ಸಟ್ಠಿಮ ಪರಿಚ್ಛೇದ

ಕುಮಾರೋದಯೋ

೧. ರೋಹಣೇ ನಿವಸಿತ್ಥಾ’ವ, ಜಯಬಾಹುಮಹೀಪತಿ;

ಮಿತ್ತಾವ್ಹಾ ರಾಜಿನೀ ಚೇವ, ತದಾ ಕಾಲಮಕಂಸು ತೇ.

೨. ಸಿರೀವಲ್ಲಭಜಾಯಾ’ಥ, ಜನೇಸಿ ಸುಗಲಾ ದುವೇ;

ಮಾಣಭರಣಕಂ ಪುತ್ತಂ, ಪುತ್ತಿಂ ಲೀಲಾವತಿಮ್ಪಿ ಚ.

೩. ಮಾಣಾಭರಣಭೂಪಾಲ-ದೇವೀ’ಪಿ ರತನಾವಲೀ;

ಮಿತ್ತಂ ಪಭಾವತಿಞ್ಚಾಪಿ, ಅಲಭೀ ಧೀತರೋ ದುವೇ.

೪. ಪಸ್ಸನ್ತಸ್ಸ ಉಭೋ ತಾಯೋ, ಧೀತರೋ ವೀರಬಾಹುನೋ;

ತದಾ ಮಹಾದಿಪಾದಸ್ಸ, ಏವಂ ಆಸಿ ವಿತಕ್ಕಿತಂ.

೫. ಲೋಕಾಭಿಸಮ್ಮತೇ ಸಬ್ಬ-ಭೂಪಾಲನ್ವಯಮುದ್ಧನಿ;

ವಿಸುದ್ಧೇ ಸೋಮವಂಸಮ್ಹಿ, ಅಭಿಜಾತಾ ಮಯಂ ಪನ.

೬. ಪಿಹನೀಯತರಾಕಾರಾ, ಸಬ್ಬಸತ್ತಿಸಮುನ್ನತಾ;

ನಾನಾವಿಜ್ಜಾಸು ನಿಪುಣಾ, ಹತ್ಥಿಅಸ್ಸಾದಿಸುಕ್ಖಮಾ.

೭. ತಥಾ ಪೇಕಾಕಿನಾ ವೇ’ತೇ, ತಯೋ ವಿಕ್ಕಮಬಾಹುನಾ;

ಪರಾಜಯಂ ಪರಿಭವಂ, ಪಾಪಿತಾ ಬಹುಸೋ ರಣೇ.

೮. ಸೂನುನೋ ಸುಸಮತ್ಥಸ್ಸ, ವಿಸೋಧೇತು ಮಿಮಂ ಮಲಂ;

ನ ದಿಸ್ಸತೇ ಪಾತುಭಾವೋ, ಅಹೋ ನೋ ಅಪ್ಪಪುಞ್ಞತಾ.

೯. ಜನವಾದಕಿಲಿಟ್ಠೇನ, ರಾಜತ್ತೇನಾಪಿ ಕಿಂ ಮಮ;

ಇದಾನಿ ವಿಸಯಾಸಙ್ಗಂ, ಹಿತ್ವಾ ಕಲ್ಯಾಣಕಮ್ಮಸು.

೧೦. ಅಪ್ಪಮತ್ತಸ್ಸ ಸತತಂ, ನೇತಬ್ಬಾ ವಾಸರಾ’ಇತಿ;

ನಿಯ್ಯಾತೇತ್ವಾ ಅಮಚ್ಚಾನಂ, ಸಬ್ಬಂ ರಜ್ಜವಿಚಾರಣಂ.

೧೧. ತಹಿಂ ಸತ್ತ’ಟ್ಠಮಾಸಞ್ಹಿ, ವಸಂ ರತ್ತಿಯಮೇಕದಾ;

ದೇವರಾಜಘರೇಸೇಯ್ಯಂ, ಕಪ್ಪೇಸಿ ಸೀಲಸಂಯತೋ.

೧೨. ತತೋ ಪಚ್ಚೂಸಕಾಲಮ್ಹಿ, ದೇವಪುತ್ತಂ ಮಹಿದ್ಧಿಕಂ;

ವಿಚಿತ್ತವತ್ಥಾಭರಣಂ, ಗನ್ಧಮಾಲಾವಿಭೂಸಿತಂ.

೧೩. ಉಳಾರತರರೂಪೇನ, ದೇಹೋಭಾಸೇನ ಅತ್ತನೋ;

ಓಭಾಸೇನ್ತಂ ಅಸೇಸಾ’ಸಾ, ಸೂರಿಯಞ್ಚ ನ ಭುಗ್ಗತಂ.

೧೪. ವದನ್ತಂ ಸುಪಿನೇ ಏವಂ, ಅದಕ್ಖಿ ದರಣೀಪತಿ;

ಪಸೀದಸ್ಸು ಮಹಾಭಾಗ, ಪಿತೋಭವ ಮಹಿಪತಿ.

೧೫. ಧಞ್ಞಲಕ್ಖಣಸಮ್ಪನ್ನೋ, ಇಚ್ಛಿತತ್ಥಸ್ಸಸಾಧಕೋ;

ವಿನೀತೋ ಲೋಕಕುಹರ-ಬ್ಯಾಪಿತೇಜೋ ಪರಕ್ಕಮೋ.

೧೬. ಆಣಬಲಯಸೋಕಿತ್ತಿ-ಭಾಸುರೋ ಸಗ್ಗುಣಾಕರೋ;

ಲೋಕಸಾಸನಸಂವುದ್ಧಿ-ಕರೋ ಪುತ್ತವರೋ ತವ.

೧೭. ಲಬ್ಭೀಸ್ಸತೇ ಮಹಾರಾಜ, ನ ಚಿರಸ್ಸೇವ ಸಮ್ಪತಿ;

ಪುತ್ತದಾರಾಧಿವುತ್ಥಂ ತಂ, ಪುರಂ ಖಿಪ್ಪಂ ಪಯಾಹೀತಿ.

೧೮. ಪಬುಜ್ಝಿತ್ವಾನ ಸಞ್ಜಾತ-ಪೀತಿವೇಗೋಥ ರತ್ತಿಯಾ;

ವಿಭಾತಾಯ ತತೋಪೋಙ್ಖ-ಗಾಮಂ ಗಞ್ಛಿನರುತ್ತಮೋ.

೧೯. ಯಥಾ ದಿಟ್ಠಪ್ಪಕಾರನ್ತಂ, ಕಥೇಸಿ ಸುಪಿನಂ ಸುಭಂ;

ಮಹೇಸೀ ಪಮುಖಾನಂ ಸೋ, ಅಮಚ್ಚಾನಂ ಮಹೀಪತಿ.

೨೦. ಸದ್ಧಿಂ ಮಹೇಸಿಯಾ ತತ್ಥ, ಪತ್ಥೇನ್ತೋ ಪುತ್ತಮುತ್ತಮಂ;

ಚಿನ್ತೋನ್ತೋ ದಾನಸೀಲಾದಿಂ, ಸುಭಂ ನಾನಪ್ಪಕಾರಕಂ.

೨೧. ಅಥೇಕದಿವಸಂಕಾಲೇ, ಪಚ್ಚೂಸೇ ಸುಪಿನೇ ಪನ;

ಸಬ್ಬಲಕ್ಖಣಸಮ್ಪನ್ನಂ, ಸಬ್ಬಸೇತಂ ಮನೋಹರಂ.

೨೨. ದನ್ತೀಪೋತವರಂ ದನ್ತಂ, ಕಣ್ಣೇ ಗಣಿಯಪೇಮತೋ;

ಪವಿಸನ್ತಮಿವತ್ತಾನಂ, ಸೇಯ್ಯಾಗಬ್ಭಂ ಮಹೇಸಿಯಾ.

೨೩. ಸಮ್ಪಸ್ಸಿಯ ಪಬುಜ್ಝಿತ್ವಾ, ಉಟ್ಠಾಯ ಸಯನಾವರಾ;

ಸಞ್ಜಾತಪೀತಿಪಾಮೋಜ್ಜ-ವೇಗಪೀಣಿತಮಾನಸೋ.

೨೪. ತಾಯಂ ವೇಲಾಯಮೇದಾಸು-ಸೇಯ್ಯಾಗಬ್ಭಂ ಮಹೇಸಿಯಾ;

ಪವಿಸ್ಸಸುಪಿನಂ ತಸ್ಸಾ, ಯಥಾದಿಟ್ಠಂ ಪಕಾಸಯೀ.

೨೫. ಅಹಮ್ಪಿ ತಾದಿಸಂ ಹತ್ಥಿ-ಪೋತಕಂ ಸಯನಂ ಮಮ;

ಪದಕ್ಖಿಣಂ ಕರಿತ್ವಾನ, ಠಿತಂ ಸೋಣ್ಡೇ ಸಮಾದಿಯ.

೨೬. ಆಕಡ್ಢಿತ್ವಾನ ಸಯನಂ, ಸಮಾರೋಪಿಯ ಪೇಮತೋ;

ಆಲಿಙ್ಗಿಂ ಸುಪಿನಮ್ಹೀತಿ, ದೇವೀ ಚಾಪಿ ತಮಬ್ರವೀ.

೨೭. ಉಭೋ ತೇ ಅಞ್ಞಮಞ್ಞಸ್ಸ, ದಿಟ್ಠಮೇವಂ ಪಕಾಸಿಯ;

ಉಟ್ಠಾಪೇಸುಂ ಪಹಟ್ಠಾವ, ವೀತನಿದ್ದಾರುಣಂ ತದಾ.

೨೮. ತತೋ ಪಾತೋ ಉಪಟ್ಠಾತು, ಮುಪಯಾತಂ ಪುರೋಹಿತಂ;

ನೇಮಿತ್ತಕೇ ಚ ಪುಚ್ಛಿಂಸು, ಸುನಿತ್ವಾ ತೇ ಪಮೋದಿತಾ.

೨೯. ನ ಚಿರಸ್ಸೇವ ಪುತ್ತಸ್ಸ, ಧಞ್ಞಲಕ್ಖಣಸಾಲಿನೋ;

ಉಪ್ಪತ್ತಿಯಾ ಅವಸ್ಸಂ’ವ, ಭವಂತಬ್ಬನ್ತಿ ಕಿತ್ತಯುಂ.

೩೦. ತಂ ಸುಣಿತ್ವಾ ಅಮಚ್ಚಾ ಚ, ತಥಾ ನಗರವಾಸಿನೋ;

ಅವಿನ್ದಿಂಸು ಜನಿನ್ದೋ ಚ, ಸಬ್ಬೇಪೀತಿ ಮಹುಸ್ಸವಂ.

೩೧. ತತೋ ಪಟ್ಠಾಯ ಸೋತ್ಥಾನಂ, ಪತ್ಥಯಂ ಪತ್ಥಿವೋಭುಸಂ;

ಭಿಕ್ಖುಸಙ್ಘೇನ ಬಹುಸೋ, ಭಣಾಪೇಸಿ ಪರಿತ್ತಕಂ.

೩೨. ಮಣಿಮುತ್ತಾದಿಕಂ ಚಿತ್ತಂ, ಮಹಗ್ಘಮನುವಾಸರಂ;

ಪರಿಚ್ಚಜಿ ದಾನಮುಖೇ, ಯಾಚಕಾನಮನೇಕಸೋ.

೩೩. ಪುರೋಹಿತಾದಿವಿಪ್ಪೇಹಿ, ವೇದವೇದಙ್ಗವಿಞ್ಞೂಹಿ;

ವತ್ತಾಪೇಸಿ ಚ ಹೋಮಾದಿ-ವಿಧಾನಂ ಸೋತ್ಥಿ ಸಮ್ಮತಂ.

೩೪. ಸುವಿನಟ್ಠೇ ವಿಹಾರೇ ಚ, ಧಾತುಗಬ್ಭೇ ಚ ವಾಪಿಯೋ;

ಜಿಣ್ಣಾ ಚ ಪಟಿಸಙ್ಖತ್ತುಂ, ಯೋಜಯೀ ರಾಜಕಪ್ಪಿಕೇ.

೩೫. ದಿನಂ ನಯನ್ತೇ ಕಲ್ಯಾಣ-ಕಮ್ಮೇನೇ’ವಂ ನರಿಸ್ಸರೇ;

ನ ಚಿರಂ ಸಣ್ಠಹಿ ಗಬ್ಭ-ವರೋ ಕುಚ್ಛಿಮ್ಹಿ ದೇವಿಯಾ.

೩೬. ತತೋವಗಮ್ಮ ತಂ ಹಟ್ಠ-ಪಹಟ್ಠೋ ಸೋ ನರಿಸ್ಸರೋ;

ಮಹನ್ತಂ ದೇವಿಯಾ ಗಬ್ಭ-ಪರಿಹಾರಮದಾಪಯಿ.

೩೭. ಪರಿಪಕ್ಕಗಬ್ಭಾ ದೇವೀ, ಕಮೇನ ಜನಯೀಸುಕಂ;

ಸಮಯೇ ಭದ್ದನಕ್ಖತ್ತ-ಮುಹುತ್ತೇನಭಿಲಕ್ಖಿತೇ.

೩೮. ಸುಪ್ಪಸನ್ನಾ ಅಸೇಸಾ ಚ, ದಿಸಾಯೋ ತಂಖಣೇ ಅಹು;

ಸಮೀರಣೇ ಚ ವಾಸಿಂಸು, ಸುಗನ್ಧಿಮುದುಸೀತಲಾ.

೩೯. ದನ್ತೀನಂ ಕೋಞ್ಚನಾದೇನ, ಹಯಾನಂ ಹೇಸಿತೇನ ಚ;

ರಾಜಙ್ಗಣಂ ತದಾಜಾತಂ, ಮಹಾಕೋಲಾಹಲಾ ಕೂಲಂ.

೪೦. ಅಚ್ಛೇರಾತಿಸಯೇ ಏವಂ, ಪಾತುಭೂತೇ ಅನೇಕಧಾ;

ದಿಸ್ವಾ ತಂ ವಿಮ್ಹಯಪ್ಪತ್ತೋ, ಮಾಣಭರಣಭೂಪತಿ.

೪೧. ಸುತ್ವಾ ನಿಜಸ್ಸ ಪುತ್ತಸ್ಸ, ತದಾ ಸಞ್ಜಾತಸಾಸನಂ;

ಅಮತೇನಾಭಿಸಿತ್ತೋವ, ಪೀತಿಪುಣ್ಣಮನೋರಥೋ.

೪೨. ಮೋಚಾಪೇತ್ವಾ ತದಾ ಕಾರಾ-ಘರೇ ಬದ್ಧೇ ಬಹೂಜನೇ;

ದಾನಂ ಉಳಾರಂ ಸಮಣ-ಬ್ರಾಹ್ಮಣಾನಂ ಪದಾಪಯಿ.

೪೩. ಅಮಚ್ಚಪಮುಖಾ ಚಾಪಿ, ಜನಾಪುರನಿವಾಸಿನೋ;

ಕದಲೀತೋರಣಾದೀಹಿ, ರಾಜಧಾನೀ ಮನೇಕಧಾ.

೪೪. ಅಲಙ್ಕರಿತ್ವಾ ಸಕಲಂ, ಸುಮಣ್ಡಿತಪಸಾಧಿತಾ;

ಛಣಂ ಮಹನ್ತಂ ವತ್ತೇಸುಂ, ಕತಿಪಾಹಂ ಮನೋರಮಂ.

೪೫. ವೇದೇ ವುತ್ತವಿಧಾನೇನ, ಜಾತಕಮ್ಮಾದಿಕಂ ವಿಧಿಂ;

ಸಬ್ಬಂ ಸಮಾಪಯಿತ್ವಾನ, ಕುಮಾರಸ್ಸಾ’ವನೀಪತಿ.

೪೬. ಪುರೋಹಿತಾದಯೋ ವಿಪ್ಪೇ, ತತೋ ಲಕ್ಖಣಪಾಠಕೇ;

ಆಣಾಪೇತ್ವಾನ ಸಕ್ಕಾರ-ಸಮ್ಮಾನವಿಧಿಪುಬ್ಬಕಂ.

೪೭. ನಿಯೋಜೇಸಿ ಕುಮಾರಸ್ಸ, ಲಕ್ಖಣಾನಂ ಪಟಿಗ್ಗಹೇ;

ಸಾಧಕಂ ಸಕಲಂ ತಸ್ಸ, ಯತ್ಥಪಾದಾದಿಲಕ್ಖಣಂ.

೪೮. ಉಪಧಾರಿಯ ಮಹಾಮಚ್ಚ-ಗಣಮಜ್ಝಗತಸ್ಸ ತೇ;

ರಾಜಿನೋ ದೇವಿಯಾ ಚಾಪಿ, ಪಕಾಸೇಸುಂ ಪಮೋದಿತಾ.

೪೯. ಲಙ್ಕಾದೀಪಂ ಠಪೇತ್ವಾನ, ಜಮ್ಬುದೀಪತಲಮ್ಪಿ ಚ;

ಏಕಚ್ಛತ್ತಙ್ಕಿತಂ ಕತ್ವಾ-ನುಭೋತ್ತುಂ ನಿಪುಣೋ ಇತಿ.

೫೦. ತೇ ಸನ್ತಪ್ಪಿಯ ಭೋಗೇಹಿ, ಭಿಯ್ಯೋ ಪುಚ್ಛಿತ್ಥ ಸಾದರಂ;

ಸನ್ದಿಸ್ಸಮಾನಂ ಯಂಕಿಞ್ಚಿ, ಅರಿಟ್ಠಂ ಅತ್ಥಿ ನತ್ಥೀ’ತಿ.

೫೧. ದೀಘಾಯುಕೋ ಕುಮಾರೋ’ಯಂ, ಕಿಞ್ಚಿ ಪಞ್ಞಾಯತೇ ವತ;

ಜನಕಾರಿಟ್ಠಯೋಗೋ’ತಿ, ತೇ ಮಹೀಪತಿನೋ’ಬ್ರವುಂ.

೫೨. ತಸ್ಸಾರಿಜನಸಮ್ಮದ್ದಿ-ಪತಾಪಭುಜಯೋ ಗತೋ;

ಸೋ ಪರಕ್ಕಮಬಾಹೂ’ತಿ, ಅನ್ವತ್ಥನಾಮಮಗ್ಗಹೀ.

೫೩. ಕಣ್ಣವೇ ಧಮಹಞ್ಚೇವ, ಅನ್ನುಪಾಸನಮಙ್ಗಲಂ;

ಕಾರಾಪಿಯ ವಿಧಾನಞ್ಞೂ, ಯಥಾವಿಧಿಮಸೇಸತೋ.

೫೪. ರಞ್ಞೋ ವಿಕ್ಕಮಬಾಹುಸ್ಸ, ಸಪುತ್ತುಪ್ಪತ್ತಿಸಾಸನಂ;

ವತ್ತುಂ ಸದೂತೇ ಪೇಸೇಸಿ, ಪುಲತ್ಥಿನಗರಂ ತದಾ.

೫೫. ತೇಹಿಸೋ ಭಾಗಿನೇಯ್ಯಸ್ಸ, ಮಹಾಭಾಗತ್ತನಮ್ಪಿ ಚ;

ಜನಕಾರಿಟ್ಠಯೋಗಞ್ಚ, ಸುತ್ವಾ ವಿಕ್ಕಮಬಾಹುಸೋ.

೫೬. ಧಞ್ಞಂ ವಿಜಯರಾಜಾದಿ-ರಾಜಮಾಲಾಯ ನಾಯಕಂ;

ಮಣಿಂವ ಭಾಸುರಂ ಮಯ್ಹಂ, ಭಾಗಿನೇಯ್ಯಂ ಜನೇಸಿಸೋ.

೫೭. ಹಾನಿ ಯಾಕಾಚಿಸತತಂ, ಯಥಾ ತಸ್ಸ ನ ಹೇಸ್ಸತಿ;

ತಥಾ ಮಮನ್ತಿಕೇಯೇವ, ಕುಮಾರೋ ಏತ್ಥ ವಡ್ಢತಂ.

೫೮. ಅಲದ್ಧಂ ಲಭಿತುಂ ಲಾಭಂ, ಲದ್ಧಞ್ಚ ಪರಿರಕ್ಖಿತುಂ;

ಸಬ್ಬಥಾ ನ ಸಮತ್ಥೋಯಂ, ಪುತ್ತೋ ಗಜಬಾಹು ಮಮ.

೫೯. ಸೂರಭಾವಾದಿಯುತ್ತೋ’ಪಿ, ಮಹಿನ್ದವ್ಹಪರೋಸುತೋ;

ನಿಹೀನೋ ಮಾತುಗೋತ್ತೇನ, ನ ರಜ್ಜಸ್ಸ ರಹೋ ಮಮ.

೬೦. ಠಿತಸ್ಸ ವಿಕ್ಕಜಾತೇನ, ನೇಕಸೋ ಸಞ್ಚಿತೇನ ಮೇ;

ರಜ್ಜಸ್ಸ ಭಾಗಿನೇಯ್ಯೋ’ವ, ಕಾಮಂ ಭಾಗೀ ಭವಿಸ್ಸತಿ.

೬೧. ಇತಿಪೇಸೇಸಿ ದೂತೇ ಸೋ, ಆನೇತುಂ ತಂ ಕುಮಾರಕಂ;

ಕುಮಾರಾ ಭರಣಂ ದತ್ವಾ, ಸೇಸಂ ಸಾರಞ್ಚುಪಾಯನಂ.

೬೨. ಸಬ್ಬಂ ದೂತಮುಖಾ ಸುತ್ವಾ, ವೀರಬಾಹು ಮಹೀಪತಿ;

ತಸ್ಸೇತಂ ವಚನಂ ಯುತ್ತಂ, ವುತ್ತಂ ಮೇಹಿತ ಬುದ್ಧಿಯಾ.

೬೩. ತಥಾಪಿ ಚ ನಿಜಾರಿಟ್ಠ-ಪಟಿಕಾರತ್ಥಮೀದಿಸಂ;

ಓರಸಂ ಪುತ್ತರತನಂ, ಪೇಸೇತುಂ ನಾ’ನುರೂಪಕಂ.

೬೪. ಕಿಞ್ಚ ತತ್ಥ ಕುಮಾರಮ್ಹಿ, ನೀತೇ ವಿಕ್ಕಮ ಬಾಹುನೋ;

ಪಕ್ಖೋ ಲದ್ಧಮಹಾವಾಹ-ಬಲೋ ವಿಯ ಹುತಾಸನೋ.

೬೫. ಅಚ್ಚುನ್ನತೇನ ಮಹತಾ, ತೇಜಸಾ ಸಞ್ಜಲಿಸ್ಸತಿ;

ಹಾನಿರೇವ ವತಮ್ಹಾಕಂ, ಮಹತೀ ಹೇಸ್ಸತೇ ಭುಸಂ.

೬೬. ಇತಿ ಹತ್ಥೇ ಗತಾನಂ ಸೋ, ದೂತಾನಂ ಥನಯಂ ಸಕಂ;

ಅಪೇಸೇತ್ವಾ ವಿಸಜ್ಜೇಸಿ, ಪಸಾದಿಯ ಮನೇನ ಸೋ.

೬೭. ಸಪುತ್ತದಾರೇಹಿ ಸಮಗ್ಗವಾಸಂ,

ನರಾದಿನಾಥೋ ನಿವಸಂ ತಹಿಂಸೋ;

ತಿಬ್ಬೇನ ಫುಟ್ಠೋ ಮಹತಾಗದೇನ,

ರಜ್ಜೇನ ಸದ್ಧಿಂ ವಿಜಹಿತ್ಥ ದೇಸಂ.

ಸುಜನಪ್ಪಸಾದಸಂವೇ ಗತ್ಥಾಯ ಕತೇ ಮಹಾವಂಸೇ

ಕುಮಾರೋದಯೋ ನಾಮ

ಸಟ್ಠಿಮೋ ಪರಿಚ್ಛೇದೋ.