ಛಟ್ಠಪರಿಚ್ಛೇದ

ವಿಜಯಾಗಮನಂ

೧. ವಙ್ಗೇಸು ವಙ್ಗನಗರೇ, ವಙ್ಗರಾಜಾ ಅಹು ಪುರೇ;

ಕಾಲಿಙ್ಗರಞ್ಞೋ ಧೀತಾ’ಸಿ, ಮಹೇಸೀ ತಸ್ಸ ರಾಜಿನೋ.

೨. ಸೋ ರಾಜಾ ದೇವಿಯಾ ತಸ್ಸಾ, ಏಕಂ ಅಲಭಿ ಧೀತರಂ;

ನೇಮಿತ್ತಾಬ್ಯಾಕರುಂ ತಸ್ಸಾ, ಸಂವಾಸಂ ಮಗರಾಜಿನಾ.

೩. ಅತೀವ ರೂಪಿನಿಂ ಆಸಿ, ಅತೀವ ಕಾಮಗಿದ್ಧಿನೀ;

ದೇವೇನ ದೇವಿಯಾ’ಚಾಪಿ, ಲಜ್ಜಾಯಾ’ಸಿ ಜಗುಚ್ಛಿತಾ.

೪. ಏಕಾಕಿನೀ ಸಾ ನಿಕ್ಖಮ್ಮ, ಸೇರೀಚಾರಸುಖತ್ಥಿನೀ;

ಸತ್ಥೇನ ಸಹ ಅಞ್ಞಾತಾ, ಅಗಾ ಮಗಧಗಾಮಿನಾ.

೫. ಲಾಳರಟ್ಠೇ ಅಟವಿಯಾ, ಸೀಹೋ ಸತ್ಥಮಭಿದ್ಧವಿ;

ಅಞ್ಞತ್ಥ ಸೇಸಾ ಧಾವಿಂಸು, ಸೀಹಗತದಿಸನ್ತುಸಾ.

೬. ಗಣ್ಹಿತ್ವಾ ಗೋಚರಂ ಸೀಹೋ, ಗಚ್ಛಂ ದಿಸ್ವಾ ತಮಾ’ರತೋ;

ರತ್ತೋ ಉಪಾಗಲಾಲೇನ್ತೋ, ಲಙ್ಗುಲಂ ಪತ್ತಕಣ್ಣಕೋ.

೭. ಸಾ ತಂ ದಿಸ್ವಾ ಸರಿತ್ವಾನ, ನೇಮಿತ್ತವಚನಂ ಸುತಂ;

ಅಭೀತಾ ತಸ್ಸ ಅಙ್ಗಾನಿ, ರಞ್ಜಯನ್ತಿ ಪರಾಮಸಿ.

೮. ತಸ್ಸಾ ಫಸ್ಸೇನಾ’ತಿ ರತ್ತೋ, ಪಿಟ್ಠಿಂ ಆರೋಪಿಯಾ’ಸುತಂ;

ಸೀಹೋ ಸಕಂ ಗುಹಂ ನೇತ್ವಾ, ತಾಯ ಸಂವಾಸಮಾಚರಿ.

೯. ತೇನ ಸಂವಾಸಮನ್ವಾಯ, ಕಾಲೇನ ಯಮಕೇ ದುವೇ;

ಪುತ್ತಞ್ಚ ಧೀತರಞ್ಚಾತಿ, ರಾಜಧೀತಾ ಜನೇಸಿ ಸಾ.

೧೦. ಪುತ್ತಸ್ಸ ಹತ್ಥಪಾದಾ’ಸುಂ, ಸೀಹಾಕಾರಾ ತತೋ ಅಕಾ;

ನಾಮೇನ ಸೀಹಬಾಹುಂ ತಂ, ಧೀತರಂ ಸೀಹಸೀವಲಿಂ.

೧೧. ಪುತ್ತೋ ಸೋಳಸವಸ್ಸೋ ಸೋ, ಮಾತರಂ ಪುಚ್ಛಿ ಸಂಸಯಂ;

ತುವಂ ಪಿತಾ ಚ ನೋ ಅಮ್ಮ, ಕಸ್ಮಾ ವಿಸದಿಸಾ ಇತಿ.

೧೨. ಸಾ ಸಬ್ಬಮಬ್ರವೀ ತಸ್ಸ, ಕಿಂನಯಾಮಾ’ತಿ ಸೋ’ಬ್ರವಿ;

ಗುಹಂ ಥಕೇತಿತಾತೋ ತೇ, ಪಾಸಾಣೇನಾತಿ ಸಾ’ಬ್ರವಿ.

೧೩. ಮಹಾಗುಹಾಯ ಥಕನಂ, ಖನ್ಧೇನಾ’ದಾಯ ಸೋ ಅಕಾ;

ಏಕಾಹೇನೇ’ವ ಪಞ್ಞಾಸ-ಯೋಜನಾನಿ ಗತಾಗತಂ.

೧೪. ಗೋಚರಾಯ ಗಹೇ ಸೀಹೇ, ದಕ್ಖಿಣಸ್ಮಿಞ್ಹಿ ಮಾತರಂ;

ವಾಮೇ ಕಣಿಟ್ಠಿಂ ಕತ್ವಾನ, ತಯೋ ಸೀಘಂ ಅಪಕ್ಕಮೀ.

೧೫. ನಿವಾಸೇತ್ವಾನ ಸಾಖಂ ತೇ, ಪಚ್ಚನ್ತಂ ಗಾಮಮಾಗಮುಂ;

ತತ್ಥಾಸಿ ರಾಜಿಧೀತಾಯ, ಮಾತುಲಸ್ಸ ಸುತೋ ತದಾ.

೧೬. ಸೇನಾಪತಿ ವಙ್ಗರಞ್ಞೋ, ಠಿತೋ ಪಚ್ಚನ್ತ ಗಾಮಕೋ;

ನಿಸಿನ್ನೋವಟಮೂಲಲೇಸೋ, ಕಮ್ಮನ್ತಂ ಸಂವಿಧಾಯಕಂ.

೧೭. ದಿಸ್ವಾ ತೇ ಪುಚ್ಛಿತೇ’ವೋಚುಂ, ಅಟವೀ ವಾಸಿನೋ ಮಯಂ;

ಇತಿ ಸೋ ದಾಪಯೀ ತೇಸಂ, ವತ್ಥಾನಿ ಧಜಿನೀ ಪತಿ.

೧೮. ತಾನಾ’ಹೇಸುಂ ಉಳಾರಾನಿ, ಭತ್ತಂ ಪಣ್ಣೇಸು ದಾಪಯಿ;

ಸೋವಣ್ಣಭಾಜನನಾ’ಸುಂ, ತೇಸಂ ಪುಞ್ಞೇನ ತಾನಿ ಚ.

೧೯. ತೇನ ಸೋ ವಿಮ್ಹಿತೋ ಪುಚ್ಛಿ, ಕೇ ತುಮ್ಹೇತಿ ಚಮೂಪತಿ;

ತಸ್ಸ ಸಾ ಜಾತಿಗೋತ್ತಾನಿ, ರಾಜಧೀತಾ ನಿವೇದಯಿ.

೨೦. ಪಿತುಚ್ಛಾ ಧೀತರಂ ತಂ ಸೋ, ಆದಾಯ ಧಜಿನೀ ಪತಿ;

ಗನ್ತ್ವಾನ ವಙ್ಗನಗರಂ, ಸಂವಾಸಂ ತಾಯ ಕಪ್ಪಯಿ.

೨೧. ಸೀಹೋ ಸೀಘಂ ಗುಹಂ ಗನ್ತ್ವಾ, ತೇ ಅದಿಸ್ವಾ ತಯೋ ಜನೇ;

ಅಟ್ಟಿತೋ ಪುತ್ತಸೋಕೇನ, ನ ಚ ಖಾದಿ ನ ಚಾ’ಪಿವಿ.

೨೨. ದಾರಕೇ ತೇ ಗವೇಸನ್ತೋ, ಅಗಾ ಪಚ್ಚನ್ತಗಾಮಕೇ;

ಉಬ್ಬಾಸೀಯತಿ ಸೋ ಸೋ’ವ, ಯಂಯಂ ಗಾಮಮುಪೇತಿ ಸೋ.

೨೩. ಪಚ್ಚನ್ತವಾಸಿನೋ ಗನ್ತ್ವಾ, ರಞ್ಞೋ ತಂ ಪಟಿವೇದಯುಂ;

ಸೀಹೋ ಪಿಳೇತಿ ತೇ ರಟ್ಠಂ, ತಂ ದೇವ ಪಟಿಸೇಧಯ.

೨೪. ಅಲಕಂ ನಿಸೇಧಕಂ ತಸ್ಸ, ಹತ್ಥಿಕ್ಖನ್ಧಗತಂ ಪುರೇ;

ಆದೇತು ಸೀಹದಾಯೀತಿ, ಸಹಸ್ಸಂ ಸೋ ಪಚಾರಯಿ.

೨೫. ತಥೇವ ದ್ವೇಸಹಸ್ಸಾನಿ, ತೀಣಿಚಾ’ಪಿ ನರಿಸ್ಸರೋ;

ದ್ವೀಸು ವಾರೇಸು ವಾರೇಸಿ, ಮಾತಾ ಸೀಹಭುಜಂ ಹಿತಂ.

೨೬. ಅಗ್ಗಹಿ ತತಿಯೇ ವಾರೇ, ಸೀಹಬಾಹು ಅಪುಚ್ಛಿಯ;

ಮಾತರಂ ತಿಸಹಸ್ಸಂ ತಂ, ಘಾತೇತುಂ ಪಿತರಂ ಸಕಂ.

೨೭. ರಞ್ಞೋ ಕುಮಾರಂ ದಸ್ಸೇಸುಂ, ತಂ ರಾಜಾ ಇಧ ಮಬ್ರವಿ;

ಗಹಿತೋ ಯದಿ ಸೀಹೋ ತೇ, ದಮ್ಮಿ ರಟ್ಠಂ ತದೇವ ತೇ.

೨೮. ಸೋ ತಂ ಗನ್ತ್ವಾ ಗುಹಾದ್ವಾರಂ, ಸೀಹಂ ದಿಸ್ವಾವ ಆರಕಾ;

ಏನ್ತಂ ಪುತ್ತಸಿನೇಹೇನ, ವಿಜ್ಝಿತುಂ ತಂ ಸರಂ ಖಿಪಿ.

೨೯. ಸರೋ ನಳಾತಮಾಹಚ್ಚ, ಮೇತ್ತಚಿತ್ತೇನ ಥಸ್ಸ ತು;

ಕುಮಾರಪಾದಮೂಲೇ’ವ, ನಿವತ್ತೋ ಪತಿ ಭೂಮಿಯಂ.

೩೦. ತಥಾ’ಸಿ ಯಾವ ತತಿಯಂ, ತತೋ ಕುಜ್ಝಿಮಿಗಾಮಿಪೋ;

ತತೋ ಖಿತ್ತೋ ಸರೋತಸ್ಸ, ಕಾಯಂ ನಿಬ್ಬಿಜ್ಜ ನಿಕ್ಖಮಿ.

೩೧. ಸಕೇಸರಂ ಸೀಹಸೀಸಂ, ಆದಾಯ ಸಪುರಂ ಅಗಾ;

ಮತಸ್ಸ ವಙ್ಗರಾಜಸ್ಸ, ಸತ್ತಾಹಾನಿ ತದಾ ಅಹು.

೩೨. ರಞ್ಞೋ ಅಪುತ್ತಕತ್ತಾ ಚ, ಪತೀತಾ ಚಸ್ಸ ಕಮ್ಮುನಾ;

ಸುತ್ವಾ ಚ ರಞ್ಞೋ ನತ್ತುತ್ತಂ, ಸಞ್ಜಾನಿತ್ವಾ ಚ ಮಾತರಂ.

೩೩. ಅಮಚ್ಚಾ ಸನ್ನಿಪತಿತಾ, ಅಖಿಲಾ ಏಕಮಾನಸಾ;

ಸೀಹಬಾಹು ಕುಮಾರಸ್ಸ, ರಾಜಾ ಹೋಹೀತಿ ಅಬ್ರವುಂ.

೩೪. ಸೋ ರಜ್ಜಂ ಸಮ್ಪಟಿಚ್ಛಿತ್ವಾ, ದತ್ವಾ ಮಾತು ಪತಿಸ್ಸ ತಂ;

ಸೀಹಸೀವಲಿಮಾದಾಯ, ಜಾತಭೂಮಿಂ ಗತೋ ಸಯಂ.

೩೫. ನಗರಂ ತತ್ಥ ಮಾಪೇಸಿ, ಅಹು ಸೀಹಪುರನ್ತಿ ತಂ;

ಅರಞ್ಞೇ ಯೋಜನಸತೇ, ಗಾಮೇ ಚಾಪಿ ನಿವೇಸಯಿ.

೩೬. ಲಾಳರಟ್ಠೇ ಪುರೇ ತಸ್ಮಿಂ, ಸೀಹಬಾಹುನರಾಧಿಪೋ;

ರಜ್ಜಂ ಕಾರೇಸಿ ಕತ್ವಾನ, ಮಹೇಸಿಂ ಸೀಹಸೀವಲಿಂ.

೩೭. ಮಹೇಸೀ ಸೋಳಸಕ್ಖತ್ತುಂ, ಯಮಕೇ ಚ ದುವೇ ದುವೇ;

ಪುತ್ತೇ ಜನಯಿ ಕಾಲೇಸಾ, ವಿಜಯೋ ನಾಮ ಜೇಟ್ಠಕೋ.

೩೮. ಸುಮಿತ್ತೋ ನಾಮ ದುತಿಯೋ, ಸಬ್ಬೇ ದ್ವತ್ತಿಂಸ ಪುತ್ತಕಾ;

ಕಾಲೇನ ವಿಜಯಂ ರಾಜಾ, ಉಪರಜ್ಜೇ’ಭಿ ಸೇಚಯಿ.

೩೯. ವಿಜಯೋ ವಿಸಮಾಚಾರೋ, ಆಸಿ ತಮ್ಪರಿಸಾಪಿ ಚ;

ಸಾಹಸಾನಿ ಅನೇಕಾನಿ, ದುಸ್ಸಹಾನಿ ಕರಿಂಸುತೇ.

೪೦. ಕುದ್ಧೋ ಮಹಾಜನೋ ರಞ್ಞೋ, ತಮತ್ಥಂ ಪಟಿವೇದಯಿ;

ರಾಜಾ ತೇ ಸಞ್ಞಪೇತ್ವಾನ, ಪುತ್ತಂ ಓವದಿ ಸಾಧುಕಂ.

೪೧. ಸಬ್ಬಂ ತಥೇವ ದುತಿಯಂ, ಅಹೋಸಿ ತತಿಯಂ ಪನ;

ಕುದ್ಧೋ ಮಹಾಜನೋ ಆಹ, ಪುತ್ತಂ ಘಾತೇಹಿ ತೇ ಇತಿ.

೪೨. ರಾಜಾ’ಥವಿಜಯಂ ತಞ್ಚ, ಪರಿವಾರಞ್ಚ ತಸ್ಸ ತಂ;

ಸತ್ತಸತಾನಿ ಪುರಿಸೇ, ಕಾರೇತ್ವಾ ಅದ್ಧಮುಣ್ಣಕೇ.

೪೩. ನಾವಾಯ ಪಕ್ಖಿಪಾಪೇತ್ವಾ, ವಿಸ್ಸಜ್ಜಾಪೇಸಿ ಸಾಗರೇ;

ತಥಾ ತೇಸಂ ಭರಿಯಾಯೋ, ತಥೇವ ಚ ಕುಮಾರಕೇ.

೪೪. ವಿಸುಂ ವಿಸುಂ ತೇ ವಿಸ್ಸಟ್ಠಾ, ಪುರಿಸಿತ್ಥಿಕುಮಾರಕಾ;

ವಿಸುಂ ವಿಸುಂ ದೀಪಕಸ್ಮಿಂ, ಓಕ್ಕಮಿಂಸು ವಸಿಂಸು ಚ.

೪೫. ನಗ್ಗದೀಪೋತಿ ಞಾಯಿತ್ಥ, ಕುಮಾರೋಕ್ಕನ್ತದೀಪಕೋ;

ಭರಿಯೋಕ್ಕನ್ತದೀಪೋ ತು, ಮಹಿನ್ದದೀಪಕೋ ಇತಿ.

೪೬. ಸುಪ್ಪಾರಕೇ ಪಟ್ಟನಮ್ಹಿ, ವಿಜಯೋ ಪನ ಓಕ್ಕಮಿ;

ಪರಿಸಾ ಸಾಹಸೇನೇ’ತ್ಥ, ಭೀತೋ ನಾವಂ ಪುನಾ’ರುಹಿ.

೪೭. ಲಂಕಾಯಂ ವಿಜಯಸನಾಮಕೋ ಕುಮಾರೋ;

ಓತಿಣ್ಣೋ ಥಿರಮತಿ ತಮ್ಬಪಣ್ಣಿದೀಪೇ;

ಸಾಲಾನಂ ಯಮಕಗುಣಾನಮನ್ತರಸ್ಮಿಂ;

ನಿಬ್ಬಾತುಂ ಸಯಿತದಿನೇ ತಥಾಗತಸ್ಸ.

ಸುಜನಪಸಾದಸಂವೇ ಗತ್ಥಾಯಕತೇ ಮಹಾವಂಸೇ

ವಿಜಯಾಗಮನಂನಾಮ

ಛಟ್ಠಾಪರಿಚ್ಛೇದೋ.