ದ್ವಿಸಟ್ಠಿಮಪರಿಚ್ಛೇದ

ಪರಮಣ್ಡಲಾಭಿಗಮನೋ

೧. ಅತ್ತನಾಭಿಮತಸ್ಸಾ’ಸು, ಜಾತದೇಸಸ್ಸ ಪತ್ತಿಯಾ;

ಸಮ್ಪುಣ್ಣಮನಸಙ್ಕಪ್ಪೋ, ದುಸ್ಸಙ್ಕಪವಿವಜ್ಜಿತೋ.

೨. ವಜಿರೂಪಮೋರುಪಞ್ಞಾ, ಬಲೇನ ಗುರುಸನ್ತಿಕೇ;

ಲಹುಂ ಬಹುಞ್ಚ ಗಣ್ಹನ್ತೋ, ಸಿಪ್ಪಜಾತಮನೇಕ ಕಂ.

೩. ಜಿನಾಗಮೇಸು ನೇಕೇಸು, ಕೋಟಿಲ್ಲಾ ದೀಸು ನೀತಿಸು;

ಸದ್ದಸತ್ಥೇ ಚ ಕಾವೇಯ್ಯೇ, ಸನಿಘಣ್ಡುಕ ಕೇಟುಭೇ.

೪. ನಚ್ಚಗೀತೇಸು ಸತ್ಥೇಸು, ಹತ್ಥಿಸಿಪ್ಪಾದಿಕೇಸು ಚ;

ಧನು ಖಗ್ಗಾದಿನೇಕೇಸು, ಸತ್ಥೇಸು ಚ ವಿಸೇಸತೋ.

೫. ಪಾರಪ್ಪತ್ತೋ ವಿನೀತತ್ತೋ, ಪಿತು ರಞ್ಞೋ ಸಮಾಚರಿ;

ಅಧಿಪ್ಪಾಯಾನುಕುಲಂ’ವ, ಸದಾ ಭತ್ತಿಪುರಸ್ಸರೋ.

೬. ತದಾ ಸದಾ ದರಾಚಾರ-ಗುಣಾರಾಧಿತಮಾನಸೋ;

ಪಿಯೇನ ವಿಯ ಮಿತ್ತೇನ, ತೇನ ಸದ್ಧಿಂ ಮಹೀಪತಿ.

೭. ಉಯ್ಯಾನಜಲಕೀಳಾದಿ-ಸುಖಂ ನಾನಪ್ಪಕಾರಕಂ;

ಅನುಭೋತ್ವಾ ಸದೇಸಸ್ಮಿಂ, ಸಞ್ಚರನ್ತೋ ತಹಿಂ ತಹಿಂ.

೮. ಏಕದಾಸಙ್ಖಸೇನಾಧಿ-ಪತಿನಾ ದಳ್ಹಭತ್ತಿನಾ;

ಸರಟ್ಠಸೀಮಾ ರಕ್ಖಾಯ, ಯೋ ಜಿತೇನ ಬಲೀಯಸಾ.

೯. ಅಜ್ಝಾವುತ್ಥಸ್ಸ ಚ ಬಲತ್ಥ-ಲಿನಮಸ್ಸ ಚ ಸನ್ತಿಕಂ;

ಗಾಮಸಾ’ಗಞ್ಛಿ ಸುತ್ವಾನ, ತಮತ್ಥಂ ಧಜಿನೀಪತಿ.

೧೦. ಗಾಮಂ ತಂ ಸಾಧುಕಂ ಸಜ್ಜು, ಸಜ್ಜಾಪೇತ್ವಾ ಸಪುತ್ತಕಂ;

ಪಚ್ಚುಗ್ಗನ್ತ್ವಾ ಮಹೀಪಾಲಂ, ಪಣಮಿತ್ವಾ ಠಿತೋ ತದಾ.

೧೧. ಪಿತಾ ಪುತ್ತೋ ಉಭೋ ತಸ್ಸ, ಸಮ್ಭಾಸಿಯ ಪಿಯಂ ವಚೋ;

ನೇಕಧಾ’ರಾಧಿತಾ ತೇನ, ತಂ ಗಾಮಂ ಸಮುಪಾಗಗುಂ.

೧೨. ತಹಿಂ ಕತಿಚಿ ಭೂಪಾಲೋ, ವಾಸರೇ ವೀತಿನಾಮಿಯ;

ಸೇನಾಪತಿಂ ಸಮಾಹೂಯ, ಇದಂ ವಚನಂ ಮಬ್ರವಿ.

೧೩. ಪುತ್ತೋ ಮೇ ದಾನಿವಯಸಿ, ಠಿತೋ’ ಪನಯನಾರಹೇ;

ತಸ್ಸೋಪನಯನಂ ಕಾತುಂ, ಮಹೋಪಕರಣಂ ಲಹುಂ.

೧೪. ಸಜ್ಜೇತಬ್ಬನ್ತಿ ತಂ ಸುತ್ವಾ, ಸೋಪಿ ಸೇನಾಧಿನಾಯಕೋ;

ಸಬ್ಬುಪಕರಣಂ ಖಿಪ್ಪಂ, ಮಙ್ಗಲತ್ಥಂ ಸುಸಜ್ಜಯಿ.

೧೫. ಸುಗನ್ಧ ದೀಪಪುಪ್ಫಾದಿ-ವತ್ಥೂಹಿ ದಿವಸತ್ತಯಂ;

ಪುಬ್ಬಕಾರಂ ಕರಿತ್ವಾನ, ಮಹನ್ತಂ ರತನತ್ತಯೇ.

೧೬. ವೇದಿಕಾಚಾರದಕ್ಖೇಹಿ, ದ್ವಿಜೇಹಿ ಪುಥುವೀಪತಿ;

ಸಮ್ಪಭಾವಾನು ರೂಪಂವ, ಮಙ್ಗಲಂ ತಂ ಸಮಾಪಿಯ.

೧೭. ಪರಕ್ಕಮಕುಮಾರೇನ, ತೇನ ಸದ್ಧಿಂ ಸಮಾರಭಿ;

ವಸನ್ತಕೀಳಂ ಮಹತಿಂ, ಸಾಮಚ್ಚೋ ಕೀಳಿತುಂ ತದಾ.

೧೮. ರಾಜಾ ಕಿತ್ತಿ ಸಿರೀಮೇಘೋ-ರೋಹಣೇ ವಸತೋ ತದಾ;

ಸಿರೀವಲ್ಲಭನಾಮಸ್ಸ, ಸಭಾತು ಮರಣಮ್ಪಿ ಚ.

೧೯. ಮಾಣಭರಣನಾಮಸ್ಸ, ರಜ್ಜಲಾಭಞ್ಚ ದೇವಿಯಾ;

ಮಿತ್ತಾಯ ಪಟಿಲಾಭಞ್ಚ, ಸಿರೀವಲ್ಲಭಸೂನು ನೋ.

೨೦. ರೋಹಣಾಗತದೂತೇಹಿ, ಸುಣಿತ್ವಾ ಸಕಭಾತುನೋ;

ಕಾಲಕ್ರಿಯಾಯ ಸಞ್ಜಾತ-ಸೋಕವೇಗಂ ಸುದುಸ್ಸಹಂ.

೨೧. ಮಿತ್ತಾಯತನಯುಪ್ಪತ್ತಿ ಪವತ್ತಿಂ ಸವಣೇನ ತಂ;

ವಿನೇಯ್ಯ ವಿರತೋ ತಮ್ಹಾ, ವಸನ್ತಸಮಯುಸ್ಸವಾ.

೨೨. ನಿವತ್ತೇತ್ವಾನ ತತ್ಥೇವ, ಸೇನಾನಿಂ ಸಙ್ಖನಾಮಕಂ;

ಪುತ್ತೇನ ಸಹ ಸೋ ಸಙ್ಖ-ತ್ಥಲಿ ನಾಮಂ ಪುರಂ ಗಮಿ.

೨೩. ಪರಕ್ಕಮಕುಮಾರೇನ, ತೇನ ಸದ್ಧಿಂ ತಹಿಂ ಸುಖಂ;

ವಸತೋ ತಸ್ಸ ಭೂಪಸ್ಸ, ವಸ್ಸಮೇಕಮತಿಕ್ಕಮಿ.

೨೪. ಮಾಣಾಭರಣಭೂಪಸ್ಸ, ದೇವೀ ಚಾಪಿ ಪಭಾವತೀ;

ಲಭಿತ್ಥ ದುತಿಯಾ ಕಿತ್ತಿ-ಸಿರೀ ಮೇಘವ್ಹಯಂ ಸುತಂ.

೨೫. ಸುಣಿತ್ವಾ ತಞ್ಚ ಸೋ ಅಮ್ಹಂ, ವಂಸೋ ಜಾತೋ ಮಹಾ’’ಇತಿ;

ಅಹು ಕಿತ್ತಿಸಿರೀಮೇಘೋ, ತದಾ ಅತ್ತಮನೋ ಭುಸಂ.

೨೬. ಲಂಕಾದೀಪೋಪಭೋಗೇಕ-ಹೇತುನಾ ಮಹತಾ ಸತಾ;

ಅಸಾಧಾರಣಭೂಭೇನ, ಚೋದಿತೋ ಪುಞ್ಞಕಮ್ಮುನಾ.

೨೭. ಕುಮಾರೋ ಸೋ’ಥ ಪಿತರಾ, ಪಿಯಮಿತ್ತೇ ವಿಯತ್ತನಿ;

ಕರಿಯಮಾನಂ ಸಸ್ನೇಹಂ, ಮಹನ್ತಂ ಚೋ’ಪಲಾಲನಂ.

೨೮. ಸಚಿವಾನಮನೇಕೇಸಂ, ಭಯಭತ್ತೀ ಪುರಸ್ಸರಂ;

ಕ್ರಿಯಮಾನಮುಪಟ್ಠಾನಂ, ನ ಮಞ್ಞನ್ತೋ ತಿಣಾಯಪಿ.

೨೯. ಲಂಕಾದೀಪಮಿಮಂ ಸಬ್ಬ ಮೇಕಚ್ಛತ್ತೋ ಪಸೋಭಿತಂ;

ಖಿಪ್ಪಂ ಕಾರೇತುಕಾಮೋ ಸೋ, ಸಯಂ ಇತಿ ವಿಚಿನ್ತಯಿ.

೩೦. ಕೇಸ ಅಕ್ಖಕ ಗೀವಟ್ಠಿ-ದಾಠಾ ಪತ್ತಾನ ಮೇವ ಚ;

ಪದಚೇತ್ಯ ಮಹಾಬೋಧಿ-ಸಾಖಾನಞ್ಚಾಪಿ ಸತ್ಥುನೋ.

೩೧. ಚತುರಾಸೀತಿಸಹಸ್ಸಾನಂ, ಧಮ್ಮಕ್ಖನ್ಧಾನ ಮೇವ ಚ;

ಸಮ್ಮಾಸಮ್ಬುದ್ಧಕಪ್ಪಾನಂ, ಆಧಾರತ್ತಾ ಚ ನಿಚ್ಚಸೋ.

೩೨. ಆಕರತ್ತಾ ಚ ನೇಕೇಸಂ, ಮಣಿಮುತ್ತಾದಿವತ್ಥೂನಂ;

ಸಮ್ಮತೋಪಿ ವಿಸಿಟ್ಠೋತಿ, ದೀಪೋನಾತಿ ಮಹಾ ಅಯಂ.

೩೩. ತಯೋ ಮೇ ಪಿತರೋ ಭೂಪಾ, ಮಾತುಲೋಪಿ ಚ ಸಬ್ಬಥಾ;

ಏಕಚ್ಛತ್ತೇನ ವತ್ತೇತು, ಮಸಮತ್ಥಾ ವಿಭಜ್ಜಿ’ಮಂ.

೩೪. ಭುಞ್ಜನ್ತಾ ಏತ್ತಕೇನೇವ, ಕತಕಿಚ್ಚಾ ಮಯಂ ಇತಿ;

ಮಞ್ಞನ್ತಾ ವಿಗತಚ್ಛನ್ದಾ’ಭಿಸೇಕಮ್ಹಿ ಕುಲೋಚಿತೇ.

೩೫. ರಟ್ಠೇಸಕೇ ಸಕೇಯೇವ, ಇಸ್ಸೇರಂ ಸಮ್ಪವತ್ತಯುಂ;

ಕಸಿಕಮ್ಮಾದಿಕಂ ಗಾಮ-ಭೋಜಕಾ ವಿಯ ನಿಸ್ಸಿತಾ.

೩೬. ತೇಸು ಕಿತ್ತಿಸಿರಿ ಮೇಘಂ, ಪೇತ್ತೇಯ್ಯಂ ಮೇ ಠಪೇತ್ವ ತೇ;

ಅಗಮಂಸು ಯಥಾಕಮ್ಮಂ, ಸೇಸಾ ಭೂಪತಯೋ ತಯೋ.

೩೭. ಮಚ್ಚಾನಂ ಪರಮಂ ಆಯು, ವತೇ’ದಾನಿ ಪರಿತ್ತಕಂ;

ಬಾಲಾಯುವಾನೋ ವುದ್ಧಾ ಚ, ಇಮೇ ಸತ್ತಾ’ನುಪುಬ್ಬಸೋ.

೩೮. ಪಾಪುಣಿಸ್ಸನ್ತಿ ಮರಣ-ಮೀತಿ’ಯಂ ನಿಯಮೋಪಿ ಚ;

ನ ಹೇವ ಅಸ್ಮಿಂ ಲೋಕಸ್ಮಿಂ, ಸಂವಿಜ್ಜತಿ ಕದಾಚಿಪಿ.

೩೯. ತಸ್ಮಾ ಸರೀರಕೇ ಅಸ್ಮಿಂ, ಭಙ್ಗುರೇ ಸಾರವಜ್ಜಿತೇ;

ಹೀಳಿತೇ ಸಾರದಸ್ಸೀಹಿ, ಅಪೇಕ್ಖಂ ಹಿತ್ವಾ ಸಬ್ಬಥಾ.

೪೦. ಪಿಹನಿಯೇ ಯಸೋದೇಹೇ, ಚಿರಟ್ಠಾಯಿಮ್ಹಿ ಸಬ್ಬದಾ;

ಅಮ್ಹಾದಿಸೇಹಿ ಕತ್ತಬ್ಬೋ, ರಾಜಪುತ್ತೇಹಿ ಆದರೋ.

೪೧. ಉಮ್ಮಗ್ಗಜಾತಕಾದೀಸು, ಚಾರಿತ್ತಞ್ಚಾಪಿ ಭೂಮಿಸು;

ವಿಹಿತಂ ಬೋಧಿಸತ್ತೇನ, ವೀರಭಾವಾದಿನಿಸ್ಸಿತಂ.

೪೨. ರಾಮಾಯಣಭಾರತಾದಿ-ಲೋಕಿಯಾಸು ಕಥಾಸುಪಿ;

ರಾಮಸ್ಸ ವಿಕ್ಕಮಞ್ಚೇವ, ತಸ್ಸ ರಾವಣಘಾತಿನೋ.

೪೩. ದುಯೋಧನಾದಿರಾಜಾನೋ, ಹನ್ತ್ವಾಯುದ್ಧೇ ಪವತ್ತಿತಂ;

ವಿಕ್ಕಮಾತಿ ಸಯಞ್ಚೇವ, ಪಞ್ಚನ್ನಂ ಪಣ್ಡುಸೂನೂನಂ.

೪೪. ಇತಿಹಾಸಕಥಾಯಞ್ಚ, ದೇವಾಸುರರಣೇ ಪುರಾ;

ದುಸ್ಸನ್ತಾದಿಮಹೀಪೇಹಿ, ಕತಞ್ಚ ಚರಿತಬ್ಭೂತಂ.

೪೫. ಉಮ್ಮೂಲಿತವತೋ ತಸ್ಸ, ನನ್ದವಂಸನರಿಸ್ಸರೇ;

ಚಾರಕ್ಕದ್ವಿಜಸೇಟ್ಠಸ್ಸ, ಸುತ್ವಾ ಬುದ್ಧಿಬಲಮ್ಪಿ ಚ.

೪೬. ಸಬ್ಬಾ ನೇತಾನಿ ಲೋಕಮ್ಹಿ, ಯಾವಜ್ಜದಿವಸಾ ಭುವಿ;

ತೇಸಂ ಅಸನ್ನಿಧಾನೇಪಿ, ಸುಪ್ಪಸಿದ್ಧಿಂ ಗತಾನಿ ಹಿ.

೪೭. ಸುಲದ್ಧಂ ಜೀವಿತಂ ತೇಸಂ, ಅಸಾಧಾರಣಮೀದಿಸಂ;

ಚರಿತಾತಿಸಯಂ ಕತ್ತುಂ, ಸಮತ್ಥಾ ಹೋನ್ತಿ ಯೇ ಭುವಿ.

೪೮. ಜಾಯಿತ್ವಾ ಖತ್ತವಂಸಮ್ಹಿ, ಖತ್ತವೀರವರೋಧಿತಂ;

ಯದಿಹಂ ನ ಕರಿಸ್ಸಾಮಿ, ಮೋಘಾ ಮೇ ಜಾತಿ ಹೇಸ್ಸತಿ.

೪೯. ತೇಸಮಬ್ಭಧಿಕಾ ಕಾಲ-ಸಮ್ಪದಾಯೇವ ಕೇವಲಂ;

ಮಯಾ ತೇ ಅಧಿಕಾ ಕಿನ್ತು, ಪಞ್ಞಾದೀಹೀತಿ ಚಿನ್ತಿಯ.

೫೦. ಪಿತುರಾಜಾ ಚ ಮೇ’ದಾನಿ, ಪಚ್ಛಿಮೇ ವಯಸಿಟ್ಠಿತೋ;

ಯದಿದಂ ಪೇತ್ತಿಕಂ ರಜ್ಜಂ, ಮಮ ಹತ್ಥಗತಬ್ಭವೇ.

೫೧. ರಾಜಲಕ್ಖಿವ ಸೋ ಪೇತ-ಚೇತಸೋ ಮೇ ಪಮಾದತೋ;

ಯಥಿಚ್ಛಿತಞ್ಚೇ ನ ಭವೇ, ಮಹತೀ ಜಾನಿ ಮೇ ಭುಸಂ.

೫೨. ಏತ್ಥೇವ ನಿವಸನ್ತೋ’ಹಂ, ಚರಾಪಿಯ ಸಕೇ ವರೇ;

ಪರಮಣ್ಡಲವುತ್ತನ್ತಂ, ಜಾನೇಯ್ಯಂ ಯದಿ ತತ್ತನೋ.

೫೩. ರನ್ಧಂ ಪಚ್ಚತ್ಥಿಕಾನನ್ತು, ಪಕಾಸೇತುಂ ರಥಾತಥಂ;

ಅಧಿಪ್ಪಾಯಾನುರೂಪಂ ಮೇ, ಸಮತ್ಥಾ ವಾ ನ ವಾಚರಾ.

೫೪. ಯೇ ಕೇಚಿ’ಧ ಜನಾ ಸನ್ತಿ, ಸಬ್ಬೇ ತೇ ಮಮ ಸಮ್ಮುಖಾ;

ಬಲೀಯತ್ತಂ’ವ ಸತ್ತೂನಂ, ಕಥಯನ್ತಿ ಅನೇಕಸೋ.

೫೫. ಪಚ್ಚೇಕರಟ್ಠಸಾಮೀಹಿ, ಪಿತುಭೂಪೇಹಿ ತಿಹಿಪಿ;

ಏಕೀಭೂಯ ಕರಿತ್ವಾನ, ಸತ್ತಕ್ಖತ್ತುಂ ಮಹಾಹವಂ.

೫೬. ಸಾಧೇತುಂ ದುಕ್ಕರಂ ರಟ್ಠಂ, ಭವತೇ ಕಾಕಿನಾ ಕಥಂ;

ಸಿಸುನಾ ಗಣ್ಹಿತುಂ ಸಕ್ಕಾ, ಖುದ್ದರಜ್ಜೋ ಪಭೋಗಿನಾ.

೫೭. ಸುಕರಂ ಮೂಲಭೂತಸ್ಸ, ತಸ್ಸ ರಜ್ಜಸ್ಸ ಸಾಧನಂ;

ಇತಿ ದುಚ್ಚಿನ್ತಂತಂ ತುಯ್ಹಂ, ದೂರೇ ತಬ್ಬಮಿದಂ’’ಇತಿ.

೫೮. ಕಣ್ಣೇ ತತ್ಥಸಲಾಕಾಯೋ, ಪವೇಸೇನ್ತಾ’ವ ನೇಕಸೋ;

ಮಹನ್ತತ್ತಂ ಕಥೇನ್ತೇ’ವಂ, ಬಹುಧಾ ಪರಮಣ್ಡಲೇ.

೫೯. ಅಜಾನನಂ ಯಥಾಭೂತಂ, ವದನ್ತಾನಂ ಕುಬುದ್ಧಿನಂ;

ಸಬ್ಬಮೇತಂ ವಚೋ ಜಾತು, ಸದ್ಧಾತಬ್ಬಂ ಸಿಯಾ ನ ಹಿ.

೬೦. ಲೇಸೇನೇಕೇನ ಗನ್ತ್ವಾನ, ಖಿಪ್ಪಂ’ವ ಪರಮಣ್ಡಲಂ;

ಸರೂಪಂ ತತ್ಥ ಉಸ್ಸಾಮಿ, ಅಹಮೇವೇತಿ ಚಿನ್ತಯಿ.

೬೧. ಯದಿ ಮೇ ಪೀತುಭೂಪಾಲೋ, ವಿಞ್ಞಾಯೇತಂ ವಿತಕ್ಕಿತಂ;

ಅಭಿಜಾತಸ್ಸ ಪುತ್ತಸ್ಸ, ವಂಸಜೋತಿಕರಸ್ಸ ಮೇ.

೬೨. ಗತಸ್ಸ ಸತ್ಥು ವಿಸಯ-ಮನತ್ಥೋಪಿ ಸಿಯಾ ಇತಿ;

ಅನುಕಮ್ಪಾಧಿಯಾ ಮಯ್ಹಂ, ಗಮನಂ ವಾರಯಿಸ್ಸತಿ.

೬೩. ಮನೋರಥಸ್ಸ ಸಂಸಿದ್ಧಿ, ಸಬ್ಬಥಾ ಮೇನ ಹೇಸ್ಸತಿ;

ತಸ್ಮಾ ನಿಗುಳರೂಪೇನ, ಗಮನಂ ಭದ್ದಕಂ ಇತಿ.

೬೪. ಲದ್ಧಾನ ರತ್ತಿಯಮ ಥೇಕದಿನಂ ಖಣಞ್ಞೂ,

ಸೋ ತಾದಿಸಂ ಖಣಮಖೀಣತರೋರೂಪಾಯೋ;

ಜಾನಾತಿ ನೋ ಸಕಪಿತಾಗಮನಂ ತಥಾತಂ,

ಗೇಹಾ’ಭಿನಿಕ್ಖಮಿತಥಾ ಚತುರೋ ಕುಮಾರೋ.

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ಪರಮಣ್ಡಲಾಭಿಗಮನೋ ನಾಮ

ದ್ವಿಸಟ್ಠಿಮೋ ಪರಿಚ್ಛೇದೋ.