ಚತುಚತ್ತಾಲೀಸತಿಮ ಪರಿಚ್ಛೇದ

ತಿರಾಜಕೋ

೧. ಅಚ್ಚಯೇ ಹತ್ಥದಾಠಸ್ಸ, ಅಗ್ಗಬೋಧಿಕುಮಾರಕೋ;

ಕಣಿಟ್ಠೋ ರಾಜಿನೋ ಆಸಿ, ಸಿರಿಸಙ್ಘಾದಿ ಬೋಧಿಕೋ.

೨. ಧಮ್ಮರಾಜಾ ಅಯಂ ಆಸಿ, ಸಮ್ಮಾ ದಸ್ಸನಸಞ್ಞುತೋ;

ತಸ್ಮಾ ಸೋ ಪುಞ್ಞಕಮ್ಮಾನಿ, ಅಪ್ಪಮೇಯ್ಯಾನಿ ವತ್ತಯಿ.

೩. ನಿಕಾಯತ್ತಯವಾಸೀನಂ, ಭತ್ತಗ್ಗಮವಲೋಕಯಿ;

ಮಹಾಪಾಳಿಞ್ಚ ವಡ್ಢೇಸಿ, ಮಾಘಾತಞ್ಚೇವ ಕಾರಯಿ.

೪. ಠಾನನ್ತರಞ್ಚ ದಾಪೇಸಿ, ಯಥಾರಹ ಮನಾಲಯೋ;

ಸಿಪಗೋತ್ತಾದಿಯೋಗ್ಗೇಹಿ, ಸಂಗತೇಹಿ ಚ ಸಂಗಹಿ.

೫. ಯತ್ಥ ಕತ್ಥಚಿ ದಿಸ್ವಾಪಿ, ಭಿಕ್ಖವೋ ಸೋ ಮಹಾಮತಿ;

ಸಕ್ಕತ್ವಾ ಸೋಭಣಾಪೇಸಿ, ಪರಿತ್ತಂ ಸಾಸನೋಗಧಂ.

೬. ಥೇರಂ ಸೋ ಉಪಸಙ್ಕಮ್ಮ, ನಾಗಸಾಲನಿವಾಸಿನಂ;

ದಾಠಾಸಿವಂ ಮಹಾಪಞ್ಞಂ, ಸೀಲವನ್ತಂ ಬಹುಸ್ಸುತಂ.

೭. ಸಕ್ಕಚ್ಚ ನಂ ತತೋ ಸುತ್ವಾ, ಸಮ್ಮಾಸಮ್ಬುದ್ಧಸಾಸನಂ;

ಧಮ್ಮೇ’ತೀವಪಸೀದಿತ್ವಾ, ಸಬ್ಬಸನ್ತಿಕರೋ ಇತಿ.

೮. ಸುತ್ವಾ ಥೇರಿಯವಾದಾನಂ, ಪುಬ್ಬಞಾತೀನಮತ್ತನೋ;

ಪಾಪಾನಂ ದುಟ್ಠಚಿತ್ತಾನಂ, ಅಪಕಾರೇ ಕತೇ ಬಹೂ.

೯. ವಿಹಾರೇ ಪರಿವೇಣೇ ಚ, ಜಿಣ್ಣೇಪಾಕತಿಕೇ ಅಕಾ;

ಭೋಗಗಾಮೇ ಚ ದಾಪೇಸಿ, ತತ್ಥ ತತ್ಥ ಬಹೂದಯೇ.

೧೦. ವಿಚ್ಛಿನ್ನಪಚ್ಚಯೇ ಚಾಕಾ, ತದಾತ್ಯಂ ಕುರಿತೇ ವಿಯ;

ದಾಸಕೇಪಿ ಚ ಸಙ್ಘಸ್ಸ, ಯಥಾಠಾನೇ ಠಪಾಪಯಿ.

೧೧. ಪಧಾನಘರ ಮೇತಸ್ಸ, ಥೇರಸ್ಸ’ಕಾಸನಾಮಕಂ;

ಪಟಿಗ್ಗಹೇತ್ವಾ ತಂ ಸೋ’ಪಿ, ಸಙ್ಘಸ್ಸಾ’ದಾ ಮಹಾಮತೀ.

೧೨. ಭೋಗಗಾಮೇ ಚ ತಸ್ಸಾ’ದಾ, ಭರತ್ತಾಲಂ ಕಿಹಿಮ್ಬಿಲಂ;

ಕತಕಞ್ಚ ತುಲಾಧಾರಂ, ಅನ್ಧಕಾರಕಮೇವ ಚ.

೧೩. ಅನ್ಧಕಾರಂ ಅನ್ತುರೇಳಿಂ, ಬಾಲವಂ ದ್ವಾರನಾಯಕಂ;

ಮಹಾನಿಕಡ್ಢಿಕಞ್ಚೇವ, ಪೇಳಹಾಳಂ ತಥಾಪರಂ.

೧೪. ಏತೇ ಅಞ್ಞೇ ಚ ಸೋ ದತ್ವಾ, ಭೋಗಗಾಮೇ ನರಿಸ್ಸರೋ;

ದಾಸಿ ಆರಾಮಿಕೇ ಚೇವ, ಅತ್ತನೋ ಕಿರ ಞಾತಕೇ.

೧೫. ತಥಾ ದ್ವಿನ್ನಂ ನಿಕಾಯಾನಂ, ವಿಹಾರೇ ಮನ್ದಪಚ್ಚಯೇ;

ದಿಸ್ವಾಪಿ ಚ ಸುತ್ವಾ ವಾ, ಭೋಗಗಾಮೇ ಬಹೂ ಅದಾ.

೧೬. ಬಹುನಾ ಕಿನ್ತುವುತ್ತೇನ, ನಿಕಾಯೇಸು’ಪಿ ತೀಸು’ಪಿ;

ಅದಾ ಗಾಮಸಹಸ್ಸಂ ಸೋ, ಬಹುಪ್ಪಾದಂ ನಿರಾಕುಲಂ.

೧೭. ಅನುಸ್ಸರನ್ತೋ ಸೋ ತಿಣ್ಣಂ, ರತನಾನಂ ಗುಣೇ ವರೇ;

ಏಕಾವಲಿಂ ಗಹೇತ್ವಾನ, ಅಕ್ಖಮಾಲ ಮಕಾ ಕಿರ.

೧೮. ಏವಂ ಸಬ್ಬಪ್ಪಯೋಗೇಹಿ, ಸೋ’ಹು ಧಮ್ಮಪರಾಯನೋ;

ಸಬ್ಬೇ ತಮನುಸಿಕ್ಖನ್ತಾ, ಹೇಸು ಧಮ್ಮಕರಾ ನರಾ.

೧೯. ದಮಿಳೋ ಪೋತ್ಥಕುಟ್ಠವೋ, ತಸ್ಸ ಕಮ್ಮಕರೋ ತದಾ;

ಮಾಟಮ್ಬಿಯವ್ಹಂ ಕಾರೇಸಿ, ಪಧಾನಘರಮಬ್ಭುತಂ.

೨೦. ಬೂಕಕಲ್ಲೇ ಅಮ್ಬವಾಪಿಂ, ತನ್ತವಾಯಿಕಚಾಟಿಕಂ;

ಗಾಮಂ ನಿಟ್ಠಿಲವೇಟ್ಠಿಞ್ಚ, ತಸ್ಸಾ’ದಾ ಸೋ ಸದಾ ಸಕಂ.

೨೧. ಕಪ್ಪೂರಪರಿವೇಣೇ ಚ, ಕುರುನ್ದಪಿಲ್ಲಕೇ ತಥಾ;

ಮಹಾರಾಜಘರೇ ಚೇವ, ಪಾಸಾದೇ ಸೋ’ವ ಕಾರಯಿ.

೨೨. ಅಞ್ಞತ್ಥಾ’ದಾ ತಯೋ ಗಾಮೇ, ವಿಹಾರೇಸು ಮಹಾಧನೋ;

ಪೋತ್ಥಸಾತವ್ಹಯೋ ಪಞ್ಞೋ, ವಿಹಾರೇ ಜೇತನಾಮಕೇ.

೨೩. ಸೇನಾಪತಿರಾಜನಾಮಂ, ಪರಿವೇಣಂ ಸಮಾಪಯಿ;

ಮಹಾಕನ್ದೋ ಚ ದಮಿಳೋ, ಪರಿವೇಣಂ ಸನಾಮಕಂ.

೨೪. ಚುಲ್ಲಪನ್ಥಂ ತಥಾ ಏಕೋ, ಸೇಹಾಲಉಪರಾಜಕಂ;

ಉಪರಾಜಾ ಸಕಾರೇಸಿ, ಸಙ್ಘತಿಸ್ಸೋ’ಪಿ ರಾಜಿನೋ.

೨೫. ಅಞ್ಞೇಸು ಬಹವೋ ಆಸುಂ, ವಿಹಾರೇ ಏವಮಾದಿಕೇ;

ಭಸ್ಸ ರಞ್ಞೋ’ ನುವತ್ತನ್ತಾ, ಏವಂ ಧಮ್ಮೀಹಿ ಪಾಣಿನೋ.

೨೬. ಪಾಪಂ ವಾಪಿ ಹಿ ಪುಞ್ಞಂ ವಾ,

ಪಧಾನೋಯಂ ಕರೋತಿ ಯೋ;

ಲೋ ಕೋ ತಂ ತಂ ಕರೋತೇವ,

ತಂ ವಿಜನೇಯ್ಯ ಪಣ್ಡಿತೋ.

೨೭. ಜೇಟ್ಠನಾಮಾ ಮಹಾಪುಞ್ಞಾ, ಮಹೇಸೀ ತಸ್ಸ ರಾಜಿನೋ;

ಜೇಟ್ಠಾರಾಮಞ್ಚ ಕಾರೇಸಿ, ಭಿಕ್ಖೂನೀನಮುಪಸ್ಸಯಂ.

೨೮. ತಸ್ಸಾ’ದಾಸಿ ಚ ದ್ವೇ ಗಾಮೇ, ಪಕ್ಕಪಾಸಾಣಭೂಮಿಯಂ;

ತಮ್ಬುದ್ಧಂ ಭೇಲಗಾಮಞ್ಚ, ಆರಾಮಿಕಸತಂ ತಥಾ.

೨೯. ಅಕಾ ಮಲಯರಾಜಾಪಿ, ಧಾತುಗೇಹಂ ಮಹಾರಹಂ;

ಮಣ್ಡಲಗಿರಿವಿಹಾರಮ್ಹಿ, ಚೇತಿಯಸ್ಸ ಮಹಾಧನೋ.

೩೦. ಲೋಹಪಾಸಾದಕೇ ಸೋ’ವ, ಛಾದೇಸಿ ಮಜ್ಝಕೂಟಕಂ;

ಬೋಧಿತಿಸ್ಸವಿಹಾರಞ್ಚ, ಬೋಧಿತಸ್ಸೋ ಮಹಾಯಸೋ.

೩೧. ದೀಪೇ ಮಣ್ಡಲಿಕಾ ಸಬ್ಬೇ, ತತ್ಥ ತತ್ಥ ಯಥಾಬಲಂ;

ವಿಹಾರೇ ಪರಿವೇಣೇ ಚ, ಕಾರಯಿಂಸು ಅನಪ್ಪಕೇ.

೩೨. ತಸ್ಸ ಕಾಲೋ ನರಿನ್ದಸ್ಸ, ಪುಞ್ಞಕಮ್ಮಮಯೋ ಇಧ;

ಅತಿವಿತ್ಥಾರಭೀತೇನ, ಸಬ್ಬಸೋ ನ ವಿಚಾರಿತಂ.

೩೩. ಪುಬ್ಬಕೋಪಿ ಕಥಾಮಗ್ಗೋ, ಆಕುಲೋ ವಿಯ ಭಾತಿಮೇ;

ಯಥಾಪಧಾನಂ ಕಥಿತಂ, ಹೇತೂನಂ ಉಪಲಕ್ಖಣಂ.

೩೪. ಅಥಾಪರೇನ ಕಾಲೇನ, ಪುಲತ್ಥಿನಗರಂ ಗತೋ;

ವಾಸಂ ತತ್ಥೇವ ಕಪ್ಪೇಸಿ, ಕರೋನ್ತೋ ಪುಞ್ಞಸಞ್ಚಯಂ.

೩೫. ಅತೇಕಿಚ್ಛಿಯರೋಗೇನ, ಸಮ್ಫುಟ್ಠೋ ಕಾಲಮತ್ತನೋ;

ಮರಣಸ್ಸ ವಿದಿತ್ವಾನ, ತಮಾಹುಯಮಹಾಜನಂ.

೩೬. ಓವದಿತ್ವಾನ ಧಮ್ಮೇನ, ಮರಣಂ ಸೋ ಉಪಾಗಮಿ;

ಮಹಾಜನೋ ಮತೇ ತಸ್ಮಿಂ, ಬಾಳ್ಹಸೋಕೋ ಪರೋದಿಯ.

೩೭. ಕತ್ವಾ ಆಳಹಣೇ ತಸ್ಸ, ಕಿಚ್ಚಂ ಸಬ್ಬಮಸೇಸತೋ;

ತಸ್ಸಾಳಾಹಣಭಸ್ಮಮ್ಪಿ, ಕತ್ವಾ ಭೇಸಜ್ಜಮತ್ತನೋ.

೩೮. ರಾಜಾ ಭಣ್ಡಞ್ಚ ತಂ ಸಬ್ಬಂ, ಸಬ್ಬಞ್ಚ ಬಲವಾಹನಂ;

ಸಮ್ಮಾ ಆದಾಯ ಗೋಪೇತ್ವಾ, ನಗರಂ ಸಮುಪಾಗಮಿ.

೩೯. ಏವಂ ಸೋಳಸಮೇ ವಸ್ಸೇ, ರಾಜಾ ಆಸಿ ದಿವಙ್ಗತೋ;

ಪೋತ್ಥಕುಟ್ಠೋಪಿ ದಮಿಳೋ, ರಜ್ಜಂ ತಸ್ಸ ವಿಚಾರಯಿ.

೪೦. ಉಪರಾಜಂ ಗಹೇತ್ವಾನ, ದಾಠಾಸಿವಂ ಖಿಪಾಪಯಿ;

ಚಾರಕೋ ವಿಹಿತುಂ ಸಮ್ಮಾ, ರಕ್ಖಾವರಣ ಮಾದಿಸಿ.

೪೧. ವಿನಾ ರಞ್ಞಾ ನ ಸಕ್ಕಾತಿ, ಮೇದಿನಿಂ ಪರಿಭುಞ್ಜಿತುಂ;

ಆನೇತ್ವಾ ದತ್ತನಾಮಕಂ, ಧನಪಿಟ್ಠಪ್ಪಧಾನಕಂ.

೪೨. ಉಪ್ಪನ್ನಂ ರಾಜವಂಸಮ್ಹಿ, ರಜ್ಜೇ ತಂ ಅಭಿಸಿಞ್ಚಿಯ;

ತಸ್ಸ ನಾಮಂ ಠಪೇತ್ವಾನ, ಸಯಂ ಸಬ್ಬಂ ವಿಚಾರಯಿ.

೪೩. ದನ್ತೋ ಸೋ ಧನಪಿಟ್ಠಿಮ್ಹಿ, ವಿಹಾರಂ ಸಕನಾಮಕಂ;

ಕಾರಯಿತ್ವಾನ ಪುಞ್ಞಾನಿ, ಅಞ್ಞಾನಿಪಿ ಸಮಾಚಿನಿ.

೪೪. ಸಮಕನ್ತು ಸೋ ಠತ್ವಾ’ವ, ವಸ್ಸದ್ವಯ ಮಹುಮತೋ;

ಪೋತ್ಥಕುಟ್ಠೋ ಮತೇತಸ್ಮಿಂ, ಪುನ ಅಞ್ಞಮ್ಪಿ ಮಾಣವಂ.

೪೫. ಹತ್ಥದಾಠಂ ಸಮಾಹೂಯ, ಉಣ್ಹಾ ನಗರಸಮ್ಭವಂ;

ತಮ್ಪಿ ರಜ್ಜೇ ಭಿಸಿಞ್ಚಿತ್ವಾ, ಯಥಾ ಪುಬ್ಬಂ ಸಯಂವಸೀ.

೪೬. ಕಾಳದೀಘಾವಿಕಂ ಕತ್ವಾ, ಪಧಾನಘರಕಂ ತಥಾ;

ಪುಞ್ಞಮಞ್ಞಂ ಛಮಾಸೇಹಿ, ಸೋ’ಪಿ ಮಚ್ಚುವಸಂ ಗತೋ.

೪೭. ಏವಂ ವಿದಿತ್ವಾ ಬಹುಪದ್ದವಾನಿ;

ಧನಾನಿ ಧಞ್ಞಾನಿ ಚ ವಾಹನಾನಿ;

ವಿಹಾಯ ರಜ್ಜೇಸು ರತಿಂಸಪ್ಪಞ್ಞಾ;

ಮನುಞ್ಞಪುಞ್ಞಾಭಿರತಾ ಭವೇಯ್ಯುಂ.

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ತಿರಾಜಕೋ ನಾಮ

ಚತುಚತ್ತಾಲೀಸತಿಮೋ ಪರಿಚ್ಛೇದೋ.