ಖನ್ಧವಗ್ಗಸಂಯುತ್ತಪಾಳಿ

ಸಂಗಾಯನಸ್ಸ ಪುಚ್ಛಾ ವಿಸ್ಸಜ್ಜನಾ

ನಕುಲಪಿತುಸುತ್ತ

ಪುಚ್ಛಾ – ತೇನಾವುಸೋ ಭಗವತಾ ಜಾನತಾ…ಪೇ… ಸಮ್ಮಾಸಮ್ಬುದ್ಧೇನ ಖನ್ಧವಗ್ಗಸಂಯುತ್ತೇ ಪಠಮಂ ನಕುಲಪಿತುಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಭಗ್ಗೇಸು ಭನ್ತೇ ಸುಸುಮಾರಗಿರೇ ಭೇಸಕಳಾವನೇ ಮಿಗದಾಯೇ ನಕುಲಪಿತರಂ ಗಹಪತಿಂ ಆರಬ್ಭ ಭಾಸಿತಂ. ನಕುಲಪಿತಾ ಭನ್ತೇ ಗಹಪತಿ ಭಗವನ್ತಂ ‘‘ಅಹಮಸ್ಮಿ ಭನ್ತೇ ಜಿಣ್ಣೋ ವುಡ್ಢೋ ಮಹಲ್ಲಕೋ ಅದ್ಧಗತೋ ವಯೋಅನುಪ್ಪತ್ತೋ ಆತುರಕಾಯೋ ಅಭಿಕ್ಖಣಾತಙ್ಕೋ, ಅನಿಚ್ಚದಸ್ಸಾವೀ ಖೋ ಪನಾಹಂ ಭನ್ತೇ ಭಗವತೋ ಮನೋಭಾವನೀಯಾನಞ್ಚ ಭಿಕ್ಖೂನಂ, ಓವದತು ಮಂ ಭನ್ತೇ ಭಗವಾ, ಅನುಸಾಸತು ಮಂ ಭನ್ತೇ ಭಗವಾ, ಯಂ ಮಮಸ್ಸ ದೀಘರತ್ತಂ ಹಿತಾಯ ಸುಖಾಯಾ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಏವಮೇತಂ ಗಹಪತಿ, ಏವಮೇತಂ ಗಹಪತಿ, ಆತುರೋ ಹಾಯಂ ಗಹಪತಿ ಕಾಯೋ ಅಣ್ಡಭೂತೋ ಪರಿಯೋನದ್ಧೋ, ಯೋ ಹಿ ಗಹಪತಿ ಇಮಂ ಕಾಯಂ ಪರಿಹರನ್ತೋ ಮುಹುತ್ತಮ್ಪಿ ಆರೋಗ್ಯಂ ಪಟಿಜಾನೇಯ್ಯ, ಕಿಮಞ್ಞತ್ರ ಬಾಲ್ಯಾ. ತಸ್ಮಾತಿಹ ತೇ ಗಹಪತಿ ಏವಂ ಸಿಕ್ಖಿತಬ್ಬಂ ‘ಆತುರಕಾಯಸ್ಸ ಮೇ ಸತೋ ಚಿತ್ತಂ ಅನಾತುರಂ ಭವಿಸ್ಸತೀ’ತಿ. ಏವಞ್ಹಿ ತೇ ಗಹಪತಿ ಸಿಕ್ಖಿತಬ್ಬ’’ನ್ತಿ. ಏವಂ ಖೋ ಭನ್ತೇ ಭಗವತಾ ಭಾಸಿತಂ.

ತಸ್ಮಾತಿಹ ತೇ ಗಹಪತಿ ಏವಂ ಸಿಕ್ಖಿತಬ್ಬಂ.

ಪುಚ್ಛಾ – ತಞ್ಚಾವುಸೋ ಭಗವತಾ ಸಂಖಿತ್ತೇನ ಭಾಸಿತಂ ವಿತ್ಥಾರೇನ ಕೇನ ಕಥಞ್ಚ ವಿಭತ್ತಂ.

ವಿಸ್ಸಜ್ಜನಾ – ತಂ ಖೋ ಭನ್ತೇ ಭಗವತಾ ಸಂಖಿತ್ತೇನ ದೇಸಿತಂ ‘‘ಕಥಞ್ಚ ಗಹಪತಿ ಆತುರಕಾಯೋ ಚೇವ ಹೋತಿ ಆತುರಚಿತ್ತೋ ಚ. ಇಧ ಗಹಪತಿ ಅಸ್ಸುತವಾ ಪುಥುಜ್ಜನೋ ಅರಿಯಾನಂ ಅದಸ್ಸಾವೀ ಅರಿಯಧಮ್ಮಸ್ಸ ಅಕೋವಿದೋ ಅರಿಯಧಮ್ಮೇ ಅವಿನೀತೋ, ಸಪ್ಪುರಿಸಾನಂ ಅದಸ್ಸಾವೀ ಸಪ್ಪುರಿಸಧಮ್ಮಸ್ಸ ಅಕೋವಿದೋ ಸಪ್ಪುರಿಸಧಮ್ಮೇ ಅವಿನೀತೋ ರೂಪಂ ಅತ್ತತೋ ಸಮನುಪಸ್ಸತಿ ರೂಪವನ್ತಂ ವಾ ಅತ್ತಾನಂ, ಅತ್ತನಿ ವಾ ರೂಪಂ, ರೂಪಸ್ಮಿಂ ವಾ ಅತ್ತಾನಂ, ‘‘ಅಹಂ ರೂಪಂ ಮಮ ರೂಪ’’ನ್ತಿ ಪರಿಯುಟ್ಠಟ್ಠಾಯೀ ಹೋತಿ. ತಸ್ಸ ‘‘ಅಹಂ ರೂಪಂ ಮಮ ರೂಪ’’ನ್ತಿ ಪರಿಯುಟ್ಠಟ್ಠಾಯಿನೋ ತಂ ರೂಪಂ ವಿಪರಿಣಮತಿ ಅಞ್ಞಥಾ ಹೋತಿ. ತಸ್ಸ ರೂಪವಿಪರಿಣಾಮಞ್ಞಥಾಭಾವಾ ಉಪ್ಪಜ್ಜನ್ತಿ ಸೋಕಪರಿದೇವದುಕ್ಖದೋಮನಸ್ಸುಪಾಯಾಸಾ’’ತಿ ಏವಮಾದಿನಾ ಭನ್ತೇ ಆಯಸ್ಮತಾ ಸಾರಿಪುತ್ತೇನ ಧಮ್ಮಸೇನಾಪತಿನಾ ವಿತ್ಥಾರೇನ ವಿಭತ್ತಂ.

ಅನಿಚ್ಚಸುತ್ತ

ಪುಚ್ಛಾ – ತತ್ಥೇವ ಆವುಸೋ ದುತಿಯವಗ್ಗೇ ಪೋರಾಣಕೇಹಿ ಧಮ್ಮಸಂಗಾಹಕ ಮಹಾಥೇರೇಹಿ ಪಠಮಂ ಸಂಗೀತಂ ಅನಿಚ್ಚಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ರೂಪಂ ಭಿಕ್ಖವೇಅನಿಚ್ಚಂ, ವೇದನಾ ಅನಿಚ್ಚಾ, ಸಞ್ಞಾ ಅನಿಚ್ಚಾ, ಸಙ್ಖಾರಾ ಅನಿಚ್ಚಾ, ವಿಞ್ಞಾಣಂ ಅನಿಚ್ಚಂ. ಏವಂ ಪಸ್ಸಂ ಭಿಕ್ಖವೇ ಸುತವಾ ಅರಿಯಸಾವಕೋ ರೂಪಸ್ಮಿಮ್ಪಿ ನಿಬ್ಬಿನ್ದತಿ, ವೇದನಾಯಪಿ ನಿಬ್ಬಿನ್ದತಿ, ಸಞ್ಞಾಯಪಿ ನಿಬ್ಬಿನ್ದತಿ, ಸಙ್ಖಾರೇಸುಪಿ ನಿಬ್ಬಿನ್ದತಿ, ವಿಞ್ಞಾಣಸ್ಮಿಮ್ಪಿ ನಿಬ್ಬಿನ್ದತಿ, ನಿಬ್ಬಿನ್ದಂ ವಿರಜ್ಜತಿ, ವಿರಾಗಾ ವಿಮುಚ್ಚತಿ, ವಿಮುತ್ತಸ್ಮಿಂ ‘ವಿಮುತ್ತ’ಮಿತಿ ಞಾಣಂ ಹೋತೀ’’ತಿ. ಏವಂ ಖೋ ಭನ್ತೇ ಭಗವತಾ ಭಾಸಿತಂ.

ದುಕ್ಖಅನತ್ತಸುತ್ತ

ಪುಚ್ಛಾ – ದುಕ್ಖಅನತ್ತಸುತ್ತಾನಿ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಾನಿ.

ವಿಸ್ಸಜ್ಜನಾ – ಸಾವತ್ಥಿಯಂಯೇವ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ರೂಪಂ ಭಿಕ್ಖವೇ ದುಕ್ಖಂ, ವೇದನಾ ದುಕ್ಖಾ, ಸಞ್ಞಾ ದುಕ್ಖಾ, ಸಙ್ಖಾರಾ ದುಕ್ಖಾ, ವಿಞ್ಞಾಣಂ ದುಕ್ಖಂ. ರೂಪಂ ಭಿಕ್ಖವೇ ಅನತ್ತಾ, ವೇದನಾ ಅನತ್ತಾ, ಸಞ್ಞಾ ಅನತ್ತಾ, ಸಙ್ಖಾರಾ ಅನತ್ತಾ, ವಿಞ್ಞಾಣಂ ಅನತ್ತಾ. ಏವಂ ಪಸ್ಸಂ ಭಿಕ್ಖವೇ ಸುತವಾ ಅರಿಯಸಾವಕೋ ರೂಪಸ್ಮಿಮ್ಪಿ ನಿಬ್ಬಿನ್ದತಿ, ವೇದನಾಯಪಿ ನಿಬ್ಬಿನ್ದತಿ, ಸಞ್ಞಾಯಪಿ ನಿಬ್ಬಿನ್ದತಿ, ಸಙ್ಖಾರೇಸುಪಿ ನಿಬ್ಬಿನ್ದತಿ, ವಿಞ್ಞಾಣಸ್ಮಿಮ್ಪಿ ನಿಬ್ಬಿನ್ದತಿ, ನಿಬ್ಬಿನ್ದಂ ವಿರಜ್ಜತಿ, ವಿರಾಗಾ ವಿಮುಚ್ಚತಿ, ವಿಮುತ್ತಸ್ಮಿಂ ‘ವಿಮುತ್ತ’ಮಿತಿ ಞಾಣಂ ಹೋತಿ, ಖೀಣಾ ಜಾತಿ, ವುಸಿತಂ ಬ್ರಹ್ಮಚರಿಯಂ, ಕತಂ ಕರಣೀಯಂ, ನಾಪರಂ ಇತ್ಥತ್ತಾಯಾತಿ ಪಜಾನಾತೀ’’ತಿ ಏವಂ ಖೋ ಭನ್ತೇ ಭಗವತಾ ಭಾಸಿತಾನಿ.

ಭಾರಸುತ್ತ

ಪುಚ್ಛಾ – ಭಾರಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂಯೇವ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಭಾರಞ್ಚ ವೋ ಭಿಕ್ಖವೇ ದೇಸೇಸ್ಸಾಮಿ ಭಾರಹಾರಞ್ಚ ಭಾರಾದಾನಞ್ಚ ಭಾರನಿಕ್ಖೇಪನಞ್ಚ, ತಂ ಸುಣಾಥ. ಕತಮೋ ಚ ಭಿಕ್ಖವೇಭಾರೋ, ‘ಪಞ್ಚುಪಾದಾನಕ್ಖನ್ಧಾ’ ತಿಸ್ಸ ವಚನೀಯಂ. ಕತಮೇ ಪಞ್ಚ, ರೂಪುಪಾದಾನಕ್ಖನ್ಧೋ ವೇದನುಪಾದಾನಕ್ಖನ್ಧೋ ಸಞ್ಞುಪಾದಾನಕ್ಖನ್ಧೋ ಸಙ್ಖಾರುಪಾದಾನಕ್ಖನ್ಧೋ ವಿಞ್ಞಾಣುಪಾದಾನಕ್ಖನ್ಧೋ. ಅಯಂ ವುಚ್ಚತಿ ಭಿಕ್ಖವೇ ಭಾರೋ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಭಾರಾ ಹವೇ ಪಞ್ಚಕ್ಖನ್ಧಾ, ಭಾರಹಾರೋ ಚ ಪುಗ್ಗಲೋ;

ಭಾರಾದಾನಂ ದುಖಂ ಲೋಕೇ, ಭಾರನಿಕ್ಖೇಪನಂ ಸುಖಂ;

ನಿಕ್ಖಿಪಿತ್ವಾ ಗರುಂ ಭಾರಂ, ಅಞ್ಞಂ ಭಾರಂ ಅನಾದಿಯ;

ಸಮೂಲಂ ತಣ್ಹಮಬ್ಬುಯ್ಹ, ನಿಚ್ಛಾತೋ ಪರಿನಿಬ್ಬುತೋ.

ನತುಮ್ಹಾಕಸುತ್ತ

ಪುಚ್ಛಾ – ನ ತುಮ್ಹಾಕಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂಯೇವ ಭನ್ತೇ ಸಮ್ಬಹುಲೇ ಭಿಕ್ಖು ಆರಬ್ಭ ‘‘ಯಂ ಭಿಕ್ಖವೇ ನತುಮ್ಹಾಕಂ ತಂ ಪಜಹಥ, ತಂ ವೋ ಪಹೀನಂ ಹಿತಾಯ ಸುಖಾಯಭವಿಸ್ಸತೀ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಅನತ್ತಲಕ್ಖಣಸುತ್ತ

ಪುಚ್ಛಾ – ಅನತ್ತಲಕ್ಖಣಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಬಾರಾಣಸಿಯಂ ಭನ್ತೇ ಇಸಿಪತನೇ ಮಿಗದಾಯೇ ಪಞ್ಚವಗ್ಗಿಯೇ ಭಿಕ್ಖೂ ಆರಬ್ಭ ‘‘ರೂಪಂ ಭಿಕ್ಖವೇ ಅನತ್ತಾ, ರೂಪಞ್ಚ ಹಿದಂ ಭಿಕ್ಖವೇ ಅತ್ತಾ ಅಭವಿಸ್ಸ, ನಯಿದಂ ರೂಪಂ ಆಬಾಧಾಯ ಸಂವತ್ತೇಯ್ಯ, ಲಬ್ಭೇಥ ಚ ರೂಪೇ ಏವಂ ಮೇ ರೂಪಂ ಹೋತು, ಏವಂ ಮೇ ರೂಪಂ ಮಾ ಅಹೋಸೀ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಯಮಕಸುತ್ತ

ಪುಚ್ಛಾ – ಥೇರವಗ್ಗೇ ಪನಾವುಸೋ ತತಿಯಂ ಸಂಗೀತಂ ಯಮಕಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಯಮಕತ್ಥೇರಂ ಆರಬ್ಭ ಆಯಸ್ಮತಾ ಸಾರಿಪುತ್ತತ್ಥೇರೇನ ಧಮ್ಮಸೇನಾಪತಿನಾ ಭಾಸಿತಂ. ಆಯಸ್ಮತೋ ಭನ್ತೇ ಯಮಕತ್ಥೇರಸ್ಸ ಏವರೂಪಂ ಪಾಪಕಂ ದಿಟ್ಠಿಗತಂ ಉಪ್ಪನ್ನಂ ಹೋತಿ ‘‘ತಥಾಹಂ ಭಗವತಾ ಧಮ್ಮಂ ದೇಸಿತಂ ಆಜಾನಾಮಿ, ಯಥಾ ಖೀಣಾಸವೋ ಭಿಕ್ಖು ಕಾಯಸ್ಸ ಭೇದಾ ಉಚ್ಛಿಜ್ಜತಿ ವಿನಸ್ಸತಿ, ನ ಹೋತಿ ಪರಂಮರಣಾ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ತಂ ಕಿಂ ಮಞ್ಞಸಿ ಆವುಸೋ ಯಮಕ, ರೂಪಂ ನಿಚ್ಚಂ ವಾ ಅನಿಚ್ಚಂ ವಾ’’ತಿ ಏವಮಾದಿನಾ ಭನ್ತೇ ಆಯಸ್ಮತಾ ಸಾರಿಪುತ್ತತ್ಥೇರೇನ ಧಮ್ಮಸೇನಾಪತಿನಾ ಭಾಸಿತಂ.

ಪುಚ್ಛಾ – ಕಥಞ್ಚಾವುಸೋ ತತ್ಥ ಆಯಸ್ಮಾ ಸಾರಿಪುತ್ತತ್ಥೇರೋ ಧಮ್ಮಸೇನಾಪತಿ ಆಯಸ್ಮತೋ ಯಮಕತ್ಥೇರಸ್ಸ ಪಟಿವಿದ್ಧಸಚ್ಚಸ್ಸ ದಿಟ್ಠಿಸಮ್ಪನ್ನಸ್ಸ ಅನುಯೋಗವತ್ತಝಾಪನವಸೇನ ಪಟಿಪುಚ್ಛಿತ್ವಾ ಉತ್ತರಿ ಧಮ್ಮದೇಸನಂ ವಿತ್ಥಾರೇನ ದೇಸೇಸಿ.

ವಿಸ್ಸಜ್ಜನಾ – ತಂ ಕಿಂ ಮಞ್ಞಸಿ ಆವುಸೋ ಯಮಕ, ರೂಪಂ ‘ತಥಾಗತೋ’ತಿ ಸಮನುಪಸ್ಸಸೀತಿ. ‘ನೋ ಹೇತಂ ಆವುಸೋ’. ವೇದನಂ. ಸಞ್ಞಂ. ಸಙ್ಖಾರೇ. ವಿಞ್ಞಾಣಂ ‘ತಥಾಗತೋ’ತಿ ಸಮನುಪಸ್ಸಸೀತಿ. ‘ನೋ ಹೇತಂ ಆವುಸೋ’ತಿ ಏವಮಾದಿನಾ ಭನ್ತೇ ಆಯಸ್ಮಾ ಸಾರಿಪುತ್ತತ್ಥೇರೋ ಧಮ್ಮಸೇನಾಪತಿ ಆಯಸ್ಮತೋ ಯಮಕತ್ಥೇರಸ್ಸ ಅನುಯೋಗವತ್ತಝಾಪನವಸೇನ ಪಟಿಪುಚ್ಛಿತ್ವಾ ಪಟಿಪುಚ್ಛಿತ್ವಾ ಉತ್ತರಿ ಧಮ್ಮದೇಸನಂ ಪವತ್ತೇಸಿ.

ತಂ ಕಿಂ ಮಞ್ಞಸಿ ಆವುಸೋ ಯಮಕ, ರೂಪಂ, ವೇದನಂ, ಸಞ್ಞಂ, ಸಙ್ಖಾರೇ, ವಿಞ್ಞಾಣಂ ‘ತಥಾಗತೋ’ತಿ ಸಮನುಪಸ್ಸಸಿ–

ವಕ್ಕಲಿಸುತ್ತ

ಪುಚ್ಛಾ – ತೇನಾವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಖನ್ಧವಗ್ಗಸಂಯುತ್ತೇ ಥೇರವಗ್ಗೇ ಪಞ್ಚಮಂ ವಕ್ಕಲಿಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಆಯಸ್ಮನ್ತಂ ವಕ್ಕಲಿಂ ಥೇರಂ ಆರಬ್ಭ ಭಾಸಿತಂ. ಆಯಸ್ಮಾ ಭನ್ತೇ ವಕ್ಕಲಿಥೇರೋ ಆಬಾಧಿಕೋ ದುಕ್ಖಿತೋ ಬಾಳ್ಹಗಿಲಾನೋ ಭಗವನ್ತಂ ಏತದವೋಚ ‘‘ಚಿರಪಟಿಕಾಹಂ ಭನ್ತೇ ಭಗವನ್ತಂ ದಸ್ಸನಾಯ ಉಪಸಙ್ಕಮಿತುಕಾಮೋ, ನತ್ಥಿ ಚ ಮೇ ಕಾಯಸ್ಮಿಂ ತಾವತಿಕಾ ಬಲಮತ್ತಾ, ಯಾವತಾಹಂ ಭಗವನ್ತಂ ದಸ್ಸನಾಯ ಉಪಸಙ್ಕಮೇಯ್ಯ’’ನ್ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಅಲಂ ವಕ್ಕಲಿ, ಕಿಂ ತೇ ಇಮಿನಾ ಪೂತಿಕಾಯೇನ ದಿಟ್ಠೇನ, ಯೋ ಖೋ ವಕ್ಕಲಿ ಧಮ್ಮಂ ಪಸ್ಸತಿ, ಸೋ ಮಂ ಪಸ್ಸತಿ, ಯೋ ಮಂ ಪಸ್ಸತಿ, ಸೋ ಧಮ್ಮಂ ಪಸ್ಸತಿ. ಧಮ್ಮಞ್ಹಿ ವಕ್ಕಲಿ ಪಸ್ಸನ್ತೋ ಮಂ ಪಸ್ಸತಿ, ಮಂ ಪಸ್ಸನ್ತೋ ಧಮ್ಮಂ ಪಸ್ಸತಿ. ತಂ ಕಿಂ ಮಞ್ಞಸಿ ವಕ್ಕಲಿ, ರೂಪಂ ನಿಚ್ಚಂ ವಾ ಅನಿಚ್ಚಂ ವಾ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ.

‘‘ಅಹಂ ವಕ್ಕಲಿ, ಕಿಂ ತೇ ಇಮಿನಾ ಪೂತಿಕಾಯೇನ ದಿಟ್ಠೇನ’’ –

‘‘ತಂ ಕಿಂ ಮಞ್ಞಸಿ ವಕ್ಕಲಿ, ರೂಪಂ ನಿಚ್ಚಂ ವಾ ಅನಿಚ್ಚಂ ವಾ’’ –

ಅನಿಚ್ಚಂ ಭನ್ತೇ.

‘‘ಯಂ ಪನಾನಿಚ್ಚಂ, ದುಕ್ಖಂ ವಾ ತಂ ಸುಖಂ ವಾ’’–

ದುಕ್ಖಂ ಭನ್ತೇ.

ಯಂ ಪನಾನಿಚ್ಚಂ ದುಕ್ಖಂ ವಿಪರಿಣಾಮಧಮ್ಮಂ, ಕಲ್ಲಂ ನು ತಂ ಸಮನುಪಸ್ಸಿತುಂ ‘‘ಏತಂ ಮಮ, ಏಸೋಹಮಸ್ಮಿ, ಏಸೋ ಮೇ ಅತ್ತಾ’’–

ಪುಚ್ಛಾ – ಕಥಞ್ಚಾವುಸೋ ಪುನಪಿ ಭಗವಾ ಭಿಕ್ಖೂ ಪೇಸೇತ್ವಾ ಆಯಸ್ಮತೋ ವಕ್ಕಲಿತ್ಥೇರಸ್ಸ ಪಗ್ಗಹವಚನಂ ಆರೋಚಾಪೇಸಿ. ಸೋಪಿ ಕಥಂ ಅತ್ತನೋ ಪವತ್ತಿಂ ಭಗವತೋ ಪಚ್ಚಾರೋಚಾಪೇಸಿ. ಕಥಞ್ಚಸ್ಸ ಅಭಿಸಮ್ಪರಾಯೋ ಅಹೋಸಿ.

ವಿಸ್ಸಜ್ಜನಾ – ಸುಣಾವುಸೋ ತ್ವಂ ವಕ್ಕಲಿ ಭಗವತೋ ವಚನಂ ದ್ವಿನ್ನಞ್ಚ ದೇವತಾನಂ, ಇಮಂ ಆವುಸೋ ರತ್ತಿಂ ದ್ವೇ ದೇವತಾಯೋ ಅಭಿಕ್ಕನ್ತಾಯ ರತ್ತಿಯಾ ಅಭಿಕ್ಕನ್ತವಣ್ಣಾ ಕೇವಲಕಪ್ಪಂ ಗಿಜ್ಝಕೂಟಂ ಓಭಾಸೇತ್ವಾ ಯೇನ

ಭಗವಾ ತೇನುಪಸಙ್ಕಮಿಂಸು, ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ಅಟ್ಠಂಸು, ಏಕಮನ್ತಂ ಠಿತಾ ಖೋ ಆವುಸೋ ಏಕಾ ದೇವತಾ ಭಗವನ್ತಂ ಏತದವೋಚ ‘ವಕ್ಕಲಿ ಭನ್ತೇ ಭಿಕ್ಖು ವಿಮೋಕ್ಖಾಯ ಚೇತೇತೀ’ತಿ. ಅಪರಾ ದೇವತಾ ಭಗವನ್ತಂ ಏತದವೋಚ ‘ಸೋ ಹಿ ನೂನ ಭನ್ತೇ ಸುವಿಮುತ್ತೋ ವಿಮುಚ್ಚಿಸ್ಸತೀ’ತಿ. ಭಗವಾ ಚ ತಂ ಆವುಸೋ ವಕ್ಕಲಿ ಏವಮಾಹ ‘ಮಾ ಭಾಯಿ ವಕ್ಕಲಿ, ಮಾ ಭಾಯಿ ವಕ್ಕಲಿ, ಅಪಾಪಕಂ ತೇ ಮರಣಂ ಭವಿಸ್ಸತಿ, ಅಪಾಪಿಕಾ ಕಾಲಕಿರಿಯಾ’ತಿ. ಏವಂ ಖೋ ಭನ್ತೇ ಭಗವಾ ಪುನಪಿ ಭಿಕ್ಖೂ ಪೇಸೇತ್ವಾ ಆಯಸ್ಮತೋ ವಕ್ಕಲಿತ್ಥೇರಸ್ಸ ಪಗ್ಗಹವಚನಂ ಆರೋಚಾಪೇಸಿ. ಸೋಪಿ ಭನ್ತೇ ಆಯಸ್ಮಾ ತೇನಹಾವುಸೋ ಮಮ ವಚನೇನ ಭಗವತೋ ಪಾದೇ ಸಿರಸಾ ವನ್ದಥ ‘‘ವಕ್ಕಲಿ ಭನ್ತೇ ಭಿಕ್ಖು ಆಬಾಧಿಕೋ ದುಕ್ಖಿತೋ ಬಾಳ್ಹಗಿಲಾನೋ, ಸೋ ಭಗವತೋ ಪಾದೇ ಸಿರಸಾ ವನ್ದತೀ’’ತಿ, ಏವಞ್ಚ ವದೇಥ ‘‘ರೂಪಂ ಅನಿಚ್ಚಂ, ತಾಹಂ ಭನ್ತೇ ನ ಕಙ್ಖಾಮಿ, ಯದನಿಚ್ಚಂ ತಂ ದುಕ್ಖನ್ತಿ ನವಿಚಿಕಿಚ್ಛಾಮಿ, ಯದನಿಚ್ಚಂ ದುಕ್ಖಂ ವಿಪರಿಣಾಮಧಮ್ಮಂ, ನತ್ಥಿ ಮೇ ತತ್ಥ ಛನ್ದೋ ವಾ ರಾಗೋ ವಾ ಪೇಮಂವಾತಿ ನ ವಿಚಿಕಿಚ್ಛಾಮೀ’’ತಿ ಏವಮಾದಿನಾ ಭಗವತೋ ಅತ್ತನೋ ಪವತ್ತಿಂ ಪಚ್ಚಾರೋಚಾಪೇಸಿ. ಸೋ ಹಿ ಭನ್ತೇ ಆಯಸ್ಮಾ ಅಚಿರಪಕ್ಕನ್ತೇಸು ತೇಸು ಭಿಕ್ಖೂಸು ಸತ್ಥಂ ಆಹರಿತ್ವಾ ವೇದನಂ ವಿಕ್ಖಮ್ಭೇತ್ವಾ ಮೂಲಕಮ್ಮಟ್ಠಾನಂ ಆದಾಯ ಸಮ್ಪಜಾನೋ ಅರಹತ್ತಂ ಸಚ್ಛಿಕತ್ವಾ ಕಾಲಮಕಾಸಿ. ಏವಂ ಖೋ ಭನ್ತೇ ತಸ್ಸ ಆಯಸ್ಮತೋ ಅಭಿಸಮ್ಪರಾಯೋ ಅಹೋಸಿ.

ಅಸ್ಸಜಿಸುತ್ತ

ಪುಚ್ಛಾ – ಅಸ್ಸಜಿಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಆಯಸ್ಮನ್ತಂ ಅಸ್ಸಜಿಂ ಆರಬ್ಭ ಭಾಸಿತಂ. ಆಯಸ್ಮಾ ಭನ್ತೇ ಅಸ್ಸಜಿ ಆಬಾಧಿಕೋ ದುಕ್ಖಿತೋ ಬಾಳ್ಹಗಿಲಾನೋ ಭಗವನ್ತಂ ಏತದವೋಚ ‘‘ಪುಬ್ಬೇ ಖ್ವಾಹಂ ಭನ್ತೇ ಗೇಲಞ್ಞೇ ಪಸ್ಸಮ್ಭೇತ್ವಾ ಪಸ್ಸಮ್ಭೇತ್ವಾ ಕಾಯಸಙ್ಖಾರೇ ವಿಹರಾಮಿ, ಸೋಹಂ ಸಮಾಧಿಂ ನಪ್ಪಟಿಲಭಾಮಿ. ತಸ್ಸ ಮಯ್ಹಂ ಭನ್ತೇ ತಂ ಸಮಾಧಿಂ ಅಪ್ಪಟಿಲಭತೋ ಏವಂ ಹೋತಿ ನೋ ಚಸ್ಸಾಹಂ ಪರಿಹಾಯಾಮೀ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಯೇ ತೇ ಅಸ್ಸಜಿ ಸಮಣಬ್ರಾಹ್ಮಣಾ ಸಮಾಧಿಸಾರಕಾ ಸಮಾಧಿಸಾಮಞ್ಞಾ, ತೇಸಂ ತಂ ಸಮಾಧಿಂ ಅಪ್ಪಟಿಲಭತಂ ಏವಂ ಹೋತಿ ‘ನೋ ಚಸ್ಸು ಮಯಂ ಪರಿಹಾಯಾಮಾ’ತಿ. ತಂ ಕಿಂ ಮಞ್ಞಸಿ ಅಸ್ಸಜಿ, ರೂಪಂ ನಿಚ್ಚಂ ವಾ ಅನಿಚ್ಚಂ ವಾ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ.

ಖೇಮಕಸುತ್ತ

ಪುಚ್ಛಾ – ಖೇಮಕಸುತ್ತಂ ಪನಾವುಸೋ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಕೋಸಮ್ಬಿಯಂ ಭನ್ತೇ ಸಮ್ಬಹುಲೇ ಥೇರೇ ಭಿಕ್ಖೂ ಆರಬ್ಭ ಆಯಸ್ಮತಾ ಖೇಮಕತ್ಥೇರೇನ ಭಾಸಿತಂ. ಸಮ್ಬಹುಲಾ ಭನ್ತೇ ಥೇರಾ ಭಿಕ್ಖೂ ಆಯಸ್ಮನ್ತಂ ದಾಸಕಂ ಪೇಸೇತ್ವಾ ಚತುಕ್ಖತ್ತುಂ ಆಯಸ್ಮನ್ತಂ ಖೇಮಕಂ ಆಬಾಧಿಕಂ ದುಕ್ಖಿತಂ ಬಾಳ್ಹಗಿಲಾನಂ ಗೇಲಞ್ಞಕಾರಣಞ್ಚ ಧಮ್ಮಞ್ಚ ಪುಚ್ಛಿಂಸು, ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಪಞ್ಚಿಮೇ ಆವುಸೋ ಉಪಾದಾನಕ್ಖನ್ಧಾ ವುತ್ತಾ ಭಗವತಾ. ಸೇಯ್ಯಥಿದಂ, ರೂಪುಪಾದಾನಕ್ಖನ್ಧೋ ವೇದನುಪಾದಾನಕ್ಖನ್ಧೋ ಸಞ್ಞುಪಾದಾನಕ್ಖನ್ಧೋ ಸಙ್ಖಾರುಪಾದಾನಕ್ಖನ್ಧೋ ವಿಞ್ಞಾಣುಪಾದಾನಕ್ಖನ್ಧೋ, ಇಮೇಸು ಖ್ವಾಹಂ ಆವುಸೋ ಪಞ್ಚಸು ಉಪಾದಾನಕ್ಖನ್ಧೇಸು ನ ಕಿಞ್ಚಿ ಅತ್ತಂ ವಾ ಅತ್ತನಿಯಂ ವಾ ಸಮನುಪಸ್ಸಾಮೀ’’ತಿ ಏವಮಾದಿನಾ ಭನ್ತೇ ಆಯಸ್ಮತಾ ಖೇಮಕತ್ಥೇರೇನ ಭಾಸಿತಂ.

ಪುಚ್ಛಾ – ಕಥಞ್ಚಾವುಸೋ ತತ್ಥ ಆಯಸ್ಮಾ ಖೇಮಕೋ ಉತ್ತರಿ ಧಮ್ಮದೇಸನಂ ಪವಡ್ಢೇತ್ವಾ ವಿತ್ಥಾರೇನ ಥೇರಾನಂ ಭಿಕ್ಖೂನಂ ದೇಸೇಸಿ. ಕೀದಿಸೋ ಚ ನೇಸಂ ಧಮ್ಮದೇಸಕಧಮ್ಮಪ್ಪಟಿಗ್ಗಾಹಕಾನಂ ಧಮ್ಮದೇಸನಾಯ ಆನಿಸಂಸೋ ಅಧಿಗತೋ.

ವಿಸ್ಸಜ್ಜನಾ – ಚತುತ್ಥೇ ಭನ್ತೇ ವಾರೇ ಆಯಸ್ಮಾ ಖೇಮಕೋ ‘‘ಅಲಂ ಆವುಸೋ ದಾಸಕ ಕಿಂ ಇಮಾಯ ಸನ್ಧಾವನಿಕಾಯ, ಆಹರಾವುಸೋ ದಣ್ಡಂ, ಅಹಮೇವ ಥೇರಾನಂ ಸನ್ತಿಕಂ ಗಮಿಸ್ಸಾಮೀ’’ತಿ ದಣ್ಡಮೋಲುಬ್ಭ ಆಯಸ್ಮಾ ಖೇಮಕೋ ಯೇನ ಥೇರಾ ಭಿಕ್ಖೂ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಥೇರೇಹಿ ಭಿಕ್ಖೂಹಿ ಪುಚ್ಛಿತೋ ‘‘ನಖ್ವಾಹಂ ಆವುಸೋ ರೂಪಂ ಅಸ್ಮೀತಿ ವದಾಮಿ, ನಪಿ ಅಞ್ಞತ್ರ ರೂಪಾ ಅಸ್ಮೀತಿ ವದಾಮಿ. ನ ಖ್ವಾಹಂ ಆವುಸೋ ವೇದನಂ ಅಸ್ಮೀತಿ ವದಾಮಿ, ನಪಿ ಅಞ್ಞತ್ರ ವೇದನಾ ಅಸ್ಮೀತಿ ವದಾಮೀ’’ತಿ ಏವಮಾದಿನಾ ಭನ್ತೇ ಆಯಸ್ಮಾ ಖೇಮಕೋ ಉತ್ತರಿಪಿ ಧಮ್ಮದೇಸನಂ ಪವಡ್ಢೇತ್ವಾ ವಿತ್ಥಾರೇನ ದೇಸೇಸಿ. ಇಮಸ್ಮಿಞ್ಚ ಪನ ಭನ್ತೇ ವೇಯ್ಯಾಕರಣಸ್ಮಿಂ ಭಞ್ಞಮಾನೇ ಸಟ್ಠಿಮತ್ತಾನಂ ಥೇರಾನಂ ಭಿಕ್ಖೂನಂ ಅನುಪಾದಾಯ ಆಸವೇಹಿ ಚಿತ್ತಾನಿ ವಿಮುಚ್ಚಿಂಸು ಆಯಸ್ಮತೋಚ ಖೇಮಕಸ್ಸ. ಏವಂ ಖೋ ಭನ್ತೇ ತೇಸಂ ಥೇರಾನಂ ಧಮ್ಮದೇಸಕಧಮ್ಮಪ್ಪಟಿಗ್ಗಾಹಕಾನಂ ಧಮ್ಮಾಭಿಸಮಯೋ ಅಹೋಸಿ.

ಛನ್ನಸುತ್ತ

ಪುಚ್ಛಾ – ಛನ್ನಸುತ್ತಂ ಪನಾವುಸೋ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಕೋಸಮ್ಬಿಯಂ ಭನ್ತೇ ಆಯಸ್ಮನ್ತಂ ಛನ್ನತ್ಥೇರಂ ಆರಬ್ಭ ಭಾಸಿತಂ. ಆಯಸ್ಮಾ ಭನ್ತೇ ಛನ್ನತ್ಥೇರೋ ಆಯಸ್ಮನ್ತಂ ಆನನ್ದಂ ಏತದವೋಚ ‘‘ಓವದತು ಮಂ ಆಯಸ್ಮಾ ಆನನ್ದೋ, ಅನುಸಾಸತು ಮಂ ಆಯಸ್ಮಾ ಆನನ್ದೋ, ಕರೋತು ಮೇ ಆಯಸ್ಮಾ ಆನನ್ದೋ ಧಮ್ಮಿಂ ಕಥಂ, ಯಥಾಹಂ ಧಮ್ಮಂ ಪಸ್ಸೇಯ್ಯ’’ನ್ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಸಮ್ಮುಖಾ ಮೇ ತಂ ಆವುಸೋ ಛನ್ನ ಭಗವತೋ ಸುತಂ, ಸಮ್ಮುಖಾ ಪಟಿಗ್ಗಹಿತಂ ಕಚ್ಚಾನಗೋತ್ತಂ ಭಿಕ್ಖುಂ ಓವದನ್ತಸ್ಸ, ದ್ವಯನಿಸ್ಸಿತೋ ಖ್ವಾಯಂ ಕಚ್ಚಾನ ಲೋಕೋ ಯೇಭುಯ್ಯೇನ ಅತ್ಥಿತಞ್ಚೇವ ನತ್ಥಿತಞ್ಚ, ಲೋಕಸಮುದಯಂ ಖೋ ಕಚ್ಚಾನ ಯಥಾಭೂತಂ ಸಮ್ಮಪ್ಪಞ್ಞಾಯ ಪಸ್ಸತೋ ಯಾ ಲೋಕೇ ನತ್ಥಿತಾ, ಸಾ ನ ಹೋತೀ’’ತಿ ಏವಮಾದಿನಾ ಭನ್ತೇ ಆಯಸ್ಮತಾ ಆನನ್ದತ್ಥೇರೇನ ಧಮ್ಮಭಣ್ಡಾಗಾರಿಕೇನ ಭಾಸಿತಂ.

ಓವದತು ಮಂ ಆಯಸ್ಮಾ ಆನನ್ದೋ, ಅನುಸಾಸತು ಮಂ ಆಯಸ್ಮಾ ಆನನ್ದೋ.

ಪುಪ್ಫಸುತ್ತ

ಪುಚ್ಛಾ – ತೇನಾವುಸೋ…ಪೇ… ಸಮ್ಮಾಸಮ್ಬುದ್ಧೇನ ಖನ್ಧವಗ್ಗಸಂಯುತ್ತೇ ಪುಪ್ಫವಗ್ಗೇ ಪುಪ್ಫಸುತ್ತಂ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ನಾಹಂ ಭಿಕ್ಖವೇ ಲೋಕೇನ ವಿವದಾಮಿ, ಲೋಕೋವ ಮಯಾ ವಿವದತಿ, ನ ಭಿಕ್ಖವೇ ಧಮ್ಮವಾದೀ ಕೇನಚಿ ಲೋಕಸ್ಮಿಂ ವಿವದತಿ, ಯಂ ಭಿಕ್ಖವೇ ನತ್ಥಿ ಸಮ್ಮತಂ ಲೋಕೇ ಪಣ್ಡಿತಾನಂ, ಅಹಮ್ಪಿತಂ ‘‘ನತ್ಥೀ’’ತಿ ವದಾಮಿ, ಯಂ ಭಿಕ್ಖವೇ ಅತ್ಥಿಸಮ್ಮತಂ ಲೋಕೇ ಪಣ್ಡಿತಾನಂ, ಅಹಮ್ಪಿತಂ ‘‘ಅತ್ಥೀ’’ತಿ ವದಾಮೀ’’ತಿ ಏವಮಾದಿನಾ ಭಗವತಾ ಭಾಸಿತಂ.

ನಾಹಂ ಭಿಕ್ಖವೇ ಲೋಕೇನ ವಿವದಾಮಿ.

ನ ಭಿಕ್ಖವೇ ಧಮ್ಮವಾದೀ ಕೇನಚಿ ಲೋಕಸ್ಮಿಂ ವಿವದತಿ.

ಫೇಣಪಿಣ್ಡೂಪಮಸುತ್ತ

ಪುಚ್ಛಾ – ತತ್ಥೇವ ಆವುಸೋ ಫೇಣಪಿಣ್ಡೂಪಮಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಅಯುಜ್ಝಾಯಂ ಭನ್ತೇ ಗಙ್ಗಾಯ ನದಿಯಾ ತೀರೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಸೇಯ್ಯಥಾಪಿ ಭಿಕ್ಖವೇ ಅಯಂ ಗಙ್ಗಾ ನದೀ ಮಹನ್ತಂ ಫೇಣಪಿಣ್ಡಂ ಆವಹೇಯ್ಯ, ತಮೇನಂ ಚಕ್ಖುಮಾ ಪುರಿಸೋ ಪಸ್ಸೇಯ್ಯ ನಿಜ್ಝಾಯೇಯ್ಯ ಯೋನಿಸೋ ಉಪಪರಿಕ್ಖೇಯ್ಯ, ತಸ್ಸ ತಂ ಪಸ್ಸತೋ ನಿಜ್ಝಾಯತೋ ಯೋನಿಸೋ ಉಪಪರಿಕ್ಖತೋ ರಿತ್ತಕಞ್ಞೇವ ಖಾಯೇಯ್ಯ, ತುಚ್ಛಕಞ್ಞೇವ ಖಾಯೇಯ್ಯ, ಅಸಾರಕಞ್ಞೇವ ಖಾಯೇಯ್ಯ, ಕಿಂ ಸಿಯಾ ಭಿಕ್ಖವೇ ಫೇಣಪಿಣ್ಡೇ ಸಾರೋ. ಏವಮೇವ ಖೋ ಭಿಕ್ಖವೇ ಯಂ ಕಿಞ್ಚಿ ರೂಪಂ ಅತೀತಾನಾಗತಪಚ್ಚುಪ್ಪನ್ನಂ ಅಜ್ಝತ್ತಂವಾ ಬಹಿದ್ಧಾ ವಾ ಓಳಾರಿಕಂ ವಾ ಸುಖುಮಂ ವಾ ಹೀನಂ ವಾ ಪಣೀತಂ ವಾ ಯಂ ದೂರೇ ಸನ್ತಿಕೇ ವಾ, ತಂ ಭಿಕ್ಖು ಪಸ್ಸತಿ ನಿಜ್ಝಾಯತಿ ಯೋನಿಸೋ ಉಪಪರಿಕ್ಖತಿ, ತಸ್ಸ ತಂ ಪಸ್ಸತೋ ನಿಜ್ಝಾಯತೋ ಯೋನಿಸೋ ಉಪಪರಿಕ್ಖತೋ ರಿತ್ತಕಞ್ಞೇವ ಖಾಯತಿ, ತುಚ್ಛಕಞ್ಞೇವ ಖಾಯತಿ, ಅಸಾರಕಞ್ಞೇವ ಖಾಯತಿ, ಕಿಞ್ಹಿ ಸಿಯಾ ಭಿಕ್ಖವೇ ರೂಪೇ ಸಾರೋ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಫೇಣಪಿಣ್ಡೂಪಮಂ ರೂಪಂ, ವೇದನಾ ಪುಬ್ಬುಳುಪಮಾ;

ಮರೀಚಿಕೂಪಮಾ ಸಞ್ಞಾ, ಸಙ್ಖಾರಾ ಕದಲೂಪಮಾ;

ಮಾಯೂಪಮಞ್ಚ ವಿಞ್ಞಾಣಂ, ದೇಸಿತಾದಿಚ್ಚಬನ್ಧುನಾ;

ಯಥಾ ಯಥಾ ನಿಜ್ಝಾಯತಿ, ಯೋನಿಸೋ ಉಪಪರಿಕ್ಖತಿ;

ರಿತ್ತಕಂ ತುಚ್ಛಕಂ ಹೋತಿ, ಯೋ ನಂ ಪಸ್ಸತಿ ಯೋನಿಸೋ.

ಇಮಞ್ಚ ಕಾಯಂ ಆರಬ್ಭ, ಭೂರಿಪಞ್ಞೇನ ದೇಸಿತಂ;

ಪಹಾನಂ ತಿಣ್ಣಂ ಧಮ್ಮಾನಂ, ರೂಪಂ ಪಸ್ಸಥ ಛಡ್ಡಿತಂ.

ಆಯು ಉಸ್ಮಾಚ ವಿಞ್ಞಾಣಂ, ಯದಾ ಕಾಯಂ ಜಹನ್ತಿಮಂ;

ಅಪವಿದ್ಧೋ ತದಾ ಸೇತಿ, ಪರಭತ್ತಂ ಅಚೇತನಂ.

ಏತಾದಿಸಾಯಂ ಸನ್ತಾನೋ, ಮಾಯಾಯಂ ಬಾಲಲಾಪಿನೀ;

ವಧಕೋ ಏಸ ಅಕ್ಖಾತೋ, ಸಾರೋ ಏತ್ಥ ನ ವಿಜ್ಜತಿ.

ಏವಂ ಖನ್ಧೇ ಅವೇಕ್ಖೇಯ್ಯ, ಭಿಕ್ಖು ಆರದ್ಧವೀರಿಯೋ;

ದಿವಾ ವಾ ಯದಿ ವಾ ರತ್ತಿಂ, ಸಮ್ಪಜಾನೋ ಪಟಿಸ್ಸತೋ.

ಜಹೇಯ್ಯ ಸಬ್ಬಸಂಯೋಗಂ, ಕರೇಯ್ಯ ಸರಣತ್ತನೋ;

ಚರೇಯ್ಯಾದಿತ್ತಸೀಸೋವ, ಪತ್ಥಯಂ ಅಚ್ಚುತಂ ಪದಂ.

ದುತಿಯಧಮ್ಮಕತಿಕಸುತ್ತ

ಪುಚ್ಛಾ – ತತ್ಥೇವ ಆವುಸೋ ಧಮ್ಮಕಥಿಕವಗ್ಗೇ ದುತಿಯಧಮ್ಮಕಥಿಕಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಭಾಸಿತಂ. ಅಞ್ಞತಮೋ ಭನ್ತೇ ಭಿಕ್ಖು ಭಗವನ್ತಂ ಏತದವೋಚ ‘‘ಧಮ್ಮಕಥಿಕೋ ಧಮ್ಮಕಥಿಕೋತಿ ಭನ್ತೇ ವುಚ್ಚತಿ, ಕಿತ್ತಾವತಾ ನು ಖೋ ಭನ್ತೇ ಧಮ್ಮಕಥಿಕೋ ಹೋತಿ, ಕಿತ್ತಾವತಾ ಧಮ್ಮಾನುಧಮ್ಮಪ್ಪಟಿಪನ್ನೋ ಹೋತಿ, ಕಿತ್ತಾವತಾ ದಿಟ್ಠಧಮ್ಮನಿಬ್ಬಾನಪ್ಪತ್ತೋ ಹೋತೀ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ರೂಪಸ್ಸ ಚೇ ಭಿಕ್ಖು ನಿಬ್ಬಿದಾಯ ವಿರಾಗಾಯ ನಿರೋಧಾಯ ಧಮ್ಮಂ ದೇಸೇತಿ, ‘ಧಮ್ಮಕಥಿಕೋ ಭಿಕ್ಖೂ’ತಿ ಅಲಂ ವಚನಾಯಾ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಸೀಲವನ್ತಸುತ್ತ, ಸುತವನ್ತಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಸಂಗೀತಂ ಸೀಲವನ್ತಸುತ್ತಞ್ಚ ಸುತವನ್ತಸುತ್ತಞ್ಚ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಬಾರಾಣಸಿಯಂ ಭನ್ತೇ ಆಯಸ್ಮನ್ತಂ ಮಹಾಕೋಟ್ಠಿಕಂ ಆರಬ್ಭ ಆಯಸ್ಮತಾ ಸಾರಿಪುತ್ತತ್ಥೇರೇನ ಧಮ್ಮಸೇನಾಪತಿನಾ ಭಾಸಿತಂ. ಆಯಸ್ಮಾ ಭನ್ತೇ ಮಹಾಕೋಟ್ಠಿಕೋ ಸಾಯನ್ಹಸಮಯಂ ಪಟಿಸಲ್ಲಾನಾ ವುಟ್ಠಿತೋ ಯೇನಾಯಸ್ಮಾ ಸಾರಿಪುತ್ತೋ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಆಯಸ್ಮನ್ತಂ ಸಾರಿಪುತ್ತಂ ಏತದವೋಚ ‘‘ಸೀಲವತಾವುಸೋ ಸಾರಿಪುತ್ತ ಭಿಕ್ಖುನಾ ಕತಮೇ ಧಮ್ಮಾ ಯೋನಿಸೋ ಮನಸಿಕಾತಬ್ಬಾ. ಸುತಾವತಾವುಸೋ ಸಾರಿಪುತ್ತ ಭಿಕ್ಖುನಾ ಕತಮೇ ಧಮ್ಮಾ ಯೋನಿಸೋ ಮನಸಿಕಾತಬ್ಬಾ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಸೀಲವತಾವುಸೋ ಕೋಟ್ಠಿಕ ಭಿಕ್ಖುನಾ, ಸುತಾವತಾವುಸೋ ಕೋಟ್ಠಿಕ ಭಿಕ್ಖುನಾ ಪಞ್ಚುಪಾದಾನಕ್ಖನ್ಧಾ ಅನಿಚ್ಚತೋ ದುಕ್ಖತೋ ರೋಗತೋ ಗಣ್ಡತೋ ಸಲ್ಲತೋ ಅಘತೋ ಆಬಾಧತೋ ಪರತೋ ಪಲೋಕತೋ ಸುಞ್ಞತೋ ಅನತ್ತತೋ ಯೋನಿಸೋ ಮನಸಿಕಾತಬ್ಬಾ’’ತಿ ಏವಮಾದಿನಾ ಆಯಸ್ಮತಾ ಸಾರಿಪುತ್ತತ್ಥೇರೇನ ಧಮ್ಮಸೇನಾಪತಿನಾ ಭಾಸಿತಂ.

ರಾಧಸಂಯುತ್ತ

ಸತ್ತಸುತ್ತ

ಪುಚ್ಛಾ – ರಾಧಸಂಯುತ್ತೇ ಪನಾವುಸೋ ದುತಿಯಂ ಸತ್ತಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ರಾಧತ್ಥೇರಂ ಆರಬ್ಭ ಭಾಸಿತಂ. ಆಯಸ್ಮಾ ಭನ್ತೇ ರಾಧತ್ಥೇರೋ ಭಗವನ್ತಂ ಏತದವೋಚ ‘‘ಸತ್ತೋ ಸತ್ತೋತಿ ಭನ್ತೇ ವುಚ್ಚತಿ, ಕಿತ್ತಾವತಾ ನು ಖೋ ಭನ್ತೇ ಸತ್ತೋತಿ ವುಚ್ಚತೀ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ರೂಪೇ ಖೋ ರಾಧ ಯೋ ಛನ್ದೋ ಯೋ ರಾಗೋ ಯಾ ನನ್ದೀ ಯಾ ತಣ್ಹಾ, ತತ್ರ ಸತ್ತೋ ತತ್ರ ವಿಸತ್ತೋ, ತಸ್ಮಾ ಸತ್ತೋತಿ ವುಚ್ಚತೀ’’ತಿ ಏವಮಾದಿನಾ ಭಗವತಾ ಭಾಸಿತಂ.

ದಿಟ್ಠಿಸಂಯುತ್ತ

ಸೋಅತ್ತಾಸುತ್ತ

ಪುಚ್ಛಾ – ದಿಟ್ಠಿಸಂಯುತ್ತೇ ಪನಾವುಸೋ ತತಿಯಂ ಸಂಗೀತಂ ಸೋಅತ್ತಾ ಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಕಿಸ್ಮಿಂ ನು ಖೋ ಭಿಕ್ಖವೇ ಸತಿ ಕಿಂ ಉಪಾದಾಯ ಕಿಂ ಅಭಿನಿವಿಸ್ಸ ಏವಂ ದಿಟ್ಠಿ ಉಪ್ಪಜ್ಜತಿ ಸೋ ಅತ್ತಾ ಸೋ ಲೋಕೋ ಸೋ ಪೇಚ್ಚ ಭವಿಸ್ಸಾಮಿ ನಿಚ್ಚೋ ಧುವೋ ಸಸ್ಸತೋ ಅವಿಪರಿಣಾಮಧಮ್ಮೋ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ.

ನತ್ಥಿದಿನ್ನಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪಞ್ಚಮಂ ನತ್ಥಿದಿನ್ನಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂಯೇವ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಕಿಸ್ಮಿಂ ನು ಖೋ ಭಿಕ್ಖವೇ ಸತಿ ಕಿಂ ಉಪಾದಾಯ ಕಿಂ ಅಭಿನಿವಿಸ್ಸ ಏವಂ ದಿಟ್ಠಿ ಉಪ್ಪಜ್ಜತಿ ನತ್ಥಿ ದಿನ್ನಂ, ನತ್ಥಿ ಯಿಟ್ಠಂ, ನತ್ಥಿ ಹುತಂ, ನತ್ಥಿ ಸುಕತದುಕ್ಕಟಾನಂ ಕಮ್ಮಾನಂ ಫಲಂ ವಿಪಾಕೋ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಓಕ್ಕನ್ತಸಂಯುತ್ತ

ಚಕ್ಖುಸುತ್ತ

ಪುಚ್ಛಾ – ಓಕ್ಕನ್ತಸಂಯುತ್ತೇ ಪನಾವುಸೋ ಪಠಮಂ ಚಕ್ಖುಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಚಕ್ಖುಂ ಭಿಕ್ಖವೇ ಅನಿಚ್ಚಂ ವಿಪರಿಣಾಮಿ ಅಞ್ಞಥಾಭಾವಿ. ಸೋತಂ. ಘಾನಂ. ಜಿವ್ಹಂ. ಕಾಯೋ. ಮನೋ ಅನಿಚ್ಚೋ ವಿಪರಿಣಾಮೀ ಅಞ್ಞಥಾಭಾವೀ’’ತಿ ಏವಮಾದಿನಾ ಭಗವತಾ ಭಾಸಿತಂ.

ಸಾರಿಪುತ್ತಸಂಯುತ್ತ

ಸುಚಿಮುಖೀಸುತ್ತ

ಪುಚ್ಛಾ – ಸಾರಿಪುತ್ತಸಂಯುತ್ತೇ ಪನಾವುಸೋ ದಸಮಂ ಸುಚಿಮುಖೀಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸುಚಿಮುಖಿಂ ಪರಿಬ್ಬಾಜಿಕಂ ಆರಬ್ಭ ಆಯಸ್ಮತಾ ಸಾರಿಪುತ್ತತ್ಥೇರೇನ ಧಮ್ಮಸೇನಾಪತಿನಾ ಭಾಸಿತಂ. ಸುಚಿಮುಖೀ ಭನ್ತೇ ಪರಿಬ್ಬಾಜಿಕಾ ಆಯಸ್ಮನ್ತಂ ಸಾರಿಪುತ್ತಂ ಏತದವೋಚ ‘‘ಕಿಂ ನು ಖೋ ಸಮಣ ಅಧೋಮುಖೋ ಭುಞ್ಜಸೀ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ನ ಖ್ವಾಹಂ ಭಗಿನಿ ಅಧೋಮುಖೋ ಭುಞ್ಜಾಮೀ’’ತಿ ಏವಮಾದಿನಾ ಪಟಿಕ್ಖಿಪಿತ್ವಾ ‘‘ಯೇ ಹಿ ಕೇಚಿ ಭಗಿನಿ ಸಮಣಬ್ರಾಹ್ಮಣಾ ವತ್ಥುವಿಜ್ಜಾ ತಿರಚ್ಛಾನವಿಜ್ಜಾಯ ಮಿಚ್ಛಾಜೀವೇನ ಜೀವಿಕಂ ಕಪ್ಪೇನ್ತಿ, ಇಮೇ ವುಚ್ಚನ್ತಿ ಭಗಿನಿ ಸಮಣಬ್ರಾಹ್ಮಣಾ ಅಧೋಮುಖಾ ಭುಞ್ಜನ್ತೀ’’ತಿ ಏವಮಾದಿನಾ ಆಯಸ್ಮತಾ ಸಾರಿಪುತ್ತತ್ಥೇರೇನ ಧಮ್ಮಸೇನಾಪತಿನಾ ಭಾಸಿತಂ.

ಕಿಂ ನು ಖೋ ಸಮಣ ಅಧೋ ಮುಖೋ ಭುಞ್ಜಸಿ.

ನ ಖ್ವಾಹಂ ಭಗಿನಿ ಅಧೋಮುಖೋ ಭುಞ್ಜಾಮಿ.

ತೇನ ಹಿ ಸಮಣ ಉಬ್ಭಮುಖೋ ಭುಞ್ಜಸಿ.

ನ ಖ್ವಾಹಂ ಭಗಿನಿ ಉಬ್ಭಮುಖೋ ಭುಞ್ಜಾಮಿ.