ತಿವಞ್ಞಾಸತಿಮ ಪಚ್ಛೇದ

ಲಂಕಾವಿಲೋಪೋನಾಮ

೧. ಮಹಿನ್ದೋ ತಂ ಕಣಿಟ್ಠೋ ಸೋ, ರಾಜಪುತ್ತೋ ತದಚ್ಚಯೇ;

ಉಸ್ಸಾಪಿಯ ಸೇತಚ್ಛತ್ತ-ಮನುರಾಧಪುರೇ ವರೇ.

೨. ಸೇನ ಸೇನಾನೀನಾ’ನೀತ ದೇಸನ್ತರಜನಾ ಕುಲೇ;

ತತ್ಥ ವಾಸಮಕಪ್ಪೇಸಿ, ಕಿಚ್ಛೇನ ದಸವಚ್ಛರೇ.

೩. ಅಪೇತನೀತಿ ಮಗ್ಗಸ್ಸ, ಮುದುಭೂತಸ್ಸ ಸಬ್ಬಸೋ;

ಉಪ್ಪಾದಭಾಗಂ ನಾದಂಸು, ತಸ್ಸ ಜಾನಪದಾ ತದಾ.

೪. ಅಚ್ಚನ್ತಂ ಖೀಣಚಿತ್ತೋ ಸೋ, ವಸ್ಸಮ್ಹಿ ದಸಮೇ ವಿಭೂ;

ವುತ್ತಿದಾನೇನ ನಾಸಕ್ಖಿ, ಸಙ್ಗಹೇತುಂ ಸಕಂ ಬಲಂ.

೫. ಅಲದ್ಧ ವುತ್ತಿನೋ ಸಬ್ಬೇ, ಕೇರಳಾ ಸಹಿತಾ ತತೋ;

ನ ವುತ್ತಿದಾನಂ ನೋ ಯಾವ, ಹೋತಿ ಮಾತಾವ ಭುಞ್ಜತು.

೬. ಇತಿ ರಾಜಘರದ್ವಾರೇ, ಸಾಹಸೇಕರಸಾ ಭುಸಂ;

ಚಾಪಹತಾ ನಿಸೀದಿಂಸು, ಸನ್ನದ್ಧಛುರಿಕಾಯುಧಾ.

೭. ಹತ್ಥಸಾರಂ ಸಮಾದಾಯ, ತೇ ವಿವಞ್ಚಿಯ ಭೂಪತಿ;

ಉಮ್ಮಗ್ಗತೋ ವಿನಿಗ್ಗಮ್ಮ, ತುರಿತೋ ರೋಹಣಂ ಅಗಾ.

೮. ಸೀದುಪಬ್ಬತಗಾಮಮ್ಹಿ, ಖನ್ಧವಾರಂ ನಿಬನ್ಧಿಯ;

ಭಾತು ಜಾಯಮ್ಮ ಹೇಸಿತ್ತೇ, ಠಪೇತ್ವಾ ಸೋ ತಹಿಂ ವಸೀ.

೯. ನ ಚಿರಸ್ಸೇವ ತಸ್ಸಾಯ, ಮತಾ ಯಸಮಹೀಪತಿ;

ಮಹೇಸಿತ್ತೇ ನಿವೇಸೇಸಿ, ಸಕಭಾತುಸ್ಸ ಧೀತರಂ.

೧೦. ದೇವಿಯಾ ತಾಯ ಸಞ್ಜಾತೇ, ಸುತೇ ಕಸ್ಸಪನಾಮಕೇ;

ಅಜ್ಝಾವುತ್ತಂ ವಿಹಾಯಾ’ಥ, ಖನ್ಧಾವಾರಂ ಮಹೀಮತಿ.

೧೧. ಕಾರಯಿತ್ವಾನ ನಗರಂ, ಕಪ್ಪಗಲ್ಲಕಗಾಮಕೇ;

ಅಧಿಪಚ್ಚಂ ಪವತ್ತೇನ್ತೋ, ರೋಹಣೇ ಸುಚಿರಂ ವಸೀ.

೧೨. ತತೋ ಸೇಸೇಸು ಠಾನೇಸು, ಕೇರಳಾ ಸೀಹಳಾ ತದಾ;

ಕಣ್ಣಾಟಾ ಚ ಯಥಾಕಾಮ-ಮಾಧಿಪಚ್ಚಂ ಪವತ್ತಯುಂ.

೧೩. ಅಥಸ್ಸ ವಾಣಿಜೋ ಏಕೋ, ಪರತೀರಂ ಇಧಾಗತೋ;

ಗನ್ತ್ವಾ ಪವತ್ತಿಂ ಲಂಕಾಯ, ಚೋಳರಞ್ಞೋ ನಿವೇದಯಿ.

೧೪. ಸೋತಂ ಸುಣಿತ್ವಾ ಪೇಸೇಸಿ, ಲಂಕಾಗಹಣಮಾನಸೋ;

ಬಲಂ ಮಹನ್ತಂ ಬಲವಾ, ತಂ ಖಿಪ್ಪಂ ಲಂಕಮೋತರಿ.

೧೫. ಪಟ್ಠಾಯೋ ತಿಣ್ಣಠಾನಮ್ಹಾ, ವಿಹೇಠೇನ್ತಂ ಬಹೂ ಜನೇ;

ಅನುಕ್ಕಮೇನ ತಂ ಚೋಳ-ಬಲಂ ರೋಹಣಮಜ್ಝಗಾ.

೧೬. ಛತ್ತಿಂಸೇ ರಾಜಿನೋ ವಸ್ಸೇ, ಮಹೇಸಿಂ ರತನಾನಿ ಚ;

ಮಕುಟಞ್ಚ ಕಮಾಯಾತಂ, ಸಬ್ಬಮಾಭರಣಂ ತಥಾ.

೧೭. ಅಮೂಲಿಕಞ್ಚವಜಿರ-ವಲಯಂ ದೇವದತ್ತಿಯಂ;

ಅಚ್ಛೇಜ್ಜಚ್ಛುರಿಕಂ ಛಿನ್ನ-ಪಟ್ಟಿಕಾ ಧಾತುಕಞ್ಚ ತೇ.

೧೮. ಪವಿಟ್ಠಂ ವನದುಗ್ಗಮ್ಹಿ, ಭಯಾತಞ್ಚ ಮಹೀಪತಿಂ;

ಜೀವಗ್ಗಾಹಮಗಣ್ಹಿಂಸು, ಸನ್ಧಿಲೇಸಮ್ಪದಸ್ಸಿಯ.

೧೯. ಮಹೀಪಾಲಂ ಧನಂ ತಞ್ಚ, ಸಬ್ಬಂ ಹತ್ಥಗತಂ ತತೋ;

ಪೇಸಯಿಂಸು ಲಹುಂ ಚೋಳ-ಮಹೀಪಾಲಸ್ಸ ಸನ್ತಿಕಂ.

೨೦. ನಿಕಾಯತ್ತಿತಯೇ ಧಾತು-ಗಬ್ಭೇ ಲಂಕಾತಲೇ ಖಿಲೇ;

ಮಹಾರಹೇ ಸುವಣ್ಣಾದಿ-ಪಟಿಬಿಮ್ಬೇ ಚ’ನಪ್ಪಕೇ.

೨೧. ಭಿನ್ದಿತ್ವಾ ಸಹಸಾ ಸಬ್ಬೇ, ವಿಹಾರೇ ಚ ತಹಿಂ ತಹಿಂ;

ಯಥೋ ಜೋಹಾರಿನೋ ಯಕ್ಖಾ, ಲಙ್ಕಾಯಂ ಸಾರಮಗ್ಗಹುಂ.

೨೨. ತೇ ಚೋಳಾ ರಾಜರಟ್ಠಂ ತಂ, ಪುಲತ್ಥಿಪುರನಿಸ್ಸಿತಾ;

ರಕ್ಖಪಾಸಾಣಕಣ್ಡವ್ಹ, ಠಾನಾವಧಿಮಭುಞ್ಜಿಸುಂ.

೨೩. ತಂ ಕುಮಾರಕಮಾದಾಯ, ಕಸ್ಸಪಂ ರಟ್ಠವಾಸಿನೋ;

ವಡ್ಢೇನ್ತಿ ಚೋಳಭಯತೋ, ಗೋಪಯನ್ತಾ ಸುಸಾದರಾ.

೨೪. ಚೋಳರಾಜಾ ಕುಮಾರಂ ತಂ, ಸುತ್ವಾ ದ್ವಾದಸವಸ್ಸಿಕಂ;

ಗಹಣತ್ಥಾಯ ಪೇಸೇಸಿ, ಮಹಾಮಚ್ಚೇ ಮಹಾಬಲೇ.

೨೫. ಊನಂ ಪಞ್ಚಸಹಸ್ಸೇನ, ಯೋಧಲಕ್ಖಂ ಸಮಾದಿಯ;

ಸಬ್ಬಂ ತೇ ರೋಹಣಂ ದೇಸಂ, ಸಙ್ಖೋಭೇಸು ಮಿತೋ ತತೋ.

೨೬. ಕಿತ್ತಿನಾಮೋ’ಥ ಸಚಿವೋ, ಮಕ್ಖಕುದ್ರೂಸವಾಸಿಕೋ;

ಮುದ್ಧನಾಮೋ ತಥಾಮಚ್ಚೋ, ಮಾರಗಲ್ಲಕವಾಸಿಕೋ.

೨೭. ಉಭೋಪಿ ತೇ ಮಹಾವೀರಾ, ಯುದ್ಧೋಪಾಯವಿಚಕ್ಖಣಾ;

ಚೋಳಸೇನಂ ವಿನಾಸೇತು-ಮಚ್ಚನ್ತಕತನಿಚ್ಛಯಾ.

೨೮. ಪಲುಟ್ಠಗಿರಿನಾಮಮ್ಹಿ, ಠಾನೇ ದುಗ್ಗೇ ನಿವೇಸಿಯ;

ಕತ್ವಾ ಛಮಾಸಂ ಸಙ್ಗಾಮಂ, ಹನಿಂಸು ದಮಿಳೇ ಬಹೂಂ.

೨೯. ಹತಾವಸಿಟ್ಠಾ ಚೋಳಾತಾ, ರಣೇ ತಸ್ಮಿಂ ಭಯದ್ದಿತಾ;

ಪಲಾಯಿತ್ವಾ ಯಥಾಪುಬ್ಬಂ, ಪುಲತ್ತಿಪುರಮಾವಸುಂ.

೩೦. ಕುಮಾರೋ ಜಯಿತೋ ದಿಸ್ವಾ, ಉಭೋ ತೇ ಸಚಿವೇ ತದಾ;

ಹಟ್ಠತುಟ್ಠೋ ‘‘ವರಂ ತಾತಾ, ಗಣ್ಹಥಾ’’ತಿ ಸ ಚಬ್ರವೀ.

೩೧. ಬುದ್ಧೋ ಪವೇಣಿಗಾಮಂ ಸೋ, ವರಂ ಯಾಚಿತ್ಥ ಕಿತ್ತಿಕೋ;

ಸಙ್ಘಿಕಂ ಗಹಿತಂ ಭಾಗಂ, ವಿಸ್ಸಜ್ಜೇತುಂ ವರಂ ವರಿ.

೩೨. ರಾಜಪುತ್ತವರಾಲದ್ಧ-ವರಾ’ಮಚ್ಚವರಾ ತದಾ;

ನಿದ್ದರಾ ಸಾದರಾ ವೀರಾ, ಪಾದೇ ವನ್ದಿಂಸು ತಸ್ಸ ತೇ.

೩೩. ರಾಜಾ ದ್ವಾದಸವಸ್ಸಾನಿ, ವಸಿತ್ವಾ ಚೋಳಮಣ್ಡಲೇ;

ಅಟ್ಠತಾಲೀಸವಸ್ಸಮ್ಹಿ, ಮಹಿನ್ದೋ ಸೋ ದಿವಂಗತೋ.

೩೪. ಪಮಾದ ದೋಸಾನಗತೇನ ಏವಂ,

ಲದ್ಧಾ’ಪಿ ಭೋಗಾನನಥಿರಾ ಭವನ್ತಿ;

ಇಚ್ಚಪ್ಪಮಂದಂ ಹಿತಮಾಸಸಾನೋ,

ನಿಚ್ಚಂ ಸುವಿಞ್ಞೂಸುಸಮಾ ಚರೇಯ್ಯ.

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ಲಂಕಾವಿಲೋಪೋ ನಾಮ

ತಿಪಞ್ಞಾಸತಿಮೋ ಪರಿಚ್ಛೇದೋ.