೪. ಸಮಥಕ್ಖನ್ಧಕ

ಪುಚ್ಛಾ – ಅಸಮ್ಮುಖೀಭೂತಾನಂ ಆವುಸೋ ಭಿಕ್ಖೂನಂ ತಜ್ಜನೀಯಂ ವಾ ನಿಯಸ್ಸಂ ವಾ ಪಬ್ಬಾಜನೀಯಂ ವಾ ಪಟಿಸಾರಣೀಯಂ ವಾ ಉಕ್ಖೇಪನೀಯಂ ವಾ ಕಮ್ಮಂ ಕರೋನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಅಸಮ್ಮುಖೀಭೂತಾನಂ ಭಿಕ್ಖೂನಂ ಕಮ್ಮಂ ಅಕಂಸು ತಜ್ಜನೀಯಮ್ಪಿ ನಿಯಸ್ಸಮ್ಪಿ ಪಬ್ಬಾಜನೀಯಮ್ಪಿ ಪಟಿಸಾರಣೀಯಮ್ಪಿ ಉಕ್ಖೇಪನೀಯಮ್ಪಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಸತಿವೇಪುಲ್ಲಪತ್ತಸ್ಸ ಆವುಸೋ ಭಿಕ್ಖುನೋ ಸತಿವಿನಯಂ ದಾನಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಮೇತ್ತಿಯಭೂಮಜಕೇ ಭಿಕ್ಖೂ ಆರಬ್ಭ ಅನುಞ್ಞಾತಂ ಮೇತ್ತಿಯಭೂಮಜಕಾ ಭನ್ತೇ ಭಿಕ್ಖೂ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಅಮೂಲಿಕಾಯ ಸೀಲವಿಪತ್ತಿಯಾ ಅನುದ್ಧಂಸೇಸುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಕತಿಪನಾವುಸೋ ಏತ್ಥ ಧಮ್ಮಿಕಾನಿ ಸತಿವಿನಯದಾನಾನಿ.

ವಿಸ್ಸಜ್ಜನಾ – ಪಞ್ಚಿಮಾನಿ ಭನ್ತೇ ಧಮ್ಮಿಕಾನಿ ಸತಿವಿನಯಸ್ಸ ದಾನಾನಿ, ಸುದ್ಧೋ ಹೋತಿ ಭಿಕ್ಖು ಅನಾಪತ್ತಿಕೋ, ಅನುವದನ್ತಿ ಚ ನಂ, ಯಾಚತಿ ಚ, ತಸ್ಸ ಸಙ್ಘೋ ಸತಿವಿನಯಂ ದೇತಿ ಧಮ್ಮೇನ ಸಮಗ್ಗೇನ, ಇಮಾನಿ ಖೋ ಭನ್ತೇ ಪಞ್ಚ ಧಮ್ಮಿಕಾನಿ ಸತಿ ವಿನಯಸ್ಸ ದಾನಾನಿ.

ಪುಚ್ಛಾ – ಅಮೂಳ್ಹಸ್ಸ ಆವುಸೋ ಭಿಕ್ಖುನೋ ಅಮೂಳ್ಹವಿನಯಂ ದಾತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಗಗ್ಗಂ ಭಿಕ್ಖುಂ ಉಮ್ಮತ್ತಕೇನ ಚಿತ್ತವಿಪರಿಯಾಸಕತೇನ ಅಜ್ಝಾಚಿಣ್ಣೇನ ಆಪತ್ತಿಯಾ ಚೋದೇಸುಂ ‘‘ಸರತಾ ಯಸ್ಮಾ ಏವರೂಪಿಂ ಆಪತ್ತಿಂ ಆಪಜ್ಜಿತಾ’’ತಿ, ಸೋ ಏವಂ ವದೇತಿ ‘‘ಅಹಂ ಖೋ ಆವುಸೋ ಉಮ್ಮತ್ತಕೋ ಅಹೋಸಿ ಚಿತ್ತವಿಪರಿಯಾಸಕತೋ, ತೇನ ಮೇ ಉಮ್ಮತ್ತಕೇನ ಚಿತ್ತವಿಪರಿಯಾಸಕತೇನ ಬಹುಂ ಅಸ್ಸಾಮಣಕಂ ಅಜ್ಝಾಚಿಣ್ಣಂ ಭಾಸಿತಪರಿಕ್ಕನ್ತಂ, ನಾಹಂ ತಂ ಸರಾಮಿ, ಮೂಳ್ಹೇನ ಮೇ ಏತಂ ಕತ’’ನ್ತಿ. ಏವಮ್ಪಿ ನಂ ವುಚ್ಚಮಾನಾ ಚೋದೇನ್ತೇವ ‘‘ಸರತಾ ಯಸ್ಮಾ ಏವರೂಪಿಂ ಆಪತ್ತಿಂ ಆಪಜ್ಜಿತಾ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಕತಿ ಆವುಸೋ ಅಧಮ್ಮಿಕಾನಿ ಅಮೂಳ್ಹವಿನಯಸ್ಸ ದಾನಾನಿ, ವಿಭಜಿತ್ವಾ ಕಥೇಹಿ.

ವಿಸ್ಸಜ್ಜನಾ – ತೀಣಿ ಭನ್ತೇ ಅಧಮ್ಮಿಕಾನಿ ಅಮೂಳ್ಹವಿನಯಸ್ಸ ದಾನಾನಿ, ಇಧ ಭನ್ತೇ ಭಿಕ್ಖು ಆಪತ್ತಿಂ ಆಪನ್ನೋ ಹೋತಿ, ತಮೇನಂ ಚೋದೇತಿ ಸಙ್ಘೋ ವಾ ಸಮ್ಬಹುಲಾ ವಾ ಏಕಪುಗ್ಗಲೋ ವಾ ‘‘ಸರತಾಯಸ್ಮಾ ಏವರೂಪಿಂ ಆಪತ್ತಿಂ ಆಪಜ್ಜಿತಾ’’ತಿ, ಸೋ ಸರಮಾನೋವ ಏವಂ ವದೇತಿ ‘‘ನ ಖೋ ಅಹಂ ಆವುಸೋ ಸರಾಮಿ ಏವರೂಪಿಂ ಆಪತ್ತಿಂ ಆಪಜ್ಜಿತಾ’’ತಿ. ಅಞ್ಞೋ ಸರಮಾನೋವ ಏವಂ ವದೇತಿ ‘‘ಸರಾಮಿ ಖೋ ಅಹಂ ಆವುಸೋ ಯಥಾ ಸುಪಿನನ್ತೇನಾ’’ತಿ. ಅಞ್ಞೋ ಅನುಮ್ಮತ್ತಕೋವ ಉಮ್ಮತ್ತಕಾಲಯಂ ಕರೋತಿ ‘‘ಅಹಮ್ಪಿ ಖೋ ಏವಂ ಕರೋಮಿ, ತುಮ್ಹೇಪಿ ಏವಂ ಕರೋಥ, ಮಯ್ಹಮ್ಪಿ ಏತಂ ಕಪ್ಪತಿ, ತುಮ್ಹಾಕಮ್ಪೇತಂ ಕಪ್ಪತೀ’’ತಿ. ಏಸಂ ಸಙ್ಘೋ ಅಮೂಳ್ಹವಿನಯಂ ದೇತಿ, ಅಧಮ್ಮಿಕಂ ಭನ್ತೇ ಅಮೂಳ್ಹವಿನಯಸ್ಸ ದಾನಂ. ಇಮಾನಿ ಖೋ ಭನ್ತೇ ತೀಣಿ ಅಧಮ್ಮಿಕಾನಿ ಅಮೂಳ್ಹವಿನಯಸ್ಸ ದಾನಾನಿ.

ಪುಚ್ಛಾ – ಕತಿ ಆವುಸೋ ಧಮ್ಮಿಕಾನಿ ಅಮೂಳ್ಹವಿನಯಸ್ಸ ದಾನಾನಿ, ವಿಭಜಿತ್ವಾ ಕಥೇಹಿ.

ವಿಸ್ಸಜ್ಜನಾ – ತೀಣಿ ಭನ್ತೇ ಧಮ್ಮಿಕಾನಿ ಅಮೂಳ್ಹವಿನಯಸ್ಸ ದಾನಾನಿ, ಇಧ ಭನ್ತೇ ಭಿಕ್ಖು ಉಮ್ಮತ್ತಕೋ ಹೋತಿ ಚಿತ್ತವಿಪರಿಯಾಸಕತೋ ತೇನ ಉಮ್ಮತ್ತಕೇನ ಚಿತ್ತವಿಪರಿಯಾಸಕತೇನ ಬಹುಂ ಅಸ್ಸಾಮಣಕಂ ಅಜ್ಝಾಚಿಣ್ಣಂ ಹೋತಿ ಭಾಸಿತಪರಿಕ್ಕನ್ತಂ, ತಮೇನಂ ಚೋದೇತಿ ಸಙ್ಘೋ ವಾ ಸಮ್ಬಹುಲಾ ವಾ ಏಕಪುಗ್ಗಲೋ ವಾ ‘‘ಸರತಾಯಸ್ಮಾ ಏವರೂಪಿಂ ಆಪತ್ತಿಂ ಆಪಜ್ಜಿತಾ’’ತಿ, ಸೋ ಅಸ್ಸರಮಾನೋವ ಏವಂ ವದೇತಿ ‘‘ನ ಖೋ ಅಹಂ ಆವುಸೋ ಸರಾಮಿ ಏವರೂಪಿಂ ಆಪತ್ತಿಂ ಆಪಜ್ಜಿತಾ’’ತಿ. ಅಞ್ಞೋಪಿ ಅಸ್ಸರಮಾನೋವ ಏವಂ ವದೇತಿ ‘‘ಸರಾಮಿ ಖೋ ಅಹಂ ಆವುಸೋ ಯಥಾ ಸುಪಿನನ್ತೇನಾ’’ತಿ. ಅಞ್ಞೋಪಿ ಉಮ್ಮತ್ತಕೋವ ಉಮ್ಮತ್ತಕಾಲಯಂ ಕರೋತಿ ‘‘ಅಹಮ್ಪಿ ಏವಂ ಕರೋಮಿ, ತುಮ್ಹೇಪಿ ಏವಂ ಕರೋಥ, ಮಯ್ಹಮ್ಪಿ ಏತಂ ಕಪ್ಪತಿ, ತುಮ್ಹಾಕಮ್ಪೇತಂ ಕಪ್ಪತೀ’’ತಿ. ಏಸಂ ಭನ್ತೇ ತಿಣ್ಣಂ ಭಿಕ್ಖೂನಂ ಸಙ್ಘೋ ಅಮೂಳ್ಹವಿನಯಂ ದೇತಿ, ಧಮ್ಮಿಕಂ ಭನ್ತೇ ಅಮೂಳ್ಹವಿನಯಸ್ಸ ದಾನಂ. ಇಮಾನಿ ಖೋ ಭನ್ತೇ ತೀಣಿ ಧಮ್ಮಿಕಾನಿ ಅಮೂಳ್ಹವಿನಯಸ್ಸ ದಾನಾನಿ.

ಪುಚ್ಛಾ – ಅಪ್ಪಟಿಞ್ಞಾಯ ಆವುಸೋ ಭಿಕ್ಖೂನಂ ತಜ್ಜನೀಯಾದೀನಿ ಕಮ್ಮಾನಿ ಕರೋನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಛಬ್ಬಗ್ಗಿಯಾ ಭನ್ತೇ ಭಿಕ್ಖೂ ಅಪ್ಪಟಿಞ್ಞಾಯ ಭಿಕ್ಖೂನಂ ಕಮ್ಮಾನಿ ಅಕಂಸು ತಜ್ಜನೀಯಾದೀನಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕಥಂ ಆವುಸೋ ಅಧಮ್ಮಿಕಂ ಹೋತಿ ಪಟಿಞ್ಞಾತಕರಣಂ.

ವಿಸ್ಸಜ್ಜನಾ – ಅಞ್ಞಥಾ ಭನ್ತೇ ಆಪತ್ತಿಂ ಆಪಜ್ಜನ್ತಸ್ಸ ಅಞ್ಞಥಾ ಪಟಿಜಾನನ್ತಸ್ಸ ಯಥಾ ಸೋ ಪಟಿಜಾನಾತಿ, ತಥಾ ಸಙ್ಘೋ ಕಾರೇತಿ, ಏವಂ ಖೋ ಭನ್ತೇ ಅಧಮ್ಮಿಕಂ ಹೋತಿ ಪಟಿಞ್ಞಾತಕರಣಂ.

ಪುಚ್ಛಾ – ಕಥಂ ಆವುಸೋ ಧಮ್ಮಿಕಂ ಹೋತಿ ಪಟಿಞ್ಞಾತಕರಣಂ.

ವಿಸ್ಸಜ್ಜನಾ – ಯಂ ಭನ್ತೇ ಆಪತ್ತಿಂ ಆಪಜ್ಜನ್ತಸ್ಸ ತಮೇವ ಪಟಿಜಾನನ್ತಸ್ಸ ತೇನೇವ ಸಙ್ಘೋ ಕಾರೇತಿ, ಏವಂ ಖೋ ಭನ್ತೇ ಧಮ್ಮಿಕಂ ಪಟಿಞ್ಞಾತಕರಣಂ.

ಪುಚ್ಛಾ – ಯೇಭುಯ್ಯಸಿಕಾಯ ಆವುಸೋ ಅಧಿಕರಣಂ ವೂಪಸಮೇತುಂ ಭಗವತಾ ಕತ್ಥ ಅನುಞ್ಞಾತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಂ, ಸಮ್ಬಹುಲಾ ಭನ್ತೇ ಭಿಕ್ಖೂ ಭಣ್ಡನಜಾತಾ ಕಲಹಜಾತಾ ವಿವಾದಾಪನ್ನಾ ಅಞ್ಞಮಞ್ಞಂ ಮುಖಸತ್ತೀಹಿ ವಿತುದನ್ತಾ ವಿಹರಿಂಸು, ನ ಸಕ್ಕೋನ್ತಿ ತಂ ಅಧಿಕರಣಂ ವೂಪಸಮೇತುಂ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಕಥಂ ಆವುಸೋ ಅಧಿಕರಣಂ ಯೇಭುಯ್ಯಸಿಕಾಯ ವೂಪಸಮೇತಬ್ಬಂ.

ವಿಸ್ಸಜ್ಜನಾ – ಪಞ್ಚಹಿ ಭನ್ತೇ ಅಙ್ಗೇಹಿ ಸಮನ್ನಾಗತೋ ಭಿಕ್ಖು ಸಲಾಕಗ್ಗಾಹಾಪಕೋ ಸಮ್ಮನ್ನಿತಬ್ಬೋ, ತೇನ ಭನ್ತೇ ಸಲಾಕಗ್ಗಾಹಾಪಕೇನ ಸಲಾಕಾ ಗಾಹಾತಬ್ಬಾ ಯಥಾ ಬಹುತರಾ ಭಿಕ್ಖೂ ಧಮ್ಮವಾದಿನೋ ವದನ್ತಿ ತಥಾ ತಂ ಅಧಿಕರಣಂ ವೂಪಸಮೇತಬ್ಬಂ, ಏವಂ ಖೋ ಭನ್ತೇ ಯೇಭುಯ್ಯಸಿಕಾಯ ಅಧಿಕರಣಂ ವೂಪಸಮೇತಬ್ಬಂ.

ಪುಚ್ಛಾ – ಕತಿ ಆವುಸೋ ಅಧಮ್ಮಿಕಾ ಸಲಾಕಗ್ಗಾಹಾ.

ವಿಸ್ಸಜ್ಜನಾ – ದಸ ಭನ್ತೇ ಅಧಮ್ಮಿಕಾ ಸಲಾಕಗ್ಗಾಹಾ, ಓರಮತ್ತಕಞ್ಚ ಅಧಿಕರಣಂ ಹೋತಿ, ನ ಚ ಗತಿಗತಂ ಹೋತಿ, ನ ಚ ಸರಿತಸಾರಿತಂ ಹೋತಿ, ಜಾನಾತಿ ‘ಅಧಮ್ಮವಾದೀ ಬಹುತರಾ’ತಿ, ಅಪ್ಪೇವ ನಾಮ ಅಧಮ್ಮವಾದೀ ಬಹುತರಾ ಅಸ್ಸೂತಿ, ಜಾನಾತಿ ‘ಸಙ್ಘೋ ಭಿಜ್ಜಿಸ್ಸತೀ’ತಿ, ಅಪ್ಪೇವ ನಾಮ ಸಙ್ಘೋ ಭಿಜ್ಜೇಯ್ಯಾತಿ, ಅಧಮ್ಮೇನ ಗಣ್ಹನ್ತಿ, ವಗ್ಗಾ ಗಣ್ಹನ್ತಿ, ನ ಚ ಯಥಾದಿಟ್ಠಿಯಾ ಗಣ್ಹನ್ತಿ, ಇಮೇ ಖೋ ಭನ್ತೇ ದಸ ಅಧಮ್ಮಿಕಾ ಕಲಾಕಗ್ಗಾಹಾ.

ಪುಚ್ಛಾ – ಕತಿ ಆವುಸೋ ಧಮ್ಮಿಕಾ ಸಲಾಕಗ್ಗಾಹಾ.

ವಿಸ್ಸಜ್ಜನಾ – ದಸ ಭನ್ತೇ ಧಮ್ಮಿಕಾ ಸಲಾಕಗ್ಗಾಹಾ ವುತ್ತವಿಪರಿಯಾಯೇನ.

ಪುಚ್ಛಾ – ಪಾಪುಸ್ಸನ್ನಸ್ಸ ಆವುಸೋ ಭಿಕ್ಖುಸ್ಸ ತಸ್ಸ ಪಾಪಿಯಸಿಕಾ ಕಮ್ಮಂ ಕಾತುಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಉಪವಾಳಂ ಭಿಕ್ಖುಂ ಆರಬ್ಭ ಪಞ್ಞತ್ತಂ, ಉಪವಾಳೋ ಭನ್ತೇ ಭಿಕ್ಖು ಸಙ್ಘಮಜ್ಝೇ ಆಪತ್ತಿಯಾ ಅನುಯುಞ್ಜಿಯಮಾನೋ ಅವಜಾನಿತ್ವಾ ಪಟಿಜಾನಾತಿ, ಪಟಿಜಾನಿತ್ವಾ ಅವಜಾನಾತಿ, ಅಞ್ಞೇನಞ್ಞಂ ಪಟಿಚರತಿ, ಸಮ್ಪಜಾನಮುಸಾ ಭಾಸತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಕತಿ ಆವುಸೋ ಧಮ್ಮಿಕಾನಿ ತಸ್ಸಪಾಪಿಯಸಿಕಾ ಕಮ್ಮಸ್ಸ ಕರಣಾನಿ.

ವಿಸ್ಸಜ್ಜನಾ – ಪಞ್ಚಿಮಾನಿ ಭನ್ತೇ ಧಮ್ಮಿಕಾನಿ ತಸ್ಸಪಾಪಿಯಸಿಕಾ ಕಮ್ಮಸ್ಸ ಕರಣಾನಿ. ಅಸುಚಿ ಚ ಹೋತಿ, ಅಲಜ್ಜೀ ಚ, ಸಾನುವಾದೋ ಚ, ತಸ್ಸ ಸಙ್ಘೋ ತಸ್ಸಪಾಪಿಯಸಿಕಾ ಕಮ್ಮಂ ಕರೋತಿ ಧಮ್ಮೇನ ಸಮಗ್ಗೇನ, ಇಮಾನಿ ಖೋ ಭನ್ತೇ ಪಞ್ಚ ಧಮ್ಮಿಕಾನಿ ತಸ್ಸ ಪಾಪಿಯಸಿಕಾ ಕಮ್ಮಸ್ಸ ಕರಣಾನಿ.

ಪುಚ್ಛಾ – ತಸ್ಸ ಪಾಪಿಯಸಿಕಾಕಮ್ಮಕತೇನ ಆವುಸೋ ಭಿಕ್ಖುನಾ ಕತಿಸು ವತ್ತೇಸು ಸಮ್ಮಾ ವತ್ತಿತಬ್ಬಂ.

ವಿಸ್ಸಜ್ಜನಾ – ತಸ್ಸ ಪಾಪಿಯಸಿಕಾಕಮ್ಮಕತೇನ ಭನ್ತೇ ಭಿಕ್ಖುನಾ ಅಟ್ಠಾರಸಸು ವತ್ತೇಸು ಸಮ್ಮಾ ವತ್ತಿತಬ್ಬಂ. ನ ಉಪಸಮ್ಪಾದೇತಬ್ಬಂ, ನ ನಿಸ್ಸಯೋ ದಾತಬ್ಬೋ, ನ ಸಾಮಣೇರೋ ಉಪಟ್ಠಾಪೇತಬ್ಬೋ, ಏವಮಾದೀಸು ಭನ್ತೇ ಅಟ್ಠಾರಸಸು ವತ್ತೇಸು ಸಮ್ಮಾ ವತ್ತಿತಬ್ಬಂ.

ಪುಚ್ಛಾ – ಕತಿ ಆವುಸೋ ಅಧಿಕರಣಾನಿ ಸಮಥೇಹಿ ವೂಪಸಮೇತಬ್ಬಾನಿ.

ವಿಸ್ಸಜ್ಜನಾ – ಚತ್ತಾರಿಮಾನಿ ಭನ್ತೇ ಅಧಿಕರಣಾನಿ ಸಮಥೇಹಿ ವೂಪಸಮೇತಬ್ಬಾನಿ, ವಿವಾದಾಧಿಕರಣಂ ಅನುವಾದಾಧಿಕರಣಂ ಆಪತ್ತಾಧಿಕರಣಂ ಕಿಚ್ಚಾಧಿಕರಣಂ, ಇಮಾನಿ ಭನ್ತೇ ಚತ್ತಾರಿ ಅಧಿಕರಣಾನಿ ಸಮಥೇಹಿ ವೂಪಸಮೇತಬ್ಬಾನಿ.

ಪುಚ್ಛಾ – ಕಿಂ ಆವುಸೋ ವಿವಾದಾಧಿಕರಣಸ್ಸ ಮೂಲಂ.

ವಿಸ್ಸಜ್ಜನಾ – ಛ ಭನ್ತೇ ವಿವಾದಮೂಲಾನಿ ವಿವಾದಾಧಿಕರಣಸ್ಸ ಮೂಲಂ, ತೀಣಿಪಿ ಅಕುಸಲಮೂಲಾನಿ ವಿವಾದಾಧಿಕರಣಸ್ಸ ಮೂಲಂ, ತೀಣಿಪಿ ಕುಸಲಮೂಲಾನಿ ವಿವಾದಾಧಿಕರಣಸ್ಸ ಮೂಲಂ, ಇದಂ ಭನ್ತೇ ವಿವಾದಾಧಿಕರಣಸ್ಸ ಮೂಲಂ.

ಪುಚ್ಛಾ – ಕಿಂ ಪನಾವುಸೋ ಅನುವಾದಾಧಿಕರಣಸ್ಸ ಮೂಲಂ.

ವಿಸ್ಸಜ್ಜನಾ – ಛ ಭನ್ತೇ ಅನುವಾದಮೂಲಾನಿ ಅನುವಾದಾಧಿಕರಣಸ್ಸ ಮೂಲಂ, ತೀಣಿಪಿ ಅಕುಸಲಮೂಲಾನಿ ಅನುವಾದಾಧಿಕರಣಸ್ಸ ಮೂಲಂ, ತೀಣಿಪಿ ಕುಸಲಮೂಲಾನಿ ಅನುವಾದಾಧಿಕರಣಸ್ಸ ಮೂಲಂ, ಕಾಯೋಪಿ ಅನುವಾದಾಧಿಕರಣಸ್ಸ ಮೂಲಂ, ವಾಚಾಪಿ ಅನುವಾದಾಧಿಕರಣಸ್ಸ ಮೂಲಂ, ಇದಂ ಖೋ ಭನ್ತೇ ಅನುವಾದಾಧಿಕರಣಸ್ಸ ಮೂಲಂ.

ಪುಚ್ಛಾ – ಕಿಂ ಪನಾವುಸೋ ಆಪತ್ತಾಧಿಕರಣಸ್ಸ ಮೂಲಂ.

ವಿಸ್ಸಜ್ಜನಾ – ಛ ಭನ್ತೇ ಆಪತ್ತಿಸಮುಟ್ಠಾನಾ ಆಪತ್ತಾಧಿಕರಣಸ್ಸ ಮೂಲಂ, ಅತ್ತಿ ಭನ್ತೇ ಆಪತ್ತಿ ಕಾಯತೋ ಸಮುಟ್ಠಾತಿ ನ ವಾಚತೋ ನ ಚಿತ್ತತೋ, ಅತ್ಥಿ ಭನ್ತೇ ಆಪತ್ತಿ ವಾಚತೋ ಸಮುಟ್ಠಾತಿ ನ ಕಾಯತೋ ನ ಚಿತ್ತತೋ, ಅತ್ಥಿ ಭನ್ತೇ ಆಪತ್ತಿ ಕಾಯತೋ ಚ ವಾಚತೋ ಚ ಸಮುಟ್ಠಾತಿ ನ ಚಿತ್ತತೋ, ಅತ್ಥಿ ಭನ್ತೇ ಆಪತ್ತಿ ಕಾಯತೋ ಚ ಚಿತ್ತತೋ ಚ ಸಮುಟ್ಠಾತಿ ನ ವಾಚತೋ, ಅತ್ಥಿ ಭನ್ತೇ ಆಪತ್ತಿ ವಾಚತೋ ಚ ಚಿತ್ತತೋ ಚ ಸಮುಟ್ಠಾತಿ ನ ಕಾಯತೋ, ಅತ್ಥಿ ಭನ್ತೇ ಆಪತ್ತಿ ಕಾಯತೋ ಚ ವಾಚತೋ ಚ ಚಿತ್ತತೋ ಚ ಸಮುಟ್ಠಾತಿ, ಇಮಾನಿ ಭನ್ತೇ ಛ ಆಪತ್ತಿ ಸಮುಟ್ಠಾನಾನಿ ಆಪತ್ತಾಧಿಕರಣಸ್ಸ ಮೂಲಂ.

ಪುಚ್ಛಾ – ಕಿಂ ಪನಾವುಸೋ ಕಿಚ್ಚಾಧಿಕರಣಸ್ಸ ಮೂಲಂ.

ವಿಸ್ಸಜ್ಜನಾ – ಕಿಚ್ಚಾಧಿಕರಣಸ್ಸ ಭನ್ತೇ ಏಕಂ ಮೂಲಂ ಸಙ್ಘೋ.

ಪುಚ್ಛಾ – ಸಮಥಂ ಆವುಸೋ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಸಮಥಂ ಭನ್ತೇ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ದ್ವೇ ಆಪತ್ತಿಯೋ.