೨. ಉಪೋಸಥಕ್ಖನ್ಧಕ

ಪುಚ್ಛಾ – ಚಾತುದ್ದಸೇ ಚ ಆವುಸೋ ಪನ್ನರಸೇ ಚ ಪಕ್ಖಸ್ಸ ಚ ಅಟ್ಠಮಿಯಾ ಸನ್ನಿಪತಿತ್ವಾ ಧಮ್ಮಂ ಭಾಸಿತುಂ ಭಗವತಾ ಕತ್ಥ ಅನುಞ್ಞಾತಂ, ಕಿಸ್ಮಿಂ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಅನುಞ್ಞಾತಾ, ಸಮ್ಬಹುಲಾ ಭನ್ತೇ ಭಿಕ್ಖೂ ಚಾತುದ್ದೇಸ ಪನ್ನರಸೇ ಅಟ್ಠಮಿಯಾ ಚ ಪಕ್ಖಸ್ಸ ಸನ್ನಿಪತಿತ್ವಾ ತುಣ್ಹೀ ನಿಸೀದಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಾ.

ಅನುಜಾನಾಮಿ ಭಿಕ್ಖವೇ ಚಾತುದ್ದಸೇ ಪನ್ನರಸೇ ಅಟ್ಠಮಿಯಾ ಚ ಪಕ್ಖಸ್ಸ ಸನ್ನಿಪತಿತುಂ.

ನನು ನಾಮ ಸನ್ನಿಪತಿತೇಹಿ ಧಮ್ಮೋ ಭಾಸಿತಬ್ಬೋ.

ಪುಚ್ಛಾ – ಕದಾ ಆವುಸೋ ಭಿಕ್ಖೂನಂ ಪಾತಿಮೋಕ್ಖುದ್ದೇಸೋ ಭಗವತಾ ಅನುಞ್ಞಾತೋ.

ವಿಸ್ಸಜ್ಜನಾ – ಯದಾ ಭನ್ತೇ ಭಗವತೋ ರಹೋಗತಸ್ಸ ಪಟಿಸಲ್ಲೀನಸ್ಸ ಏವಂ ಚೇತಸೋ ಪರಿವಿತಕ್ಕೋ ಉದಪಾದಿ ‘‘ಯಂನೂನಾಹಂ ಯಾನಿ ಮಯಾ ಭಿಕ್ಖೂನಂ ಪಞ್ಞತ್ತಾನಿ ಸಿಕ್ಖಾಪದಾನಿ, ತಾನಿ ನೇಸಂ ಪಾತಿಮೋಕ್ಖುದ್ದೇಸಂ ಅನುಜಾನೇಯ್ಯಂ, ಸೋ ನೇಸಂ ಭವಿಸ್ಸತಿ ಉಪೋಸಥಕಮ್ಮ’’ನ್ತಿ ತದಾ ಭನ್ತೇ ಭಗವತಾ ಭಿಕ್ಖೂನಂ ಪಾತಿಮೋಕ್ಖುದ್ದೇಸೋ ಅನುಞ್ಞಾತೋ.

ಪುಚ್ಛಾ – ಸೀಮಂ ಆವುಸೋ ಸಮ್ಮನಿತುಂ ಭಗವತಾ ಕತ್ಥ ಅನುಞ್ಞಾತಂ, ಕಿಸ್ಮಿಞ್ಚ ವತ್ಥುಸ್ಮಿಂ ಅನುಞ್ಞಾತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಅನುಞ್ಞಾತಂ, ರಾಜಗಹೇ ಭನ್ತೇ ಭಗವತಿ ವಿಹರತಿ ಭಿಕ್ಖೂನಂ ಏತದಹೋಸಿ ‘‘ಭಗವತಾ ಪಞ್ಞತ್ತಂ ಏತ್ತಾವತಾ ಸಾಮಗ್ಗೀ, ಯಾವತಾ ಏಕಾವಾಸೋತಿ ಕಿತ್ತಾವತಾನುಖೋ ಏಕಾವಾಸೋ ಹೋತೀ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಅನುಞ್ಞಾತಂ.

ಪುಚ್ಛಾ – ಕತಿ ಆವುಸೋ ಉಪೋಸಥಾ ದಿವಸವಸೇನ ಚ ಕಾರಕಪುಗ್ಗಲವಸೇನ ಚ ಕಾತಬ್ಬಾಕಾರವಸೇನ ಚ.

ವಿಸ್ಸಜ್ಜನಾ – ದಿವಸವಸೇನ ಭನ್ತೇ ತಯೋ ಉಪೋಸಥಾ, ಪುಗ್ಗಲವಸೇನ ಚ ಭನ್ತೇ ತಯೋ ಉಪೋಸಥಾ, ಕಾತಬ್ಬಾಕಾರವಸೇನ ಚ ಭನ್ತೇ ತಯೋ ಉಪೋಸಥಾ.

ಪುಚ್ಛಾ – ಕತಿ ಆವುಸೋ ಉಪೋಸಥಕಮ್ಮಾನಿ ತೇಸು ಚ ಕೀದಿಸಂ ಉಪೋಸಥಕಮ್ಮಂ ಭಗವತಾ ಅನುಞ್ಞಾತಂ, ಕೀದಿಸಂ ಅನನುಞ್ಞಾತಂ.

ವಿಸ್ಸಜ್ಜನಾ – ಚತ್ತಾರಿಮಾನಿ ಭನ್ತೇ ಉಪೋಸಥಕಮ್ಮಾನಿ, ಅಧಮ್ಮೇನ ವಗ್ಗಂ ಉಪೋಸಥಕಮ್ಮಂ, ಅಧಮ್ಮೇನ ಸಮಗ್ಗಂ ಉಪೋಸಥಕಮ್ಮಂ, ಧಮ್ಮೇನ ವಗ್ಗಂ ಉಪೋಸಥಕಮ್ಮಂ, ಧಮ್ಮೇನ ಸಮಗ್ಗಂ ಉಪೋಸಥಕಮ್ಮಂ. ತತ್ರ ಭನ್ತೇ ಯದಿದಂ ಅಧಮ್ಮೇನ ವಗ್ಗಂ ಉಪೋಸಥಕಮ್ಮಂ, ಅಧಮ್ಮೇನ ಸಮಗ್ಗಂ ಉಪೋಸಥಕಮ್ಮಂ ಧಮ್ಮೇನ ವಗ್ಗಂ ಉಪೋಸಥಕಮ್ಮಂ, ಏವರೂಪಂ ಭನ್ತೇ ಉಪೋಸಥಕಮ್ಮಂ ಅನನುಞ್ಞಾತಂ, ತತ್ರ ಭನ್ತೇ ಯದಿದಂ ಧಮ್ಮೇನ ಸಮಗ್ಗಂ ಉಪೋಸಥಕಮ್ಮಂ, ಏವರೂಪಂ ಭನ್ತೇ ಉಪೋಸಥಕಮ್ಮಂ ಅನುಞ್ಞಾತಂ.

ಪುಚ್ಛಾ – ಉಪೋಸಥಂ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಉಪೋಸಥಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ತಿಸ್ಸೋ ಆಪತ್ತಿಯೋ.