ಸೀಲಕ್ಖನ್ಧವಗ್ಗಸುತ್ತ

ಸಂಗಾಯನಸ್ಸ ಪುಚ್ಛಾ ವಿಸ್ಸಜ್ಜನಾ

ಪುಚ್ಛಾ – ಪಠಮಮಹಾಧಮ್ಮಸಂಗೀತಿಕಾಲೇ ಆವುಸೋ ಧಮ್ಮಸಂಗಾಹಕಾ ಮಹಾಕಸ್ಸಪಾದಯೋ ಮಹಾಥೇರವರಾ ಪಠಮಂ ವಿನಯಂ ಸಂಗಾಯಿತ್ವಾ ತದನನ್ತರಂ ಕಂ ನಾಮ ಪಾವಚನಂ ಸಂಗಾಯಿಂಸು.

ವಿಸ್ಸಜ್ಜನಾ – ಪಠಮಮಹಾಧಮ್ಮಸಂಗೀತಿಯಂ ಭನ್ತೇ ಧಮ್ಮಸಂಗಾಹಕಾ ಮಹಾಕಸ್ಸಪಾದಯೋ ಮಹಾಥೇರವರಾ ಪಠಮಂ ವಿನಯಂ ಸಂಗಾಯಿತ್ವಾ ತದನನ್ತರಂ ಧಮ್ಮಂ ಸಂಗಾಯಿಂಸು.

ಪುಚ್ಛಾ – ಧಮ್ಮೋ ನಾಮ ಆವುಸೋ ಸುತ್ತನ್ತಾಭಿಧಮ್ಮವಸೇನ ದುವಿಧೋ, ತತ್ಥ ಕತರಂ ಧಮ್ಮಂ ಪಠಮಂ ಸಂಗಾಯಿಂಸು.

ವಿಸ್ಸಜ್ಜನಾ – ದ್ವೀಸು ಭನ್ತೇ ಧಮ್ಮೇಸು ಸುತ್ತನ್ತಾಭಿಧಮ್ಮಪಿಟಕೇಸು ಪಠಮಂ ಸುತ್ತನ್ತಂ ಪಿಟಕಂ ಧಮ್ಮಂ ಸಂಗಾಯಿಂಸು.

ಪುಚ್ಛಾ – ಸುತ್ತನ್ತಪಿಟಕೇ ಪಿ ಆವುಸೋ ದೀಘಮಜ್ಝಿಮಸಂಯುತ್ತಅಙ್ಗುತ್ತರಖುದ್ದಕನಿಕಾಯವಸೇನ ಪಞ್ಚ ನಿಕಾಯಾ, ತೇಸು ಪಠಮಂ ಕತರಂ ನಿಕಾಯಂ ಸಂಗಾಯಿಂಸು.

ವಿಸ್ಸಜ್ಜನಾ – ಪಞ್ಚಸು ಭನ್ತೇ ನಿಕಾಯೇಸು ಪಠಮಂ ದೀಘನಿಕಾಯಂ ಸಂಗಾಯಿಂಸು.

ಪುಚ್ಛಾ – ದೀಘನಿಕಾಯೇಪಿ ಆವುಸೋ ತಯೋ ವಗ್ಗಾ ಚತುತ್ತಿಂಸಾ ಚ ಸುತ್ತಾನಿ, ತೇಸು ಕತರಂ ವಗ್ಗಂ ಕತರಞ್ಚ ಸುತ್ತಂ ಪಠಮಂ ಸಂಗಾಯಿಂಸು.

ವಿಸ್ಸಜ್ಜನಾ – ದೀಘನಿಕಾಯೇಪಿ ಭನ್ತೇ ತೀಸು ವಗ್ಗೇಸು ಪಠಮಂ ಸೀಲಕ್ಖನ್ಧವಗ್ಗಂ, ಚತುತ್ತಿಂಸತಿಯಾ ಚ ಸುತ್ತೇಸು ಪಠಮಂ ಬ್ರಹ್ಮಜಾಲಸುತ್ತಂ ಸಂಗಾಯಿಂಸು.