ಸತಿಪಟ್ಠಾನಸಂಯುತ್ತ

ಸತಿಸುತ್ತ

ಪುಚ್ಛಾ – ಸತಿಪಟ್ಠಾನಸಂಯುತ್ತೇ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕ ಮಹಾಥೇರೇಹಿ ದುತಿಯಂ ಸಂಗೀತಂ ಸತಿಸುತ್ತಂ ಭಗವತಾ ಕತ್ಥ ಕಂ ಕಾರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಅಮ್ಬಪಾಲಿವನೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಸತೋ ಭಿಕ್ಖವೇ ಭಿಕ್ಖು ವಿಹರೇಯ್ಯ ಸಮ್ಪಜಾನೋ ಅಯಂ ವೋ ಅಮ್ಹಾಕಂ ಅನುಸಾಸನೀ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಸಾಲಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಚತುತ್ಥಂ ಸಂಗೀತಂ ಸಾಲಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಕೋಸಲೇಸು ಭನ್ತೇ ಸಾಲಾಯನಾಮ ಕೇಸಲಾನಂ ಬ್ರಾಹ್ಮಣಗಾಮೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಯೇ ತೇ ಭಿಕ್ಖವೇ ಭಿಕ್ಖೂ ನವಾ ಅಚಿರಪಬ್ಬಜಿತಾ ಅಧುನಾಗತಾ ಇಮಂ ಧಮ್ಮವಿನಯಂ, ತೇ ವೋ ಭಿಕ್ಖವೇ ಭಿಕ್ಖೂ ಚತುನ್ನಂ ಸತಿಪಟ್ಠಾನಾನಂ ಭಾವನಾಯ ಸಮಾದಪೇತಬ್ಬಾ ನಿವೇಸೇತಬ್ಬಾ ಪತಿಟ್ಠಾಪೇತಬ್ಬಾ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ.

ಸಕುಣಗ್ಘಿಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಛಟ್ಠಂ ಸಂಗೀತಂ ಸಕುಣಗ್ಘಿಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಭೂತಪುಬ್ಬಂ ಭಿಕ್ಖವೇ ಸಕುಣಗ್ಘಿ ಲಾಪಂ ಸಕುಣಂ ಸಹಸಾ ಅಜ್ಝಪ್ಪತ್ತಾ ಅಗ್ಗಹೇಸಿ. ಅಥ ಖೋ ಭಿಕ್ಖವೇ ಲಾಪೋ ಸಕುಣೋ ಸಕುಣಗ್ಘಿಯಾ ಹರಿಯಮಾನೋ ಏವಂ ಪರಿದೇವಸಿ ಮಯಮೇವಮ್ಹ ಅಲಕ್ಖಿಕಾ, ಮಯಂ ಅಪ್ಪಪುಞ್ಞಾ, ಯೇ ಮಯಂ ಅಗೋಚರೇ ಚರಿಮ್ಹ ಪರವಿಸಯೇ, ಸಚೇಜ್ಜ ಮಯಂ ಗೋಚರೇ ಚರೇಯ್ಯಾಮ ಸಕೇ ಪೇತ್ತಿಕೇ ವಿಸಯೇ, ನ ಮ್ಯಾಹಂ ಸಕುಣಗ್ಘಿ ಅಲಂ ಅಭವಿಸ್ಸ ಯದಿದಂ ಯುದ್ಧಾಯಾ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಮಯಮೇವಮ್ಹ ಅಲಕ್ಖಿಕಾ, ಮಯಂ ಅಪ್ಪಪುಞ್ಞಾ.

ಕೋ ಪನ ತೇ ಲಾಪ ಗೋಚರೋ ಸಕೋ ಪೇತ್ತಿಕೋ ವಿಸಯೋ.

ಯದಿದಂ ನಙ್ಗಲಕಟ್ಠಕರಣಂ ಲೇಡ್ಡುಟ್ಠಾನಂ.

ಏಹಿ ಖೋ ದಾನಿ ಮೇ ಸಕುಣಗ್ಘಿ, ಏಹಿ ಖೋ ದಾನಿ ಮೇ ಸಕುಣಗ್ಘಿ,

(ದಾರುಗುಳೋವಿಯ ವಿನಿವತ್ತಿತ್ವಾ ತಸ್ಸೇವ ಲೇಡ್ಡುಸ್ಸ ಅನ್ತರೇ ಪಚ್ಚುಪಾದಿ. ಅಟ್ಠಕಥಾ)

ಏವಞ್ಹಿ ತಂ ಭಿಕ್ಖವೇ ಹೋತಿ ಯೋ ಅಗೋಚರೇ ಚರತಿ ಪರವಿಸಯೇ.

ತಸ್ಮಾತಿಹ ಭಿಕ್ಖವೇ ಮಾ ಅಗೋಚರೇ ಚರಿತ್ಥ ಪರವಿಸಯೇ.

ಗೋಚರೇ ಭಿಕ್ಖವೇ ಚರಥ ಸಕೇ ಪೇತ್ತಿಕೇ ವಿಸಯೇ.

ಗೋಚರೇ ಭಿಕ್ಖವೇ ಚರತಂ ಸಕೇ ಪೇತ್ತಿಕೇ ವಿಸಯೇ ನ ಲಚ್ಛತಿ ಮಾರೋ ಓತಾರಂ, ನ ಲಚ್ಛತಿ ಮಾರೋ ಆರಮ್ಮಣಂ.

ಭಿಕ್ಖುನುಪಸ್ಸಯಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ದಸಮಂ ಸಂಗೀತಂ ಭಿಕ್ಖುನುಪಸ್ಸಯಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಆನನ್ದತ್ಥೇರಂ ಆರಬ್ಭ ಭಾಸಿತಂ. ಆಯಸ್ಮಾ ಭನ್ತೇ ಆನನ್ದೋ ಯಾವತ್ತಕೋ ಅಹೋಸಿ ಭಿಕ್ಖುನೀಹಿ ಸದ್ಧಿಂ ಕಥಾಸಲ್ಲಾಪೋ ತಂ ಸಬ್ಬಂ ಭಗವತೋ ಆರೋಚೇಸಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಏವಮೇತಂ ಆನನ್ದ, ಏವಮೇತಂ ಆನನ್ದ, ಯೋಹಿ ಕೋಚಿ ಆನನ್ದ ಭಿಕ್ಖು ವಾ ಭಿಕ್ಖುನೀ ವಾ ಚತೂಸು ಸತಿಪಟ್ಠಾನೇಸು ಸುಪ್ಪತಿಟ್ಠಿತಚಿತ್ತೋ ವಿಹರತಿ, ತಸ್ಸೇತಂ ಪಾಟಿಕಙ್ಖಂ ಉಳಾರಂ ಪುಬ್ಬೇನಾಪರಂ ವಿಸೇಸಂ ಸಞ್ಜಾನಿಸ್ಸತೀ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಚುನ್ದಸುತ್ತ

ಪುಚ್ಛಾ – ತತ್ಥೇವ ಆವುಸೋ ದುತಿಯೇ ನಾಲನ್ದವಗ್ಗೇ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ತತಿಯಂ ಸಂಗೀತಂ ಚುನ್ದಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂಯೇವ ಆನನ್ದತ್ಥೇರಂ ಆರಬ್ಭ ಭಾಸಿತಂ. ಆಯಸ್ಮಾ ಭನ್ತೇ ಆನನ್ದತ್ಥೇರೋ ಚುನ್ದೇನ ಸಮಣುದ್ದೇಸೇನ ಸದ್ಧಿಂ ಯೇನ ಭಗವಾ ತೇನುಪಸಙ್ಕಮಿ. ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ಭನ್ತೇ ಆಯಸ್ಮಾ ಆನನ್ದೋ ಭಗವನ್ತಂ ಏತದವೋಚ ‘‘ಅಯಂ ಭನ್ತೇ ಚುನ್ದೋ ಸಮಣುದ್ದೇಸೋ ಏವಮಾಹ ‘ಆಯಸ್ಮಾ ಭನ್ತೇ ಸಾರಿಪುತ್ತೋ ಪರಿನಿಬ್ಬುತೋ, ಇದಮಸ್ಸ ಪತ್ತಚೀವರ’ನ್ತಿ. ಅಪಿ ಚ ಮೇ ಭನ್ತೇ ಮಧುರಕಜಾತೋ ವಿಯ ಕಾಯೋ, ದಿಸಾಪಿ ಮೇ ನ ಪಕ್ಖಾಯನ್ತಿ, ಧಮ್ಮಾಪಿ ಮಂ ನಪ್ಪಟಿಭನ್ತಿ ‘ಆಯಸ್ಮಾ ಸಾರಿಪುತ್ತೋ ಪರಿನಿಬ್ಬುತೋ’ತಿ ಸುತ್ವಾ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಕಿಂ ನು ಖೋ ತೇ ಆನನ್ದ ಸಾರಿಪುತ್ತೋ ಸೀಲಕ್ಖನ್ಧಂ ವಾ ಆದಾಯ ಪರಿನಿಬ್ಬುತೋ, ಸಮಾಧಿಕ್ಖನ್ಧಂ ವಾ, ಪಞ್ಞಾಕ್ಖನ್ಧಂವಾ, ವಿಮುತ್ತಿಕ್ಖನ್ಧಂವಾ, ವಿಮುತ್ತಿಞಾಣದಸ್ಸನಕ್ಖನ್ಧಂ ವಾ ಆದಾಯ ಪರಿನಿಬ್ಬುತೋ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಅಯಂ ಭನ್ತೇ ಚುನ್ದೋಸಮಣುದ್ದೇಸೋ ಏವಮಾಹ.

ತಸ್ಮಾತಿಹಾನನ್ದ ಅತ್ತದೀಪಾ ವಿಹರಥ ಅತ್ತಸರಣಾ ಅನಞ್ಞಸರಣಾ ಧಮ್ಮದೀಪಾ ಧಮ್ಮಸರಣಾ ಅನಞ್ಞಸರಣಾ.

ಬಾಹಿಯಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಪಞ್ಚಮಂ ಸಂಗೀತಂ ಬಾಹಿಯಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಬಾಹಿಯಂ ಆರಬ್ಭ ಭಾಸಿತಂ. ಆಯಸ್ಮಾ ಭನ್ತೇ ಬಾಹಿಯೋ ಭಗವನ್ತಂ ಏತದವೋಚ ‘‘ಸಾಧು ಮೇ ಭನ್ತೇ ಭಗವಾ ಸಂಖಿತ್ತೇನ ಧಮ್ಮಂ ದೇಸೇತು, ಯಮಹಂ ಭಗವತೋ ಧಮ್ಮಂ ಸುತ್ವಾ ಏಕೋ ವೂಪಕಟ್ಠೋ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರೇಯ್ಯ’’ನ್ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ತಸ್ಮಾತಿಹ ತ್ವಂ ಬಾಹಿಯ ಆದಿಮೇವ ವಿಸೋಧೇಹಿ ಕುಸಲೇಸು ಧಮ್ಮೇಸು. ಕೋ ಚಾದಿಕುಸಲಾನಂ ಧಮ್ಮಾನಂ, ಸೀಲಞ್ಚ ಸುವಿಸುದ್ಧಂ ದಿಟ್ಠಿಚ ಉಜುಕಾ’’ತಿ ಏವಮಾದಿನಾ ಭಗವತಾ ಭಾಸಿತಂ.