೬. ಚಮ್ಪೇಯ್ಯಕ್ಖನ್ಧಕ

ಪುಚ್ಛಾ – ಸುದ್ಧಂ ಆವುಸೋ ಭಿಕ್ಖುಂ ಅನಾಪತ್ತಿಕಂ ಅವತ್ಥುಸ್ಮಿಂ ಅಕಾರಣೇ ಉಕ್ಖಿಪನ್ತಸ್ಸ ದುಕ್ಕಟಂ ಭಗವತಾ ಕತ್ಥ ಪಞ್ಞತ್ತಂ, ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಪಞ್ಞತ್ತಂ.

ವಿಸ್ಸಜ್ಜನಾ – ಚಮ್ಪಾಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಪಞ್ಞತ್ತಂ, ಭಗವತಿ ಭನ್ತೇ ಚಮ್ಪಾಯಂ ವಿಹರತಿ ಸಮ್ಬಹುಲಾ ಭಿಕ್ಖೂ ಕಾಸೀಸು ವಾಸಭಗಾಮೇ ಸುದ್ಧಂ ಕಸ್ಸಪಗೋತ್ತಂ ಭಿಕ್ಖುಂ ಅನಾಪತ್ತಿಕಂ ಅವತ್ಥುಸ್ಮಿಂ ಅಕಾರಣೇ ಉಕ್ಖಿಪಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ಪಞ್ಞತ್ತಂ.

ಪುಚ್ಛಾ – ಚಮ್ಪೇಯ್ಯಕಂ ಪುಚ್ಛಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಆವುಸೋ ಕತಿ ಆಪತ್ತಿಯೋ.

ವಿಸ್ಸಜ್ಜನಾ – ಚಮ್ಪೇಯ್ಯಕಂ ವಿಸ್ಸಜ್ಜಿಸ್ಸಂ, ಸನಿದಾನಂ ಸನಿದ್ದೇಸಂ. ಸಮುಕ್ಕಟ್ಠಪದಾನಂ ಭನ್ತೇ ಏಕಾ ಆಪತ್ತಿ.