೮. ವತ್ತಕ್ಖನ್ಧಕ

ಪುಚ್ಛಾ – ಆಗನ್ತುಕಾನಂ ಆವುಸೋ ಭಿಕ್ಖೂನಂ ವತ್ತಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಆಗನ್ತುಕೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಆಗನ್ತುಕಾ ಭನ್ತೇ ಭಿಕ್ಖೂ ಸಉಪಾಹನಾಪಿ ಆರಾಮಂ ಪವಿಸಿಂಸು, ಛತ್ತಪಗ್ಗಹಿತಾಪಿ ಆರಾಮಂ ಪವಿಸಿಂಸು, ಓಗುಣ್ಠಿತಾಪಿ ಆರಾಮಂ ಪವಿಸಿಂಸು, ಸೀಸೇಪಿ ಚೀವರಂ ಕರಿತ್ವಾ ಆರಾಮಂ ಪವಿಸಿಂಸು, ಪಾನೀಯೇನಪಿ ಪಾದೇ ದೋವಿಂಸು, ವುಡ್ಢತರೇಪಿ ಆವಾಸಿಕೇ ಭಿಕ್ಖೂ ನಾಭಿವಾದೇಸುಂ, ನಪಿ ಸೇನಾಸನಂ ಪುಚ್ಛಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ತೇನ ಹಿ ಭಿಕ್ಖವೇ ಆಗನ್ತುಕಾನಂ ಭಿಕ್ಖೂನಂ ವತ್ತಂ ಪಞ್ಞಪೇಸ್ಸಾಮಿ, ಯಥಾ ಆಗನ್ತುಕೇಹಿ ಭಿಕ್ಖೂಹಿ ಸಮ್ಮಾ ವತ್ತಿತಬ್ಬಂ, ಆಗನ್ತುಕೇನ ಭಿಕ್ಖವೇ ಭಿಕ್ಖುನಾ ಇದಾನಿ ಆರಾಮಂ ಪವಿಸಿಸ್ಸಾಮೀತಿ ಉಪಾಹನಾ ಓಮುಞ್ಚಿತ್ವಾ ನೀಚಂ ಕತ್ವಾ ಪಪ್ಫೋಟೇತ್ವಾ ಗಹೇತ್ವಾ ಛತ್ತಂ ಅಪನಾಮೇತ್ವಾ ಸೀಸಂ ವಿವರಿತ್ವಾ ಸೀಸೇ ಚೀವರಂ ಖನ್ಧೇ ಕತ್ವಾ ಸಾಧುಕಂ ಅತರಮಾನೇನ ಆರಾಮೋ ಪವಿಸಿತಬ್ಬೋ’’ ಏವಮಾದಿನಾ ಭನ್ತೇ ಆಗನ್ತುಕಾನಂ ಭಿಕ್ಖೂನಂ ವತ್ತಂ ಪಞ್ಞತ್ತಂ.

ಪುಚ್ಛಾ – ಆವಾಸಿಕಾನಂ ಆವುಸೋ ಭಿಕ್ಖೂನಂ ವತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ, ಕಥಞ್ಚ ಪನ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಆವಾಸಿಕೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಆವಾಸಿಕಾ ಭಿಕ್ಖೂ ಆಗನ್ತುಕೇ ಭಿಕ್ಖೂ ದಿಸ್ವಾ ನೇವ ಆಸನಂ ಪಞ್ಞಪೇಸುಂ, ನ ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿಂಸು, ನ ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹೇಸುಂ, ನ ಸೇನಾಸನಂ ಪಞ್ಞಪೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ –

‘‘ಆವಾಸಿಕೇನ ಭಿಕ್ಖವೇ ಭಿಕ್ಖುನಾ ಆಗನ್ತುಕಂ ಭಿಕ್ಖುಂ ವುಡ್ಢತರಂ ದಿಸ್ವಾ ಆಸನಂ ಪಞ್ಞಪೇತಬ್ಬಂ, ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿತಬ್ಬಂ, ಪಚ್ಚುಗ್ಗನ್ತ್ವಾ ಪತ್ತಚೀವರಂ ಪಟಿಗ್ಗಹೇತಬ್ಬಂ ಪಾನೀಯೇನ ಪುಚ್ಛಿತಬ್ಬೋ’’ ಏವಮಾದಿನಾ ಭನ್ತೇ ಆವಾಸಿಕಾನಂ ಭಿಕ್ಖೂನಂ ವತ್ತಂ ಭಗವತಾ ಪಞ್ಞತ್ತಂ.

ಪುಚ್ಛಾ – ಗಮಿಕಾನಂ ಆವುಸೋ ಭಿಕ್ಖೂನಂ ವತ್ತಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ, ಕಥಞ್ಚಪನ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಗಮಿಕೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಸಮ್ಬಹುಲಾ ಭನ್ತೇ ಗಮಿಕಾ ಭಿಕ್ಖೂ ದಾರುಭಣ್ಡಂ ಮತ್ತಿಕಾಭಣ್ಡಂ ಅಪ್ಪಟಿಸಾಮೇತ್ವಾ ದ್ವಾರವಾತಪಾನಂ ವಿವರಿತ್ವಾ ಸೇನಾಸನಂ ಅನಾಪುಚ್ಛಾ ಪಕ್ಕಮಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಗಮಿಕೇನ ಭಿಕ್ಖವೇ ಭಿಕ್ಖುನಾ ದಾರುಭಣ್ಡಂ ಪಟಿಸಾಮೇತ್ವಾ ದ್ವಾರವಾತಪಾನಂ ಥಕೇತ್ವಾ ಸೇನಾಸನಂ ಆಪುಚ್ಛಾ ಪಕ್ಕಮಿತಬ್ಬಂ’’ ಏವಮಾದಿನಾ ಭನ್ತೇ ಆಕಾರೇನ ಭಗವತಾ ಗಮಿಕಾನಂ ಭಿಕ್ಖೂನಂ ವತ್ತಂ ಪಞ್ಞತ್ತಂ.

ಪುಚ್ಛಾ – ಭತ್ತಗ್ಗೇ ಆವುಸೋ ಅನುಮೋದಿತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಭತ್ತಗ್ಗೇ ನಾನುಮೋದಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಭಿಕ್ಖೂನಂ ಆವುಸೋ ಭತ್ತಗ್ಗವತ್ತಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ದುನ್ನಿವತ್ಥಾ ದುಪ್ಪಾರುತಾ ಅನಾಕಪ್ಪಸಮ್ಪನ್ನಾ ಭತ್ತಗ್ಗಂ ಗಚ್ಛಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಸಚೇ ಆರಾಮೇ ಕಾಲೋ ಆರೋಚಿತೋ ಹೋತಿ, ತಿಮಣ್ಡಲಂ ಪಟಿಚ್ಛಾದೇನ್ತೇನ ಪರಿಮಣ್ಡಲಂ ನಿವಾಸೇತ್ವಾ ಕಾಯಬನ್ಧನಂ ಬನ್ಧಿತ್ವಾ ಸಗುಣಂ ಕತ್ವಾ ಸಙ್ಘಾಟಿಯೋ ಪಾರುಪಿತ್ವಾ ಗಣ್ಠಿಕಂ ಪಟಿಮುಞ್ಚಿತ್ವಾ ಧೋವಿತ್ವಾ ಪತ್ತಂ ಗಹೇತ್ವಾ ಸಾಧುಕಂ ಅತರಮಾನೇನ ಗಾಮೋ ಪವಿಸಿತಬ್ಬೋ’’ತಿ ಏವಮಾದಿನಾ ಭನ್ತೇ ಭತ್ತಗ್ಗವತ್ತಂ ಪಞ್ಞತ್ತಂ.

ಪುಚ್ಛಾ – ಭಿಕ್ಖೂನಂ ಆವುಸೋ ಸೇನಾಸನವತ್ತಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ, ಕಥಞ್ಚ ತಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಭಿಕ್ಖೂಸು ಅಜ್ಝೋಕಾಸೇ ಚೀವರಂ ಕರೋನ್ತೇಸು ಪಟಿವಾತೇ ಅಙ್ಗಣೇ ಸೇನಾಸನಂ ಪಪ್ಫೋಟೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಯಸ್ಮಿಂ ವಿಹಾರೇ ವಿಹರತಿ, ಸಚೇ ಸೋ ವಿಹಾರೋ ಉಕ್ಲಾಪೋ ಹೋತಿ, ಸಚೇ ಉಸ್ಸಹತಿ ಸೋಧೇತಬ್ಬೋ’’ತಿ ಏವಮಾದಿನಾ ಭನ್ತೇ ಭಿಕ್ಖೂನಂ ಸೇನಾಸನವತ್ತಂ ಭಗವತಾ ಪಞ್ಞತ್ತಂ.

ಪುಚ್ಛಾ – ಸಮಾಚಾರಂ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಸಮಾಚಾರಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ಏಕಾ ಆಪತ್ತಿ.