೧೧. ನನ್ದಿಯರಾಜಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಇತೋ ಕಿರ ಕಪ್ಪಸತಸಹಸ್ಸಮತ್ಥಕೇ ಪದುಮುತ್ತರೋ ನಾಮ ಸತ್ಥಾ ಲೋಕೇ ಉದಪಾದಿ ಸದೇವಕಂ ಲೋಕಂ ಸಂಸಾರಕನ್ತಾರಾ ಉತ್ತಾರೇನ್ತೋ. ತಸ್ಮಿಂ ಕಿರ ಸಮಯೇ ಏಕೋ ಕುಟುಮ್ಬಿಕೋ ಸತ್ಥು ಧಮ್ಮದೇಸನಂ ಸುತ್ವಾ ಪಸನ್ನಮಾನಸೋ ಬುದ್ಧಪಮುಖಂ ಭಿಕ್ಖುಸಙ್ಘಂ ನಿಮನ್ತೇತ್ವಾ ಮಹಾದಾನಂ ಸಜ್ಜೇತ್ವಾ ಅತ್ತನೋ ಭವನಂ ದೇವಭವನಮಿವ ಅಲಙ್ಕರಿತ್ವಾ ಬುದ್ಧಾರಹಂ ಮಹಾಸನಂ ಪಞ್ಞಾಪೇತ್ವಾ ಗನ್ತ್ವಾ ಭಗವನ್ತಂ ಯಾಚಿ ಕಾಲೋಯಂ ಭನ್ತೇ ಭಗವತೋ ಭತ್ತಗ್ಗಸ್ಸ ಉಪಸಙ್ಕಮನಾಯಾತಿ. ಅಥ ಭಗವಾ ಭಿಕ್ಖುಸಙ್ಘಪರಿವುತೋ ಮಹತಾ ಬುದ್ಧಾನುಭಾವೇನ ಗನ್ತ್ವಾ ನಿಸೀದಿ ಪಞ್ಞತ್ತವರಬುದ್ಧಾಸನೇ, ತತೋ ಕುಟುಮ್ಬಿಕೋ ಹಟ್ಠೋ ಉದಗ್ಗೋ ಸಪರಿಸೋ ಭಗವನ್ತಂ ಪರಿವಿಸತಿ ಅನೇಕೇಹಿ ಮಧುರನ್ನಪಾನಾದೀಹಿ. ತದಾ ತಸ್ಸ ಭಗವತೋ ಸಾಸನೇ ಧುತಙ್ಗಧರಾನಂ ಅಗ್ಗೋ ವಸಭತ್ಥೇರೋನಾಮ ಮಹಾಸಾವಕೋ ಸಪದಾನವತ್ತೇನ ಪಿಣ್ಡಾಯ ಚರಮಾನೋ ತಸ್ಸ ಕುಟುಮ್ಬಿಕಸ್ಸ ಗೇಹದ್ವಾರೇ ಅಟ್ಠಾಸಿ, ಅಥ ಸೋ ಥೇರಂ ದಿಸ್ವಾ ಭನ್ತೇ ಸತ್ಥಾ ಅನ್ತೋಗೇಹೇ ನಿಸಿನ್ನೋ, ತುಮ್ಹೇಪಿ ಪವಿಸಥಾತಿ ಯಾಚಿ, ಥೇರೋ ಅಪವಿಸಿತ್ವಾವ ಅಗಮಾಸಿ, ಕುಟುಮ್ಬಿಕೋ ಭಗವನ್ತಂ ಉಪಸಙ್ಕಮಿತ್ವಾ ತಮತ್ತಂ ವತ್ವಾ ಕಿಂ ಭನ್ತೇ ಸದೇವಕೇ ಲೋಕೇ ಭಗವತಾಪಿ ಉತ್ತರಿತರೋ ಗುಣೇನ ಸಂವಿಜ್ಜತೀತಿ ಆಹ. ಅಥಸ್ಸ ಸತ್ಥಾ ಪುತ್ತೋಪಮಂ ದಸ್ಸೇತ್ವಾ ಥೇರಸ್ಸ ಗುಣೇ ವಣ್ಣೇನ್ತೋ ಏವಮಾಹ.

೧. ಪಾಲೇನ್ತಿ ನಿಮ್ಮಲಂ ಕತ್ವಾ, ಪಾತಿಮೋಕ್ಖಾದಿಸಂವರಂ;

ಸಮಾದಿನ್ನಧುತಙ್ಗಾಚ, ಅಪ್ಪಿಚ್ಛಾ ಮುನಿಸೂನವೋ.

೨. ನಿಚ್ಚ ಮನ್ತಕಯುದ್ಧಮ್ಹಿ, ನದ್ಧಾ ಯೋಧಾವ ದಪ್ಪಿತಾ;

ಪುಞ್ಞಾನಂ ವತ್ಥುಭೂತಾ ತೇ, ದೇವಮಾನುಸಕಾ ದಿನಂ.

೩. ಧಾರೇಮಹಂ ವಣ್ಣವನ್ತಂ, ಸೀವೇಯ್ಯಮ್ಪಿಚ ಚೀವರಂ;

ಬುದ್ಧಪುತ್ತಾ ಮಹಾನಾಗಾ ನ ಧಾರೇನ್ತಿ ತಥಾವಿಧಂ.

೪. ಧಾರೇನ್ತಿ ತೇ ಪಂಸುಕೂಲಂ, ಸಙ್ಘಾಟೇತ್ವಾ ಪಿಲೋತಿಕೇ;

ವಣಚ್ಛಾದನಚೋಲಂವ, ಇಚ್ಛಾಲೋಭ ವಿವಜ್ಜಿತಾ.

೫. ಸಾದಿಯಾಮಿ ಸದಾ ಹಮ್ಭೋ, ಉಪಾಸಕನಿಮನ್ತನಂ;

ನೇವ ಸಾದೇನ್ತಿ ಸಮ್ಬುದ್ಧ, ಪುತ್ತೋ ಪಾಸಕಯಾಚನಂ.

೬. ಸಪದಾನೇನ ಯಂ ಲದ್ಧಂ, ಲೂಖಂವಾಪಿ ಪಣೀತಕಂ;

ತೇನ ತುಸ್ಸನ್ತಿ ಮೇ ಪುತ್ತಾ, ರಸಗೇಧವಿವಜ್ಜಿತಾ.

೭. ನಿಪಜ್ಜಾಮಿ ಅಹಂ ಸಾಧು, ಸನ್ಥತೇ ಸಯನೇ ಸುಭೇ;

ನ ತೇ ಸೇಯ್ಯಂ ಪಕಪ್ಪೇನ್ತಿ, ಸಂಸಾರಭಯಭೀರುಕಾ.

೮. ಠಾನಾ ಸನಗಮನೇನ, ಕಪ್ಪೇನ್ತಿ ಇರಿಯಾಪಥಂ;

ನೇಕಭೂಮಿಸಮಾಕಿಣ್ಣ, ಪಾಸಾದೇಸು ವಸಾಮಹಂ.

೯. ಬುದ್ಧಪುತ್ತಾ ತಥಾಚ್ಛನ್ನಂ, ನ ಕದಾ ಪವಿಸನ್ತಿ ತೇ;

ರುಕ್ಖಮೂಲೇ ಸುಸಾನಸ್ಮಿಂ, ಅಬ್ಭೋಕಾಸೇ ರಮನ್ತಿ ತೇ.

೧೦. ಭಾವೇತ್ವಾ ಭವನಾಸಾಯ, ಹೇತುಂ ಭಾವನಮುತ್ತಮಂ;

ಅಹಂ ಗಾಮೇ ವಸಿಸ್ಸಾಮಿ, ಪಾಪೇನ್ತೋ ಜನತಂ ಸಿವಂ.

೧೧. ರಮನ್ತಿ ಮಮ ಪುತ್ತಾ ತೇ, ಪನ್ತಸೇನಾಸನೇ ಕಕಾ;

ತೇಸಂ ಮಹತ್ತರೋ ಸನ್ತೋ, ಥೇರೋಯಂ ವಸಭೋ ಮಹಾ;

ಧುತಪಾಪೋ ಧುತಙ್ಗಗ್ಗೋ, ಞಾತೋಯಂ ಮಮ ಸಾಸನೇತಿ.

ಏವಂ ಭಗವಾ ಹತ್ಥಂ ಉಕ್ಖಿಪಿತ್ವಾ ಚನ್ದಮಣ್ಡಲೇ ಪಹರನ್ತೋ ವಿಯ ಥೇರಸ್ಸ ಗುಣೇ ಪಕಾಸೇಸಿ, ತತೋ ಸೋ ತಸ್ಸ ಗುಣಕಥಂ ಸುತ್ವಾ ಸಯಮ್ಪಿತಂ ಠಾನನ್ತರಂ ಕಾಮಯಮಾನೋ ಯನ್ನೂನಾಹಂ ಅನಾಗತೇ ಅಞ್ಞತರಸ್ಸ ಸಮ್ಮಾಸಮ್ಬುದ್ಧಸ್ಸ ಸಾಸನೇ ಧುತಙ್ಗಧರಾನಂ ಅಗ್ಗೋ ಭವಿಸ್ಸಾಮೀತಿ ತಂ ಠಾನನ್ತರಂ ಪತ್ಥೇನ್ತೋ ಭಗವತೋ ಪಾದಮೂಲೇ ನಿಪಜ್ಜಿ, ಸತ್ಥಾ ತಂ ಕಾರಣಂ ಉಪಪರಿಕ್ಖಿತ್ವಾ ಇತೋ ಕಪ್ಪಸತಸಹಸ್ಸಮತ್ಥಕೇ ಗೋತಮೋ ನಾಮ ಸತ್ಥಾ ಉಪ್ಪಜ್ಜಿಸ್ಸತಿ. ತ್ವಂ ತದಾ ಧುತಙ್ಗಧರಾನಂ ಅಗ್ಗೋ ಹುತ್ವಾ ಕಸ್ಸ ಪೋತಿ ಪಞ್ಞಾಯಿಸ್ಸತೀತಿ ಬ್ಯಾಕರಣ ಮದಾಸಿ. ತತೋ ಪಟ್ಠಾಯ ಸೋ ಸೋಮನಸ್ಸೋ ಪುಞ್ಞಕಮ್ಮಂ ಕತ್ವಾ ತತೋ ಚುತೋ ದೇವಮನುಸ್ಸೇಸು ದೇವಿಸ್ಸರಿಯಂ ಅನುಭವನ್ತೋ ವಿಪಸ್ಸೀಸಮ್ಮಾಸಮ್ಬುದ್ಧಕಾಲೇ ಏಕಸಾಟಕೋ ನಾಮ ಬ್ರಾಹ್ಮಣೋ ಹುತ್ವಾ ಮಹಾದಾನಂ ಅದಾಸಿ. ತತೋ ಚುತೋ ಕಸ್ಸಪಸಮ್ಮಾಸಮ್ಬುದ್ಧೇ ಪರಿನಿಬ್ಬುತೇ ಬಾರಾಣಸೀನಗರೇ ಬಾರಾಣಸೀಸೇಟ್ಠಿ ಹುತ್ವಾ ನಿಬ್ಬತ್ತೋ ದಾನಾದೀನಿ ಪುಞ್ಞಾನಿ ಕತ್ವಾ ತತೋ ಚವಿತ್ವಾ ಸಂಸಾರೇ ಸಂಸರನ್ತೋ ದಸವಸ್ಸಸಹಸ್ಸಾ ಯುಕೇಸು ಮನುಸ್ಸೇಸು ಬಾರಾಣಸಿಯಂ ಏಕೋ ಕುಟುಮ್ಬಿಕೋ ಹುತ್ವಾ ನಿಬ್ಬತ್ತಿ. ಸೋ ಪನಾಯಂ ಕುಟುಮ್ಬಿಕೋ ಅರಞ್ಞೇ ಜಙ್ಘಾವಿಹಾರಂ ಅನುವಿಚರನ್ತೋ ಪಚ್ಚನ್ತಿಮೇ ಜನಪದೇ ಅರಞ್ಞಾಯತನೇ ಅಞ್ಞತರಂ ಪಚ್ಚೇಕಬುದ್ಧಂ ಅದ್ದಸ. ಸೋ ಚ ಪಚ್ಚೇಕಬುದ್ಧೋ ತತ್ಥ ಚೀವರಕಮ್ಮಂ ಕರೋನ್ತೋ ಅನುವಾತೇ ಅಪ್ಪಹೋನ್ತೇ ಸಂಹರಿತ್ವಾ ಠಪೇತುಂ ಆರದ್ಧೋ. ಕುಟುಮ್ಬಿಕೋ ತಂ ದಿಸ್ವಾ ಭನ್ತೇ ಕಿಂ ಕರೋಥಾತಿ ಪುಚ್ಛಿ. ಸೋ ಪಚ್ಚೇಕಬುದ್ಧೋ ಅಪ್ಪಿಚ್ಛತಾಯ ತೇನ ಪುಟ್ಠೋ ನ ಕಿಞ್ಚಿ ವುತ್ತೋ ಹೋತಿ. ಸೋ ಚೀವರದುಸ್ಸಂ ನಪ್ಪಹೋತೀತಿ ಞತ್ವಾ ಅತ್ತನೋ ಉತ್ತರಸಾಟಕಂ ಪಚ್ಚೇಕಬುದ್ಧಸ್ಸ ಪಾದಮೂಲೇ ಠಪೇತ್ವಾ ಅಗಮಾಸಿ. ಪಚ್ಚೇಕಬುದ್ಧೋ ತಂ ಗಹೇತ್ವಾ ಅನುವಾತಕಂ ಆರೋಪೇನ್ತೋ ಚೀವರಂ ಕತ್ವಾ ಪಾರುಪಿ. ಕುಟುಮ್ಬಿಕೋ ಜೀವಿತಪರಿಯೋಸಾನೇ ಕಾಲಂ ಕತ್ವಾ ತಾವತಿಂಸಭವನೇ ನಿಬ್ಬತ್ತಿತ್ವಾ ತತ್ಥ ಯಾವತಾಯುಕಂ ದಿಬ್ಬಸಮ್ಪತ್ತಿಂ ಅನುಭವಿತ್ವಾ ತತೋ ಚವಿತ್ವಾ ಬಾರಾಣಸಿತೋ ತಿಯೋಜನಮತ್ತಕೇ ಠಾನೇ ಅಞ್ಞತರಸ್ಮಿಂ ನಗರೇ ನಿಬ್ಬತ್ತಿ, ತಸ್ಸ ಮಾತಾಪಿತರೋ ನನ್ದಿಯೋತಿ [ನನ್ದೀತಿನಾಮಂ ಇತಿಸಬ್ಬತ್ಥ] ನಾಮಂ ಅಕಂಸು, ತಸ್ಸ ಸತ್ತ ಭಾತರೋ ಅಹೇಸುಂ, ಸೇಸಾ ಛ ಭಾತರೋ ನಾನಾಕಮ್ಮನ್ತೇಸು ಬ್ಯಾವಟಾ ಮಾತಾಪಿತುನ್ನಂ ಪೋಸೇನ್ತಿ. ನನ್ದಿಯೋ ಪನ ಅಕಮ್ಮಸೀಲೋ ಗೇಹೇಯೇವ ವಸತಿ. ತಸ್ಮಾ ತಸ್ಸ ಸೇಸಾ ಕುಜ್ಝನ್ತಿ. ಮಾತಾಪಿತರೋಪಿ ನನ್ದಿಯಂ ಆಮನ್ತೇತ್ವಾ ಓವದನ್ತಿ. ಸೋ ತುಣ್ಹೀ ಹೋತೇವ. ಅಥಾಪರಸ್ಮಿಂ ಸಮಯೇ ಗಾಮೇ ನಕ್ಖತ್ತಂ ಸಙ್ಘುಟ್ಠಂ, ತದಾ ಸೋ ಮಾತರಂ ಆಹ. ಅಮ್ಮ ಸಾಟಕಂ ದೇಹಿ, ನಕ್ಖತ್ತಂ ಕೀಳಿಸ್ಸಾಮೀತಿ, ಸಾ ಧೋತ- ವತ್ಥಂ ನೀಹರಿತ್ವಾ ಅದಾಸಿ, ಅಮ್ಮ ಥೂಲಂ ಇದನ್ತಿ, ಸಾ ಅಞ್ಞಂ ನೀಹರಿತ್ವಾ ಅದಾಸಿ, ತಮ್ಪಿ ಪಟಿಕ್ಖಿಪಿ. ಅಥ ನಂ ಮಾತಾ ಆಹ. ತಾತ ಯಾದಿಸೇ ಮಯಂ ಗೇಹೇ ಜಾತಾ, ನತ್ಥಿ ಇತೋ ಸುಖುಮತರಸ್ಸ ಪಟಿಲಾಭಾಯ ಪುಞ್ಞನ್ತಿ, ಲಭನಟ್ಠಾನಂ ಗಮಿಸ್ಸಾಮಿ ಅಮ್ಮಾತಿ. ಪುತ್ತ ಅಹಂ ಅಜ್ಜೇವ ತವ ಬಾರಾಣಸೀನಗರೇ ರಜ್ಜಪಟಿಲಾಭಂ ಇಚ್ಛಾಮೀತಿ ಆಹ. ಸೋ ಸಾಧು ಅಮ್ಮಾತಿ ಮಾತರಂ ವನ್ದಿತ್ವಾ ಪದಕ್ಖಿಣಂ ಕತ್ವಾ ಪಕ್ಕಾಮಿ. ಮಾತುಯಾ ಪನಸ್ಸ ಏವಂ ಅಹೋಸಿ. ಕಹಂ ಸೋ ಗಮಿಸ್ಸತಿ, ಪುಬ್ಬೇವಿಯ ಇಧವಾ ಏತ್ಥವಾ ಗೇಹೇ ನಿಸೀದಿತ್ವಾ ಆಗಚ್ಛತೀತಿ, ಸೋ ಪನ ಪುಞ್ಞನಿಯಾಮೇನ ಚೋದಿಯಮಾನೋ ಗಾಮತೋ ನಿಕ್ಖಮಿತ್ವಾ ಬಾರಾಣಸಿಂ ಗನ್ತ್ವಾ ಸೇನಗುತ್ತಸ್ಸ ಗೇಹೇ ಪಟಿವಸತಿ, ಅಥೇಕದಿವಸಂ ಸೋ ತಸ್ಸ ಕಮ್ಮಕಾರೇಹಿ ಸದ್ಧಿಂ ಸಲ್ಲಪನ್ತೋ ನಿಸೀದಿತ್ವಾ ಪಚಲಾಯನ್ತೋ ಸುಪಿನಂ ಅದ್ದಸ. ಮುಖೇನ ಅನ್ತಂ ನಿಕ್ಖಮಿತ್ವಾ ಸಕಲಜಮ್ಬುದೀಪೇ ಪತ್ಥರಿತ್ವಾ ಅನ್ತೋಕುಚ್ಛಿಮೇವ ಪಾವಿಸಿ. ಪಬುದ್ಧೋ ಸೋ ಭೀತೋ ಮಹಾಸದ್ದಮಕಾಸಿ. ಅಥ ನಂ ಮಹಾಸೇನಗುತ್ತೋ ಪುಚ್ಛಿ. ನನ್ದಿಯೋ ಸುಪಿನಂ ಅದ್ದಸನ್ತಿ ಆಹ. ಅಥ ತೇನ ಕೀದಿಸನ್ತಿ ಪುಟ್ಠೋ ಕಥೇಸಿ, ತತೋ ಸೇನಗುತ್ತೋ ತಂ ಅತ್ತನೋ ಕುಲೂಪಗಂ ಪರಿಬ್ಬಾಜಿಕಂ ಪುಚ್ಛಿ ಕೋ ತಸ್ಸ ವಿಪಾಕೋತಿ. ಪರಿಬ್ಬಾಜಿಕಾ ಯದಿ ಭೋ ಇತ್ಥೀ ಪಸ್ಸತಿ. ಸತ್ತದಿವಸಬ್ಭನ್ತರೇಯೇವ ಅಭಿಸೇಕಂ ಲಭತಿ, ಯದಿ ಪುರಿಸೋ ಪಸ್ಸತಿ, ತಥೇವ ರಾಜಾ ಹೋತೀತಿ ಕಥೇಸಿ. ಸೇನಗುತ್ತೋ ತಸ್ಸಾ ತಂ ಕಥಂ ಸುತ್ವಾ ಇಮಂ ಮಮ ಞಾತಿಂ ಕರೋಮೀತಿ ಅತ್ತನೋ ಸತ್ತ ಧೀತರೇ ಪಕ್ಕೋಸಿತ್ವಾ ಪಟಿಪಾಟಿಯಾ ಪುಚ್ಛಿ. ನನ್ದಿಯಸ್ಸ ಸನ್ತಿಕೇ ವಸಥಾತಿ, ಸೇಸಾ ಸಬ್ಬಾ ನ ಇಚ್ಛಿಂಸು, ನ ಮಯಂ ಜಾನಾಮ ಏತಂ ಅಧುನಾಗತಂ ಕುಲವನ್ತಂ ವಾ ದುಕ್ಕುಲವನ್ತಂವಾತಿ. ಅಥ ಕಣಿಟ್ಠಿಕಂ ಪುಚ್ಛಿ. ಸಾ ಯಸ್ಸ ಮಂ ಮಾತಾಪಿತರೋ ದಸ್ಸನ್ತಿ. ತೇಸಂ ವಚನಂ ನ ಭಿನ್ದಿಸ್ಸಾಮೀತಿ ಸಮ್ಪಟಿಚ್ಛಿ, ಅಥ ಸೇನಗುತ್ತೋ ನನ್ದಿಯಂ ಪಕ್ಕೋಸಿತ್ವಾ ಅತ್ತನೋ ಧೀತರಂ ದತ್ವಾ ತಸ್ಸ ಮಹಾಸಮ್ಪತ್ತಿ ಮದಾಸಿ. ತತೋ ಸತ್ತಮೇ ದಿವಸೇ ನನ್ದಿಯೋ ತತ್ಥ ತತ್ಥ ಆಹಿಣ್ಡನ್ತೋ ರಞ್ಞೋ ಮಙ್ಗಲುಯ್ಯಾನಂ ಪಸ್ಸಿಸ್ಸಾಮೀತಿ ಗನ್ತ್ವಾ ಧಙ್ಗಲಸಿಲಾಪಟ್ಟೇಸಸೀಸಂ ಪಾರುಪಿತ್ವಾ ನಿಪಜ್ಜಿ, ಸೋ ಚ ಬಾರಾಣಸೀರಞ್ಞೋ ಕಾಲಙ್ಕತಸ್ಸ ಸತ್ತಮೋ ದಿವಸೋ ಹೋತಿ. ಅಮಚ್ಚಾಚ ಪುರೋಹಿತೋಚ ರಞ್ಞೋ ಸರೀರಕಿಚ್ಚಂ ಕಾರೇತ್ವಾ ರಾಜಙ್ಗಣೇ ನಿಸೀದಿತ್ವಾ ಮನ್ತಯಿಂಸು. ರಞ್ಞೋ ಏಕಾವ ಧೀತಾ ಅತ್ಥಿ, ಪುತ್ತೋ ಪನಸ್ಸ ನತ್ಥಿ. ಅರಾಜಿಕಂ ರಜ್ಜಂ ನ ತಿಟ್ಠತಿ. ಫುಸ್ಸರಥಂ ವಿಸ್ಸಜ್ಜೇಸ್ಸಾಮಾತಿ. ತೇ ಕುಮುದಪತ್ತವಣ್ಣೇ ಚತ್ತಾರೋ ಸಿನ್ಧವೇ ಯೋಜೇತ್ವಾ ಸೇತಚ್ಛತ್ತಪಮುಖಂಪಞ್ಚವಿಧರಾಜಕಕುಧಭಣ್ಡಂ ರಥಸ್ಮಿಂಯೇವ ಠಪೇತ್ವಾ ರಥಂ ವಿಸ್ಸಜ್ಜೇತ್ವಾ ಪಚ್ಛತೋ ತುರಿಯಾನಿ ಪಗ್ಗಣ್ಹಾಪೇಸುಂ. ರಥೋ ಪಾಚೀದ್ವಾರೇನ ನಿಕ್ಖಮಿತ್ವಾ ಉಯ್ಯಾನಾಭಿಮುಖೋ ಅಹೋಸಿ. ಪರಿಚಯೇನ ಉಯ್ಯಾನಾಭಿಮುಖೋ ಗಚ್ಛತಿ. ನಿವತ್ತೇಮಾತಿ ಕೇಚಿ ಆಹಂಸು. ಪುರೋಹಿತೋ ಮಾ ನಿವಾರಯಿತ್ಥಾತಿ ಆಹ. ರಥೋ ಕುಮಾರಕಂ ಪದಕ್ಖಿಣಂ ಕತ್ವಾ ಆರೋಹಣಸಜ್ಜೋ ಹುತ್ವಾ ಅಟ್ಠಾಸಿ. ಪುರೋಹಿತೋ ಪಾರುಪಣಕಣ್ಣಂ ಅಪನೇತ್ವಾ ಪಾದತಲಾನಿ ಓಲೋಕೇನ್ತೋ ತಿಟ್ಠತು ಅಯಂ ದೀಪೋ. ದ್ವಿಸಹಸ್ಸದೀಪ ಪರಿವಾರೇಸು ಚತೂಸು ಮಹಾದೀಪೇಸು ಏಕರಜ್ಜಂ ಕಾತುಂ ಸಮತ್ಥೋತಿವತ್ವಾ ತಸ್ಸ ಧಿತಿಂ ಉಪಧಾರೇತುಂ ತಿಕ್ಖತ್ತುಂ ತುರಿಯಾನಿ ಪಗ್ಗಣ್ಹಾಪೇಸಿ. ಅಥ ಕುಮಾರೋ ಮುಖಂ ವಿವರಿತ್ವಾ ಓಲೋಕೇತ್ವಾ ಕೇನ ಕಾರಣೇನ ಆಗತತ್ಥಾತಿ ಆಹ, ದೇವ ತುಮ್ಹಾಕಂ ರಜ್ಜಂ ಪಾಪುಣಾತೀತಿ, ರಾಜಾ ಕಹನ್ತಿ, ದೇವತ್ತಂ ಗತೋ ಸಾಮೀತಿ, ಕತಿ ದಿವಸಾ ಅತಿಕ್ಕನ್ತಾತಿ, ಅಜ್ಜ ಸತ್ತಮೋ ದಿವಸೋತಿ. ಪುತ್ತೋ ವಾ ಧೀತಾ ವಾ ನತ್ಥೀತಿ, ಧೀತಾ ಅತ್ಥಿ ದೇವ. ಪುತ್ತೋ ನ ವಿಜ್ಜತೀತಿ, ತೇನಹಿ ಕರಿಸ್ಸಾಮಿ ರಜ್ಜನ್ತಿ, ತೇ ತಾವದೇವ ಅಭಿಸೇಕಮಣ್ಡಪಂ ಕಾರೇತ್ವಾ ರಾಜಧೀತರಂ ಸಬ್ಬಾಲಙ್ಕಾರೇಹಿ ಅಲಙ್ಕಾರಿತ್ವಾ ಉಯ್ಯಾನಂ ನೇತ್ವಾ ಕುಮಾರಸ್ಸ ಅಭಿಸೇಕಂ ಅಕಂಸು, ಅಥಸ್ಸ ಕತಾಭಿಸೇಕಸ್ಸ ಸತಸಹಸ್ಸಗ್ಘನಕಂ ವತ್ಥಂ ಆನೇಸುಂ, ಸೋ ಕಿಮಿದಂ ತಾತಾತಿ ಆಹ, ನಿವಾಸನವತ್ಥಂ ದೇವಾತಿ, ನನು ತಾತಾ ಥೂಲಂತಿ, ಮನುಸ್ಸಾನಂ ಪರಿಭೋಗವತ್ಥೇಸು ಇತೋ ಸುಖುಮತರಂ ನತ್ಥಿ ದೇವಾತಿ, ತುಮ್ಹಾಕಂ ರಾಜಾ ಏವರೂಪಂ ನಿವಾಸೇಸೀತಿ, ಆಮ ದೇವಾತಿ. ನ ಮಞ್ಞೇ ಪುಞ್ಞವಾ ತುಮ್ಹಾಕಂ ರಾಜಾತಿ ವತ್ವಾ ಹನ್ದ ಸುವಣ್ಣಭಿಙ್ಕಾರಂ ಆಹರಥ, ಲಭಿಸ್ಸಾಮ ವತ್ಥನ್ತಿ, ತೇ ಸುವಣ್ಣಭಿಙ್ಕಾರಂ ಆಹರಿಂಸು, ಸೋ ಉಟ್ಠಾಯ ಹತ್ಥೇ ಧೋವಿತ್ವಾ ಮುಖಂ ವಿಕ್ಖಾಲೇತ್ವಾ ಹತ್ಥೇನ ಉದಕಂ ಆದಾಯ ಪುರತ್ಥಿಮದಿಸಾಯ ಅಬ್ಭುಕ್ಕಿರಿ, ತಾವದೇವ ಘನಪಥವಿಂ ಭಿನ್ದಿತ್ವಾ ಸೋಳಸಕಪ್ಪರುಕ್ಖಾ ಉಟ್ಠಹಿಂಸು, ಪುನ ಉದಕಂ ಹತ್ಥೇನ ಗಹೇತ್ವಾ ದಕ್ಖಿಣಂ ಪಚ್ಛಿಮಂ ಉತ್ತರನ್ತಿ ಏವಂ ಚತಸ್ಸೋಪಿ ದಿಸಾ ಅಬ್ಭುಕ್ಕಿರಿ, ಸಬ್ಬದಿಸಾಸು ಸೋಳಸ ಸೋಳಸ ಹುತ್ವಾ ಚತುಸಟ್ಠಿಕಪ್ಪರುಕ್ಖಾ ಉಟ್ಠಹಿಂಸು, ಸೋ ಏಕಂ ದಿಬ್ಬದುಸ್ಸಂ ನಿವಾಸೇತ್ವಾ ಏಕಂ ಪಾರುಪಿತ್ವಾ ನನ್ದಿಯರಞ್ಞೋ ವಿಜಿತೇ ಸುತ್ತಕನ್ತಿಕಾ ಇತ್ಥಿಯೋ ಮಾ ಸುತ್ತಂ ಕನ್ತನ್ತೂತಿ ಭೇರಿಂ ಚರಾಪೇಥಾತಿ ವತ್ವಾ ಛತ್ತಂ ಉಸ್ಸಾಪೇತ್ವಾ ಅಲಙ್ಕತಪಟಿಯತ್ತೋ ಹತ್ಥಿಕ್ಖನ್ಧವರಗತೋ ನಗರಂ ಪವಿಸಿತ್ವಾ ಪಾಸಾದಮಭಿರುಯ್ಹ ಮಹಾಸಮ್ಪತ್ತಿಂ ಅನುಭವಿ. ಅಹೋ ತದಾ ಪಚ್ಚೇಕಬುದ್ಧಸ್ಸ ದಿನ್ನಾನುವಾತಕಸ್ಸ ವಿಪಾಕೋ. ತೇನಾಹು ಪೋರಾಣಾ.

೧೨. ಯಥಾ ಸಾಸಪಮತ್ತಮ್ಹಾ, ಬೀಜಾ ನಿಗ್ರೋಧಪಾದಪೋ;

ಜಾಯತೇ ಸತಸಾಖಡ್ಢೋ, ಮಹಾನೀಲಮ್ಬುದೋಪಮೋ.

೧೩. ತಥೇವ ಪುಞ್ಞಕಮ್ಮಮ್ಹಾ, ಅಣುಮ್ಹಾ ವಿಪುಲಂ ಫಲಂ;

ಹೋತೀತಿ ಅಪ್ಪಪುಞ್ಞನ್ತಿ, ನಾವಮಞ್ಞೇಯ್ಯ ಪಣ್ಡಿತೋತಿ.

ಏವಂ ಗಚ್ಛನ್ತೇ ಕಾಲೇ ಏಕದಿವಸಂ ದೇವೀ ರಞ್ಞೋ ಸಮ್ಪತ್ತಿಂ ದಿಸ್ವಾ ಅಹೋ ತಪಸ್ಸೀತಿ ಕಾರುಞ್ಞಾಕಾರಂ ದಸ್ಸೇಸಿ. ಕಿಮಿದಂ ದೇವೀತಿ ಚ ಪುಟ್ಠಾ ಅತಿಮಹತೀ ತೇ ದೇವ ಸಮ್ಪತ್ತಿ. ಅತೀತಮದ್ಧಾನಂ ಕಲ್ಯಾಣಂ ಕತತ್ತಾ. ಇದಾನಿ ಅನಾಗತಸ್ಸತ್ಥಾಯ ಕುಸಲಂ ಕರೋಥಾತಿ ಆಹ. ಕಸ್ಸ ದಸ್ಸಾಮ. ಸೀಲವನ್ತಾ ನತ್ಥೀತಿ. ಅಸುಞ್ಞೋ ದೇವ ಜಮ್ಬುದೀಪೋ ಅರಹನ್ತೇಹಿ, ತುಮ್ಹೇ ದಾನಂ ಸಜ್ಜೇಥ, ಅಹಂ ಅರಹನ್ತೇ ಲಚ್ಛಾಮೀತಿ ಆಹ. ಪುನದಿವಸೇ ರಾಜಾ ಮಹಾರಹಂ ದಾನಂ ಸಜ್ಜಾಪೇಸಿ. ದೇವೀ ಸಚೇ ಇಮಿಸ್ಸಾ ದಿಸಾಯ ಅರಹನ್ತೋ ಅತ್ಥಿ, ಇಧಾ ಗನ್ತ್ವಾ ಅಮ್ಹಾಕಂ ಭಿಕ್ಖಂ ಗಣ್ಹನ್ತೂತಿ ಉತ್ತರಹಿಮವನ್ತಾಭಿಮುಖೀ ಪುಪ್ಫಾನಿ ಉದ್ಧಂ ಖಿಪಿತ್ವಾ ಉರೇನ ನಿಪಜ್ಜಿ. ಅಥ ತಾನಿ ಪುಪ್ಫಾನಿ ಆಕಾಸತೋ ಗನ್ತ್ವಾ ಹಿಮವನ್ತಪದೇಸೇ ವಸನ್ತಾನಂ ಪದುಮವತಿಯಾ ಪುತ್ತಾನಂ ಪಞ್ಚಸತಾನಂಪಚ್ಚೇಕಬುದ್ಧಾನಂ ಜೇಟ್ಠಕಮಹಾಪದುಮಪಚ್ಚೇಕಬುದ್ಧಸ್ಸ ಪಾದಮೂಲೇ ಪತಿಂಸು. ತಥಾಹಿ.

೧೪. ಅಹೋ ಪಸ್ಸಥ ಭೋ ದಾನಿ, ವಿಮ್ಹಯಂ ಪುಞ್ಞಕಮ್ಮುನೋ;

ಅಚೇತನಾಪಿ ಪುಪ್ಫಾನಿ, ದೂತಕಿಚ್ಚೇಸು ಬ್ಯಾವಟಾ.

೧೫. ಕತ್ತುಕಾಮೇನ ಲೋಕಸ್ಮಿಂ, ಸಕಲಂ ಅತ್ತನೋ ವಸಂ;

ಸಬ್ಬತ್ಥಾಮೇನ ಕತ್ತಬ್ಬಂ, ಪುಞ್ಞಂ ಪಞ್ಞವತಾ ಸದಾತಿ.

ತತೋ ಮಹಾಪದುಮಪಚ್ಚೇಕಬುದ್ಧೋ ತಂ ಞತ್ವಾ ಸೇಸಭಾತರೇ ಆಮನ್ತೇಸಿ. ಮಾರಿಸಾ ನನ್ದಿಯರಾಜಾ ತುಮ್ಹೇ ನಿಮನ್ತೇಸಿ. ಅಧಿವಾಸೇಥ ತಸ್ಸ ನಿಮನ್ತನನ್ತಿ. ತೇ ಅಧಿವಾಸೇತ್ವಾ ತಾವದೇವ ಆಕಾಸೇನಾ ಗನ್ತ್ವಾ ಉತ್ತರದ್ವಾರೇ ಓತರಿಂಸು. ಮನುಸ್ಸಾ ಪಞ್ಚಸತಾ ದೇವ ಪಚ್ಚೇಕಬುದ್ಧಾ ಆಗತಾತಿ ರಞ್ಞೋ ಆರೋಚೇಸುಂ, ರಾಜಾ ಸದ್ಧಿಂ ದೇವಿಯಾ ಗನ್ತ್ವಾ ವನ್ದಿತ್ವಾ ಪತ್ತೇ ಗಹೇತ್ವಾ ಪಚ್ಚೇಕಬುದ್ಧೇ ಪಾಸಾದಂ ಆರೋಪೇತ್ವಾ ತತ್ಥ ತೇಸಂ ದಾನಂ ದತ್ವಾ ಭತ್ತಕಿಚ್ಚಾವಸಾನೇ ರಾಜಾ ಸಙ್ಘತ್ಥೇರಸ್ಸ ದೇವೀ ಸಙ್ಘನವಕಸ್ಸ ಚ ಪಾದಮೂಲೇ ನಿಪಜ್ಜಿತ್ವಾ ಅಯ್ಯಾ ಪಚ್ಚಯೇಹಿ ನ ಕಿಲಮಿಸ್ಸನ್ತು, ಮಯಂ ಪುಞ್ಞೇನ ನ ಹಾಯಿಸ್ಸಾಮ, ಅಮ್ಹಾಕಂ ಇಧ ವಾಸಾಯ ಪಟಿಞ್ಞಂ ದೇಥಾತಿ ಪಟಿಞ್ಞಂ ಕಾರೇತ್ವಾ ಉಯ್ಯಾನೇ ನಿವಾಸಟ್ಠಾನಾದಯೋ ಕಾರೇತ್ವಾ ಯಾವಜೀವಂ ಪಚ್ಚಕಬುದ್ಧೇ ಉಪಟ್ಠಹಿತ್ವಾ ತೇಸು ಪರಿನಿಬ್ಬುತೇಸು ಸಾಧುಕೀಳನಂ ಕಾರೇತ್ವಾ ಚನ್ದನಾ ಗರುಆದೀಹಿ ಸರೀರಕಿಚ್ಚಂ ಕಾರೇತ್ವಾ ಧಾತುಯೋ ಗಹೇತ್ವಾ ಚೇತಿಯಂ ಪತಿಟ್ಠಾಪೇತ್ವಾ ಏವರೂಪಾನಮ್ಪಿ ಮಹಾನುಭಾವಾನಂ ಮಹೇಸೀನಂ ಮರಣಂ ಭವಿಸ್ಸತಿ, ಕಿಮಙ್ಗಂ ಪನ ಮಾದಿಸಾನನ್ತಿ ಸಂವೇಗಜಾತೋ ಜೇಟ್ಠಪುತ್ತಂ ರಜ್ಜೇ ಪತಿಟ್ಠಾಪೇತ್ವಾ ಸಯಂ ಪಬ್ಬಜಂ ಪಬ್ಬಜಿ, ದೇವೀಪಿ ರಞ್ಞೇ ಪಬ್ಬಜಿತೇ ಅಹಂ ಕಿಂಕರಿಸ್ಸಾಮೀತಿ ಪಬ್ಬಜಿತ್ವಾ ದ್ವೇಪಿ ಉಯ್ಯಾನೇ ವಸನ್ತಾ ಝಾನಾಭಿಞ್ಞಂ ನಿಬ್ಬತ್ತೇತ್ವಾ ಝಾನಸುಖೇನ ವೀತಿನಾಮೇನ್ತಾ ಆಯುಪರಿಯೋಸಾನೇ ಬ್ರಹ್ಮಲೋಕೇ ನಿಬ್ಬತ್ತಿಂಸು. ತೇ ಅಮ್ಹಾಕಂ ಭಗವತೋ ಕಾಲೇ ಬ್ರಾಹ್ಮಣಕುಲೇ ನಿಬ್ಬತ್ತಿತ್ವಾ ಬುದ್ಧಸಾಸನೇ ಪಬ್ಬಜಿಂಸು, ತದಾ ನನ್ದಿಯರಾಜಾ ಧುತಙ್ಗಧರಾನಂ ಅಗ್ಗೋ ಮಹಾಕಸ್ಸಪತ್ಥೇರೋನಾಮ ಹುತ್ವಾ ಚನ್ದೋ ವಿಯ ಸುರಿಯೋ ವಿಯಚ ಲೋಕೇ ಪಾಕಟೋ ಹುತ್ವಾ ಭಗವತಿ ಪರಿ- ನಿಬ್ಬುತೇ ಬುದ್ಧಸಾಸನಂ ಅತಿವಿಯ ಸೋಭೇತಿ. ಭರಿಯಾಪಿಸ್ಸ ಭದ್ದಕಾಪಿಳಾನೀ ನಾಮ ಅಹೋಸೀತಿ.

೧೬. ದತ್ವಾ ಪುರೇಕೋ ವಿಪಿನೇ ಚರನ್ತೋ,

ಪಚ್ಚೇಕಬುದ್ಧಸ್ಸನುವಾತಮತ್ತಂ;

ಕತ್ವಾ ಸರಟ್ಠಂ ಕುರುದೀಪಸೋಭಂ,

ಮಹಾನುಭಾವೋ ವಸುಧಾ ಧಿಪೋಸಿ.

೧೭. ತುಮ್ಹೇಚ ಭೋನ್ತೋ ಖಲು ಸೀಲವನ್ತೇ,

ದದಾಥ ದಾನಾನಿ ಅನಪ್ಪಕಾನಿ;

ತಂ ವೋ ಪತಿಟ್ಠಾಚ ಭವನ್ತರಸ್ಮಿಂ,

ಚಿನ್ತಾಮಣಿಂ ಕಪ್ಪತರುಂವ ಸಾರನ್ತಿ.

ನನ್ದಿಯರಾಜಸ್ಸ ವತ್ಥುಂ ಪಥಮಂ.