ಏಕಚತ್ತಾಲೀಸತಿಮ ಪರಿಚ್ಛೇದ

ದ್ವಿರಾಜಕೋ

೧. ಮಹಾನಾಗನರಿನ್ದಸ್ಸ, ಭಾಗಿನೇಯ್ಯೋ ಸುಭಾಗಿಯೋ;

ಸೋ ಅಗ್ಗಬೋಧಿರಾಜಾಸಿ, ಅಗ್ಗಬೋಧಿಗತಾಸಯೋ.

೨. ತೇಜೇನ ಬಾಹುಂ ಸೋಮ್ಮೇನ, ಚನ್ದಂ ಸಮ್ಪುಣ್ಣಮಣ್ಡಲಂ;

ಸುಮೇರುಮಚಲನ್ತೇನ, ಗಮ್ಭಿರೇನ ಮಹೋದಧಿಂ.

೩. ವಸುನ್ಧರಾ ಪಕಮ್ಪೇನ, ಮಾರುತಂ ಸಮ್ಪವುತ್ತಿಯಾ;

ಬುದ್ಧಿಯಾಮರಮನ್ತಾರಂ, ಸುದ್ಧಿಯಾ ಸರದಮ್ಬರಂ.

೪. ಕಾಮಭೋಗೇನ ದೇವಿನ್ದ, ಮತ್ಥೇನ ಚ ನರಿಸ್ಸರಂ;

ಧಮ್ಮೇನ ಸುದ್ಧವಾಸೇಟ್ಠಂ, ವಿಕ್ಕಮೇನ ಮಿಗಾಧಿಪಂ.

೫. ರಾಜಧಮ್ಮೇಹಿ ರಜ್ಜೇಹಿ, ಚಕ್ಕವತ್ತಿನರಿಸ್ಸರಂ;

ವೇಸ್ಸನ್ತರಞ್ಚ ದಾನೇನ, ಅನುಗನ್ತ್ವಾ ಜನೇ ಸುತೋ.

೬. ಮಾತುಲಂ ಉಪರಾಜವ್ಹೇ, ಭಾತರಂ ಯುವರಾಜಕೇ;

ಭಾಗಿನೇಯ್ಯಞ್ಚ ಮಲಯ-ರಾಜಠಾನೇ ಠಪೇಸಿ ಸೋ.

೭. ಠಾನನ್ತರೇ ಯಥಾಯೋಗಂ-ಸೇಟ್ಠಾಮಚ್ಚೇ ಠಪೇಸಿ ಚ;

ಜನಂ ಸಙ್ಗಹವತ್ಥೂಹೀ, ರಾಜಧಮ್ಮೇಹಿ ಚಗ್ಗಹಿ.

೮. ದೇಸಂ ಸಯೋಗ್ಗಂ ಪಾದಾಸಿ, ಯುವರಾಜಸ್ಸ ದಕ್ಖಿಣಂ;

ವಸಂ ತತ್ಥ ಸಿರೀವಡ್ಢ-ಮಾನವಾಪಿಂ ಸಗಾಹಯಿ.

೯. ಕತ್ವಾ ಗಿರಿವಿಹಾರಞ್ಚ, ಸಙ್ಘಿಕಂ ತಸ್ಸ ದಾಪಯಿ;

ಖೇತ್ತಾನಂ ದ್ವಿಸತಂ ಸಙ್ಘ-ಭೋಗತ್ಥಾಯ ಮಹಾಮತಿ.

೧೦. ಅದಾ ಮಲಯರಾಜಸ್ಸ, ದಾಠಾನಾಮಂ ಸಧೀತರಂ;

ಪರಿವೇಣಂ ಸೀರಿಸಙ್ಘ-ಬೋಧಿನಾಮಞ್ಚ ಕಾರಯಿ.

೧೧. ಮಹಾಸಿವಸ್ಸ ಕಾರೇಸಿ, ಪರಿವೇಣಂ ಸನಾಮಕಂ;

ಪರಿವಾರೋ’ಪಿ ತಸ್ಸಾಸಿ, ಏವಂ ಪುಞ್ಞಪರಾಯನೋ.

೧೨. ಕತ್ವಾ ಸಾಧುಪಚಾರೇನ, ಪೋರಾಣಂ ಸಙ್ಗಹಂ ವಿಧಿಂ;

ಅನ್ತರಾಯಂ ವಿಸೋಧೇತುಂ, ಜಿಣ್ಣಞ್ಚ ಪಟಿಸಙ್ಖರಿ.

೧೩. ಕವಯೋ ತಸ್ಸ ರಜ್ಜಮ್ಹಿ, ಸೀಹಳಾಯ ನಿರುತ್ತಿಯಾ;

ಕಾವೇಯ್ಯೇ ಬಹುಕೇ’ಕಾಸುಂ, ವಿಚಿತ್ರನಯಾಸಾಲಿನೋ.

೧೪. ವಿಹಾರೇ ದಕ್ಖಿಣೇ ಕಾಸಿ, ಪಾಸಾದಂ ಸುಮನೋಹರಂ;

ಅಕಾ ನವಹಿ ವಸ್ಸೇಹಿ, ದಿಪೇ ಕಣ್ಟಕಸೋಧನಂ.

೧೫. ಕುರುನ್ದನಾಮಂ ಕಾರೇತ್ವಾ, ವಿಹಾರಂ ಸಬ್ಬಸಙ್ಘಿಕಂ;

ವಾಪಿಂ ತನ್ನಾಮಕಂ ನಾಳಿ-ಕೇರಾರಾಮಂ ತಿಯೋಜನಂ.

೧೬. ಮಹಾಸಿವವ್ಹಯೇ ಚೇವ, ಸಸ್ಸಂ ಕಾರಯಿತುಂ ಅದಾ;

ಲಾಭಸಕ್ಕಾರಸಮ್ಮಾನ-ಮಾರಾಮಿಕಸತಂ ತದಾ.

೧೭. ವಿಹಾರಂ ತಂ ಸಮೀಪಮ್ಹಿ, ಕತ್ವಾ ಅಮ್ಬಿಲಪಸ್ಸವಂ;

ಗಾಮಂ ತನ್ನಾಮಕಂ ಚಾದಾ, ಥೇರಿಯಾನಂ ತಪಸ್ಸೀನಂ.

೧೮. ಉತ್ತರವಲ್ಲಿವಿಹಾರಸ್ಸ, ರತನಂ ದೀಘವಣ್ಣಿತಂ;

ದತ್ವಾ ಗಾಮಂ ಪತಿಟ್ಠೇಸಿ, ಸತ್ಥುಬಿಮ್ಬಂ ಸಿಲಾಮಯಂ.

೧೯. ಕೇಳಿವಾತೇ ಚ ಕಾರೇಸಿ, ಸುಮನಂ ನಾಮ ಪಬ್ಬತಂ;

ಮಹಾತೇಲವಟಂಬೋಧಿ-ಘರೇ ಪಾಸಾಣವೇದಿಕಂ.

೨೦. ಕಾರೇತ್ವಾ ಲೋಹಪಾಸಾದಂ, ಪಾಸಾದಮಹನೇ ಅದಾ;

ಛತ್ತಿಂಸಾನಂ ಸಹಸ್ಸಾನಂ, ಭಿಕ್ಖೂನಂ ಸೋ ತಿಚೀವರಂ.

೨೧. ಗಾಮಂ ದತ್ವಾ ನಿಯೋಜೇಸಿ, ಆರಕ್ಖಂ ಧೀತು ನಾಮಕಂ;

ಹತ್ಥಿಕುಚ್ಛಿವಿಹಾರೇಪಿ, ಪಾಸಾದಂ ಕಾಸಿ ಬುದ್ಧಿಮಾ.

೨೨. ದಾಠಾ ಸಿವಸ್ಸ ಠತ್ವಾನ, ಓವಾದೇ ಸಾಧು ಭಿಕ್ಖುನೋ;

ಸಮಾಚರನ್ತೋ ಧಮ್ಮೇನ, ಸಕ್ಕಚ್ಚಂ ತಮುಪಟ್ಠಹಿ.

೨೩. ಮೂಗಸೇನಾಪತಿಂ ಚಾಕಾ, ವಿಹಾರಂ ಸೋ ವಿಸಾಲಕಂ;

ಗಾಮಂ ಲಜ್ಜಿಕಮೇತಸ್ಸ, ದಾಸ ಭೋಗಾಯ’ದಾಸಿ ಚ.

೨೪. ಮಹಾನಾಗಸ್ಸ ಪುಞ್ಞತ್ಥಂ, ರಞ್ಞೋ ತಂನಾಮಕಂ ಅಕಾ;

ಮಹಾಥೇರಸ್ಸ ತಞ್ಚಾ’ದಾ, ರಾಜಾ ತೇಪಿಟಕಸ್ಸ ಸೋ.

೨೫. ಅತ್ತನೋ ಸದಿಸಾನಞ್ಚ, ಯೋಗೀನಂ ವಿಗತಾಲಯೋ;

ಭಿಕ್ಖೂನಂ ಚತುಸಟ್ಠೀನಂ, ವಿಹಾರಂ ತಂ ತದಾ ಅದಾ.

೨೬. ಕತ್ವಾ ತಸ್ಸೇವ ಮಹಾ-ಪರಿವೇಣನಿವಾಸಿನೋ;

ಭಿನ್ನೋರುದೀಪಂ ದತ್ವಾನ, ವಟ್ಟಕಾಕಾರಪಿಟ್ಠಿತೋ.

೨೭. ದಕ್ಖಿಣಗೀರಿದಳ್ಹವ್ಹೇ, ಮಹಾನಾಗೇ ಚ ಪಬ್ಬತೇ;

ಕಾಳವಾಪಾದಿಕೇ ಚಾ’ಕಾ, ವಿಹಾರೇ ಪೋಸಥಾಲಯೇ.

೨೮. ವಿಹಾರೇ ಅಭಯೇ’ಕಾಸಿ, ಮಹಾಪೋಕ್ಖರಣಿಂ ತಥಾ;

ಚೇತಿಯಪಬ್ಬತೇ ಚಾಕಾ, ನಾಗಸೋಣ್ಡಿಂ ಥಿರೋದಿಕಂ.

೨೯. ಮಹಿನ್ದತಟವಾವಿಞ್ಚ, ಕಾರಾಪೇತ್ವಾನ ಸಾಧುಕಂ;

ಏತಿಸ್ಸಾ ಮರಿಯಾದಾಯ, ಥೇರಂ ನೇತುಂ ನಿಯೋಜಯಿ.

೩೦. ಮಹಾಮಹಿನ್ದ ಥೇರಮ್ಹಿ, ತಂಠಾನಸಮುಪಾಗತೋ;

ತರಚ್ಛಾ ಏವ ನೇತುನ್ತಿ, ಕತಿಕಞ್ಚೇವ ಕಾರಯಿ.

೩೧. ಛತ್ತಂ ಸೋಣ್ಣಞ್ಚ ಕಾರೇಸಿ, ನಿಕಾಯೇಸುಪಿ ತೀಸು ಸೋ;

ಸತ್ತಾಟ್ಠನವ ವಾರೇಸು, ಮಹಗ್ಘರತನೇಹಿ ಚ.

೩೨. ಮಹಾತೂಪೇ ಚತುಬ್ಬೀಸ-ಭಾರಂ ಛತ್ತಂ ಸುವಣ್ಣಯಂ;

ತತ್ಥ ತತ್ಥ ಚ ಪೂಜೇಸಿ, ಮಹಗ್ಘಂ ರತನುತ್ತಮಂ.

೩೩. ದಾಠಾಧಾತುಘರಂ ಕತ್ವಾ, ವಿಚಿತ್ರರತನುಜ್ಜಲಂ;

ಕಾಸಿ ಹೇಮಕರಣ್ಡಞ್ಚ, ಲೋಹನಾವಞ್ಚ ಪಾಳಿಯಂ.

೩೪. ಮಣಿಮೇಖಲನಾಮಞ್ಚ, ಬನ್ಧಾಪೇಸಿ ಸಬನ್ಧನಂ;

ಮಹಾಮಾತಿಞ್ಚ ಗಣ್ಹೇಸಿ, ಮಣಿಹೀರಕವಾಪಿಯಂ.

೩೫. ತದಾ ಏಕೋ ಮಹಾಥೇರೋ, ಜೋತಿಪಾಲಕನಾಮಕೋ;

ಪರಾಜೇಸಿ ವಿವಾದೇನ, ದೀಪೇ ವೇತುಲ್ಲವಾದಿನೋ.

೩೬. ದಾಠಾಪಭುತಿನಾಮೋ’ಥ, ಆದಿಪಾದೋ’ತಿಲಜ್ಜಿತೋ;

ಹತ್ಥಮುಕ್ಖಿಪ್ಪಿ ತಂ ಹನ್ತುಂ, ಗಣ್ಡೋ ಸಞ್ಜಾಯಿ ತಂಖಣೇ.

೩೭. ರಾಜಾ ತಸ್ಮಿಂ ಪಸೀದಿತ್ವಾ, ವಿಹಾರೇಯೇವ ವಾಸಯಿ;

ಮಾನೇನ ತಂ ಅನಾಗಮ್ಮ, ದಾಠಾಪಭೂಮತೋ ಕಿರ.

೩೮. ದತ್ವಾ ಮಹಾದಿಪಾದತ್ತಂ, ಭಾಗಿನೇಯ್ಯಗ್ಗಬೋಧಿನೋ;

ರಕ್ಖಿತುಂ ತಂ ನಿಯೋಜೇಸಿ, ಥೇರಂ ಸೋಪಿ ತಮಾಚರಿ.

೩೯. ನೀಲಗೇಹಪರಿಚ್ಛೇದಂ, ಕತ್ವಾ ತಸ್ಸೇವ ಸೋ ಅದಾ;

ಕತ್ವೇವಂ ಬಹುಧಾ ಪುಞ್ಞಂ, ಚತುತ್ತಿಂಸೇ ಸಮೇ ಮತೋ.

೪೦. ಅಗ್ಗಬೋಧಿ ತತೋ ಆಸಿ, ರಾಜಾ ಪುಬ್ಬಸ್ಸ ರಾಜಿನೋ;

ಮಹಲ್ಲಕತ್ತಾನಂ ಖುದ್ದ-ನಾಮೇನ ಪರಿದೀಪಯುಂ.

೪೧. ಸೋ ದೀಪಂ ಪರಿಪಾಲೇಸಿ, ಪುಬ್ಬಚಾರಿತ್ತಕೋವಿದೋ;

ಅಕಾಸಿ ಚ ಮಹೇಸಿಂ ಸೋ, ಮಾತುಲಧೀತುಮತ್ತನೋ.

೪೨. ಸಙ್ಘಭದ್ದಂ ಅಸಿಗ್ಗಾಹಂ, ಕಾಸಿ ಬನ್ಧುಂ ಮಹೇಸಿಯಾ;

ಯಥಾರಹಮದಾ ಚೇವ, ಠಾನನ್ತರಮನಾಲಯೋ.

೪೩. ಕತ್ವಾ ವೇಳುವನಂ ರಾಜಾ, ಸಾಗಲೀನಂ ನಿಯೋಜಯೀ;

ಜಮ್ಬುರನ್ತರಗಲ್ಲಞ್ಚ, ಕಾಸಿ ಮಾತಿಕಪಿಟ್ಠಿಕಂ.

೪೪. ರಞ್ಞೋ ತಸ್ಸೇ’ವ ರಜ್ಜಮ್ಹಿ, ಕಾಲಿಙ್ಗೇಸು ಮಹೀಪತಿ;

ಸತ್ತಾನಂ ಮರಣಂ ಯುದ್ಧೇ, ದಿಸ್ವಾ ಸಂವಿಗ್ಗಮಾನಸೋ.

೪೫. ಇಮಂ ದೀಪಮುಪಾಗಮ್ಮ, ಪಬ್ಬಜ್ಜಾ ಕತನಿಚ್ಛಯೋ;

ಜೋತಿಪಾಲಮ್ಹಿ ಪಬ್ಬಜಿ, ರಾಜಾ ಸಕ್ಕಾಸಿ ತಂ ಚಿರಂ.

೪೬. ಪಧಾನಠಾನಂ ತಸ್ಸ’ಕಾ, ವಿಹಾರೇ ಮತ್ತಪಬ್ಬತೇ;

ತಸ್ಸಾಮಚ್ಚೋ ಮಹೇಸೀ ಚ, ತಥೇವಾ’ಗಮ್ಮ ಪಬ್ಬಜುಂ.

೪೭. ರಞ್ಞೋ ಮಹೇಸೀ ಸುತ್ವಾನ, ತಸ್ಸ ಪಬ್ಬಜ್ಜಮುತ್ತಮಂ;

ಸಕ್ಕಚ್ಚಂ ತಮುಪಟ್ಠಾಸಿ, ರತನವ್ಹಞ್ಚ ಕಾರಯಿ.

೪೮. ಅದಾ ರಾಜಾ ಅಮಚ್ಚಸ್ಸ, ಪಾಚೀನಕಣ್ಡರಾಜಿಯಂ;

ವೇತ್ತವಾಸವಿಹಾರಞ್ಚ, ಸೋ’ದಾ ಸಙ್ಘಸ್ಸ ತಂ ಯತಿ.

೪೯. ರಾಜತ್ಥೇರೇಮತೇ ರಾಜಾ, ಸೋಚಿತ್ವಾ ಪರಿದೇವಿಯ;

ಪಧಾನಠಾನಂ ಕಾರೇಸಿ, ಚೂಳಗಲ್ಲವಿಹಾರಕೇ.

೫೦. ಪಲಂನಗರಗಞ್ಚೇವ, ತಸ್ಸ ಠಾನಞ್ಹಿ ಕಾರಯಿ;

ಏವಂ ತದತ್ಥಂ ಪುಞ್ಞಾನಿ, ಬಹೂನಿ’ಪಿ ಮಹೀಪತಿ.

೫೧. ಜೋತಿಪಾಲಿತ ಥೇರಮ್ಹಿ, ತೂಪಾರಾಮಮ್ಹಿ ಚೇತಿಯಂ;

ವನ್ದಮಾನೇ ಪಭಿಜ್ಜಿತ್ವಾ, ಭಾಗೋ ತಂ ಪುರತೋ ಪತಿ.

೫೨. ಪಕ್ಕೋಸಿತ್ವಾನ ರಾಜಾನಂ, ಥೇರೋ ದಸ್ಸೇಸಿ ದುಕ್ಖಿತೋ;

ರಾಜಾ ದಿಸ್ವಾವ ಸಂವಿಗ್ಗೋ, ಕಮ್ಮಂ ಪಟ್ಠಪಿ ತಂಖಣೇ.

೫೩. ದಕ್ಖಿಣಕ್ಖಕಧಾತುಂ ಸೋ, ಲೋಹಪಾಸಾದಕುಚ್ಛಿಯಂ;

ಸಾರಕ್ಖಂ ಠಪಯಿತ್ವಾನ, ರತ್ತಿನ್ದಿವಮಪೂಜಯಿ.

೫೪. ನವಕಮ್ಮೇ ಚಿರಾಯನ್ತೇ, ಥೂಪಾರಾಮಮ್ಹಿ ದೇವತಾ;

ಸುಪಿನಂ ತಸ್ಸ ದಸ್ಸೇಸುಂ, ರತ್ತಿಮಾರಾಮಿಕಾ ವಿಯ.

೫೫. ಸಚೇ ರಾಜಾ ಪಪಞ್ಚೇತಿ, ಕಾತುಂ ಧಾತುಘರಂ ಮಯಂ;

ಧಾತುಂ ಗಹೇತ್ವಾ ಗಚ್ಛಾಮ, ಯತ್ಥತತ್ಥಾ’ತಿ ತಂಖಣೇ.

೫೬. ರಾಜಾ ಪಬುದ್ಧೋ ಸಂವಿಗ್ಗೋ, ನ ಚಿರೇನೇವ ಕಾರಯಿ;

ಕಮ್ಮಂ ಧಾತುಘರೇಸಬ್ಬಂ, ಚಿತ್ತಕಮ್ಮಾದಿಸಞ್ಞುತ್ತಂ.

೫೭. ಚತಸ್ಸೋ ಪಟಿಮಾಯೋ ಚ, ಪಲ್ಲಙ್ಕೇ ಚ ಸಿಲಾಮಯೇ;

ಹೇಮಚ್ಛತ್ತಂ ಸಿಲಾದನ್ತ-ಕಮ್ಮಂ ಗೇಹಮ್ಹಿ ಸಬ್ಬಸೋ.

೫೮. ಮಹಾಮಚ್ಚಾದಯೋ’ಕಂಸು, ಕರಣ್ಡಾನಂ ಸತಂ ನವ;

ದೇವಾನಂಪಿಯತಿಸ್ಸಸ್ಸ, ಕಮ್ಮಞ್ಚ ನಿಖಿಲಂ ನವಂ.

೫೯. ಸಬ್ಬುಸ್ಸಾಹೇನ ಕಾರೇತ್ವಾ, ಮಹಾಪೂಜಂ ಯಥಾರಹಂ;

ಆನೇತ್ವಾ ಲೋಹಪಾಸಾದಾ, ಧಾತುಂ ಸಬ್ಬಾದರೇನ ಸೋ.

೬೦. ಜೋತಿಪಾಲಂ ಮಹಾಥೇರಂ, ಸಸಙ್ಘಂ ಪರಿವಾರಿಯ;

ಪರಿಹಾರೇನ ವಡ್ಢೇಸಿ, ಧಾತುಂ ಧಾತುಕರಣ್ಡಕೇ.

೬೧. ಧಾತುಗೇಹಸ್ಸ ಪಾದಾಸಿ, ಲಙ್ಕಾದೀಪಂ ಸಹತ್ತನಾ;

ಲಾಭಗ್ಗಾಮ-ಮದಾ ತಸ್ಸಾ, ರಕ್ಖಕಾನಂ ಮಹೇಸಿಯಾ.

೬೨. ನಾಗದೀಪಮ್ಹಿ ಗೇಹಞ್ಚ, ರಾಜಾಯತನಧಾತುಯಾ;

ಉಣ್ಣಲೋಮಘರಞ್ಚೇವ, ಛತ್ತಮಾಮಲಚೇತಿಯೇ.

೬೩. ತತ್ಥ ಗಾಮಂ ವಿಹಾರಸ್ಸ, ಯಾಗುದಾನಾಯ’ದಾಸಿ ಚ;

ವಿಹಾರಸ್ಸ’ಭಯಸ್ಸಾ’ದಾ, ಗಾಮಮಙ್ಗಣಸಾಲಕಂ.

೬೪. ನಾಮಂ ಕತ್ವಾನ ಸೋ’ಕಾಸಿ, ಅತ್ತನೋ ಚ ಮಹೇಸಿಯಾ;

ದಾಠಗ್ಗಬೋಧಿಮಾವಾಸಂ, ವಿಹಾರೇ ಅತಯುತ್ತರೇ.

೬೫. ದೇವೀ ಕಪಾಲನಾಗಂ ಸಾ, ವಿಹಾರಂ ಸಾಧುಕಾರಿಯ;

ತಸ್ಸೇ’ವಾದಾ ವಿಹಾರಸ್ಸ, ಸಮ್ಪನ್ನಚತುಪಚ್ಚಯಂ.

೬೬. ಗೇಹಂ ಜೇತವನೇ ಕಾಸಿ, ರಾಜಾ ರಾಜತಚುಮ್ಬಟಂ;

ಉದಪಾನಂ ಮಣಾಪೇಸಿ, ಸೋವ ಬೋಧಿಘರನ್ತಿಕೇ.

೬೭. ಗಙ್ಗಾತಟಂ ವಲಾಹಸ್ಸಂ, ವಾಪಿಂ ಗಿರಿತಟಞ್ಚಕಾ;

ಮಹಾಪಾಳಿಂಪಿ ವಡ್ಢೇಸಿ, ಭತನಾವಞ್ಚ ಕಾರಯಿ.

೬೮. ಭಿಕ್ಖೂನೀನಂ ಮಹೇಸೀ ಚ, ಭತ್ತವಂಸಂ ಸಮಾದಿಸಿ;

ಏವಂ ಪುಞ್ಞಾನಿ ಕತ್ವಾ ಸೋ, ದಿವಂ’ಗಾ ದಸಮೇ ಸಮೇ.

೬೯. ಏವಂ ಪುಞ್ಞರತಾ ನರಾಧಿಪತಯೋ ಸಮ್ಪನ್ನಭೋಗಾ ಗಮುಂ;

ಮಚ್ಚುಸ್ಸೇವ ವಸಂ ತತೋಹಿ ಮತಿಮಾ ಸಮ್ಮಾ ಭವಸ್ಸೀದಿಸಂ;

ಪಸ್ಸನ್ತೋ ನಿಯಮಂ ವಿಹಾಯ ವಿಧಿನಾ ಸಬ್ಬಂ ಭವೇ ಸಙ್ಗತಿಂ;

ನಿಬ್ಬಾನಾಭಿಮುಖೋ ಚರೇಯ್ಯ ಧಿತಿಮಾ ಪಬ್ಬಜ್ಜಮಜ್ಝೂಪಗೋ.

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ದ್ವಿರಾಜಕೋ ನಾಮ

ಏಕಚತ್ತಾಲೀಸತಿಮೋ ಪರಿಚ್ಛೇದೋ.