ಏಕೂನಚತ್ತಾಲೀಸತಿಮ ಪರಿಚ್ಛೇದ

ರಾಜದ್ವಯದೀಪನೋ

೧. ತತೋ ಕಸ್ಸಪನಾಮೋ ಸೋ, ಪಾಪಕೋ ನರಪಾಲಕೋ;

ಅಸ್ಸ ಗೋ ಪಞ್ಚಸೂದಞ್ಚ, ಪೇಸಯಿತ್ವಾನ ಭಾತಿಕಂ.

೨. ಮಾರಾಪೇತುಂ ಅಸಕ್ಕೋನ್ತೋ, ಭೀತೋ ಸೀಹಗಿರಿಂ ಗತೋ;

ದುರಾರೋಹಂ ಮನುಸ್ಸೇಹಿ, ಸೋಧಾಪೇತ್ವಾ ಸಮನ್ತತೋ.

೩. ಪಾಕಾರೇನ ಪರಿಕ್ಖಿಪ್ಪ, ಸೀಹಾಕಾರೇನ ಕಾರಯಿ;

ತತ್ಥ ನಿಸ್ಸೇಣಿ ಗೇಹಾನಿ, ತೇನ ತಂ ನಾಮಕೋ ಅಹೂ.

೪. ಸಂಹರಿತ್ವಾ ಧನಂ ತತ್ಥ, ನಿದಹಿತ್ವಾ ಸುಗೋಪಿತಂ;

ಅತ್ತನೋ ನಿಹಿತಾನಂ ಸೋ, ರಕ್ಖಂ ದತ್ವಾ ತಹಿಂ ತಹಿಂ.

೫. ಕತ್ವಾ ರಾಜಘರಂ ತತ್ಥ, ದಸ್ಸನೇಯ್ಯಂ ಮನೋರಮಂ;

ದುತಿಯಾಲಕಮನ್ದಂವ, ಕುವೇರೋವ ತಹಿಂ ವಸಿ.

೬. ಮಿಗಾರೋ ನಾಮ ಕಾರೇಸಿ, ಸೇನಾಪತಿ ಸನಾಮಕಂ;

ಪರಿವೇಣಂ ತಥಾಗೇಹ-ಮಭಿಸೇಕಜಿನಿಸ್ಸ ಚ.

೭. ತಸ್ಸಾಭಿಸೇಕಂ ಯಾಚಿತ್ವಾ, ಸಿಲಾಸಮ್ಬುದ್ಧತೋ’ಧಿರಂ;

ಅಲದ್ಧಾಸಾಮಿ ನೋ ರಜ್ಜೇ, ಜಾನಿಸ್ಸಾಮೀತಿ ಸಣ್ಠಹಿ.

೮. ಹುತ್ವಾ ವಿಪ್ಪಟಿಸಾರೀ ಸೋ, ಅತ್ತನಾ ಕತಕಮ್ಮನಾ;

ಮುಚ್ಚಿಸ್ಸಾಮಿ ಕತಂ ನು’ತಿ, ಪುಞ್ಞಂ ಕಾಸಿ ಅನಪ್ಪಕಂ.

೯. ಮಹಾ ವತ್ಥುನಿ ಕಾರೇಸಿ, ದ್ವಾರೇಸು ನಗರಸ್ಸ ಸೋ;

ಅಮ್ಬುಯ್ಯಾನೇ ಚ ಕಾರೇಸಿ, ದೀಪೇ ಯೋಜನ ಯೋಜನೇ.

೧೦. ಇಸ್ಸರಸಮಣಾರಾಮಂ, ಕಾರೇತ್ವಾ ಪುಬ್ಬವತ್ಥುತೋ;

ಅಧಿಕಂ ಭೋಗಗಾಮೇ ಚ, ಅಧಿಕಂ ತಸ್ಸ ದಾಪಯಿ.

೧೧. ಬೋಧಿ ಉಪ್ಪಲವಣ್ಣಾ ಚ, ತಸ್ಸಾಸುಂ ಧೀತರೋ ದುವೇ;

ವಿಹಾರಸ್ಸ’ಸ್ಸ ಕಾರೇಸಿ, ನಾಮಂ ತಾಸಞ್ಚ ಅತ್ತನೋ.

೧೨. ದೇನ್ತೇ ತಸ್ಮಿಂ ನ ಇಚ್ಛಿಂಸು, ಸಮಣಾ ಥೇರವಾದಿನೋ;

‘‘ಪಿತುಘಾತಿಸ್ಸ ಕಮ್ಮ’’ನ್ತಿ, ಲೋಕಗಾರಯ್ಹ ಭೀರುನೋ.

೧೩. ದಾತುಕಾಮೋಸ ತೇಸಂ’ವ, ಸಮ್ಬುದ್ಧ ಪಟಿಮಾಯ’ದಾ;

ಭಿಕ್ಖವೇ ಅಧಿವಾಸೇಸುಂ, ಭೋಗೋ ನೋ ಸತ್ಥುನೋ ಇತಿ.

೧೪. ಕಥಾ ನಿಯ್ಯನ್ತಿ ಉಯ್ಯಾನೇ, ಸಮೀಪೇ ಪಬ್ಬತಸ್ಸ ಸೋ;

ಕಾರಾಪೇಸಿ ವಿಹಾರಂ ಸೋ, ತೇಸಂ ನಾಮೋ ತತೋ ಅಹು.

೧೫. ಅದಾ ಧಮ್ಮರುಚಿನಂ ತಂ, ಸಮ್ಪತ್ತ ಚತುಪಚ್ಚಯಂ;

ವಿಹಾರಞ್ಚೇವ ಉಯ್ಯಾನಂ, ದಿಸಾಭಾಗಮ್ಹಿ ಉತ್ತರೇ.

೧೬. ಭತ್ತಂ ಸನೀರಪಕ್ಕಂ ಸೋ, ಭುಞ್ಜಿತ್ವಾ ದಿನ್ನಮಿತ್ಥಿಯಾ;

ಸಪ್ಪಿಯುತ್ತಂ ಮನುಞ್ಞೇಹಿ, ಸೂಪೇಹಿ ಅಭಿಸಙ್ಖತಂ.

೧೭. ಮನುಞ್ಞಮಿದಮಯ್ಯಾನಂ, ದಸ್ಸಮೇವನ್ತಿ ತಾದಿಸಂ;

ಭತ್ತಂ ಪಾದಾಸಿ ಭಿಕ್ಖೂನಂ, ಸಬ್ಬೇಸಞ್ಚ ಸಚೀವರಂ.

೧೮. ಉಪೋಸಥಮಧಿಟ್ಠಾಸಿ, ಅಪ್ಪಮಞ್ಞಞ್ಚ ಭಾವಯಿ,

ಸಮಾದಿಯಿ ಧುತಙ್ಗೇ ಚ, ಲಿಖಾಪೇಸಿ ಚ ಪೋತ್ಥಕೇ.

೧೯. ಪಟಿಮಾದಾನ ಸಾಲಾದಿಂ, ಕಾರಾಪೇಸಿ ಅನಪ್ಪಕಂ;

ಭಿತೋ ಸೋ ಪರಲೋಕಮ್ಹಾ, ಮೋಗ್ಗಲ್ಲಾನಾ ಚ ವತ್ತತಿ.

೨೦. ತತೋ ಅಟ್ಠಾರಸೇ ವಸ್ಸೇ, ಮೋಗ್ಗಲ್ಲಾನೋ ಮಹಾಭಟೋ;

ಆದೇಸೇನ ನಿಗಣ್ಠಾನಂ, ದ್ವಾದಸಗ್ಗಸಹಾಯ ವಾ.

೨೧. ಜಮ್ಬುದೀಪಾ ಇಧಾಗಮ್ಮ, ದೇಸೇ ಅಮ್ಬಟ್ಠಕೋಲಕೇ;

ಕುಳಾರೀ ನಾಮೇ ಬನ್ಧಿತ್ಥ, ವಿಹಾರೇ ಬಲಸಞ್ಚಯಂ.

೨೨. ರಾಜಾ ಸುತ್ವಾ ಗಹೇತ್ವಾ ತಂ, ಭಞ್ಜಿಸ್ಸಾಮಿತಿ ನಿಕ್ಖಮಿ;

ನೇಮಿತ್ತೇಹಿ ನ ಸಕ್ಕಾತಿ, ವದನ್ತೇಪಿ ಮಹಾಬಲೋ.

೨೩. ಮೋಗ್ಗಲ್ಲಾನೋಪಿ ಸನ್ನದ್ಧ ಬಲೋ ಸೂರಸಹಾಯ ವಾ;

ಗಚ್ಛನ್ತೋ ಸುರಸಙ್ಗಾಮಂ, ದೇವೋ ವಿಯ ಸುಜಮ್ಪತಿ.

೨೪. ಅಞ್ಞಮಞ್ಞಂ ಉಪಾಗಮ್ಮ, ಭಿನ್ನವೇಲಾವ ಸಾಗರಾ;

ಆರಭಿಂಸು ಮಹಾಯುದ್ಧಂ, ಬಲಕಾಯಾ ಉಭೋಪಿ ತೇ.

೨೫. ಕಸ್ಸಪೋ ಪುರತೋ ದಿಸ್ವಾ, ಮಹನ್ತಂ ಕದ್ದಮಾಸಯಂ;

ಗನ್ತುಮಞ್ಞೇನ ಮಗ್ಗೇನ, ಪರಿವತ್ತೇಸಿ ದನ್ತಿನಂ.

೨೬. ದಿಸ್ವಾ ತಂ ಸಾಮಿಕೋನೋ’ಯಂ, ಪಲಾಯತಿ ಭಣೇ ಇತಿ;

ಬಲಕಾಯೋ ಪಭಿಜ್ಜಿತ್ಥ, ‘‘ದಿಟ್ಠಂ ಪಿಠ’’ನ್ತಿ ಘೋಸಯುಂ.

೨೭. ಮೋಗ್ಗಲಾನ ಬಲಾರಾಜಾ, ಛೇತ್ವಾ ನಿಕರಣೇನ ಸೋ;

ಸೀಸಂ ಉಕ್ಖಿಪಿಯಾ’ಕಾಸಂ, ಛುರಿಕಂ ಕೋಸಿಯಂ ಖಿಪಿ.

೨೮. ಕತ್ವಾ’ಳಾಹನ ಕಿಚ್ಚಂ ಸೋ, ತಸ್ಸ ಕಮ್ಮೇ ಪಸೀದಿಯ;

ಸಬ್ಬಂಸೋ ಧನಮಾದಾಯ, ಆಗಞ್ಛಿ ನಗರಂ ವರಂ.

೨೯. ಭಿಕ್ಖೂ ಸುತ್ವಾ ಪವತ್ತಿಂ ತಂ, ಸುನಿವತ್ಥಾ ಸುಪಾರುತಾ;

ಸಮ್ಮಜ್ಜಿತ್ವಾ ವಿಹಾರಞ್ಚ, ಅಟ್ಠಂಸು ಪಟಿಪಾಟಿಯಾ.

೩೦. ಮಹಾಮೇಘವನಂ ಪತ್ವಾ, ದೇವರಾಜಾವ ನನ್ದನಂ;

ಮಹಾಸೇನ ನಿವತ್ತೇತ್ವಾ, ಹತ್ಥಿಪಾಕಾರತೋ ಬಹಿ.

೩೧. ಉಪಸಙ್ಕಮ್ಮ ವನ್ದಿತ್ವಾ, ಸಙ್ಘೇ ತಸ್ಮಿಂ ಪಸೀದಿಯ;

ಛತ್ತತ್ತೇನ ಸಙ್ಘಂ ಪೂಜೇಸಿ, ಸಙ್ಘೋ ತಸ್ಸೇವ ತಂ ಅದಾ.

೩೨. ತಂ ಠಾನಂ ಛತ್ತವಡ್ಢೀತಿ, ವೋಹರಿಂಸು ತಹಿಂ ಕತಂ;

ಪರಿವೇಣಮ್ಪಿ ತಂ ನಾಮಂ, ಅಹೋಸಿ ಪುರಮಾಗತೋ.

೩೩. ವಿಹಾರೇ ದ್ವೇಪಿ ಗನ್ತ್ವಾನ, ಸಙ್ಘಂ ತತ್ಥಾ’ಭಿವನ್ದಿಯ;

ಪಾಪುಣಿತ್ವಾ ಮಹಾರಜ್ಜಂ, ಲೋಕಂ ಧಮ್ಮೇನ ಪಾಲಯಿ.

೩೪. ಕುದ್ಧೋ ನೀಹರಿ ದಾಠಂಸೋ, ಘಾತಕಂ ಪಿತುನೋ ಮಮ;

ಅನುವತ್ತಿತ್ವಾ ಮಚ್ಚಾತಿ, ತೇನ ರಕ್ಖಸ ನಾಮ ವಾ.

೩೫. ಅತಿರೇಕಸಹಸ್ಸಂ ಸೋ, ಅಮಚ್ಚಾನಂ ವಿನಾಸಯಿ;

ಕಣ್ಣನಾಸಾದಿ ಛೇದೇಸಿ, ಪಬ್ಬಾಜೇಸಿ ತಥಾ ಬಹೂ.

೩೬. ತತೋ ಸುತ್ವಾನ ಸದ್ಧಮ್ಮ-ಮುಪಸನ್ನೋ ಸುಮಾನಸೋ;

ಮಹಾದಾನಂ ಪವತ್ತೇಸಿ, ಮೇಘೋ ವಿಯ ಮಹೀತಲೇ.

೩೭. ಫುಸ್ಸಪುಣ್ಣಮೀಯಂ ದಾನ-ಮನುವಸ್ಸಂ ಪವತ್ತಯಿ;

ತತೋ ಪಟ್ಠಾಯ ತಂ ದಾನಂ, ದೀಪೇ ಅಜ್ಜಾಪಿ ವತ್ತತಿ.

೩೮. ಸೋಪಿ ಸಾರಥಿಕೋ ಲಾಜ-ದಾಯಕೋ ಪಿತುರಾಜಿನೋ;

ಆನೇತ್ವಾ ಪಿತುಸನ್ದೇ ಸಂ, ಮೋಗ್ಗಲ್ಲಾನಸ್ಸ ದಸ್ಸಯಿ.

೩೯. ತಂ ದಿಸ್ವಾ ಪರಿದೇವಿತ್ವಾ, ಪಿತುನೋ ಪೇಮ ಮತ್ತನೀ;

ವಣ್ಣೇತ್ವಾ ತಸ್ಸ ಪಾದಾಸಿ, ದ್ವಾರನಾಯಕತಂ ವಿಭೂ.

೪೦. ಸೇನಾಪತಿ ಮಿಗಾರೋಹಿ, ನಿವೇದೇತ್ವಾ ಯಥಾ ವಿಧಿಂ;

ಅಭಿಸೇಕ ಜಿನಸ್ಸಾ’ಕಾ, ಅಭಿಸೇಕಂ ಯಥಾರುಚಿಂ.

೪೧. ಸೀಹಾ’ಚಲೇ ದಳ್ಹನಾಮಂ, ದಾಠಾ ಕೋಣ್ಡಞ್ಞಕಮ್ಪಿ ಚ;

ವಿಹಾರಂ ಧಮ್ಮರುಚಿನಂ, ಸಾಗಲಿನಞ್ಚ ದಾಪಯಿ.

೪೨. ಪಬ್ಬತನ್ತು ವಿಹಾರಂಸೋ, ಕತ್ವಾ ಥೇರಸ್ಸ ದಾಪಯಿ;

ಮಹಾನಾಮಸನಾಮಸ್ಸ, ದೀಘಸಣ್ಡ ವಿಹಾರಕೇ.

೪೩. ರಾಜಿನಿನಾಮಕಞ್ಚೇವ, ಕತ್ವಾ ಭಿಕ್ಖುನುಪಸ್ಸಯಂ;

ಅದಾ ಸಾಗಲಿಕಾನಂ ಸೋ, ಭಿಕ್ಖುನೀನಂ ಮಹಾಮತಿ.

೪೪. ಲಮ್ಬಕಣ್ಣಕಗೋತ್ತೋಪಿ, ದಾಠಾ ಪಭುತಿ ನಾಮಕೋ;

ಕಸ್ಸಪಸ್ಸ ಉಪಠಾನೇ, ಕೋಚಿ ನಿಬ್ಬಿನ್ನ ಮಾನಸೋ.

೪೫. ಗನ್ತಾ ಮೇ ರೇಲಿಯಂ ವಗ್ಗಂ,

ವಾಸಂ ತತ್ಥೇವ ಕಪ್ಪಯಿ;

ಅಹೋಸಿ ಪುತ್ತೋ ತಸ್ಸೇಕೋ,

ಸಿಲಾಕಾ ಲೋತಿ ಪಿಸ್ಸುತೋ.

೪೬. ಸೋಪಿ ಕಸ್ಸಪತೋ ಭೀತೋ, ಞಾತಕೇನ ಸಹ’ತ್ತನೋ;

ಮೋಗ್ಗಲ್ಲಾನೇನ ಗನ್ತ್ವಾನ, ಜಮ್ಬುದೀಪತಲಂ ಇತೋ.

೪೭. ಬೋಧಿಪಣ್ಡವಿಹಾರಮ್ಪಿ, ಪಬ್ಬಜ್ಜಂ ಸಮುಪಾಗತೋ;

ಕರೋನ್ತೋ ಸಙ್ಘಕಿಚ್ಚಾನಿ, ಸಾದರೋ ಸೋ ಸುಪೇಸಲೋ.

೪೮. ಅಮ್ಮಂ ಸಙ್ಘಸ್ಸ ಪಾದಾಸಿ, ಸಙ್ಘೋ ತಸ್ಮಿಂ ಪಸೀದಿಯ;

ಆಹ’ಮ್ಬ ಸಾಮಣೇರೋ’ತಿ, ತೇನ ತಂ ನಾಮಕೋ ಅಹು.

೪೯. ಸೋ ಕೇಸಧಾತುವಂಸಮ್ಹಿ, ವುತ್ತೇನ ವಿಧಿನಾ ತತೋ;

ಕೇಸಧಾತುಂ ಲಭಿತ್ವಾನ, ತಸ್ಸ ರಜ್ಜೇ ಇಧಾ’ನಯಿ.

೫೦. ತಸ್ಸ ಕತ್ವಾನ ಸಕ್ಕಾರಂ, ಗಹೇತ್ವಾ ಕೇಸ ಧಾತುಯೋ;

ಮಹಗ್ಘೇ ನಿದಹಿತ್ವಾನ, ಕರಣ್ಡೇ ಫಲಿಕುಮ್ಭವ್ಹೇ.

೫೧. ದೀಪಙ್ಕರಸ್ಸ ನಾಥಸ್ಸ, ಪಟಿಮಾಯ ಘರೇ ವರೇ;

ವಡ್ಢೇತ್ವಾ ಪರಿಹಾರೇನ, ಮಹಾಪೂಜಂ ಪವತ್ತಯಿ.

೫೨. ಮಾತುಲಂ ಭರಿಯಞ್ಚ’ಸ್ಸ, ಕತ್ವಾ ಸೋವಣ್ಣಯಂ ತಹಿಂ;

ಠಪೇಸಿ ಪಟಿಮಾಯೋ ಚ, ಅಸ್ಸ ಬಿಮ್ಬಞ್ಚ ಚಾರುಕಂ.

೫೩. ಕೇಸಧಾತುಕರಣ್ಡಞ್ಚ, ಛತ್ತಂ ರತನಮಣ್ಡಪಂ;

ಸಾವಕಗ್ಗಯುಂಗಂ ವಾಳ-ಬೀಜನಿಞ್ಚ ಸಕಾರಯಿ.

೫೪. ಪರಿಹಾರಞ್ಚ ತಸ್ಸ’ದಾ, ರಾಜಾ ಅಧಿಕಮತ್ತನೋ;

ಸಿಲಾಕಾಳ ಮಸಿಗ್ಗಾಹಂ, ಕತ್ವಾ ರಕ್ಖಾಯ ಯೋಜಯಿ.

೫೫. ಅಸಿಗ್ಗಾಹಸಿಲಾಕಾಳೋ, ಇತಿ ತೇನಾ’ಸಿ ವಿಸ್ಸುತೋ;

ಭಗಿನಿಞ್ಚ’ಸ್ಸ ಪಾದಾಸಿ, ಸದ್ಧಿಂ ಭೋಗೇನ ಭೂಮಿಪೋ.

೫೬. ವುತ್ತೋ’ಯಮತಿ ಸಙ್ಖೇಪೋ, ವಿತ್ಥಾರೋ ಪನ ಸಬ್ಬಸೋ;

ಕೇಸಧಾತುಕವಂಸಮ್ಹಾ, ಗಹೇತಬ್ಬೋ ವಿಭಾವಿನಾ.

೫೭. ಬನ್ಧಿತ್ವಾ ಸಾಗರಾ ರಕ್ಖಂ, ದೀಪಞ್ಚ ಕಾಸಿನಿಬ್ಭಯಂ;

ಧಮ್ಮಕಮ್ಮನ ಸೋಧೇಸಿ, ಸಧಮ್ಮಂ ಜಿನಸಾಸನಂ.

೫೮. ಸೇನಾಪತಿಸ ನಾಮಂ’ಕಾ, ಪಧಾನಘರ ಮುತ್ತರೋ;

ಕತ್ವಾ’ಟ್ಠಾರಸಮೇ ವಸ್ಸೇ, ಸೋ ಪುಞ್ಞಾನಿ ಖಯಂ ಗತೋ.

೫೯. ಕಸ್ಸಪತೋ ಜಿತೋ ಅತಿಬಲಿ ಪುಞ್ಞಕ್ಖಯೇ ಸಙ್ಖತೇ;

ಜೇತುಂ ನೋ ವಿಸಹಿತ್ಥ ಮಚ್ಚುಮುಪಗಂ ಸೋ ಯೇವದಾಸೋವಿಯ;

ತಸ್ಮಾ ಮಚ್ಚುಬಲಂ ನಿಹಚ್ಚ ಸುಖಿನೋ ಹೇಸ್ಸನ್ತಿ ಮೇಧಾವಿನೋ;

ನಿಬ್ಬಾನಂ ಪರಮಚ್ಚುತಂ ಸಿವಪದಂ ಪತ್ತಬ್ಬಮತ್ತಞ್ಞುನಾ.

ಸುಜನಪ್ಪಸಾದ ಸಂವೇಗತ್ಥಾಯ ಕತೇ ಮಹಾವಂಸೇ

ರಾಜದ್ವಯದೀಪನೋ ನಾಮ

ಏಕೂನಚತ್ತಾಲೀಸತಿಮೋ ಪರಿಚ್ಛೇದೋ.