೫. ಚಿತ್ತಾಗಾರವಗ್ಗ, ೯-೧೦. ನವಮ, ದಸಮ ಸಿಕ್ಖಾಪುಚ್ಛಾ

ಪುಚ್ಛಾ – ತಿರಚ್ಛಾನವಿಜ್ಜಂ ಆವುಸೋ ಪರಿಯಾಪುಣನ್ತಿಯಾ ಚ ವಾಚೇನ್ತಿಯಾ ಚ ಪಾಚಿತ್ತಿಯಂ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖುನಿಯೋ ತಿರಚ್ಛಾನವಿಜ್ಜಂ ಪರಿಯಾಪುಣಿಂಸುಚೇವ ವಾಚೇಸುಞ್ಚ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಭಿಕ್ಖು ಪನ ಆವುಸೋ ತಾದಿಸಂ ತಿರಚ್ಛಾನವಿಜ್ಜಂ ಪರಿಯಾಪುಣನ್ತೋ ಚ ವಾಚೇನ್ತೋ ಚ ಕಿಂ ನಾಮ ಆಪತ್ತಿಂ ಆಪಜ್ಜತಿ.

ವಿಸ್ಸಜ್ಜನಾ – ದುಕ್ಕಟಂ ಭನ್ತೇ ಆಪತ್ತಿಂ ಆಪಜ್ಜತಿ.