ಮಜ್ಝಿಮಪಣ್ಣಾಸಪಾಳಿ

ಕನ್ದರಕಸುತ್ತ

ಪುಚ್ಛಾ – ತೇನಾವುಸೋ ಜಾನತಾ…ಪೇ… ಸಮ್ಮಾಸಮ್ಬುದ್ಧೇನ ಕನ್ದರಕಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಚಮ್ಪಾಯಂ ಭನ್ತೇ ಗಗ್ಗರಾಯ ಪೋಕ್ಖರಣಿಯಾ ತೀರೇ ಪೇಸ್ಸಞ್ಚ ಹತ್ಥಾರೋಹಪುತ್ತಂ ಕನ್ದರಕಞ್ಚ ಪರಿಬ್ಬಾಜಕಂ ಆರಬ್ಭ ಭಾಸಿತಂ, ಕನ್ದರಕೋ ಭನ್ತೇ ಪರಿಬ್ಬಾಜಕೋ ಭಗವತೋ ಚ ಭಿಕ್ಖುಸಙ್ಘಸ್ಸ ಚ ವಣ್ಣಂ ಅಭಾಸಿ, ಪೇಸ್ಸೋ ಚ ಭನ್ತೇ ಹತ್ಥಾರೋಹಪುತ್ತೋ ಭಗವತೋ ಚ ಧಮ್ಮದೇಸನಾಯ ಚ ವಣ್ಣಂ ಅಭಾಸಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಏವಂ ಖೋ ಆವುಸೋ ಕನ್ದರಕೇನ ಪರಿಬ್ಬಾಜಕೇನ ಭಗವತೋ ಚ ಭಿಕ್ಖುಸಙ್ಘಸ್ಸ ಚ ಅಭಿಪ್ಪಸನ್ನೇನ ವಣ್ಣೇ ಭಾಸಿತೇ ಕಥಂ ಭಗವಾ ತಂ ಸಮನುಜಾನಿತ್ವಾ ಧಮ್ಮದೇಸನಾರಮ್ಭಂ ಆರಭಿ, ಕಥಞ್ಚ ಪೇಸ್ಸೋ ಹತ್ಥಾರೋಹಪುತ್ತೋ ಭಗವತೋ ಚ ಧಮ್ಮದೇಸನಾಯ ಚ ವಣ್ಣಂ ಅಭಾಸಿ, ಕಥಞ್ಚ ಪೇಸ್ಸಸ್ಸ ಹತ್ಥಾರೋಹಪುತ್ತಸ್ಸ ಅಜ್ಝಾಸಯಾನುರೂಪಂ ಧಮ್ಮಂ ದೇಸೇಸಿ.

ವಿಸ್ಸಜ್ಜನಾ – ಏವಂ ಖೋ ಭನ್ತೇ ಕನ್ದರಕೇನ ಪರಿಬ್ಬಾಜಕೇನ ಭಗವತೋ ಚ ಭಿಕ್ಖುಸಙ್ಘಸ್ಸ ಚ ಅಭಿಪ್ಪಸನ್ನೇನ ವಣ್ಣೇ ಭಾಸಿತೇ ‘‘ಏವಮೇತಂ ಕನ್ದರಕ ಏವಮೇತಂ ಕನ್ದರಕ’’ ಏವಮಾದಿನಾ ಭಗವಾ ತಂ ಸಮನುಜಾನಿತ್ವಾ ‘‘ಸನ್ತಿ ಹಿ ಕನ್ದರಕ ಭಿಕ್ಖೂ ಇಮಸ್ಮಿಂ ಭಿಕ್ಖುಸಙ್ಘೇ ಅರಹನ್ತೋ ಖೀಣಾಸವಾ ವುಸಿತವನ್ತೋ ಕತಕರಣೀಯಾ ಓಹಿತಭಾರಾ ಅನುಪ್ಪತ್ತಸದತ್ಥಾ ಪರಿಕ್ಖೀಣಭವಸಂಯೋಜನಾ ಸಮ್ಮದಞ್ಞಾ ವಿಮುತ್ತಾ’’ತಿ ಏವಮಾದಿನಾ ಧಮ್ಮದೇಸನಂ ಸಮಾರಭಿ. ಅಥ ಖೋ ಭನ್ತೇ ಪೇಸ್ಸೋ ಹತ್ಥಾರೋಹಪುತ್ತೋ ‘‘ಅಚ್ಛರಿಯಂ ಭನ್ತೇ ಅಬ್ಭುತಂ ಭನ್ತೇ ಯಾವ ಸುಪಞ್ಞತ್ತಾ ಚಿಮೇ ಭನ್ತೇ ಭಗವತಾ ಚತ್ತಾರೋ ಸತಿಪಟ್ಠಾನಾ ಸತ್ತಾನಂ ವಿಸುದ್ಧಿಯಾ ಸೋಕಪರಿದೇವಾನಂ ಸಮತಿಕ್ಕಮಾಯ ದುಕ್ಖದೋಮನಸ್ಸಾನಂ ಅತ್ಥಙ್ಗಮಾಯ ಞಾಯಸ್ಸ ಅಧಿಗಮಾಯ ನಿಬ್ಬಾನಸ್ಸ ಸಚ್ಛಿಕಿರಿಯಾಯಾ’’ತಿ ಏವಮಾದಿನಾ ಭಗವತೋ ಚ ಧಮ್ಮದೇಸನಾಯ ವಣ್ಣಂ ಅಭಾಸಿ, ಭಗವಾಪಿ ಭನ್ತೇ ‘‘ಗಹನಞ್ಹೇತಂ ಪೇಸ್ಸ ಯದಿದಂ ಮನುಸ್ಸಾ, ಉತ್ತಾನಕಞ್ಹೇತಂ ಪೇಸ್ಸ ಯದಿದಂ ಪಸವೋ’’ತಿಆದಿನಾ ಪೇಸ್ಸಸ್ಸ ಹತ್ಥಾರೋಹಪುತ್ತಸ್ಸ ಅಜ್ಝಾಸಯಾನುರೂಪಂ ಧಮ್ಮಕಥಂ ದೇಸೇಸಿ.

ಪುಚ್ಛಾ – ತಂ ಪನಾವುಸೋ ಧಮ್ಮದೇಸನಂ ಸುತ್ವಾ ಪೇಸ್ಸಸ್ಸ ಹತ್ಥಾರೋಹಪುತ್ತಸ್ಸ ಕೀದಿಸೋ ಆನಿಸಂಸೋ ಅಧಿಗತೋ, ಕಥಞ್ಚ ಭಗವಾ ತಂ ಪುಗ್ಗಲಚತುಕ್ಕದೇಸನಂ ಸಂಖಿತ್ತೇನ ಭಾಸಿತಂ, ಭಿಕ್ಖೂನಂ ವಿತ್ಥಾರೇನ ವಿಭಜಿತ್ವಾ ದೇಸೇಸಿ.

ವಿಸ್ಸಜ್ಜನಾ – ತಂ ಖೋ ಪನ ಭನ್ತೇ ಧಮ್ಮಂ ಸುತ್ವಾ ಪೇಸ್ಸಸ್ಸ ಹತ್ಥಾರೋಹಪುತ್ತಸ್ಸ ದ್ವೇ ಆನಿಸಂಸಾ ಅಧಿಗತಾ ಸಙ್ಘೇ ಚ ಪಸಾದೋ ಸತಿಪಟ್ಠಾನಪರಿಗ್ಗಹಣೂಪಾಯೋ ಚ ಅಭಿನವೋ. ಭಗವಾ ಚ ಭನ್ತೇ ತಂ ಪುಗ್ಗಲಚತುಕ್ಕದೇಸನಂ ಭಿಕ್ಖೂಹಿ ಯಾಚಿತೋ ‘‘ಕತಮೋ ಚ ಭಿಕ್ಖವೇ ಪುಗ್ಗಲೋ ಅತ್ತಪರಿತಾಪನಾನುಯೋಗಮನುಯುತ್ತೋ’’ತಿಆದಿನಾ ಸಂಖಿತ್ತೇನ ಭಾಸಿತಂ, ವಿತ್ಥಾರೇನ ಅತ್ಥಂ ಅವಿಭತ್ತಂ. ವಿತ್ಥಾರೇನ ವಿಭಜಿತ್ವಾ ದೇಸೇಸಿ.

ಅಟ್ಠಕನಾಗರಸುತ್ತ

ಪುಚ್ಛಾ – ಅಟ್ಠಕನಾಗರಸುತ್ತಂ ಪನಾವುಸೋ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಭಾಸಿತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ವೇಳುವಗಾಮಕೇ ಗಹಪತಿಂ ಅಟ್ಠಕನಾಗರಂ ಆರಬ್ಭ ಆಯಸ್ಮತಾ ಆನನ್ದತ್ಥೇರೇನ ಧಮ್ಮಭಣ್ಡಾಗಾರಿಕೇನ ಭಾಸಿತಂ. ದಸಮೋ ಭನ್ತೇ ಗಹಪತಿ ಅಟ್ಠಕನಾಗರೋ ಆಯಸ್ಮನ್ತಂ ಆನನ್ದಂ ಉಪಸಙ್ಕಮಿತ್ವಾ ಏತದವೋಚ ‘‘ಅತ್ಥಿ ನು ಖೋ ಭನ್ತೇ ಆನನ್ದ ತೇನ ಭಗವತಾ ಜಾನತಾ ಪಸ್ಸತಾ ಅರಹತಾ ಸಮ್ಮಾಸಮ್ಬುದ್ಧೇನ ಏಕಧಮ್ಮೋ ಅಕ್ಖಾತೋ, ಯತ್ಥ ಭಿಕ್ಖುನೋ ಅಪ್ಪಮತ್ತಸ್ಸ ಆತಾಪಿನೋ ಪಹಿತತ್ತಸ್ಸ ವಿಹರತೋ ಅವಿಮುತ್ತಞ್ಚೇವ ಚಿತ್ತಂ ವಿಮುಚ್ಚತಿ, ಅಪರಿಕ್ಖಿಣಾ ಚ ಆಸವಾ ಪರಿಕ್ಖಯಂ ಗಚ್ಛನ್ತಿ, ಅನನುಪ್ಪತ್ತಞ್ಚ ಅನುತ್ತರಂ ಯೋಗಕ್ಖೇಮಂ ಅನುಪಾಪುಣಾತೀ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಸೇಖಸುತ್ತ

ಪುಚ್ಛಾ – ಸೇಖಸುತ್ತಂ ಪನಾವುಸೋ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಭಾಸಿತಂ.

ವಿಸ್ಸಜ್ಜನಾ – ಸಕ್ಕೇಸು ಭನ್ತೇ ಕಪಿಲವತ್ಥುಸ್ಮಿಂ ಸನ್ಥಾಗಾರೇ ಆಯಸ್ಮತಾ ಆನನ್ದತ್ಥೇರೇನ ಧಮ್ಮಭಣ್ಡಾಗಾರಿಕೇನ ಕಾಪಿಲವತ್ಥವೇ ಸಕ್ಯೇ ಆರಬ್ಭ ಭಾಸಿತಂ. ಭಗವಾ ಭನ್ತೇ ಕಾಪಿಲವತ್ಥವೇ ಸಕ್ಯೇ ಬಹುದೇವರತ್ತಿಂ ಧಮ್ಮಿಯಾ ಕಥಾಯ ಸನ್ದಸ್ಸೇತ್ವಾ ಸಮಾದಪೇತ್ವಾ ಸಮುತ್ತೇಜೇತ್ವಾ ಸಮ್ಪಹಂಸೇತ್ವಾ ಆಯಸ್ಮನ್ತಂ ಆನನ್ದಂ ಆಮನ್ತೇಸಿ ‘‘ಪಟಿಭಾತು ತಂ ಆನನ್ದ ಕಾಪಿಲವತ್ಥವಾನಂ ಸಕ್ಯಾನಂ ಸೇಖೋ ಪಾಟಿಪದೋ, ಪಿಟ್ಠಿ ಮೇ ಆಗಿಲಾಯತಿ, ತಮಹಂ ಆಯಮಿಸ್ಸಾಮೀ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪೋತಲಿಯಸುತ್ತ

ಪುಚ್ಛಾ – ಪೋತಲಿಯಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಅಙ್ಗುತ್ತರಾಪೇಸು ಭನ್ತೇ ಆಪಣೇ ನಾಮ ಅಙ್ಗುತ್ತರಾಪಾನಂ ನಿಗಮೇ ಪೋತಲಿಯಂ ಗಹಪತಿಂ ಪಟಿಕ್ಖಿತ್ತಸಬ್ಬಕಮ್ಮನ್ತಂ ಆರಬ್ಭ ಭಾಸಿತಂ. ಪೋತಲಿಯೋ ಭನ್ತೇ ಗಹಪತಿ ಪಟಿಕ್ಖಿತ್ತಸಬ್ಬಕಮ್ಮನ್ತೋ ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮನ್ತೋ ಭಗವತಾ ಗಹಪತಿವಾದೇನ ಸಮುದಾಚರಿಯಮಾನೋ ಕುಪಿತೋ ಅನತ್ತಮನೋ ಭಗವನ್ತಂ ಏತದವೋಚ ‘‘ತಯಿದಂ ಭೋ ಗೋತಮ ನಚ್ಛನ್ನಂ ತಯಿದಂ ನಪ್ಪತಿರೂಪಂ, ಯಂ ಮಂ ತ್ವಂ ಗಹಪತಿವಾದೇನ ಸಮುದಾಚರಸೀ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಕಥಞ್ಚಾವುಸೋ ಭಗವಾ ಕಾಮಾನಂ ಆದೀನವಂ ವಿತ್ಥಾರೇನ ಪಕಾಸೇತ್ವಾ ಅರಿಯಸ್ಸ ವಿನಯೇ ವೋಹಾರಸಮುಚ್ಛೇದಂ ದಸ್ಸೇಸಿ.

ವಿಸ್ಸಜ್ಜನಾ – ಅಥ ಭನ್ತೇ ಭಗವಾ ಅರಿಯಸ್ಸ ವಿನಯೇ ವೋಹಾರಸಮುಚ್ಛೇದಾಯ ಅಟ್ಠ ಧಮ್ಮೇ ವಿಭಜಿತ್ವಾ ‘‘ಸೇಯ್ಯಥಾಪಿ ಗಹಪತಿ ಕುಕ್ಕುರೋ ಜಿಘಚ್ಛಾದುಬ್ಬಲ್ಯಪರೇತೋ ಗೋಘಾತಕಸೂನಂ ಪಚ್ಚುಪಟ್ಠಿತೋ ಅಸ್ಸ’’ ಏವಮಾದಿನಾ ಕಾಮೇಸು ಆದೀನವಂ ದಸ್ಸೇತ್ವಾ ಪರಿಯೋಸಾನೇ ತೀಹಿ ವಿಜ್ಜಾಹಿ ಅರಿಯಸ್ಸ ವಿನಯೇ ವೋಹಾರಸಮುಚ್ಛೇದಂ ಸಬ್ಬೇನಸಬ್ಬಂ ಸಬ್ಬಥಾಸಬ್ಬಂ ವೋಹಾರಸಮುಚ್ಛೇದಂ ವಿತ್ಥಾರೇನ ವಿಭಜಿತ್ವಾ ದೇಸೇಸಿ.

ಜೀವಕಸುತ್ತ

ಪುಚ್ಛಾ – ತೇನಾವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಜೀವಕಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಜೀವಕಂ ಕೋಮಾರಭಚ್ಚಂ ಆರಬ್ಭ ಭಾಸಿತಂ. ಜೀವಕೋ ಭನ್ತೇ ಕೋಮಾರಭಚ್ಚೋ ಭಗವನ್ತಂ ಉಪಸಙ್ಕಮಿತ್ವಾ ಏತದವೋಚ ‘‘ಸುತಂ ಮೇತಂ ಭನ್ತೇ ಸಮಣಂ ಗೋತಮಂ ಉದ್ದಿಸ್ಸ ಪಾಣಂ ಆರಭನ್ತಿ, ತಂ ಸಮಣೋ ಗೋತಮೋ ಜಾನಂ ಉದ್ದಿಸ್ಸ ಕತಂ ಮಂಸಂ ಪರಿಭುಞ್ಜತಿ ಪಟಿಚ್ಚ ಕಮ್ಮನ್ತಿ. ಯೇ ತೇ ಭನ್ತೇ ಏವಮಾಹಂಸು ‘ಸಮಣಂ ಗೋತಮಂ ಉದ್ದಿಸ್ಸ ಪಾಣಂ ಆರಭನ್ತಿ, ತಂ ಸಮಣೋ ಗೋತಮೋ ಜಾನಂ ಉದ್ದಿಸ್ಸ ಕತಂ ಮಂಸಂ ಪರಿಭುಞ್ಜತಿ ಪಟಿಚ್ಚ ಕಮ್ಮ’ನ್ತಿ, ಕಚ್ಚಿ ತೇ ಭನ್ತೇ ಭಗವತೋ ವುತ್ತವಾದಿನೋ ನ ಚ ಭಗವನ್ತಂ ಅಭೂತೇನ ಅಬ್ಭಾಚಿಕ್ಖನ್ತಿ, ಧಮ್ಮಸ್ಸ ಚಾನುಧಮ್ಮಂ ಬ್ಯಾಕರೋನ್ತಿ, ನ ಚ ಕೋಚಿ ಸಹಧಮ್ಮಿಕೋ ವಾದಾನುವಾದೋ ಗಾರಯ್ಹಂ ಠಾನಂ ಆಗಚ್ಛತೀ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಉಪಾಲಿಸುತ್ತ

ಪುಚ್ಛಾ – ಉಪಾಲಿಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ನಾಳನ್ದಾಯಂ ಭನ್ತೇ ಉಪಾಲಿಂ ಗಹಪತಿಂ ಆರಬ್ಭ ಭಾಸಿತಂ. ಉಪಾಲಿ ಭನ್ತೇ ಗಹಪತಿ ಭಗವನ್ತಂ ಉಪಸಙ್ಕಮಿತ್ವಾ ಏತದವೋಚ ‘‘ಆಗಮಾ ನುಖ್ವಿಧ ಭನ್ತೇ ದೀಘತಪಸ್ಸೀ ನಿಗಣ್ಠೋ’’ತಿ, ಏವಮಾದಿನಾ ಚ ಭನ್ತೇ ಉಪಾಲಿ ಗಹಪತಿ ಭಗವತೋ ಪಟಿಸನ್ಧಾರಂ ಕತ್ವಾ ಅತ್ತನೋ ಆಚರಿಯಸ್ಸ ನಿಗಣ್ಠಸ್ಸ ನಾಟಪುತ್ತಸ್ಸ ವಾದಂ ಪಕಾಸೇಸಿ, ವಾದಂ ವಣ್ಣೇಸಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಅಥ ಖೋ ಆವುಸೋ ಭಗವಾ ಉಪಾಲಿಂ ಗಹಪತಿಂ ತಸ್ಮಿಂ ವಾದೇ ಕಥಂ ಸಮನುಯುಞ್ಜೀ ಸಮನುಗಾಹೀ ಸಮನುಭಾಸೀ, ಕಥಞ್ಚಸ್ಸ ಉಪಾಯಂ ದಸ್ಸೇತ್ವಾ ಯಥಾಭೂತಂ ಅತ್ಥಂ ಞಾಪೇಸಿ.

ವಿಸ್ಸಜ್ಜನಾ – ಅಥ ಖೋ ಭನ್ತೇ ಭಗವಾ ಉಪಾಲಿಂ ಗಹಪತಿಂ ‘‘ಸಚೇ ಖೋ ತ್ವಂ ಗಹಪತಿ ಸಚ್ಚೇ ಪತಿಟ್ಠಾಯ ಮನ್ತೇಯ್ಯಾಸಿ, ಸಿಯಾ ನೋ ಏತ್ಥ ಕಥಾಸಲ್ಲಾಪೋ’’ತಿ ಉಪಾಲಿಂ ಗಹಪತಿಂ ಕಥಂ ಸಮುಟ್ಠಾಪೇತ್ವಾ ‘‘ತಂ ಕಿಂಮಞ್ಞಸಿ ಗಹಪತಿ, ಇಧಸ್ಸ ನಿಗಣ್ಠೋ ಆಬಾಧಿಕೋ ದುಕ್ಖಿತೋ ಬಾಞ್ಹಗಿಲಾನೋ ಸೀತೋದಕಪರಿಕ್ಖಿತ್ತೋ ಉಣ್ಹೋದಕಪಟಿಸೇವೀ, ಸೋ ಸೀತೋದಕಂ ಅಲಭಮಾನೋ ಕಾಲಙ್ಕರೇಯ್ಯಾ’’ತಿ ಏವಮಾದಿನಾ ಭನ್ತೇ ಭಗವಾ ಚತ್ತಾರೋ ಉಪಾಯೇ ದಸ್ಸೇತ್ವಾ ಉಪಾಲಿಂ ಗಹಪತಿಂ ಯಥಾಭೂತಮತ್ಥಂ ಞಾಪೇಸಿ.

ಪುಚ್ಛಾ – ಏವಂ ಖೋ ಆವುಸೋ ಉಪಾಲಿ ಗಹಪತಿ ಭಗವತಾ ಸಞ್ಞಾಪಿತೋ ಇಮಸ್ಮಿಂ ಧಮ್ಮವಿನಯೇ ಪಸನ್ನೋ ಕೀದಿಸಂ ಪಸನ್ನಾಕಾರಂ ಅಕಾಸಿ, ಕಥಞ್ಚ ಭಗವಾ ತಂ ಪುನ ಅನುಸಾಸಿತ್ವಾ ಉತ್ತರಿ ವಿನೇಸಿ.

ವಿಸ್ಸಜ್ಜನಾ – ‘‘ಪುರಿಮೇನೇವಾಹಂ ಭನ್ತೇ ಓಪಮ್ಮೇನ ಭಗವತೋ ಅತ್ತಮನೋ ಅಭಿರದ್ಧೋ, ಅಪಿಚಾಹಂ ಇಮಾನಿ ಭಗವತೋ ವಿಚಿತ್ರಾನಿ ಪಞ್ಹಪಟಿಭಾನಾನಿ ಸೋತುಕಾಮೋ, ಏವಾಹಂ ಭಗವನ್ತಂ ಪಚ್ಚನೀಕಂ ಕಾತಬ್ಬಂ ಅಮಞ್ಞಿಸ್ಸ’’ನ್ತಿ, ಏವಮಾದಿನಾ ಭನ್ತೇ ಉಪಾಲಿ ಗಹಪತಿ ಭಗವತಾ ವಿಞ್ಞಾಪಿತೋ ಇಮಸ್ಮಿಂ ಧಮ್ಮವಿನಯೇ ಪಸನ್ನೋ ಪಸನ್ನಾಕಾರಂ ಅಕಾಸಿ. ತತ್ಥ ಭಗವಾ ಚ ಭನ್ತೇ ‘‘ಅನುವಿಚ್ಚಕಾರಂ ಖೋ ಗಹಪತಿ ಕರೋಹಿ, ಅನುವಿಚ್ಚಕಾರೋ ತುಮ್ಹಾದಿಸಾನಂ ಞಾತಮನುಸ್ಸಾನಂ ಸಾಧು ಹೋತೀ’’ತಿ ಏವಮಾದಿನಾ ಪುನ ಅನುಸಾಸಿತ್ವಾ ಉತ್ತರಿ ಯಾವ ಧಮ್ಮಚಕ್ಖುಪಟಿಲಾಭಾ ವಿನೇಸಿ.

ಪುಚ್ಛಾ – ಕಥಞ್ಚಾವುಸೋ ನಿಗಣ್ಠಸ್ಸ ನಾಟಪುತ್ತಸ್ಸ ಉಪಾಲಿಸ್ಸ ಗಹಪತಿಸ್ಸ ನಿವೇಸನಂ ಗನ್ತ್ವಾ ಆವೀಮಂಸನಾ ಚ ಉಪಾಲಿಸ್ಸ ಗಹಪತಿಸ್ಸ ಪಚ್ಚುತ್ತರಾ ಕಥಾ ಚ ಅಹೋಸಿ.

ವಿಸ್ಸಜ್ಜನಾ – ‘‘ಉಮ್ಮತ್ತೋಸಿ ತ್ವಂ ಗಹಪತಿ ದತ್ತೋಸಿ ತ್ವಂ ಗಹಪತೀ’’ತಿ ಏವಮಾದಿನಾ ಭನ್ತೇ ನಿಗಣ್ಠಸ್ಸ ನಾಟಪುತ್ತಸ್ಸ ಉಪಾಲಿಸ್ಸ ಗಹಪತಿಸ್ಸ ನಿವೇಸನಂ ಗನ್ತ್ವಾ ವೀಮಂಸಾ ಚ ‘‘ಭದ್ದಿಕಾ ಭನ್ತೇ ಆವಟ್ಟನೀಮಾಯಾ ಕಲ್ಯಾಣೀ ಭನ್ತೇ ಆವಟ್ಟನೀಮಾಯಾತಿ’’ ಏವಮಾದಿನಾ ಉಪಾಲಿಸ್ಸ ಗಹಪತಿಸ್ಸ ಪಚ್ಚುತ್ತರಕಥಾ ಚ ಅಹೋಸಿ.

ಧೀರಸ್ಸ ವಿಗತಮೋಹಸ್ಸ,

ಪಭಿನ್ನಖೀಲಸ್ಸ ವಿಜಿತವಿಜಯಸ್ಸ;

ಅನೀಘಸ್ಸ ಸುಸಮಚಿತ್ತಸ್ಸ,

ವುದ್ಧಸೀಲಸ್ಸ ಸಾಧುಪಞ್ಞಸ್ಸ;

ವೇಸಮನ್ತರಸ್ಸ ವಿಮಲಸ್ಸ,

ಭಗವತೋ ತಸ್ಸ ಸಾವಕೋಹಮಸ್ಮಿಂ.

ಅಕಥಂ ಕಥಿಸ್ಸ ತುಸಿತಸ್ಸ,

ವನ್ತಲೋಕಾಮಿಸಸ್ಸ ಮುದಿತಸ್ಸ;

ಕತಸಮಣಸ್ಸ ಮನುಜಸ್ಸ,

ಅನ್ತಿಮಸಾರೀರಸ್ಸ ನರಸ್ಸ.

ಅನೋಪಮಸ್ಸ ವಿರಜಸ್ಸ,

ಭಗವತೋ ತಸ್ಸ ಸಾವಕೋ ಹಮಸ್ಮಿ –

ತಣ್ಹಚ್ಛಿದಸ್ಸ ಬುದ್ಧಸ್ಸ,

ವೀತಧೂಮಸ್ಸ ಅನುಪಲಿತ್ತಸ್ಸ.

ಆಹುನೇಯ್ಯಸ್ಸ ಯಕ್ಖಸ್ಸ,

ಉತ್ತಮಪುಗ್ಗಲಸ್ಸ ಅತುಲಸ್ಸ;

ಮಹತೋ ಯಸಗ್ಗಪತ್ತಸ್ಸ,

ಭಗವತೋ ತಸ್ಸ ಸಾವಕೋ ಹಮಸ್ಮಿ –

ಕುಕ್ಕುರವತಿಕಸುತ್ತ

ಪುಚ್ಛಾ – ಕುಕ್ಕುರವತಿಕಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಕೋಲಿಯೇಸು ಭನ್ತೇ ಹಲಿದ್ದವಸನೇ ನಾಮ ಕೋಲಿಯಾನಂ ನಿಗಮೇ ಪುಣ್ಣಞ್ಚ ಕೋಲಿಯಪುತ್ತಂ ಗೋವತಿಕಂ ಅಚೇಲಞ್ಚ ಸೇನಿಯಂ ಕುಕ್ಕುರವತಿಕಂ ಆರಬ್ಭ ಭಾಸಿತಂ. ಪುಣ್ಣೋ ಭನ್ತೇ ಕೋಲಿಯ ಪುತ್ತೋ ಗೋವತಿಕೋ ಭಗವನ್ತಂ ಏತದವೋಚ ‘‘ಅಯಂ ಭನ್ತೇ ಅಚೇಲೋ ಸೇನಿಯೋ ಕುಕ್ಕುರವತಿಕೋ ದುಕ್ಕರಕಾರಕೋ ಛಮಾನಿಕ್ಖಿತ್ತಂ ಭೋಜನಂ ಭುಞ್ಜತಿ, ತಸ್ಸ ತಂ ಕುಕ್ಕುರವತಂ ದೀಘರತ್ತಂ ಸಮತ್ತಂ ಸಮಾದಿನ್ನಂ, ತಸ್ಸ ಕಾ ಗತಿ, ಕೋ ಅಭಿಸಮ್ಪರಾಯೋ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಅಭಯರಾಜಕುಮಾರಸುತ್ತ

ಪುಚ್ಛಾ – ತೇನಾವುಸೋ ಜಾನತಾ…ಪೇ… ಸಮ್ಮಾಸಮ್ಬುದ್ಧೇನ ಅಭಯರಾಜಕುಮಾರಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ರಾಜಗಹೇ ಮೇ ಭನ್ತೇ ಅಭಯಂ ರಾಜಕುಮಾರಂ ಆರಬ್ಭ ಭಾಸಿತಂ. ಅಭಯೋ ಭನ್ತೇ ರಾಜಕುಮಾರೋ ಭಗವನ್ತಂ ಉಪಸಙ್ಕಮಿತ್ವಾ ಏತದವೋಚ ‘‘ಭಾಸೇಯ್ಯ ನು ಖೋ ಭನ್ತೇ ತಥಾಗತೋ ತಂ ವಾಚಂ, ಯಾ ಸಾ ವಾಚಾ ಪರೇಸಂ ಅಪ್ಪಿಯಾ ಅಮನಾಪಾ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಬಹುವೇದನೀಯಸುತ್ತ

ಪುಚ್ಛಾ – ಬಹುವೇದನೀಯಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಞ್ಚ ಉದಾಯಿಂ ಪಞ್ಚಕಙ್ಗಞ್ಚ ಥಪತಿಂ ಆರಬ್ಭ ಭಾಸಿತಂ, ಪಞ್ಚಕಙ್ಗೋ ಭನ್ತೇ ಥಪತಿ ಆಯಸ್ಮನ್ತಂ ಉದಾಯಿಂ ಉಪಸಙ್ಕಮಿತ್ವಾ ವೇದನಂ ಪುಚ್ಛಿ, ಆಯಸ್ಮಾ ಭನ್ತೇ ಉದಾಯೀ ಪಞ್ಚಕಙ್ಗಂ ಥಪತಿಂ ಏತದವೋಚ ‘‘ತಿಸ್ಸೋ ಖೋ ಥಪತಿ ವೇದನಾ ವುತ್ತಾ ಭಗವತಾ ಸುಖಾ ವೇದನಾ ದುಕ್ಖಾ ವೇದನಾ ಅದುಕ್ಖಮಸುಖಾ ವೇದನಾ’’ತಿ. ಏವಂ ವುತ್ತೇ ಭನ್ತೇ ಪಞ್ಚಕಙ್ಗೋ ಥಪತಿ ಆಯಸ್ಮನ್ತಂ ಉದಾಯಿಂ ಏತದವೋಚ ‘‘ನ ಖೋ ಭನ್ತೇ ಉದಾಯಿ ತಿಸ್ಸೋ ವೇದನಾ ವುತ್ತಾ ಭಗವತಾ, ದ್ವೇ ವೇದನಾ ವುತ್ತಾ ಭಗವತಾ ಸುಖಾ ವೇದನಾ ದುಕ್ಖಾ ವೇದನಾ, ಯಾಯಂ ಭನ್ತೇ ಅದುಕ್ಖಮಸುಖಾ ವೇದನಾ, ಸನ್ತಸ್ಮಿಂ ಏಸಾ ಪಣೀತೇ ಸುಖೇ ವುತ್ತಾ ಭಗವತಾ’’ತಿ. ನೇವ ಅಸಕ್ಖಿ ಖೋ ಭನ್ತೇ ಆಯಸ್ಮಾ ಉದಾಯೀ ಪಞ್ಚಕಙ್ಗಂ ಥಪತಿಂ ಸಞ್ಞಾಪೇತುಂ, ನ ಪನ ಅಸಕ್ಖಿ ಪಞ್ಚಕಙ್ಗೋ ಥಪತಿ ಆಯಸ್ಮನ್ತಂ ಉದಾಯಿಂ ಸಞ್ಞಾಪೇತುಂ. ಅಸ್ಸೋಸಿ ಖೋ ಆಯಸ್ಮಾ ಆನನ್ದೋ ಆಯಸ್ಮತೋ ಉದಾಯಿಸ್ಸ ಪಞ್ಚಕಙ್ಗೇನ ಥಪತಿನಾ ಸದ್ಧಿಂ ಇಮಂ ಕಥಾಸಲ್ಲಾಪಂ, ಅಥ ಖೋ ಭನ್ತೇ ಆಯಸ್ಮಾ ಆನನ್ದೋ ಯಾವತಕೋ ಅಹೋಸಿ ಆಯಸ್ಮತೋ ಉದಾಯಿಸ್ಸ ಪಞ್ಚಕಙ್ಗೇನ ಥಪತಿನಾ ಸದ್ಧಿಂ ಕಥಾಸಲ್ಲಾಪೋ, ತಂ ಸಬ್ಬಂ ಭಗವತೋ ಆರೋಚೇಸಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಅಪಣ್ಣಕಸುತ್ತ

ಪುಚ್ಛಾ – ಅಪಣ್ಣಕಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಕೋಸಲೇಸು ಭನ್ತೇ ಸಾಲಾಯಂ ನಾಮ ಕೋಸಲಾನಂ ಬ್ರಾಹ್ಮಣಗಾಮೇ ಸಾಲೇಯ್ಯಕೇ ಬ್ರಾಹ್ಮಣಗಹಪತಿಕೇ ಆರಬ್ಭ ಭಾಸಿತಂ. ಸಮ್ಬಹುಲಾ ಭನ್ತೇ ಅಞ್ಞತಿತ್ಥಿಯಾ ಸಾಲೇಯ್ಯಕಾನಂ ಬ್ರಾಹ್ಮಣಗಹಪತಿಕಾನಂ ಅತ್ತನೋ ಅತ್ತನೋ ಮಿಚ್ಛಾದಿಟ್ಠಿಯೋ ಪಟಿಗ್ಗಣ್ಹಾಪೇಸುಂ ಉಗ್ಗಣ್ಹಾಪೇಸುಂ. ತೇ ಪನ ಭನ್ತೇ ಸಾಲೇಯ್ಯಕಾ ಬ್ರಾಹ್ಮಣಗಹಪತಿಕಾ ಏಕದಿಟ್ಠಿಯಮ್ಪಿ ಪತಿಟ್ಠಾತುಂ ನ ಸಕ್ಖಿಂಸು. ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ತತ್ರ ಆವುಸೋ ಭಗವತಾ ಪಠಮಂ ಮಿಚ್ಛಾವಾದೋ ಚ ಸಮ್ಮಾವಾದೋ ಚ ಕಥಂ ವಿಭಜಿತ್ವಾ ಪಕಾಸಿತೋ.

ವಿಸ್ಸಜ್ಜನಾ – ತತ್ರ ಭನ್ತೇ ಭಗವತಾ ‘‘ಸನ್ತಿ ಗಹಪತಯೋ ಏಕೇ ಸಮಣಬ್ರಾಹ್ಮಣಾ ಏವಂವಾದಿನೋ ಏವಂದಿಟ್ಠಿನೋ ನತ್ಥಿ ದಿನ್ನಂ ನತ್ಥಿ ಯಿಟ್ಠಂ ನತ್ಥಿ ಹುತಂ ನತ್ಥಿ ಸುಕತದುಕ್ಕಟಾನಂ ಕಮ್ಮಾನಂ ಫಲಂ ವಿಪಾಕೋ’’ತಿ ಏವಮಾದಿನಾ ಪಠಮಂ ಮಿಚ್ಛಾವಾದೋ ಚ ಸಮ್ಮಾವಾದೋ ಚ ವಿಭಜಿತ್ವಾ ಪಕಾಸಿತೋ.

ಪುಚ್ಛಾ – ತತ್ಥ ಆವುಸೋ ಭಗವತಾ ಮಿಚ್ಛಾವಾದೀನಞ್ಚ ದೋಸೋ ಸಮ್ಮಾವಾದೀನಞ್ಚ ಗುಣೋ ಕಥಂ ವಿಚಾರೇತ್ವಾ ಪಕಾಸಿತೋ.

ವಿಸ್ಸಜ್ಜನಾ – ತತ್ಥ ಭನ್ತೇ ಭಗವತಾ ‘‘ತತ್ರ ಗಹಪತಯೋ ಯೇತೇ ಸಮಣಬ್ರಾಹ್ಮಣಾ ಏವಂವಾದಿನೋ ಏವಂದಿಟ್ಠಿನೋ ನತ್ಥಿ ದಿನ್ನಂ ನತ್ಥಿ ಯಿಟ್ಠಂ ನತ್ಥಿ ಹುತಂ ನತ್ಥಿ ಸುಕತದುಕ್ಕಟಾನಂ ಕಮ್ಮಾನಂ ಫಲಂ ವಿಪಾಕೋ’’ತಿ ಏವಮಾದಿನಾ ಭನ್ತೇ ಮಿಚ್ಛಾವಾದೀನಞ್ಚ ದೋಸೋ ಸಮ್ಮಾವಾದೀನಞ್ಚ ಗುಣೋ ಭಗವತಾ ವಿಚಾರೇತ್ವಾ ಪಕಾಸಿತೋ.

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ವಿಞ್ಞುನೋ ಪುರಿಸಪುಗ್ಗಲಸ್ಸ ಪಟಿಸಞ್ಚಿಕ್ಖಣಾ ಪಕಾಸಿತಾ.

ವಿಸ್ಸಜ್ಜನಾ – ತತ್ರ ಗಹಪತಯೋ ವಿಞ್ಞೂ ಪುರಿಸೋ ಇತಿ ಪಟಿಸಞ್ಚಿಕ್ಖತೀತಿ ಏವಮಾದಿನಾ ಭನ್ತೇ ತತ್ಥ ಭಗವತಾ ವಿಞ್ಞುನೋ ಪುರಿಸಪುಗ್ಗಲಸ್ಸ ಪಟಿಸಞ್ಚಿಕ್ಖಣಾ ಪಕಾಸಿತಾ.

ಪುಚ್ಛಾ – ಕಥಞ್ಚಾವುಸೋ ಭಗವತಾ ಅಞ್ಞೇಸುಪಿ ಮಿಚ್ಛಾವಾದಸಮ್ಮಾವಾದೇಸು ಅಪಣ್ಣಕಪಟಿಪದಾ ವಿಚಾರೇತ್ವಾ ಪಕಾಸಿತಾ, ತಂ ಸಙ್ಖೇಪತೋ ಕಥೇಸಿ.

ವಿಸ್ಸಜ್ಜನಾ – ಯಥೇವ ಭನ್ತೇ ಪಠಮೇ ವಾದೇ, ಏವಮೇವ ಖೋ ಭನ್ತೇ ಅಕಿರಿಯವಾದಾದೀಸು ಚತೂಸು ಚ ಮಿಚ್ಛಾವಾದೇಸು ದೋಸಂ ಕಿರಿಯವಾದಾದೀಸು ಚ ಚತೂಸು ಸಮ್ಮಾವಾದೇಸು ಗುಣಂ, ತತ್ಥ ಚ ವಿಞ್ಞುನೋ ಪುರಿಸಸ್ಸ ಪಟಿಸಞ್ಚಿಕ್ಖಣಾಕಾರಂ ದಸ್ಸೇತ್ವಾ ಭಗವತಾ ಅಪಣ್ಣಕಪಟಿಪದಾ ಪಕಾಸಿತಾ.

ಅಮ್ಬಲಟ್ಠಿಕರಾಹುಲೋವಾದಸುತ್ತ

ಪುಚ್ಛಾ – ಅಮ್ಬಲಟ್ಠಿಕರಾಹುಲೋವಾದಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಭಾಸಿತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಆಯಸ್ಮನ್ತಂ ರಾಹುಲಂ ಆರಬ್ಭ ಭಾಸಿತಂ.

ಮಹಾರಾಹುಲೋವಾದಸುತ್ತ

ಪುಚ್ಛಾ – ಮಹಾರಾಹುಲೋವಾದಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ರಾಹುಲಂ ಆರಬ್ಭ ಭಾಸಿತಂ. ಆಯಸ್ಮಾ ಭನ್ತೇ ರಾಹುಲೋ ಭಗವತೋ ಚೇವ ಅತ್ತನೋ ಚ ಅತ್ತಭಾವಸಮ್ಪತ್ತಿಂ ನಿಸ್ಸಾಯ ಗೇಹಸ್ಸಿತಂ ಛನ್ದರಾಗಂ ಉಪ್ಪಾದೇಸಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಚೂಳಮಾಲುಕ್ಯಸುತ್ತ

ಪುಚ್ಛಾ – ಚೂಳಮಾಲುಕ್ಯಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಮಾಲುಕ್ಯಪುತ್ತಂ ಆರಬ್ಭ ಭಾಸಿತಂ. ಆಯಸ್ಮಾ ಭನ್ತೇ ಮಾಲುಕ್ಯಪುತ್ತೋ ಅತ್ತನೋ ಪವಿವಿತ್ತಸ್ಸ ರಹೋಗತಸ್ಸ ಪಟಿಸಲ್ಲೀನಸ್ಸ ಚೇತಸೋ ಪರಿವಿತಕ್ಕಂ ಭಗವತೋ ಆರೋಚೇಸಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಮಹಾಮಾಲುಕ್ಯಸುತ್ತ

ಪುಚ್ಛಾ – ಮಹಾಮಾಲುಕ್ಯಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ತಸ್ಮಿಂಯೇವ ಭನ್ತೇ ಸಾವತ್ಥಿಯಂ ಆಯಸ್ಮನ್ತಂ ಮಹಾಮಾಲುಕ್ಯಪುತ್ತಂ ಆರಬ್ಭ ಭಾಸಿತಂ.

ಭದ್ದಾಲಿಸುತ್ತ

ಪುಚ್ಛಾ – ತೇನಾವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಭದ್ದಾಲಿಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಭದ್ದಾಲಿಂ ಆರಬ್ಭ ಭಾಸಿತಂ. ಆಯಸ್ಮಾ ಭನ್ತೇ ಭದ್ದಾಲಿ ಭಗವತಾ ಸಿಕ್ಖಾಪದೇ ಪಞ್ಞಾಪಿಯಮಾನೇ ಭಿಕ್ಖುಸಙ್ಘೇ ಸಿಕ್ಖಂ ಸಮಾದಿಯಮಾನೇ ಅನುಸ್ಸಾಹಂ ಪವೇದೇಸಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಅಚ್ಚಯೋ ಮಂ ಭನ್ತೇ ಅಚ್ಚಗಮಾ ಯಥಾಬಾಲಂ ಯಥಾಮೂಳ್ಹಂ ಯಥಾಅಕುಸಲಂ, ಯೋಹಂ ಭಗವತಾ ಸಿಕ್ಖಾಪದೇ ಪಞ್ಞಾಪಿಯಮಾನೇ ಭಿಕ್ಖುಸಙ್ಘೇ ಸಿಕ್ಖಂ ಸಮಾದಿಯಮಾನೇ ಅನುಸ್ಸಾಹಂ ಪವೇದೇಸಿಂ, ತಸ್ಸ ಮೇ ಭನ್ತೇ ಭಗವಾ ಅಚ್ಚಯಂ ಅಚ್ಚಯತೋ ಪಟಿಗ್ಗಣ್ಹಾತು ಆಯತಿಂ ಸಂವರಾಯ –

ಪುಚ್ಛಾ – ಅಥ ಖೋ ಆವುಸೋ ಆಯಸ್ಮಾ ಭದ್ದಾಲಿ ಭಗವನ್ತಂ ಕೀದಿಸಂ ಪಞ್ಹಂ ಪುಚ್ಛಿ, ಕಥಞ್ಚಸ್ಸ ಭಗವಾ ತಂ ವಿಭಜಿತ್ವಾ ಬ್ಯಾಕಾಸಿ.

ವಿಸ್ಸಜ್ಜನಾ – ಅಥ ಖೋ ಭನ್ತೇ ಆಯಸ್ಮಾ ಭದ್ದಾಲಿ ‘‘ಕೋ ನು ಖೋ ಭನ್ತೇ ಹೇತು, ಕೋ ಪಚ್ಚಯೋ, ಯೇನ ಮಿಧೇಕಚ್ಚಂ ಭಿಕ್ಖುಂ ಪಸಯು ಪಸಯು ಕಾರಣಂ ಕರೋನ್ತೀ’’ತಿ ಏವಮಾದಿನಾ ಭಗವನ್ತಂ ಪಞ್ಹಂ ಅಪುಚ್ಛಿ. ಭಗವಾ ಚ ಭನ್ತೇ ‘‘ಇಧ ಭದ್ದಾಲಿ ಏಕಚ್ಚೋ ಭಿಕ್ಖು ಅಭಿಣ್ಹಾಪತ್ತಿಕೋ ಹೋತಿ, ಆಪತ್ತಿಬಹುಲೋ’’ ಏವಮಾದಿನಾ ಆಯಸ್ಮತೋ ಭದ್ದಾಲಿಸ್ಸ ವಿಭಜಿತ್ವಾ ಬ್ಯಾಕಾಸಿ.

ಪುಚ್ಛಾ – ತದಾಪಿ ಖೋ ಆವುಸೋ ಆಯಸ್ಮಾ ಭದ್ದಾಲಿ ಪುನಪಿ ಭಗವನ್ತಂ ಕೀದಿಸಂ ಪಞ್ಹಂ ಪುಚ್ಛಿ, ಕಥಞ್ಚಸ್ಸ ಭಗವಾ ತಮ್ಪಿ ವಿಭಜಿತ್ವಾ ಬ್ಯಾಕಾಸಿ.

ವಿಸ್ಸಜ್ಜನಾ – ತದಾಪಿ ಭನ್ತೇ ಆಯಸ್ಮಾ ಭದ್ದಾಲಿ ‘‘ಕೋ ನು ಖೋ ಭನ್ತೇ ಹೇತು, ಕೋ ಪಚ್ಚಯೋ, ಯೇನ ಪುಬ್ಬೇ ಅಪ್ಪತರಾನಿ ಚೇವ ಸಿಕ್ಖಾಪದಾನಿ ಅಹೇಸುಂ, ಬಹುತರಾ ಚ ಭಿಕ್ಖೂ ಅಞ್ಞಾಯ ಸಣ್ಡಹಿಂಸು. ಕೋ ಪನ ಭನ್ತೇ ಹೇತು, ಕೋ ಪಚ್ಚಯೋ ಯೇನ ಏತರಹಿ ಬಹುತರಾನಿ ಚೇವ ಸಿಕ್ಖಾಪದಾನಿ ಹೋನ್ತಿ ಅಪ್ಪತರಾ ಚ ಭಿಕ್ಖೂ ಅಞ್ಞಾಯ ಸಣ್ಡಹನ್ತೀ’’ತಿ ಭಗವನ್ತಂ ಪುನಪಿ ಪಞ್ಹಂ ಅಪುಚ್ಛಿ. ಭಗವಾ ಚ ಭನ್ತೇ ‘‘ಏವಮೇತಂ ಭದ್ದಾಲಿ ಹೋತಿ, ಸತ್ತೇಸು ಹಾಯಮಾನೇಸು ಸದ್ಧಮ್ಮೇ ಅನ್ತರಧಾಯಮಾನೇ ಬಹುತರಾನಿ ಹೋನ್ತಿ ಅಪ್ಪತರಾ ಚ ಭಿಕ್ಖೂ ಅಞ್ಞಾಯ ಸಣ್ಡಹನ್ತೀ’’ತಿ, ಏವಮಾದಿನಾ ಆಯಸ್ಮತೋ ಭದ್ದಾಲಿಸ್ಸ ವಿಭಜಿತ್ವಾ ವಿಭಜಿತ್ವಾ ಬ್ಯಾಕತಾ.

ಲಟುಕಿಕೋಪಮಸುತ್ತ

ಪುಚ್ಛಾ – ಲಟುಕಿಕೋಪಮಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಅಙ್ಗುತ್ತರಾಪೇಸು ಭನ್ತೇ ಆಪಣೇ ನಾಮ ಅಙ್ಗುತ್ತರಾಪಾನಂ ನಿಗಮೇ ಆಯಸ್ಮನ್ತಂ ಉದಾಯಿಂ ಆರಬ್ಭ ಭಾಸಿತಂ. ಆಯಸ್ಮಾ ಭನ್ತೇ ಉದಾಯೀ ಭಗವನ್ತಂ ಉಪಸಙ್ಕಮಿತ್ವಾ ಏತದವೋಚ ‘‘ಇಧ ಮಯ್ಹಂ ಭನ್ತೇ ರಹೋಗತಸ್ಸ ಪಟಿಸಲ್ಲೀನಸ್ಸ ಏವಂ ಚೇತಸೋ ಪರಿವಿತಕ್ಕೋ ಉದಪಾದಿ ‘‘ಬಹೂನಂ ವತ ನೋ ಭಗವಾ ದುಕ್ಖಧಮ್ಮಾನಂ ಅಪಹತ್ತಾ, ಬಹೂನಂ ವತ ನೋ ಭಗವಾ ಸುಖಧಮ್ಮಾನಂ ಉಪಹತ್ತಾ, ಬಹೂನಂ ವತ ನೋ ಭಗವಾ ಅಕುಸಲಾನಂ ಧಮ್ಮಾನಂ ಅಪಹತ್ತಾ, ಬಹೂನಂ ವತ ನೋ ಭಗವಾ ಕುಸಲಾನಂ ಧಮ್ಮಾನಂ ಉಪಹತ್ತಾ’ತಿ’’. ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಅಥ ಖೋ ಆವುಸೋ ಭಗವಾ ಕೀದಿಸೀ ಉಪಮಾಯೋ ದಸ್ಸೇತ್ವಾ ಭಿಕ್ಖೂನಂ ಓವಾದಂ ಅದಾಸಿ.

ವಿಸ್ಸಜ್ಜನಾ – ಅಥ ಖೋ ಭನ್ತೇ ಭಗವಾ ಲಟುಕಿಕೋಪಮಂ ಹತ್ಥಿನಾಗೋಪಮಂ ದಲಿದ್ದಪುರಿಸೋಪಮಂ ಗಹಪತಿಕೋಪಮನ್ತಿ ಚತಸ್ಸೋ ಉಪಮಾಯೋ ದಸ್ಸೇತ್ವಾ ಭಿಕ್ಖೂನಂ ಓವಾದಮದಾಸಿ.

ಪುಚ್ಛಾ – ಏವಞ್ಚಾವುಸೋ ಭಗವಾ ಚತೂಹಿ ಉಪಮಾಹಿ ಭಿಕ್ಖೂನಂ ಓವಾದಂ ದತ್ವಾ ಕಥಂ ಉತ್ತರಿ ಧಮ್ಮದೇಸನಂ ಪವಡ್ಢೇಸಿ.

ವಿಸ್ಸಜ್ಜನಾ – ಏವಂ ಖೋ ಭನ್ತೇ ಭಗವಾ ಚತೂಹಿ ಉಪಮಾಹಿ ಭಿಕ್ಖೂನಂ ಓವಾದಂ ದತ್ವಾ ‘‘ಚತ್ತಾರೋ ಮೇ ಉದಾಯಿ ಪುಗ್ಗಲಾ ಸನ್ತೋ ಸಂವಿಜ್ಜಮಾನಾ ಲೋಕಸ್ಮಿಂ’’ನ್ತಿ ಏವಮಾದಿನಾ ಉತ್ತರಿ ಭಿಕ್ಖೂನಂ ಧಮ್ಮಕಥಂ ಪವಡ್ಢೇಸಿ.

ಚಾತುಮಸುತ್ತ

ಪುಚ್ಛಾ – ಚಾತುಮಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಚಾತುಮಾಯಂ ಭನ್ತೇ ಆಯಸ್ಮನ್ತಾನಂ ಸಾರಿಪುತ್ತಮೋಗ್ಗಲಾನತ್ಥೇರಾನಂ ಸದ್ಧಿವಿಹಾರಿಕೇ ಅಧುನಾ ಪಬ್ಬಜಿತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಭಾಸಿತಂ. ಸಾರಿಪುತ್ತಮೋಗ್ಗಲ್ಲಾನಪ್ಪಮುಖಾನಿ ಭನ್ತೇ ಪಞ್ಚಮತ್ತಾನಿ ಭಿಕ್ಖುಸತಾನಿ ಚಾತುಮಂ ಅನುಪ್ಪತ್ತಾನಿ ಹೋನ್ತಿ ಭಗವನ್ತಂ ದಸ್ಸನಾಯ, ತೇ ಚ ಆಗನ್ತುಕಾ ಭಿಕ್ಖೂ ನೇವಾಸಿಕೇಹಿ ಭಿಕ್ಖೂಹಿ ಸದ್ಧಿಂ ಪಟಿಸಮ್ಮೋದಮಾನಾ ಸೇನಾಸನಾನಿ ಪಞ್ಞಾಪಯಮಾನಾ ಪತ್ತಚೀವರಾನಿ ಪಟಿಸಾಮಯಮಾನಾ ಉಚ್ಚಾಸದ್ದಾ ಮಹಾಸದ್ದಾ ಅಹೇಸುಂ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವಾ ಭಿಕ್ಖೂನಂ ಓವಾದಂ ಅದಾಸಿ.

ವಿಸ್ಸಜ್ಜನಾ – ಚತ್ತಾರಿಮಾನಿ ಭಿಕ್ಖವೇ ಭಯಾನಿ ಉದಕೋರೋಹನ್ತೇ ಪಾತಿಕಙ್ಖಿತಬ್ಬಾನೀತಿ ಏವಮಾದಿನಾ ಭನ್ತೇ ಭಗವಾ ತತ್ಥ ಭಿಕ್ಖೂನಂ ಓವಾದಂ ಅದಾಸಿ.

ನಳಕಪಾನಸುತ್ತ

ಪುಚ್ಛಾ – ನಳಕಪಾನಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಭಾಸಿತಂ.

ವಿಸ್ಸಜ್ಜನಾ – ನಳಕಪಾನೇ ಭನ್ತೇ ಅನುರುದ್ಧತ್ಥೇರಪ್ಪಮುಖೇ ಸಮ್ಬಹುಲೇ ಅಭಿಞ್ಞಾತೇ ಅಭಿಞ್ಞಾತೇ ಕುಲಪುತ್ತೇ ಆರಬ್ಭ ಭಾಸಿತಂ.

ಗೋಲಿಯಾನಿಸುತ್ತ

ಪುಚ್ಛಾ – ಗೋಲಿಯಾನಿಸುತ್ತಂ ಪನಾವುಸೋ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಭಾಸಿತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಆಯಸ್ಮನ್ತಂ ಗೋಲಿಯಾನಿಂ ಆರಬ್ಭ ಆಯಸ್ಮತಾ ಸಾರಿಪುತ್ತತ್ಥೇರೇನ ಧಮ್ಮಸೇನಾಪತಿನಾ ಭಾಸಿತಂ. ಆಯಸ್ಮಾ ಭನ್ತೇ ಗೋಲಿಯಾನಿ ಆರಞ್ಞಿಕೋ ಪದಸಮಾಚಾರೋ ಸಙ್ಘಮಜ್ಝೇ ಓಸಟೋ ಹೋತಿ ಕೇನಚಿದೇವ ಕರಣೀಯೇನ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಕೀಟಾಗಿರಿಸುತ್ತ

ಪುಚ್ಛಾ – ತೇನಾವುಸೋ ಭಗವತಾ…ಪೇ… ಸಮ್ಮಾಸಮ್ಬುದ್ಧೇನ ಕೀಟಾಗಿರಿಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಕಾಸೀಸು ಭನ್ತೇ ಕೀಟಾಗಿರಿಸ್ಮಿಂ ಕಾಸೀನಂ ನಿಗಮೇ ಅಸ್ಸಜಿಪುನಬ್ಬಸುಕೇ ಭಿಕ್ಖೂ ಆರಬ್ಭ ಭಾಸಿತಂ. ಅಸ್ಸಜಿಪುನಬ್ಬಸುಕಾ ಭನ್ತೇ ಭಿಕ್ಖೂ ಭಿಕ್ಖೂಹಿ ಸಹಧಮ್ಮಿಕಂ ವುಚ್ಚಮಾನಾ ಏವಮಾಹಂಸು ‘‘ಮಯಂ ಖೋ ಆವುಸೋ ಸಾಯಞ್ಚೇವ ಭುಞ್ಜಾಮ ಪಾತೋ ಚ ದಿವಾ ಚ ವಿಕಾಲೇ, ತೇ ಮಯಂ ಸಾಯಞ್ಚೇವ ಭುಞ್ಜಮಾನಾ ಪಾತೋ ಚ ದಿವಾ ಚ ವಿಕಾಲೇ ಅಪ್ಪಾಬಾಧತಞ್ಚ ಸಞ್ಜಾನಾಮ ಅಪ್ಪಾತಙ್ಕತಞ್ಚ ಲಹುಟ್ಠಾನಞ್ಚ ಬಲಞ್ಚ ಫಾಸುವಿಹಾರಞ್ಚ, ತೇ ಮಯಂ ಕಿಂ ಸನ್ದಿಟ್ಠಿಕಂ ಹಿತ್ವಾ ಕಾಲಿಕಂ ಅನುಧಾವಿಸ್ಸಾಮ, ಸಾಯಞ್ಚೇವ ಮಯಂ ಭುಞ್ಜಿಸ್ಸಾಮ ಪಾತೋ ಚ ದಿವಾ ಚ ವಿಕಾಲೇ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ತೇವಿಜ್ಜವಚ್ಛಸುತ್ತ

ಪುಚ್ಛಾ – ತೇವಿಜ್ಜವಚ್ಛಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ವಚ್ಛಗೋತ್ತಂ ಪರಿಬ್ಬಾಜಕಂ ಆರಬ್ಭ ಭಾಸಿತಂ. ವಚ್ಛಗೋತ್ತೋ ಭನ್ತೇ ಪರಿಬ್ಬಾಜಕೋ ಭಗವನ್ತಂ ಏತದವೋಚ ‘‘ಸುತಂ ಮೇ ಭನ್ತೇ ಸಮಣೋ ಗೋತಮೋ ಸಬ್ಬಞ್ಞೂ ಸಬ್ಬದಸ್ಸಾವೀ ಅಪರಿಸೇಸಂ ಞಾಣದಸ್ಸನಂ ಪಟಿಜಾನಾತಿ, ಚರತೋ ಚ ಮೇ ತಿಟ್ಠತೋ ಚ ಸುತ್ತಸ್ಸ ಚ ಜಾಗರಸ್ಸ ಚ ಸತತಂ ಸಮಿತಂ ಞಾಣದಸ್ಸನಂ ಪಚ್ಚುಪಟ್ಠಿತ’’ನ್ತಿ. ಯೇ ತೇ ಭನ್ತೇ ಏವಮಾಹಂಸು ‘‘ಸಮಣೋ ಗೋತಮೋ ಸಬ್ಬಞ್ಞೂ ಸಬ್ಬದಸ್ಸಾವೀ ಅಪರಿಸೇಸಂ ಞಾಣದಸ್ಸನಂ ಪಟಿಜಾನಾತಿ, ಚರತೋ ಚ ಮೇ ತಿಟ್ಠತೋ ಚ ಸುತ್ತಸ್ಸ ಚ ಜಾಗರಸ್ಸ ಚ ಸತತಂ ಸಮಿತಂ ಞಾಣದಸ್ಸನಂ ಪಚ್ಚುಪಟ್ಠಿತ’’ನ್ತಿ. ಕಚ್ಚಿ ತೇ ಭನ್ತೇ ಭಗವತೋ ವುತ್ತವಾದಿನೋ, ನ ಚ ಭಗವನ್ತಂ ಅಭೂತೇನ ಅಬ್ಭಾಚಿಕ್ಖನ್ತಿ, ಧಮ್ಮಸ್ಸ ಚಾನುಧಮ್ಮಂ ಬ್ಯಾಕರೋನ್ತಿ, ನ ಚ ಕೋಚಿ ಸಹಧಮ್ಮಿಕೋ ವಾದಾನುವಾದೋ ಗಾರಯ್ಹಂ ಠಾನಂ ಆಗಚ್ಛತೀ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಅಗ್ಗಿವಚ್ಛಸುತ್ತ

ಪುಚ್ಛಾ – ಅಗ್ಗಿವಚ್ಛಸುತ್ತಂ ಪನಾವುಸೋ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ವಚ್ಛಗೋತ್ತಂ ಪರಿಬ್ಬಾಜಕಂ ಭಾಸಿತಂ. ವಚ್ಛಗೋತ್ತೋ ಭನ್ತೇ ಪರಿಬ್ಬಾಜಕೋ ಭಗವನ್ತಂ ಉಪಸಙ್ಕಮಿತ್ವಾ ‘‘ಕಿಂ ನು ಖೋ ಭೋ ಗೋತಮ ‘ಸಸ್ಸತೋ ಲೋಕೋ ಇದಮೇವ ಸಚ್ಚಂ ಮೋಘಮಞ್ಞ’ನ್ತಿ ಏವಂದಿಟ್ಠಿ ಭವಂ ಗೋತಮೋ’’ತಿ ಏವಮಾದಿಕಂ ಪಞ್ಹಂ ಅಪುಚ್ಛಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಮಹಾವಚ್ಛಸುತ್ತ

ಪುಚ್ಛಾ – ಮಹಾವಚ್ಛಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ವಚ್ಛಗೋತ್ತಂಯೇವ ಪರಿಬ್ಬಾಜಕಂ ಆರಬ್ಭ ಭಾಸಿತಂ. ವಚ್ಛಗೋತ್ತೋ ಭನ್ತೇ ಪರಿಬ್ಬಾಜಕೋ ಭಗವನ್ತಂ ಉಪಸಙ್ಕಮಿತ್ವಾ ಏತದವೋಚ ‘‘ದೀಘರತ್ತಾಹಂ ಭೋತಾ ಗೋತಮೇನ ಸಹಕಥೀ, ಸಾಧು ಮೇ ಭವಂ ಗೋತಮೋ ಸಂಖಿತ್ತೇನ ಕುಸಲಾಕುಸಲಂ ದೇಸೇತೂ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಏವಂ ವುತ್ತೇ ಖೋ ಆವುಸೋ ವಚ್ಛಗೋತ್ತೋ ಪರಿಬ್ಬಾಜಕೋ ಇಮಸ್ಮಿಂ ಧಮ್ಮವಿನಯೇ ಪಸನ್ನೋ ಹುತ್ವಾ ಕೀದಿಸಂ ಪಸನ್ನಾಕಾರಂ ಅಕಾಸಿ, ಕಥಞ್ಚಸ್ಸ ಧಮ್ಮಾಭಿಸಮಯೋ ಅಹೋಸಿ.

ವಿಸ್ಸಜ್ಜನಾ – ಏವಂ ವುತ್ತೇ ಭನ್ತೇ ವಚ್ಛಗೋತ್ತೋ ಪರಿಬ್ಬಾಜಕೋ ‘‘ಸಚೇ ಹಿ ಭೋ ಗೋತಮ ಇಮಂ ಧಮ್ಮಂ ಭವಂಯೇವ ಗೋತಮೋ ಆರಾಧಕೋ ಅಭವಿಸ್ಸ, ನೋ ಚ ಖೋ ಭಿಕ್ಖೂ ಆರಾಧಕಾ ಅಭವಿಸ್ಸಂಸು, ಏವಮಿದಂ ಬ್ರಹ್ಮಚರಿಯಂ ಅಪರಿಪೂರಂ ಅಭವಿಸ್ಸ ತೇನಙ್ಗೇನಾ’’ತಿ ಏವಮಾದಿನಾ ಇಮಸ್ಮಿಂ ಧಮ್ಮವಿನಯೇ ಪಸನ್ನೋ ಪಸನ್ನಾಕಾರಮಕಾಸಿ. ಯಾವ ಅರಹತ್ತಞ್ಚಸ್ಸ ಧಮ್ಮಾಭಿಸಮಯೋ ಅಹೋಸಿ.

ದೀಘನಖಸುತ್ತ

ಪುಚ್ಛಾ – ದೀಘನಖಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ರಾಜಗಹೇ ಭನ್ತೇ ದೀಘನಖಂ ಪರಿಬ್ಬಾಜಕಂ ಆರಬ್ಭ ಭಾಸಿತಂ. ದೀಘನಖೋ ಭನ್ತೇ ಪರಿಬ್ಬಾಜಕೋ ಭಗವನ್ತಂ ಉಪಸಙ್ಕಮಿತ್ವಾ ಏತದವೋಚ ‘‘ಅಹಞ್ಹಿ ಭೋ ಗೋತಮ ಏವಂವಾದೀ ಏವಂದಿಟ್ಠಿ ಸಬ್ಬಂ ಮೇ ನಕ್ಖಮತೀ’’ತಿ. ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಇಮಸ್ಮಿಂ ಚ ಪನಾವುಸೋ ವೇಯ್ಯಾಕರಣಸ್ಮಿಂ ಭಞ್ಞಮಾನೇ ಕೇಸಂ ಪುಗ್ಗಲಾನಂ ವಿಸೇಸಾಧಿಗಮೋ ಅಹೋಸಿ.

ವಿಸ್ಸಜ್ಜನಾ – ಇಮಸ್ಮಿಞ್ಚ ಪನ ಭನ್ತೇ ವೇಯ್ಯಾಕರಣಸ್ಮಿಂ ಭಞ್ಞಮಾನೇ ಆಯಸ್ಮತೋ ಸಾರಿಪುತ್ತಸ್ಸ ಅನುಪಾದಾಯ ಆಸವೇಹಿ ಚಿತ್ತಂ ವಿಮುಚ್ಚಿ, ದೀಘನಖಸ್ಸ ಪನ ಪರಿಬ್ಬಾಜಕಸ್ಸ ತಸ್ಮಿಂಯೇವ ಆಸನೇ ವಿರಜಂ ವೀತಮಲಂ ಧಮ್ಮಚಕ್ಖುಂ ಉದಪಾದಿ ಯಂಕಿಞ್ಚಿ ಸಮುದಯಧಮ್ಮಂ, ಸಬ್ಬಂ ತಂ ನಿರೋಧಧಮ್ಮ’’ನ್ತಿ.

ಮಾಗಣ್ಡಿಯಸುತ್ತ

ಪುಚ್ಛಾ – ಮಾಗಣ್ಡಿಯಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.

ವಿಸ್ಸಜ್ಜನಾ – ಕುರೂಸು ಭನ್ತೇ ಕಮ್ಮಾಸಧಮ್ಮೇ ನಾಮ ಕುರೂನಂ ನಿಗಮೇ ಭಾರದ್ವಾಜ ಗೋತ್ತಸ್ಸ ಬ್ರಾಹ್ಮಣಸ್ಸ ಅಗ್ಯಾಗಾರೇ ತಿಣಸನ್ಥಾರಕೇ ಮಾಗಣ್ಡಿಯಂ ಪರಿಬ್ಬಾಜಕಂ ಆರಬ್ಭ ಭಾಸಿತಂ. ಮಾಗಣ್ಡಿಯೋ ಭನ್ತೇ ಪರಿಬ್ಬಾಜಕೋ ಭಗವನ್ತಂ ‘‘ಭೂನಹು ಸಮಣೋ ಗೋತಮೋ’’ತಿ ವದೇಸಿ, ತಸ್ಮಿಂ ಭನ್ತೇ ವಟ್ಠುಸ್ಮಿಂ ಭಾಸಿತಂ.

ಪುಚ್ಛಾ – ಕಥಞ್ಚಾವುಸೋ ಭಗವಾ ತತ್ಥ ಮಾಗಣ್ಡಿಯಸ್ಸ ಪರಿಬ್ಬಾಜಕಸ್ಸ ಸಮನುಯುಞ್ಜಿತ್ವಾ ಸಮನುಯುಞ್ಜಿತ್ವಾ ಧಮ್ಮಂ ದೇಸೇಸಿ.

ವಿಸ್ಸಜ್ಜನಾ – ‘‘ಚಕ್ಖುಂ ಖೋ ಮಾಗಣ್ಡಿಯ ರೂಪಾರತಂ ರೂಪಸಮ್ಮುದಿತಂ, ತಂ ತಥಾಗತಸ್ಸ ದನ್ತಂ ಗುತ್ತಂ ರಕ್ಖಿತಂ ಸಂವುತಂ, ತಸ್ಸ ಚ ಸಂವರಾಯ ಧಮ್ಮಂ ದೇಸೇತೀ’’ತಿ ಏವಮಾದಿನಾ ಭನ್ತೇ ತತ್ಥ ಭಗವಾ ಮಾಗಣ್ಡಿಯಸ್ಸ ಪರಿಬ್ಬಾಜಕಸ್ಸ ಸಮನುಯುಞ್ಜಿತ್ವಾ ಸಮನುಯುಞ್ಜಿತ್ವಾ ಧಮ್ಮಂ ದೇಸೇಸಿ.

ಪುಚ್ಛಾ – ಏವಂ ಖೋ ಆವುಸೋ ಮಾಗಣ್ಡಿಯೇನ ಪರಿಬ್ಬಾಜಕೇನ ‘‘ನಕಿಞ್ಚಿ ಭೋ ಗೋತಮಾ’’ತಿ ಯಥಾಭೂತಂ ಪಟಿಸ್ಸುತೇ ಕಥಂ ಭಗವಾ ಅತ್ತನೋಪಿ ನ ಕಿಞ್ಚಿ ಕೇನಚಿಪಿ ವತ್ತಬ್ಬತಂ ಪಕಾಸೇಸಿ.

ವಿಸ್ಸಜ್ಜನಾ – ಏವಂ ಖೋ ಭನ್ತೇ ಮಾಗಣ್ಡಿಯೇನ ಪರಿಬ್ಬಾಜಕೇನ ನಕಿಞ್ಚಿ ಭೋಗೋತಮಾತಿ ಯಥಾಭೂತಂ ಪಟಿಸ್ಸುತೇ ‘‘ಅಹಂ ಖೋ ಪನ ಮಾಗಣ್ಡಿಯ ಪುಬ್ಬೇ ಅಗಾರಿಯಭೂತೋ ಸಮಾನೋ ಪಞ್ಚಹಿ ಕಾಮಗುಣೇಹಿ ಸಮಪ್ಪಿತೋ ಸಮಙ್ಗೀಭೂತೋ ಪರಿಚಾರೇಸಿಂ ಚಕ್ಖುವಿಞ್ಞೇಯ್ಯಹಿ ರೂಪೇಹಿ ಇಟ್ಠೇಹಿ ಮನಾಪೇಹಿ ಪಿಯರೂಪೇಹಿ ಕಾಮೂಪಸಂಹಿತೇಹಿ ರಜನೀಯೇಹೀ’’ತಿ ಏವಮಾದಿನಾ ಭಗವಾ ಅತ್ತನೋಪಿ ನ ಕಿಞ್ಚಿ ಕೇನಚಿಪಿ ವತ್ತಬ್ಬತಂ ಪಕಾಸೇಸಿ.

ಪುಚ್ಛಾ – ಇಮಸ್ಮಿಂ ಸುತ್ತೇ ಪರಿಯೋಸಾನಪುಚ್ಛಂ ಪುಚ್ಛಿಸ್ಸಾಮಿ ಇಮಞ್ಚ ಪನಾವುಸೋ ಧಮ್ಮದೇಸನಂ ಸುತ್ವಾ ಮಾಗಣ್ಡಿಯೋ ಪರಿಬ್ಬಾಜಕೋ ಇಮಸ್ಮಿಂ ಧಮ್ಮವಿನಯೇ ಪಸನ್ನೋ ಹುತ್ವಾ ಕೀದಿಸಂ ಪಸನ್ನಾಕಾರಮಕಾಸಿ.

ವಿಸ್ಸಜ್ಜನಾ – ಇಮಂ ಚ ಪನ ಭನ್ತೇ ಧಮ್ಮದೇಸನಂ ಸುತ್ವಾ ಮಾಗಣ್ಡಿಯೋ ಪರಿಬ್ಬಾಜಕೋ ‘ಅಭಿಕ್ಕನ್ತಂ ಭೋ ಗೋತಮ ಅಭಿಕ್ಕನ್ತಂ ಭೋ ಗೋತಮಾ’’ತಿ ಏವಮಾದಿನಾ ಇಮಸ್ಮಿಂ ಧಮ್ಮವಿನಯೇ ಪಸನ್ನೋ ಪಸನ್ನಾಕಾರಮಕಾಸಿ.

ಸನ್ದಕಸುತ್ತ

ಪುಚ್ಛಾ – ಸನ್ದಕಸುತ್ತಂ ಪನಾವುಸೋ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಭಾಸಿತಂ.

ವಿಸ್ಸಜ್ಜನಾ – ಕೋಸಮ್ಬಿಯಂ ಭನ್ತೇ ಸನ್ದಕಂ ಪರಿಬ್ಬಾಜಕಂ ಆರಬ್ಭ ಆಯಸ್ಮತಾ ಆನನ್ದತ್ಥೇರೇನ ಧಮ್ಮಭಣ್ಡಾಗಾರಿಕೇನ ಭಾಸಿತಂ. ಸನ್ದಕೋ ಭನ್ತೇ ಪರಿಬ್ಬಾಜಕೋ ಆಯಸ್ಮನ್ತಂ ಆನನ್ದಂ ಏತದವೋಚ ‘‘ಸಾಧುವತ ಭವನ್ತಂಯೇವ ಆನನ್ದಂ ಪಟಿಭಾತು ಸಕೇ ಆಚರಿಯ ಕೇ ಧಮ್ಮಿಕಥಾ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ಭಾಸಿತಂ.

ಪುಚ್ಛಾ – ಕಥಞ್ಚಾವುಸೋ ತತ್ಥ ಚತ್ತಾರೋ ಅಬ್ರಹ್ಮಚರಿಯವಾಸಾ ಆಯಸ್ಮತಾ ಆನನ್ದತ್ಥೇರೇನ ಧಮ್ಮಭಣ್ಡಾಗಾರಿಕೇನ ವಿಚಾರೇತ್ವಾ ಪಕಾಸಿತಾ.

ವಿಸ್ಸಜ್ಜನಾ – ಇಧ ಸನ್ದಕ ಏಕಚ್ಚೋ ಸತ್ಥಾ ಏವಂವಾದೀ ಹೋತಿ ಏವಂದಿಟ್ಠಿ ನತ್ಥಿ ದಿನ್ನಂ, ನತ್ಥಿ ಯಿಟ್ಠಂ, ನತ್ಥಿ ಹುತಂ, ನತ್ಥಿ ಸುಕತದುಕ್ಕಟಾನಂ ಕಮ್ಮಾನಂ ಫಲಂವಿಪಾಕೋ, ನತ್ಥಿ ಅಯಂಲೋಕೋ, ನತ್ಥಿ ಪರೋಲೋಕೋ, ನತ್ಥಿ ಮಾತಾ, ನತ್ಥಿ ಪಿತಾ, ನತ್ಥಿ ಸತ್ತಾ ಓಪಪಾತಿಕಾತಿ

ಏವಮಾದಿನಾ ಭನ್ತೇ ತತ್ಥ ಆಯಸ್ಮತಾ ಆನನ್ದತ್ಥೇರೇನ ಧಮ್ಮಭಣ್ಡಾಗಾರಿಕೇನ ಚತ್ತಾರೋ ಅಬ್ರಹ್ಮಚರಿಯವಾಸಾ ವಿಚಾರೇತ್ವಾ ಪಕಾಸಿತಾ.

ಪುಚ್ಛಾ – ಕಥಞ್ಚಾವುಸೋ ತತ್ಥ ಚತ್ತಾರಿ ಅನಸ್ಸಾಸಿಕಾನಿ ಬ್ರಹ್ಮಚರಿಯಾನಿ ಆಯಸ್ಮತಾ ಆನನ್ದತ್ಥೇರೇನ ಧಮ್ಮಭಣ್ಡಾಗಾರಿಕೇನ ವಿಚಾರೇತ್ವಾ ಪಕಾಸಿತಾನಿ.

ವಿಸ್ಸಜ್ಜನಾ – ಇಧ ಸನ್ದಕ ಏಕಚ್ಚೋ ಸತ್ಥಾ ಸಬ್ಬಞ್ಞೂ ಸಬ್ಬದಸ್ಸಾವೀ ಅಪರಿಸೇಸಂ ಞಾಣದಸ್ಸನಂ ಪಟಿಜಾನಾತಿ ‘‘ಚರತೋ ಚ ಮೇ ತಿಟ್ಠತೋ ಚ ಸುತ್ತಸ್ಸ ಚ ಜಾಗರಸ್ಸ ಚ ಸತತಂ ಸಮಿತಂ ಞಾಣದಸ್ಸನಂ ಪಚ್ಚುಪಟ್ಠಿತ’’ನ್ತಿ ಏವಮಾದಿನಾ ಭನ್ತೇ ತತ್ಥ ಆಯಸ್ಮತಾ ಆನನ್ದತ್ಥೇರೇನ ಧಮ್ಮಭಣ್ಡಾಗಾರಿಕೇನ ಚತ್ತಾರಿ ಅನಸ್ಸಾಸಿಕಾನಿ ಬ್ರಹ್ಮಚರಿಯಾನಿ ವಿಭಜಿತ್ವಾ ಪಕಾಸಿತಾನಿ.

ಪುಚ್ಛಾ – ಅಥ

ಖೋ ಆವುಸೋ ಸನ್ದಕೋ ಪರಿಬ್ಬಾಜಕೋ ಆಯಸ್ಮನ್ತಂ ಆನನ್ದತ್ಥೇರಂ ಕಥಂ ಪುಚ್ಛಿ, ತಥಞ್ಚಸ್ಸಾಯಸ್ಮಾನನ್ದತ್ಥೇರೋ ಬ್ಯಾಕಾಸಿ.

ವಿಸ್ಸಜ್ಜನಾ – ಅಥ ಖೋ ಭನ್ತೇ ಸನ್ದಕೋ ಪರಿಬ್ಬಾಜಕೋ ‘‘ಸೋ ಪನ ಭೋ ಆನನ್ದ ಸತ್ಥಾ ಕಿಂವಾದೀ ಕಿಂ ಅಕ್ಖಾಯೀ’’ತಿ ಏವಮಾದಿನಾ ಆಯಸ್ಮನ್ತಂ ಆನನ್ದತ್ಥೇರಂ ಪುಚ್ಛಿ, ಆಯಸ್ಮಾ ಚ ಭನ್ತೇ ಆನನ್ದತ್ಥೇರೋ ‘‘ಇಧ ಸನ್ದಕ ತಥಾಗತೋ ಲೋಕೇ ಉಪ್ಪಜ್ಜತಿ ಅರಹಂ ಸಮ್ಮಾಸಮ್ಬುದ್ಧೋ ವಿಜ್ಜಾಚರಣಸಮ್ಪನ್ನೋ’’ತಿ ಏವಮಾದಿನಾ ಸನ್ದಕಸ್ಸ ಪರಿಬ್ಬಾಜಕಸ್ಸ ವಿಭಜಿತ್ವಾ ವಿಭಜಿತ್ವಾ ಬ್ಯಾಕಾಸಿ.

ಪುಚ್ಛಾ – ಇಮಞ್ಚ ಪನಾವುಸೋ ಧಮ್ಮದೇಸನಂ ಸುತ್ವಾ ಸನ್ದಕೋ ಪರಿಬ್ಬಾಜಕೋ ಇಮಸ್ಮಿಂ ಧಮ್ಮವಿನಯೇ ಪಸನ್ನೋ ಕೀದಿಸಂ ಪಸನ್ನಾಕಾರಮಕಾಸಿ.

ವಿಸ್ಸಜ್ಜನಾ – ಇಮಞ್ಚ ಭನ್ತೇ ಧಮ್ಮದೇಸನಂ ಸುತ್ವಾ ಸನ್ದಕೋ ಪರಿಬ್ಬಾಜಕೋ ‘‘ಅಚ್ಛರಿಯಂ ಭೋ ಆನನ್ದ, ಅಬ್ಭುತಂ ಭೋ ಆನನ್ದ, ನ ಚ ನಾಮ ಸಧಮ್ಮೋಕ್ಕಂಸನಾ ಭವಿಸ್ಸತಿ, ನ ಪರಧಮ್ಮವಮ್ಭನಾ, ಆಯತನೇ ಚ ಧಮ್ಮದೇಸನಾ, ತಾವ ಬಹುಕಾ ಚ ನಿಯ್ಯಾತಾರೋ ಪಞ್ಞಾಯಿಸ್ಸನ್ತೀ’’ತಿ ಏವಮಾದಿನಾ ಇಮಸ್ಮಿಂ ಧಮ್ಮವಿನಯೇ ಪಸನ್ನೋ ಪಸನ್ನಾಕಾರಮಕಾಸಿ.

ಮಹಾಸಕುಲುದಾಯೀಸುತ್ತ

ಪುಚ್ಛಾ – ಮಹಾಸಕುಲುದಾಯಿಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಭಾಸಿತಂ.