೧೯. ಸಮ್ಪಯುತ್ತಪಚ್ಚಯೋ

ಸಮ್ಪಯುತ್ತಪಚ್ಚಯೋ ವಿಪ್ಪಯುತ್ತಪಚ್ಚಯೋತಿ ಏಕಂ ದುಕ್ಕಂ. ಅತ್ಥಿ ಪಚ್ಚಯೋ ನತ್ಥಿ ಪಚ್ಚಯೋತಿ ಏಕಂ ದುಕ್ಕಂ. ವಿಗತಪಚ್ಚಯೋ ಅವಿಗತ ಪಚ್ಚಯೋತಿ ಏಕಂ ದುಕ್ಕಂ. ಇಮಾನಿ ತೀಣಿ ಪಚ್ಚಯದುಕ್ಕಾನಿ ವಿಸುಂ ಪಚ್ಚಯ ವಿಸೇಸಾನಿ ನ ಹೋನ್ತಿ. ಪುಬ್ಬೇ ಆಗತೇಸು ಪಚ್ಚಯೇಸು ಕೇಚಿ ಪಚ್ಚಯಾ ಅತ್ತನೋ ಪಚ್ಚಯುಪ್ಪನ್ನೇಹಿ ಸಮ್ಪಯುತ್ತಾ ಹುತ್ವಾ ಪಚ್ಚಯತ್ತಂ ಗಚ್ಛನ್ತಿ, ಕೇಚಿ ವಿಪ್ಪಯುತ್ತಾ ಹುತ್ವಾ, ಕೇಚಿ ವಿಜ್ಜಮಾನಾ ಹುತ್ವಾ, ಕೇಚಿ ಅವಿಜ್ಜಮಾನಾ ಹುತ್ವಾ, ಕೇಚಿ ವಿಗತಾ ಹುತ್ವಾ, ಕೇಚಿ ಅವಿಗತಾ ಹುತ್ವಾ ಪಚ್ಚಯತ್ತಂ ಗಚ್ಛನ್ತೀತಿ ದಸ್ಸನತ್ಥಂ ಇಮಾನಿ ತೀಣಿ ಪಚ್ಚಯದುಕ್ಕಾನಿ ವುತ್ತಾನಿ.

ಏತ್ಥ ಚ ಅತ್ಥೀತಿ ಖೋ ಕಚ್ಚಾನ ಅಯಮೇಕೋ ಅನ್ತೋ, ನತ್ಥೀತಿ ಖೋ ದುತಿಯೋ ಅನ್ತೋತಿ ಏವರೂಪೇಸು ಠಾನೇಸು ಅತ್ಥಿನತ್ಥಿಸದ್ದಾ ಸಸ್ಸತುಚ್ಛೇದೇಸುಪವತ್ತನ್ತಿ, ತಸ್ಮಾ ಏವರೂಪಾನಂ ಅತ್ಥಾನಂ ನಿವತ್ತನತ್ಥಂ ಪುನ ವಿಗತದುಕ್ಕಂ ವುತ್ತಂ.

ಸಬ್ಬೇಪಿ ಸಹಜಾತಾ ಚಿತ್ತಚೇತಸಿಕಾ ಧಮ್ಮಾ ಅಞ್ಞಮಞ್ಞಸ್ಸ ಪಚ್ಚಯಾ ಚೇವ ಹೋನ್ತಿ ಪಚ್ಚಯುಪ್ಪನ್ನಾ ಚ.

ಕೇನಟ್ಠೇನ ಸಮ್ಪಯುತ್ತೋ. ಏಕುಪ್ಪಾದತಾ ಏಕನಿರೋಧತಾ ಏಕವತ್ಥುಕತಾ ಏಕಾರಮ್ಮಣತಾತಿ ಇಮೇಹಿ ಚತೂಹಿ ಸಮ್ಪಯೋಗಙ್ಗೇಹಿ ಸಮನ್ನಾಗತೋ ಹುತ್ವಾ ಸಂಯುತ್ತೋ ಏಕೀಭಾವಂ ಗತೋತಿ ಸಮ್ಪಯುತ್ತೋ.

ತತ್ಥ ಏಕೀಭಾವಂ ಗತೋತಿ ಚಕ್ಖುವಿಞ್ಞಾಣಂ ಫಸ್ಸಾದೀಹಿ ಸತ್ತಹಿ ಚೇತಸಿಕೇಹಿ ಸಹ ಏಕೀಭಾವಂ ಗತಂ ಹೋತಿ, ದಸ್ಸನನ್ತಿ ಏಕಂ ವೋಹಾರಂ ಗಚ್ಛತಿ. ಅಟ್ಠ ಧಮ್ಮಾ ವಿಸುಂ ವಿಸುಂ ವೋಹಾರಂ ನ ಗಚ್ಛನ್ತಿ, ವಿನಿಬ್ಭುಜ್ಜಿತ್ವಾ ವಿಞ್ಞಾತುಂ ನ ಸಕ್ಕೋತಿ. ಏಸ ನಯೋ ಸೇಸೇಸು ಸಬ್ಬಚಿತ್ತುಪ್ಪಾದೇಸೂತಿ. ಸಮ್ಪಯುತ್ತಪಚ್ಚಯದೀಪನಾ ನಿಟ್ಠಿತಾ.