇಸಸಮ್ಪಯುತ್ತಾ ಚೇವ ನೋ ಚ ಕಿಲೇಸಾ ಧಮ್ಮಾ ಏಕೇನ ಖನ್ಧೇನ ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ಸಮ್ಪಯುತ್ತಾ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ಸೋಳಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೨೯೮. ದಸ್ಸನೇನ ಪಹಾತಬ್ಬಾ ಧಮ್ಮಾ… ಭಾವನಾಯ ಪಹಾತಬ್ಬಾ ಧಮ್ಮಾ… ದಸ್ಸನೇನ ಪಹಾತಬ್ಬಹೇತುಕಾ ಧಮ್ಮಾ… ಭಾವನಾಯ ಪಹಾತಬ್ಬಹೇತುಕಾ ಧಮ್ಮಾ… ಸಮ್ಪಯುತ್ತಾತಿ? ನತ್ಥಿ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ಸೋಳಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೨೯೯. ಸವಿತಕ್ಕಾ ಧಮ್ಮಾ… ಸವಿಚಾರಾ ಧಮ್ಮಾ ಏಕೇನ ಖನ್ಧೇನ ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ಸಮ್ಪಯುತ್ತಾ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ಪನ್ನರಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೩೦೦. ಅವಿತಕ್ಕಾ ಧಮ್ಮಾ… ಅವಿಚಾರಾ ಧಮ್ಮಾ…ಪೇ… ಸಮ್ಪಯುತ್ತಾತಿ? ನತ್ಥಿ. ಕತಿಹಿ ವಿಪ್ಪಯುತ್ತಾ? ನ ಕೇಹಿಚಿ ಖನ್ಧೇಹಿ ನ ಕೇಹಿಚಿ ಆಯತನೇಹಿ ಏಕಾಯ ಧಾತುಯಾ ವಿಪ್ಪಯುತ್ತಾ.

೩೦೧. ಸಪ್ಪೀತಿಕಾ ಧಮ್ಮಾ… ಪೀತಿಸಹಗತಾ ಧಮ್ಮಾ ಏಕೇನ ಖನ್ಧೇನ ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ಸಮ್ಪಯುತ್ತಾ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ಸೋಳಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೩೦೨. ಸುಖಸಹಗತಾ ಧಮ್ಮಾ ಏಕೇನ ಖನ್ಧೇನ ಸಮ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ಸಮ್ಪಯುತ್ತಾ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ಪನ್ನರಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೩೦೩. ಉಪೇಕ್ಖಾಸಹಗತಾ ಧಮ್ಮಾ ಏಕೇನ ಖನ್ಧೇನ ಸಮ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ಸಮ್ಪಯುತ್ತಾ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ಏಕಾದಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

೩೦೪. ನ ಕಾಮಾವಚರಾ ಧಮ್ಮಾ… ಅಪರಿಯಾಪನ್ನಾ ಧಮ್ಮಾ… ಅನುತ್ತರಾ ಧಮ್ಮಾ…ಪೇ… ಸಮ್ಪಯುತ್ತಾತಿ? ನತ್ಥಿ. ಕತಿಹಿ ವಿಪ್ಪಯುತ್ತಾ? ನ ಕೇಹಿಚಿ ಖನ್ಧೇಹಿ ನ ಕೇಹಿಚಿ ಆಯತನೇಹಿ ಛಹಿ ಧಾತೂಹಿ ವಿಪ್ಪಯುತ್ತಾ.

೩೦೫. ರೂಪಾವಚರಾ ಧಮ್ಮಾ… ಅರೂಪಾವಚರಾ ಧಮ್ಮಾ… ನಿಯ್ಯಾನಿಕಾ ಧಮ್ಮಾ… ನಿಯತಾ ಧಮ್ಮಾ… ಸರಣಾ ಧಮ್ಮಾ ಕತಿಹಿ ಖನ್ಧೇಹಿ ಕತಿಹಾಯತನೇಹಿ ಕತಿಹಿ ಧಾತೂಹಿ ಸಮ್ಪಯುತ್ತಾತಿ? ನತ್ಥಿ. ಕತಿಹಿ ವಿಪ್ಪಯುತ್ತಾ? ಏಕೇನ ಖನ್ಧೇನ ದಸಹಾಯತನೇಹಿ ಸೋಳಸಹಿ ಧಾತೂಹಿ ವಿಪ್ಪಯುತ್ತಾ; ಏಕೇನಾಯತನೇನ ಏಕಾಯ ಧಾತುಯಾ ಕೇಹಿಚಿ ವಿಪ್ಪಯುತ್ತಾ.

ಧಮ್ಮಾಯತನಂ ಧಮ್ಮಧಾತು, ದುಕ್ಖಸಚ್ಚಞ್ಚ ಜೀವಿತಂ;

ಸಳಾಯತನಂ ನಾಮರೂಪಂ, ಚತ್ತಾರೋ ಚ ಮಹಾಭವಾ.

ಜಾತಿ ಜರಾ ಚ ಮರಣಂ, ತಿಕೇಸ್ವೇಕೂನವೀಸತಿ;

ಗೋಚ್ಛಕೇಸು ಚ ಪಞ್ಞಾಸ, ಅಟ್ಠ ಚೂಳನ್ತರೇ ಪದಾ.

ಮಹನ್ತರೇ ಪನ್ನರಸ, ಅಟ್ಠಾರಸ ತತೋ ಪರೇ;

ತೇವೀಸ ಪದಸತಂ ಏತಂ, ಸಮ್ಪಯೋಗೇ ನ ಲಬ್ಭತೀತಿ.

ಸಮ್ಪಯೋಗವಿಪ್ಪಯೋಗಪದನಿದ್ದೇಸೋ ಛಟ್ಠೋ.