ಅಟ್ಠಚತ್ತಾಲೀಸತಿಮ ಪರಿಚ್ಛೇದ

ಏಕರಾಜಕೋ

೧. ತತೋ ತಸ್ಸಾ’ನುಜೋ ಸೇನೋ, ಛತ್ತಂ ಉಸ್ಸಾಪಯೀ ಪುರೇ;

ಪಿಯಂ’ವ ಪುತ್ತಂ ಪಸ್ಸನ್ತೋ, ಸತ್ತೇ ಸಬ್ಬೇ ಮಹಾಧನೋ.

೨. ಚರಿಯಂ ಪುಬ್ಬರಾಜೂನಂ, ಸಮಾಚರಿ ಯಥಾಭತಂ;

ಅಪುಬ್ಬಮ್ಪಿ ಚ ವತ್ತೇಸಿ, ಚರಿಯಂ ಧಮ್ಮಸಂಹಿತಂ.

೩. ಭಿಕ್ಖೂನಂ ಭಿಕ್ಖೂನೀನಞ್ಚ, ಞಾತೀನಂ ದೀಪವಾಸಿನಂ;

ಮಚ್ಛಾನಂ ಮಿಗಪಕ್ಖೀನಂ, ಕತ್ತಬ್ಬಂ ಸ ಸಮಾಚರಿ.

೪. ಮಹಿನ್ದಂ ಪರತೀರಂ ಸೋ, ಗತಂ ಯೋಜಿಯಮಾರಯಿ;

ಏವಂ ಸೋ ಸುವಿಸೋಧೇಸಿ, ರಜ್ಜಪಚ್ಚತ್ಥಿಕೇ’ಖಿಲೇ.

೫. ಮಹಾದಾನಂ ಪವತ್ತೇಸಿ, ಯಾಚಕಾನಂ ಧನೇಸಿನಂ;

ಭಿಕ್ಖೂನಂ ಬ್ರಾಹ್ಮಣಾನಞ್ಚ, ಮನುಞ್ಞಂ ರಾಜಭೋಜನಂ.

೬. ಅಹೇಸುಂ ಅನುಜಾತಸ್ಸ, ಮಹಿನ್ದೋ ಕಸ್ಸಪೋ ತಥಾ;

ಉದಯೋತಿ ತಯೋ ತೇಸು, ಮಹಿನ್ದೋ ಯುವರಾಜಕೋ.

೭. ಹುತ್ವಾ ತಸ್ಸಾನುವತ್ತನ್ತೋ, ಸಕ್ಕಚ್ಚಂ ತಮುಪಟ್ಠಹಿ;

ಸಙ್ಘಾನಾಮಾಸಿ ರಾಜಸ್ಸ, ಭರಿಯಾ ತಸ್ಸ ರಾಜಿನೀ.

೮. ಕೀಳನತ್ಥಂ ಸಮುದ್ದಸ್ಸ, ಗತೇ ರಾಜಿನಿ ಪಟ್ಟನಂ;

ಉದಯೋ ಆದಿಪಾದೋಸೋ, ಓಹೀನೋ ನಗರೇ ತದಾ.

೯. ನಾಲನಾಮಂ ಗಹೇತ್ವಾನ, ಧೀತರಂ ಮಾಣಿಲಾನಿಯಾ;

ರಕ್ಖಿತಂ ರಾಜರಕ್ಖಾಯ, ಪುಳತ್ಥಿನಗರಂ ಅಗಾ.

೧೦. ರಾಜಾ ತಸ್ಮಿಂ ಅಕುಜ್ಝಿತ್ವಾ, ಸನ್ಧಿಂ ಕತ್ವಾ ಅಕುಪ್ಪಿಯಂ;

ಮಹಾದೀಪಾದಂ ಪೇಸೇತ್ವಾ, ತೋಸತ್ವಾ ತಂ ಇಧಾನಯಿ.

೧೧. ಏವಂ ಸಮಗ್ಗಾ ತೇ ಆಸುಂ, ತತೋ ಪಟ್ಠಾಯ ಖತ್ತಿಯಾ;

ರಕ್ಖನ್ತಾ ಸಾಸನಂ ಲೋಕಂ, ವಸಿಂಸು ಸುಸಮಾಹಿತಾ.

೧೨. ತತೋ ಕೇನಚಿ ಕಾಲೇನ, ಪಣ್ಡುರಾಜಾ ಮಹಾಬಲೋ;

ಜಮ್ಬುದೀಪಾ ಇಧಾ’ಗಮ್ಮ, ದೀಪ ಗಣ್ಹಿತುಮಾರಭಿ.

೧೩. ರಾಜಾ ಸುತ್ವಾ ಮಹಾಸೇನಂ, ಪೇಸುಯಿತ್ಥ ತದನ್ತಿಕಂ;

ಅಮಚ್ಚಾನಂ ವಿವಾದೇನ, ಥದ್ಧೋತಾರೋ ನಾರಾಧಿಪೋ.

೧೪. ಪಣ್ಡುರಾಜಾ ವಿನಾಸೇನ್ತೋ, ಸಬ್ಬಂ ತಂ ದೇಸಮುತ್ತರಂ;

ಖನ್ಧಾವಾರಂ ನಿವೇಸೇಸಿ, ಮಹಾತಾಲಿತಗಾಮಕೇ.

೧೫. ವಸನ್ತಾ ದಮಿಳಾ ಏತ್ಥ, ಬಹವೋ ಯೇ ತಹಿಂ ತಹಿಂ;

ಸಬ್ಬೇ ತಂ ಪಕ್ಖಿಯಾಹೇಸುಂ, ತತೋ ಸೋ ಬಲವಾ ಅಹು.

೧೬. ತತ್ಥ ಗನ್ತಾ ಮಹಾಸೇನಾ, ರಞ್ಞೋ ಯುಜ್ಝಿತುಮಾರಭಿ;

ಹತ್ಥಿಕ್ಖನ್ಧಗತೋ ಪಣ್ಡು-ರಾಜಾಪಿ ಸಮುಪಾವಿಸಿ.

೧೭. ಅಹು ದಮಿಳಸೇನಾಸಾ, ಪಸ್ಸನ್ತಿ ಸಾಮಿನೋ ಮುಖಂ;

ಸಮ್ಪತ್ತಬಲಹುಸ್ಸಾಹಾ, ತದತ್ಥೇ ಚತ್ತಜೀವಿತಾ.

೧೮. ದೀಪಸೇನಾ ತು ಸಾಮಿನ-ಮಭಾವೇನ ನಿರುಸ್ಸುಕ್ಕಾ;

ಯುಜ್ಝನ್ತಿ ಪರಿಭಿನ್ದಿತ್ವಾ, ಪಲಾಯಿತ್ಥ ತತೋ ತತೋ.

೧೯. ಓತರಿತ್ಥಮಹಾಸೇನಾ, ಪಣ್ಡುರಾಜಾಸ್ಸ ತಙ್ಖಣೇ;

ಮಾರಸೇನಾವ ಗಚ್ಛನ್ತಿ, ವಿಚುಣ್ಣೇನ್ತಿ ಮಹಾಜನಂ.

೨೦. ರಾಜಾ ಸೇನಾಯ ಭಿನ್ನತ್ತಂ, ಸುಕ್ಕಾ ಸಬ್ಬಂ ಸಮಾದಿಯ;

ಹತ್ಥಸಾರಂ ಪುರಂ ಹಿತ್ವಾ, ಮಲಯಾಭಿಮುಖೋ ಗತೋ.

೨೧. ತತೋ ಹತ್ಥಿಂ ಸಮಾರುಯ್ಹ, ಯುವರಾಜಾ ಮಹಿನ್ದಕೋ;

ಯುಜ್ಝನ್ತೋ ಸಕಸೇನಾಯ, ಪಲಾತತ್ತಂ ಸಮೇಕ್ಖಿಯ.

೨೨. ಏಕೇನಮೇ ನ ಸಕ್ಕಾ ವೇ, ಸಬ್ಬೇ ಏತೇಹಿ ಮಾರಿತುಂ;

ಏತೇಸಂ ನ ಚ ನೀಚಾನಂ, ಹತ್ಥೇಸು ಮರಣಂ ಸುಖಂ.

೨೩. ತಸ್ಮಾ ವರಂ ಮೇ ಮರಣಂ, ಮಯಾ ಏವೇತಿ ಚಿನ್ತಿಯ;

ಹತ್ಥಿಕ್ಖನ್ಧಗತೋಯೇವ, ಛಿನ್ದಿ ಸೋ ಸೀಸಮತ್ತನೋ.

೨೪. ತಂ ದಿಸ್ವಾ ಬಹವೋ ಸೀಸೇ, ತತ್ಥ ಛಿನ್ದಿಂಸು ಸೇವಕಾ;

ತಂ ದಿಸ್ವಾ ದಮಿಳೀ ಸೇನಾ, ಹಟ್ಠತುಟ್ಠಾ ಪಮೋದಿಸಾ.

೨೫. ಏತಂ ಸಬ್ಬಂ ಸಮೇಕ್ಖಿತ್ವಾ, ಆದಾಪಾದೋ ಸಕಸ್ಸಪೋ;

ತುರಙ್ಗವರಮಾರುಯ್ಹ, ಸುಸನ್ನದ್ಧೋ ಮಹಾಯುಧೋ.

೨೬. ವಿಹಾರಮುಪಸಙ್ಕಮ್ಮ, ಅಭಯಂ ಏಕಕೋವ ಸೋ;

ತಾದಿಸಮ್ಪಿ ಮಹಾಸೇನಂ, ಓಗಾಹೇತ್ವಾ ವಿದಾರಯಿ.

೨೭. ಸುಪಣ್ಣೋ ವಿಯ ಗಣ್ಹನ್ತೋ, ಭೂಜಗೇನ ಸಲಿಲಾಲ ಯೇ;

ಸೋ ತಂ ಸಬ್ಬಂ ನಿವತ್ತೇಸಿ, ಅತ್ತಾನಞ್ಚ ಸುಗೋಪಯಿ.

೨೮. ಅಸ್ಸೋ ಏಕೋವ ದಿಸ್ಸಿತ್ಥ, ತುರಙ್ಗಾವಲಿಸನ್ನಿಭೋ;

ಅತ್ತನೋ ಸೋ ಜನಂ ಕಞ್ಚಿ, ಅಪಸ್ಸನ್ತೋ’ನುಗಾಮಿನಂ.

೨೯. ಕಿಂ ಮೇ ಏಕೇನ ವೇರಿನಂ, ಪೂರಿತೇನ ಮನೋರಥಂ;

ಕಾಲನ್ತರೇಹಂ ಜೀವನ್ತೋ, ಪೂರೇಸ್ಸಂ ಮೇ ಮನೋರಥಂ.

೩೦. ತಸ್ಮಾ ಗನ್ತುಂವ ಯುತ್ತನ್ತಿ, ನಿಮ್ಫೋಟೇತ್ವಾ ಮಹಾಬಲಂ;

ನಿಬ್ಭಯೋವ ಮಹಾಯೋಧೋ, ಕೋಣ್ಡಿವಾತಮುಪಾಗಮಿ.

೩೧. ಪಣ್ಡುರಾಜಾ ಮಹಾಸೇನಾ, ಅಗ್ಗಹೇಸಿ ತತೋ ಪುರಂ;

ಸೀಸಂ ತಂ ಯುವರಾಜಸ್ಸ, ಪಣ್ಡುರಾಜಸ್ಸ ದಸ್ಸಯುಂ.

೩೨. ಸೋ ತಂ ದಿಸ್ವಾ ಚ ಝಾಪೇತ್ವಾ, ರಾಜೂನಂ ಪಣ್ಡುದೇಸಿನಂ;

ಸಬ್ಬಮಾಳಾಹನೇ ಕಿಚ್ಚಂ, ತಸ್ಸ ಕಾತುಂ ನಿಯೋಜಯಿ.

೩೩. ಸಬ್ಬಂ ಸಾರಂ ಹರಾಪೇಸಿ, ಭಣ್ಡಾಗಾರಮ್ಹಿ ರಾಜಿನೋ;

ಅಗ್ಗಣ್ಹಿತ್ಥ ಗಹೇತಬ್ಬಂ, ವಿಹಾರೇ ನಗರೇಪಿ ಚ.

೩೪. ಪಾಸಾದೇ ರತನೇ ಸಬ್ಬೇ, ಸೋವಣ್ಣಂಸತ್ಥುಬಿಮ್ಬಕಂ;

ಸಿಲಾಮಯ ಮುನಿನ್ದಸ್ಸ, ಚಕ್ಖುಭೂಕ ಮಣಿದ್ವಯಂ.

೩೫. ತಥಾ ಸೋವಣ್ಣಪಟ್ಟೇ ಚ, ಥೂಪಾರಾಮಮ್ಹಿ ಚೇತಿಯೇ;

ಸುವಣ್ಣ ಪಟಿಮಾಯೋ ಚ, ವಿಹಾರೇಸು ತಹಿಂ ತಹಿಂ.

೩೬. ಸಬ್ಬಂ ಗಹೇತ್ವಾ ನಿಸ್ಸಾರಂ, ಲಙ್ಕಾದೀಪ ಮಕಾಸಿ ಸೋ;

ಛಡ್ಡಯಿತ್ಥ ಪುರಂ ರಮ್ಮ, ಯಕ್ಖಭಕ್ಖಿತ ರೂಪಕಂ.

೩೭. ರಾಜಾ’ಪಿ ರಕ್ಖಂ ದತ್ವಾನ, ಮಹಾಮಗ್ಗೇ ತಹಿಂ ತಹಿಂ;

ಗಙ್ಗಾದ್ವಯ ಮುಖೇ ವಾಸಂ, ಕಪ್ಪೇಸಿ ಪರಿಸಙ್ಕಿತೋ.

೩೮. ಪಣ್ಡುರಾಜಾ ತತೋ ಸದ್ಧಿಂ, ಕಾತುಂ ಸೀಹಳಸಾಮಿನಾ;

ಅಮಚ್ಚೇ ತತ್ಥ ಪೇಸೇಸಿ, ದಿಸ್ವಾ ತೇ ಸೀಹಲಾಧಿಪೋ.

೩೯. ಸುಣಿತ್ವಾ ಸಾಸನಂ ತೇಸಂ, ಸಬ್ಬಂ ತಂ ಸಮ್ಪಟಿಚ್ಛಿಯ;

ದೂತಾನಂ ಕಾರಯಿತ್ವಾನ, ಯಥಾಕಾಮೇನ ಸಙ್ಗಹಂ.

೪೦. ಹತ್ಥಿದ್ವಯಂ ಸದತ್ವಾನ, ಸಬ್ಬಮಾಭರಣಮ್ಪಿ ಚ;

ತಸ್ಸ ಪೇಸೇಸಿ ದೂತೇಸೋ, ಅತ್ತನೋಪಿ ಹಿತಾವಹೇ.

೪೧. ಪಣ್ಡುರಾಜಾ ಸಿತಂ ಸಬ್ಬಂ, ದಿಸ್ವಾ ಸನ್ತುಟ್ಠಮಾನಸೋ;

ನಿಯ್ಯಾತೇತ್ವಾನ ದೂತಾನಂ, ತದಹೇವ ಮಹಾಪುರಂ.

೪೨. ನಿಕ್ಖಮಿತ್ವಾ ಪುರಾ ಗನ್ತ್ವಾ, ನ ಚಿರೇನೇವ ಪಟ್ಟನಂ;

ತತ್ಥ ಆರುಯ್ಹ ನಾವಂ ಸೋ, ಸಕ ದೇಸ ಮುಪಾಗಮಿ.

೪೩. ತತೋ ಆಗಮ್ಮ ನಗರಂ, ಸೀಲಾಮೇಘೋ ಮಹೀಪತಿ;

ಯಥಾಠಾನೇ ಠಪೇತ್ವಾನ, ದೀಪಂ ವಸಿ ಸಮಾಹಿತೋ.

೪೪. ಭಾತರಂ ದುತಿಯಂ ಕತ್ವಾ, ಉದಯಂ ನಾಮ ಖತ್ತಿಯಂ;

ಮಹಾದೀಪಾದಂ ತಸ್ಸಾ’ದಾ, ಸೋಗತ್ಥಂ ದಕ್ಖಿಣಂ ದಿಸಂ.

೪೫. ಸೋಪಿ ಖೋ ನ ಚಿರೇನೇವ, ಕತ್ವಾ ಪುಞ್ಞಂ ಯಥಾರಹಂ;

ರೋಗೇನೇಕೇನ ಸಮ್ಫುಟ್ಠೋ, ಪವಿಟ್ಠೋ ಮಚ್ಚುನೋ ಮುಖಂ.

೪೬. ಕಸ್ಸಪೋ ಆದಿಪಾದೋಪಿ, ಪುಲತ್ಥಿನಗರೇ ವಸಂ;

ಯೋಜೇತ್ವಾ ಪಣ್ಡುರಾಜೇನ, ಅಹೋಸಿ ಕಿರ ಮಾರಿತೋ.

೪೭. ತದಾ ಕಸ್ಸಪನಾಮಸ್ಸ, ಪುತ್ತಾ ಆಸುಂ ಮಹಾರಹಾ;

ಆದಿಪಾದಸ್ಸ ಚತ್ತಾರೋ, ಧಞ್ಞಲಕ್ಖಣ ಸಞ್ಞುತಾ.

೪೮. ಯೋ ಸೇನಂ ಸಬ್ಬಪಠಮೋ, ಸೇನೋ ನಾಮ ಕುಮಾರಕೋ;

ಸೂರೋ ವೀರೋ ಮಹುಸ್ಸಾಹೋ, ರಾಜಭಾರಕ್ಖಮೋ ಸಮೋ.

೪೯. ರಾಜಾ ಮಹಾದೀಪಾದತ್ತಂ, ತಸ್ಸ ದತ್ವಾ ಯಥಾವಿಧಿಂ;

ಭೋಗತ್ಥಂ ದಕ್ಖಿಣಂ ದೇಸಂ, ಸವಾಹನ ಮುಪಾದಿಸಿ.

೫೦. ರೋಹಣಾಧಿಪತಿಸ್ಸಾ’ಸುಂ, ಪುತ್ತಾ ಕಿತ್ತಗ್ಗಬೋಧಿತೋ;

ಚತ್ತಾರೋ ಧೀತರೋ ತಿಸ್ಸೋ, ದಸ್ಸನೇಯ್ಯಾ ಮನೋರಮಾ.

೫೧. ತದಾ ಜೇಟ್ಠಸುತಂ ತಸ್ಸ, ಮಹಿನ್ದಂ ನಾಮ ಖತ್ತಿಯಂ;

ಪಿತುಚ್ಛಾ ಮಾರಯಿತ್ವಾನ, ದೇಸಂ ಗಣ್ಹಿ ಸಸಾಧನಂ.

೫೨. ಭಾತರೋ ತೇ ತಯೋ ತಸ್ಮಿಂ,

ಸಂರುಟ್ಠಾ ಭಾತು ಘಾತನೇ;

ಆದಾಯ ಭಗೀನೀ ತಿಸ್ಸೋ,

ರಞ್ಞೋ ಸನ್ತಿಕಮಾಗಮುಂ.

೫೩. ರಾಜಾಪಿ ದಿಸ್ವಾ ತೇತೀವ, ಮಮಾಯನ್ತೋ ದಯಾಲುಕೋ;

ಸಬ್ಬೇ ದೇವಕುಮಾರೇವ, ಸುಖಂ ವಡ್ಢೇಸಿ ಪೇಮವಾ.

೫೪. ತತೋ ಕಸ್ಸಪನಾಮಂ ಸೋ, ತೇಸಂ ಜೇಟ್ಠಂ ನರಿಸ್ಸರೋ;

ದೇಸಂ ತಂ ಗಣ್ಹ ಯಾಹೀತಿ, ದತ್ವಾ ಬಲಮಪೇಸಯಿ.

೫೫. ಸೋ’ಪಿ ಗನ್ತ್ವಾನ ತಂ ಹನ್ತ್ವಾ, ರೋಹಣಂ ಕಸಿಣಮ್ಪಿ ತಂ;

ಕತ್ವಾ ಹತ್ಥಗತಂ ತತ್ಥ, ವಸಿತ್ಥ ನಿರುಪದ್ದವೋ.

೫೬. ಅಥ ಸೋ ಭಾತರೋ ದ್ವೇ’ಪಿ, ಸೇನಞ್ಚ ಉದಯಂ ತಥಾ;

ಪಕ್ಕೋಸಿತ್ವಾನ, ಭಾಜೇತ್ವಾ, ದೇಸಂ ತೇಹಿ ಸಹಾವಸಿ.

೫೭. ರಾಜಾ ತಾ ಸಾಧು ವಡ್ಢೇತ್ವಾ, ವಯಪತ್ತಾಸು ತೀಸು ಸೋ;

ರಾಜಕಞ್ಞಾಸು ಧಞ್ಞಾಸು, ದೇವಚ್ಛರಸೂ ರೂಪಿಸು.

೫೮. ಠಪೇತ್ವಾ ರಾಜಿನಿ ಠಾನೇ, ಉಪರಾಜಸ್ಸ ದಾಪಯಿ;

ಸಙ್ಘನಾಮಂ ಮಹಾಭೋಗಂ, ದತ್ವಾ ರಜ್ಜಸರಿಕ್ಖಕಂ.

೫೯. ಕಣಿಟ್ಠೋ ಉಪರಾಜಸ್ಸ, ಮಹಿನ್ದೋ ನಾಮ ಭಾತುಕೋ;

ಅತ್ಥಿ ಸಬ್ಬಗುಣೋಪೇತೋ, ಸಬ್ಬಸತ್ಥವಿಸಾರದೋ.

೬೦. ತಸ್ಸಾ’ದಾಸಿ ದುವೇ ರಾಜಾ, ರಾಜಕಞ್ಞಾ ಮನೋಹರಾ;

ತಿಸ್ಸವ್ಹಕಿತ್ತ ನಾಮಞ್ಚ, ದತ್ವಾ ಭೋಗಂ ಯಥಾರುಚಿಂ.

೬೧. ಏವಂ ಕರೋನ್ತೋ ಞಾತೀನಂ, ಸಂಗಹಂ ಸೋ ಯಥಾರಹಂ;

ಆರಾಧೇನ್ತೋ ಚ ದಾನಾದಿ-ಸಙ್ಗಹೇಹಿ ಮಹಾಜನಂ.

೬೨. ರಾಜಾ ದಸಯಿ ರಾಜೂನಂ, ಧಮ್ಮೇಹಿ ಸಮುಪಾಗತೋ;

ಸಮಾಚರನ್ತೋ ಪುಞ್ಞಾನಿ, ಪರಿಭುಞ್ಜಿತ್ಥ ಮೇದಿನಿಂ.

೬೩. ಪಂಸುಕೂಲಿಕ ಭಿಕ್ಖೂನಂ, ಕತ್ವಾ’ರಿಟ್ಠಮ್ಹಿ ಪಬ್ಬತೇ;

ಮಹಾಭೋಗಂ ಅದಾರಾಮಂ, ನಿಮ್ಮಿತಂ ವಿಯ ಇದ್ಧಿಯಾ.

೬೪. ಪರಿಹಾರಞ್ಚ ತಸ್ಸದಾ, ರಾಜಾರಹಮಸೇಸತೋ;

ಆರಾಮಿಕೇ ಚ ಬಹವೋ, ದಾಸೇ ಕಮ್ಮಕರೇಪಿ ಚ.

೬೫. ಪಾಸಾದಂ ಸೋವ ಕಾರೇಸಿ, ವಿಹಾರೇ ಜೇತನಾಮಕೇ;

ಅನೇಕಭೂಮಿಂ ಭೂಮಿನ್ದೋ, ಬುದ್ಧಭೂಮಿಗತಾಸಯೋ.

೬೬. ವಡ್ಢೇತ್ವಾ ತತ್ಥ ಕಾರೇತ್ವಾ, ಸಬ್ಬ ಸೋವಣ್ಣಯಂ ಜಿನಂ;

ಸಣ್ಠಪೇತ್ವಾ ಮಹಾಭೋಗಂ, ವಸಾಪೇಸಿ ಚ ಭಿಕ್ಖವೋ.

೬೭. ಮಹಾದಿ ಪರಿವೇಣಮ್ಹಿ, ಕಾರೇಸಿ ಸುಮನೋಹರಂ;

ಪಾಸಾದ ಮಗ್ಗಿಸನ್ದಂಡ್ಢಂ, ತಸ್ಮಿಂಯೇವ ವಿಹಾರಕೇ.

೬೮. ಕತ್ವಾ ವೀರಙ್ಕುರಾರಾಮಂ, ವಿಹಾರೇ ಅಭಯುತ್ತರೇ;

ಮಹಾಸಙ್ಘಿಕ ಭಿಕ್ಖೂನಂ, ಥೇರಿಯಾನಞ್ಚ ದಾಪಯಿ.

೬೯. ಪುಬ್ಬಾರಾಮಞ್ಚ ಕಾರೇಸಿ, ಸಮ್ಪನ್ನ ಚತುಪಚ್ಚಯಂ;

ಸದ್ಧಿಂ ಸೋ ಸಙ್ಘನಾಮಾಯ, ದೇವಿಯಾಪಿ ಚ ಅತ್ತನೋ.

೭೦. ಮಹಾವಿಹಾರೇತಾಯೇವ, ಸದ್ಧಿಂ ಕಾರೇಸಿ ಭೂಮಿಪೋ;

ಆವಾಸಂ ಸಙ್ಘಸೇನವ್ಹಂ, ಮಹಾಭೋಗಂ ಮಹಾಮತಿ.

೭೧. ಕಾರೇತ್ವಾ ಸಬ್ಬಸೋವಣ್ಣಂ, ಕೇಸಧಾತು ಕರಣ್ಡಕಂ;

ಮಹಾಪೂಜಂ ಪವತ್ತೇಸಿ, ರಜ್ಜಂ ವಿಸ್ಸಜ್ಜಿ ಉತ್ತಮೋ.

೭೨. ಚೇತಿಯಸ್ಸ ಗೀರಿಸ್ಸಾದಾ, ಕಾಣವಾಪಿಂ ಬಹುದಯಂ;

ಭಿಕ್ಖೂನಂ ದಿಪವಾಸೀನಂ, ದಾಪೇಸಿ ಚ ತಿಚೀವರಂ.

೭೩. ಪುಲತ್ಥಿ ನಗರೇ ಕಾಸಿ, ವಾಪಿಯೋ ಥುಸವಾಪಿಯಾ;

ಸೇನಗ್ಗಬೋಧಿಮಾವಾಸಂ, ಗಾಮಾರಾಮಿಕ ಸಞ್ಞುತಂ.