೧೭. ಚೋರಸಹಾಯಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಅಮ್ಹಾಕಂ ಭಗವತಿ ಪರಿನಿಬ್ಬುತೇ ಜಮ್ಬುದೀಪೇ ದೇವದಹನಗರೇ ಏಕೋ ಮನುಸ್ಸೋ ದುಕ್ಖಿತೋ ತತ್ಥ ತತ್ಥ ವಿಚರನ್ತೋ ಪಚ್ಚನ್ತೇ ಅಞ್ಞತರಂ ಗಾಮಂ ಗನ್ತ್ವಾ ತತ್ಥ ಏಕಸ್ಮಿಂ ಕುಲಗೇಹೇ ನಿವಾಸಂ ಕಪ್ಪೇಸಿ. ತತ್ಥ ಮನುಸ್ಸಾ ತಸ್ಸ ಯಾಗುಭತ್ತಂ ದತ್ವಾ ಪೋಸೇಸುಂ, ತತೋ ಸೋ ತತ್ಥ ಮನುಸ್ಸೇಹಿ ಮಿತ್ತಸನ್ಥವಂ ಕತ್ವಾ ಕತಿಪಾಹಂ ತತ್ಥ ವಸಿತ್ವಾ ಅಞ್ಞಟ್ಠಾನಂ ಗನ್ತ್ವಾ ಅಪರಭಾಗೇ ಚೋರಕಮ್ಮಂ ಕರೋನ್ತೋ ಜೀವಿಕಂ ಕಪ್ಪೇತಿ. ಅಥೇಕದಿವಸಂ ಚೋರೇನ್ತಂ ತಂ ರಾಜಪುರಿಸಾ ಗಹೇತ್ವಾ ರಞ್ಞೋ ದಸ್ಸೇಸುಂ. ರಾಜಾ ತಂ ಬನ್ಧನಾಗಾರೇ ಕರೋಥಾತಿ ಆಣಾಪೇಸಿ, ತೇ ತಂ ಬನ್ಧನಾಗಾರಂ ನೇತ್ವಾ ಸಙ್ಖಲಿಕಾಹಿ ಬನ್ಧಿತ್ವಾ ಆರಕ್ಖಕಾನಂ ಪಟಿಪಾದೇತ್ವಾ ಅಗಮಂಸು, ಬನ್ಧನಾಗಾರೇ ವಸನ್ತಸ್ಸ ತಸ್ಸ ದ್ವಾದಸಸಂವಚ್ಛರಾನಿ ಅತಿಕ್ಕನ್ತಾನಿ. ತತೋ ಅಪರಭಾಗೇ ತಸ್ಸ ಪುಬ್ಬಸಹಾಯೋ ಪಚ್ಚನ್ತಗಾಮವಾಸೀ ಮನುಸ್ಸೋ ಕೇನಚಿ ಕಮ್ಮೇನ ದೇವದಹ ಮಾಗತೋ ತತ್ಥ ತತ್ಥ ಆಹಿಣ್ಡನ್ತೋ ಬನ್ಧನಾಗಾರೇ ಬದ್ಧಂ ತಂ ಅದ್ದಸ. ದಿಸ್ವಾ ತಸ್ಸ ಹದಯಂ ಕಮ್ಪಿ, ಸೋ ರೋದಿತ್ವಾ ಪರಿದೇವಿತ್ವಾ ಕಿಂ ತೇ ಮಯಾ ಕತ್ತಬ್ಬಂ ಸಮ್ಮಾತಿ ಪುಚ್ಛಿ. ತತೋ ತೇನ ಸಮ್ಮ ಬನ್ಧನಾಗಾರೇ ವಸನ್ತಸ್ಸ ಮೇ ಇದಾನಿ ದ್ವಾದಸಸಂವಚ್ಛರಾನಿ ಅತಿಕ್ಕನ್ತಾನಿ, ಏತ್ತಕಂ ಕಾಲಂ ದುಬ್ಭೋಜನಾದಿನಾ ಮಹಾದುಕ್ಖಂ ಅನುಭೋಮಿ. ಯಾವಾಹಂ ಆಹಾರಂ ಪರಿಯೇಸಿತ್ವಾ ಭುಞ್ಜಿತ್ವಾ ಆಗಮಿಸ್ಸಾಮಿ. ತಾವ ಮಂ ಇತೋ ಮುಞ್ಚನುಪಾಯಂ ಜಾನಾಹೀತಿ ವುತ್ತೇ ಸೋ ಸಪ್ಪುರಿಸೋ.

೧. ರೂಪೇನ ಕಿನ್ತು ಗುಣಸೀಲವಿವಜ್ಜಿತೇನ,

ಮಿಚ್ಛಾಲಯಸ್ಸ ಕಿತವಸ್ಸ ಧಿಯಾ ಕಿಮತ್ಥಂ;

ದಾನಾ ದಿಚಾಗವಿಗತೇನ ಧನೇನ ಕಿಂ ವಾ;

ಮಿತ್ತೇನ ಕಿಂ ಬ್ಯಸನಕಾಲಪರಮ್ಮುಖೇನಾತಿ.

ಏವಞ್ಚ ಪನ ವತ್ವಾ ಸಾಧು ಸಮ್ಮ ಕರೋಮಿ ತೇ ವಚನನ್ತಿ ಆರಕ್ಖಕಾನಂ ಸನ್ತಿಕಂ ಗನ್ತ್ವಾ ಭೋನ್ತೋ ಯಾವೇಸೋ ಭತ್ತಂ ಭುಞ್ಜಿತ್ವಾ ಆಗಚ್ಛತಿ. ತಾವಾಹಂ ತಸ್ಸ ಪಾಟಿಭೋಗೋ ಭವಿಸ್ಸಾಮಿ. ವಿಸ್ಸಜ್ಜೇಥ ನನ್ತಿ ಆಹ, ತೇಹಿ ನ ಸಕ್ಕಾ ಭೋ ಏತಂ ವಿಸ್ಸಜ್ಜೇತುಂ, ಅಪಿ ಚ ಖೋ ಯಾವಾಯಂ ಆಗಚ್ಛತಿ. ತಾವ ತ್ವಂ ಅಯಸಙ್ಖಲಿಕಾಯ ಬದ್ಧೋ ನಿಸೀದಿಸ್ಸಸಿ, ಏವಂ ತಂ ವಿಸ್ಸಜ್ಜೇಸ್ಸಾಮ, ನೋ ಚೇ ನ ಸಕ್ಕಾತಿ ಆಹಂಸು, ಸೋ ಏವಮ್ಪಿ ಹೋತು ಸಮ್ಮಾತಿ ವತ್ವಾ ತಸ್ಸ ಪಾದತೋ ಸಙ್ಖಲಿಕಂ ಮುಞ್ಚಿತ್ವಾ ಅತ್ತನೋ ಪಾದೇ ಕತ್ವಾ ಬನ್ಧನಾಗಾರಂ ಪವಿಸಿತ್ವಾ ಇತರಂ ಮುಞ್ಚಾಪೇಸಿ. ಸೋಪಿ ಅಸಪ್ಪುರಿಸೋ ಬನ್ಧನಾ ಮುತ್ತೋ ನ ಪುನ ತಂ ಠಾನ ಮಗಮಾಸಿ, ಅಹೋ ಅಕತಞ್ಞುನೋ ಪಕತಿಂ ಞಾತುಂ ಭಾರಿಯಂ. ಯಥಾಹ.

೨. ವಾರಿಪೂರೇ ಯಥಾ ಸೋಬ್ಭೇ, ನೇವನ್ತೋ ವಿಸಮಂ ಸಮಂ;

ಪಞ್ಞಾಯತೇವಂಸಾಧುಸ್ಸ, ಭಾವಂ ಮನಸಿ ಸಮ್ಭವಂ.

೩. ಭಾಸನ್ತಿ ಮುಖತೋ ಏಕಂ, ಚಿನ್ತೇನ್ತಿ ಮನಸಾ ಪರಂ;

ಕಾಯೇನೇಕಂ ಕರೋನ್ತೇವಂ, ಪಕತಾಯಮಸಾಧುನಂ.

೪. ತೇಸಂ ಯೋ ಭಾವಮಞ್ಞಾಸಿ, ಸೋವ ಪಣ್ಡಿತಜಾತಿಕೋ;

ಬಹುಸ್ಸುತೋಪಿ ಸೋಯೇವ, ಪರಚಿತ್ತವಿದೂಪಿ ಸೋ.

ಅಥಸ್ಸ ಬನ್ಧನಾಗಾರೇ ವಸನ್ತಸ್ಸ ದ್ವಾದಸಸಂವಚ್ಛರಾನಿ ಅತಿಕ್ಕನ್ತಾನಿ. ಏತ್ತಕಂ ಕಾಲಂ ಜಿಘಚ್ಛಾಪೀಳಿತೇನ ತೇನ ಆಹಾರತ್ತಾಯ ಪರೋ ನ ಯಾಚಿತಪುಬ್ಬೋ, ಅನುಚ್ಛಿಟ್ಠಾಹಾರಂ ಲಭನದಿವಸತೋ ಅಲಭನದಿವಸಾಯೇವ ಬಹುತರಾ ಹೋನ್ತಿ, ಅಥ ದ್ವಾದಸಸಂವಚ್ಛರಾತಿಕ್ಕಮೇ ರಞ್ಞೋ ಪುತ್ತೋ ನಿಬ್ಬತ್ತಿ. ತದಾ ರಾಜಾ ಅತ್ತನೋ ವಿಜಿತೇ ಸಬ್ಬಬನ್ಧನಾಗಾರಾನಿ ವಿವರಾಪೇಸಿ. ಅನ್ತಮಸೋ ಮಿಗಪಕ್ಖಿನೋಪಿ ಬನ್ಧನಾ ಮುಞ್ಚಾಪೇಸಿ. ದ್ವಾರೇ ವಿವಟಮತ್ತೇಯೇವ ಬನ್ಧನಾಗಾರೇ ಮನುಸ್ಸಾ ಇಚ್ಛಿತಿಚ್ಛಿತಟ್ಠಾನಂ ಅಗಮಂಸು. ಸೋ ಪನೇಕೋವ ತೇಹಿ ಸದ್ಧಿಂ ಅಗನ್ತ್ವಾ ಓಹೀಯಿ. ಆರಕ್ಖಕೇಹಿ ತ್ವಂ ಭೋ ಕಸ್ಮಾ ನ ಗಚ್ಛಸೀತಿ ವುತ್ತೇ ಅಹಂ ಭೋ ಪಞ್ಞಾತಭಾವೇನ ಇದಾನಿ ನ ಗಮಿಸ್ಸಾಮಿ. ಅತೀವ ಪರಿಹೀನಗತ್ತೋಸ್ಮಿ. ಅನ್ಧಕಾರೇ ಗಮಿಸ್ಸಾಮೀತಿ ವತ್ವಾ ಅನ್ಧಕಾರೇ ಆಗತೇ ನಿಕ್ಖಮ್ಮ ಅನ್ತೋನಗರೇ ವಿಸ್ಸಾಸಿಕಾನಂ ಅಭಾವೇನ ಕುತೋ ಆಹಾರಂ ಲಭಿಸ್ಸಾಮೀತಿ ಚಿನ್ತೇನ್ತೋ ನಿಕ್ಖಮ್ಮ ರತ್ತನ್ಧಕಾರೇ ಆಮಕಸುಸಾನ ಮಗಮಾಸಿ. ಏತ್ಥಾಹಾರಂ ಲಭಿಸ್ಸಾಮೀತಿ. ತತ್ಥ ಸೋ ಅಧುನಾ ನಿಕ್ಖಿತ್ತಮತಮನುಸ್ಸಂ ದಿಸ್ವಾ ಮನುಸ್ಸಟ್ಠಿನಾ ಮಂಸಂ ಛಿನ್ದಿತ್ವಾ ಸೀಸಕಪಾಲೇ ಪಕ್ಖಿಪಿತ್ವಾ ತೀಹಿ ಮನುಸ್ಸಸೀಸೇಹಿ ಕತಉದ್ಧನೇ ಠಪೇತ್ವಾ ಚಿತಕತೋ ಓಮುಕ್ಕಅಲಾತೇಹಿ ಅಗ್ಗಿಂ ಕತ್ವಾ ಸುಸಾನಂ ನಿಬ್ಬಾಪನತ್ಥಾಯಾ ಭತಉದಕೇನ ಮನುಸ್ಸಟ್ಠಿನಾ ಆಲೋಲೇನ್ತೋ ಮಂಸಂ ಪಚಿತ್ವಾ ಓತಾರೇತ್ವಾ ಸಾಖಾಭಙ್ಗೇನ ಹಿರಿಕೋಪೀಣಂ ಪಟಿಚ್ಛಾದೇತ್ವಾ ನಿವತ್ಥಪಿಲೋಕಿಕಂ ವಾತಾವರಣಂ ಕತ್ವಾನಿಸೀದಿ. ತಸ್ಮಿಂ ಖಣೇ ತತ್ಥ ಪಿಪ್ಪಲೀರುಕ್ಖೇ ಅಧಿವತ್ಥಾ ದೇವತಾ ತಸ್ಸ ತಂ ಕಿರಿಯಂ ದಿಸ್ವಾ ಪುಚ್ಛಿಸ್ಸಾಮಿ ತಾವ ನನ್ತಿ ತಂ ಉಪಸಙ್ಕಮಿತ್ವಾ ಏವಮಾಹ. ಭೋ ತ್ವಂ ಘನತರತಿಮಿರಾಕುಲೇ ಮಹಾರತ್ತಿಯಂ ತತ್ಥ ತತ್ಥ ವಿಕಿಣ್ಣನರಟ್ಠಿಸಮಾಕಿಣ್ಣೇ ಸೋಣಸಿಗಾಲಾದಿಕುಣಪಾದಕಾಕುಲೇ ಮನುಸ್ಸಮಂಸಭಕ್ಖಯಕ್ಖರಕ್ಖಸಾಕುಲೇ ತತ್ಥ ತತ್ಥ ಪಜ್ಜಲನ್ತಾನೇಕಚಿತಕಭಯಾನಕೇ ಸುಸಾನೇ ಮನುಸ್ಸಮಂಸಂ ಪಚಿತ್ವಾ ಕಿಂಕರೋಸೀತಿ ಪುಚ್ಛನ್ತೀ ಆಹ.

೫. ರತ್ತನ್ಧಕಾರೇ ಕುಣಪಾದಕೇಹಿ,

ಸಮಾಕುಲೇ ಸೀವಥಿಕಾಯ ಮಜ್ಝೇ;

ಮನುಸ್ಸಮಂಸಂ ಪಚಸೀ ಧ ಸೀಸೇ,

ವದೇಹಿ ಕಿಂ ತೇನ ಪಯೋಜನಂ ತೇತಿ.

ಅಥ ಸೋ ಆಹ.

೬. ನ ಯಾಗಹೇತು ನ ಚ ದಾನಹೇತು,

ಸುಸಾನಮಜ್ಝಮ್ಹಿ ಪಚಾಮಿ ಮಂಸಂ;

ಖುದಾಸಮಂ ನತ್ಥಿ ನರಸ್ಸ ಅಞ್ಞಂ,

ಖುದಾವಿನಾಸಾಯ ಪಚಾಮಿಮಮ್ಭೋತಿ.

ತತೋ ದೇವತಾ ತಂ ತಥಾ ಹೋತು, ಇಮಿನಾ ಪಿಲೋತಿಕೇನ ವಾತಾವರಣಂ ಕರೋಸಿ. ಕಿಮತ್ಥಮೇತನ್ತಿ ಪುಚ್ಛನ್ತೀ.

೭. ನಿವತ್ಥಸಾಖೋ ಹಿರಿಸಂವರಾಯ,

ಪಿಲೋತಿಕಂ ತತ್ಥ ಪಸಾರಯನ್ತೋ;

ಕರೋಸಿ ವಾತಾವರಣಞ್ಚ ಸಮ್ಮ,

ಕಿಮತ್ಥಮೇತಂ ವದ ಪುಚ್ಛಿತೋ ಮೇತಿ.

ಸೋ ತಸ್ಸಾ ಚಿಕ್ಖನ್ತೋ ಆಹ.

೮. ಸುಭಾ ಸುಭಾಮಿಸ್ಸಿತಸೀತವಾತೋ,

ಸಯಂ ಅಚಿತ್ತೋವ ಅಚಿತ್ತಭಾವಾ;

ದೇಹಂ ಫುಸಿತ್ವಾನ ಅಸಾಧುಕಸ್ಸ,

ಅಕತಞ್ಞುನೋ ಮಿತ್ತಪಧಂಸಕಸ್ಸ.

೯. ಸಮಾವಹನ್ತೋ ಯದಿ ಮೇ ಸರೀರೇ,

ಫುಸಾತಿ [ಫುಸಾತಿಸಾಸಙ್ಗತಿಮಜ್ಜದಾನಿ ಇತಿಕತ್ತಚಿ] ತಂ ವಾಯು ಮಮಾ ವಿಸಿತ್ವಾ;

ದುಕ್ಖಂ ದದಾತೀತಿ ವಿಸಂವ ತಂ ಭೋ,

ಪರಿವಜ್ಜಿತುಂ ಬದ್ಧಮಿಮಂ ಕುಚೇಲನ್ತಿ.

ದೇವತಾ ಆಹ.

೧೦. ಕಿ ಮಕಾಸಿ ಭೋ ಸೋ ಕತನಾಸಕೋ ತೇ,

ಧನಞ್ಚ ಧಞ್ಞಂ ತವ ನಾಸಯೀ ಚ;

ಮಾತಾ ಪಿತಾ ಬನ್ಧವೋ ಖೇತ್ತ ವತ್ಥೂ,

ವಿನಾಸಿತಾ ತೇನ ವದೇಹಿ ಕಿಂ ತೇತಿ.

ತತೋ ಸೋ ಆಹ.

೧೧. ಯಂ ರಾಜತೋ ಹೋತಿ ಭಯಂ ಮಹನ್ತಂ,

ಸಬ್ಬಸ್ಸ ಹರಣಾದಿವಧಾದಿಕಞ್ಚ;

ಅಕತಞ್ಞುನಾ ಸಪ್ಪುರಿಸೇನ ಹೋತಿ,

ಆರಾವ ಸೋ ಭೋ ಪರಿವಜ್ಜನೀಯೋ.

೧೨. ಯಮತ್ಥಿ ಚೋರಾರಿಭಯಞ್ಹಿ ಲೋಕೇ,

ಅಥೋ ದಕೇನಾಪಿ ಚ ಪಾವಕೇನ;

ಅಕತಞ್ಞುನಾ ತಂ ಸಕಲಮ್ಪಿ ಹೋತಿ,

ಆರಾವ ಸೋ ಭೋ ಪರಿವಜ್ಜನೀಯೋ.

೧೩. ಪಾಣಾತಿಪಾತಮ್ಪಿ ಅದಿನ್ನದಾನಂ,

ಪರಸ್ಸ ದಾರೂಪಗಮಂ ಮುಸಾ ಚ;

ಮಜ್ಜಸ್ಸ ಪಾನಂ ಕಲಹಞ್ಚ ಪೇಸುನಂ,

ಸಮ್ಫಂ ಗಿರಂ ಧುತ್ತಜನೇಹಿ [ಅಕ್ಖಧುತ್ತಾದಿಯೋಗಂ ಇತಿಕತ್ಥಚಿ] ಯೋಗಂ.

೧೪. ಸಬ್ಬಂ ಅನತ್ಥಂ ಅಸಿವಂ ಅನಿಟ್ಠಂ,

ಅಪಾಯಿಕಂ [ಅಪಾಯಿಕಂ ಇತಿಕತ್ಥಚಿ] ದುಕ್ಖಮನನ್ತ ಮಞ್ಞಂ;

ಅಕತಞ್ಞುನಾ ಸಪ್ಪುರಿಸೇನ ಹೋತಿ;

ಆರಾವ ಸೋ ಭೋ ಪರಿವಜ್ಜನೀಯೋತಿ.

ವತ್ವಾ ಅತ್ತನಾ ಅಸಪ್ಪುರಿಸಸಂಸಗ್ಗೇನಾನುಭೂತಂ ಸಬ್ಬಂ ದುಕ್ಖಂ ಕಥೇಸಿ, ತತೋ ದೇವತಾ ಅಹಮ್ಪಿ ಭೋ ಸತ್ಥುನೋ ಮಙ್ಗಲಸುತ್ತದೇಸನಾದಿವಸೇ ಇಮಸ್ಮಿಂಯೇವ ರುಕ್ಖೇ ನಿಸಿನ್ನೋ.

ಅಸೇವನಾ ಚ ಬಾಲಾನಂ, ಪಣ್ಡಿತಾನಞ್ಚ ಸೇವನಾ;

ಪೂಜಾ ಚ ಪೂಜನೀಯ್ಯಾನಂ, ಏತಂ ಮಙ್ಗಲ ಮುತ್ತಮನ್ತಿ.

ಗಾಥಾಯ ಬಾಲಸ್ಸ ದೋಸೇ ಅಸ್ಸೋಸಿಂತಿ ವತ್ವಾ ತಸ್ಸ ಪಸನ್ನೋ ತಂ ಅತ್ತನೋ ವಿಮಾನಂ ನೇತ್ವಾ ನಹಾಪೇತ್ವಾ ದಿಬ್ಬವತ್ಥಾಲಙ್ಕಾರೇಹಿ ಅಲಙ್ಕರಿತ್ವಾ ದಿಬ್ಬನ್ನಪಾನಂ ದತ್ವಾ ಮಹನ್ತಂ ಸಕ್ಕಾರಸಮ್ಮಾನಂ ಕತ್ವಾ ಅತ್ತನೋ ಆನುಭಾವೇನ ತಸ್ಮಿಂ ನಗರೇ ರಜ್ಜೇ ಅಭಿಸಿಞ್ಚಾಪೇಸಿ. ಸೋ ತತ್ಥ ರಜ್ಜಂ ಕರೋನ್ತೋ ದಾನಾದೀನಿ ಪುಞ್ಞಾನಿ ಕತ್ವಾ ಆಯುಪರಿಯೋಸಾನೇ ಯಥಾಕಮ್ಮಂ ಗತೋತಿ.

೧೫. ಏವಂ ಅಸಾಧುಜನಸಙ್ಗಮಸನ್ನಿವಾಸಂ,

ಸಞ್ಚಜ್ಜ ಸಾಧುಸುಚಿಸಜ್ಜನಸಙ್ಗಮೇನ;

ದಾನಾದಿ ನೇಕಕುಸಲಂ ಪರಿಪೂರಯನ್ತಾ,

ಸಗ್ಗಾ ಪವಗ್ಗವಿಭವಂ ಅಭಿಸಮ್ಭುನಾಥಾತಿ.

ಚೋರಸಹಾಯಸ್ಸ ವತ್ಥುಂ ಸತ್ತಮಂ.