೧೩. ಕುಲದೂಸಕ ಸಙ್ಘಾದಿಸೇಸ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ತೇನ ಆವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಕುಲದೂಸಕಸ್ಸ ಭಿಕ್ಖುನೋ ಯಾವತತಿಯಂ ಸಮನುಭಾಸನಾಯ ಅಪ್ಪಟಿನಿಸ್ಸಜ್ಜನ್ತಸ್ಸ ಸಙ್ಘಾದಿಸೇಸೋ ಕತ್ಥ ಪಞ್ಞತ್ತೋ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತೋ.

ಪುಚ್ಛಾ – ಕಂ ಆರಬ್ಭ ಆವುಸೋ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತೋ.

ವಿಸ್ಸಜ್ಜನಾ – ಅಸ್ಸಜಿ ಪುನಬ್ಬಸುಕೇ ಭನ್ತೇ ಭಿಕ್ಖೂ ಆರಬ್ಭ ಪಞ್ಞತ್ತೋ, ಅಸ್ಸಜಿಪುನಬ್ಬಸುಕಾ ಭನ್ತೇ ಭಿಕ್ಖೂ ಸಙ್ಘೇನ ಪಬ್ಬಾಜನೀಯಕಮ್ಮಕತಾ ಛನ್ದಗಾಮಿತಾ ದೋಸಗಾಮಿತಾ ಮೋಹಗಾಮಿತಾ ಭಯಗಾಮಿತಾ ಪಾಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತೋ.

ಅನಿಯತ ಸಿಕ್ಖಾಪುಚ್ಛಾ

ಪುಚ್ಛಾ – ಯಂ ತೇನ ಆವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಪಠಮೋ ಚ ಅನಿಯತೋ ದುತಿಯೋ ಚ ಅನಿಯತೋ ಕತ್ಥ ಪಞ್ಞತ್ತೋ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಞತ್ತೋ.

ಪುಚ್ಛಾ – ಕಂ ಆವುಸೋ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತೋ.

ವಿಸ್ಸಜ್ಜನಾ – ಆಯಸ್ಮನ್ತಂ ಭನ್ತೇ ಉದಾಯಿಂ ಆರಬ್ಭ ಪಞ್ಞತ್ತೋ, ಆಯಸ್ಮಾ ಭನ್ತೇ ಉದಾಯೀ ಮಾತುಗಾಮೇನ ಸದ್ಧಿಂ ಏಕೋಏಕಾಯ ರಹೋ ಪಟಿಚ್ಛನ್ನೇ ಆಸನೇ ಅಲಂಕಮ್ಮನಿಯೇ ನಿಸಜ್ಜಂ ಕಪ್ಪೇಸಿ, ತಸ್ಮಿಞ್ಚ ವತ್ಥುಸ್ಮಿಂ, ಆಯಸ್ಮಾಯೇವ ಭನ್ತೇ ಉದಾಯೀ ಮಾತುಗಾಮೇನ ಸದ್ಧಿಂ ರಹೋ ನಿಸಜ್ಜಂ ಅಕಾಸಿ, ತಸ್ಮಿಞ್ಚ ಭನ್ತೇ ವತ್ಥುಸ್ಮಿಂ ಪಞ್ಞತ್ತೋ.

ಪುಚ್ಛಾ – ಕಸ್ಸ ಆವುಸೋ ವಚನಂ.

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ.

ಪುಚ್ಛಾ – ಕೇನಾವುಸೋ ಆಭತಂ.

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ.

ಪುಚ್ಛಾ – ಅತ್ಥಿ ನುಖೋ ಆವುಸೋ ಏತ್ಥ ಕೋಚಿಪಿ ವಿರದ್ಧದೋಸೋ.

ವಿಸ್ಸಜ್ಜನಾ – ನತ್ಥಿ ಭನ್ತೇ.

ಸಂಗಾಯನತ್ಥಾಯ ಸಙ್ಘಸ್ಸಞಾಪನಂ

ಸುಣಾತು ಮೇ ಭನ್ತೇ ಸಙ್ಘೋ, ಅಹಂ ಭನ್ತೇ ಆಯಸ್ಮನ್ತಂ ವಿಚಿತ್ತಸಾರಾಭಿವಂಸಂ ತಿಪಿಟಕಧರ ಧಮ್ಮಭಣ್ಡಾಗಾರಿಕಂ ಪಠಮ ದುಟ್ಠದೋಸ ಸಿಕ್ಖಾಪದತೋ ಪಟ್ಠಾಯ ಪುಚ್ಛಿತಬ್ಬಾನಿ ಅನೇಕಾನಿ ಠಾನಾನಿ ಪುಚ್ಛಿಂ, ಸೋ ಚ ಆಯಸ್ಮಾ ಪುಟ್ಠೋ ಪುಟ್ಠೋ ವಿಸ್ಸಜ್ಜೇತಿ, ಇತಿಹಿದಂ ಭನ್ತೇ ಸಬ್ಬಂ ಸಿಕ್ಖಾಪದಂ ನಿಮ್ಮಲಂ ಸುಪರಿಸುದ್ಧಂ ತಸ್ಸೇವ ಭಗವತೋ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ, ತಸ್ಮಾ ಯಥಾಪುರೇ ಮಹಾಕಸ್ಸಪಾದಯೋ ಮಹಾಥೇರವರಾ ಪೋರಾಣಸಂಗೀತಿಕಾರಾ ಬ್ರಹ್ಮಚರಿಯಸ್ಸ ಚಿರಟ್ಠಿತಿಯಾ ಬಹುಜನಹಿತಾಯ ಬಹುಜನಸುಖಾಯ ಲೋಕಾನುಕಮ್ಪಾಯ ಅತ್ಥಾಯ ಹಿತಾಯ ಸುಖಾಯ ದೇವಮನುಸ್ಸಾನಂ ಸಂಗಾಯಿಂಸುಚೇವ ಅನುಸಂಗಾಯಿಂಸುಚ, ಏವಮೇವ ಮಯಮ್ಪಿ ದಾನಿ ಸಬ್ಬೇವ ಛಟ್ಠಸಂಗೀತಿ ಮಹಾಧಮ್ಮಸಭಾಪರಿಯಾಪನ್ನಾ ಇಮಾನಿ ಸಿಕ್ಖಾಪದಾನಿ ಏಕತೋ ಗಣಸಜ್ಝಾಯಂ ಕತ್ವಾ ಸಂಗಾಯೇಯ್ಯಾಮ.