ದ್ವತ್ತಿಂಸತಿಮ ಪರಿಚ್ಛೇದ

ತುಸಿತಪುರಗಮನಂ

೧. ಅನಿಟ್ಠಿತೇ ಛತ್ತಕಮ್ಮೇ, ಸುಧಾಕಮ್ಮೇ ಚ ಚೇತಿಯೇ;

ಮಾರಣನ್ತಿಕರೋಗೇನ, ರಾಜಾ ಆಸಿ ಗಿಲಾನಕೋ.

೨. ತಿಸ್ಸಂ ಪಕ್ಕೋಸಯಿತ್ವಾ ಸೋ, ಕನಿಟ್ಠಂ ದೀಘವಾಪಿತೋ;

‘‘ಥೂಪೇ ಅನಿಟ್ಠಿತಂ ಕಮ್ಮಂ, ನಿಟ್ಠಾಪೇಹೀತಿ ಅಬ್ರವಿ.

೩. ಭಾತುನೋ ದುಬ್ಬಲತ್ತಾಸೋ, ತುನ್ನವಾಯೇಹಿ ಕಾರಿಯ;

ಕಞ್ಚುಕಂ ಸುದ್ಧವತ್ಥೇಹಿ, ತೇನ ಛಾದಿಯ ಚೇತಿಯಂ.

೪. ಚಿತ್ತಕಾರೇಹಿ ಕಾರೇಸಿ, ವೇದಿಕಂ ತತ್ಥ ಸಾಧುಕಂ;

ಪನ್ತಿಪುಣ್ಣಘಟಾನಞ್ಚ, ಪಞ್ಚಙ್ಗುಲಕಪನ್ತಿಕಂ.

೫. ಛತ್ತಾಕಾರೇಹಿ ಕಾರೇಸಿ, ಛತ್ತಂ ವೇಳುಮಯಂ ತಥಾ;

ಖರಪತ್ತಮಯೇ ಚನ್ದ-ಸೂರಿಯೇ ಮುದ್ಧವೇದಿಯಂ.

೬. ಲಾಖಾಕುಙ್ಕುಮಕೇಹೇ’ತಂ, ಚಿತ್ತಯಿತ್ವಾ ಸುಚಿತ್ತಿತಂ;

ರಞ್ಞೋ ನಿವೇದಯಿ’’ಥೂಪೇ, ಕತ್ತಬ್ಬಂ ನಿಟ್ಠಿತಂ’’ಇತಿ.

೭. ಸಿವಿಕಾಯ ನಿಪಜ್ಜಿತ್ವಾ, ಇಧಾಗನ್ತ್ವಾ ಮಹೀಪತಿ;

ಪದಕ್ಖಿಣಂ ಕರಿತ್ವಾನ, ಸಿವಿಕಾಯೇ’ವ ಚೇತಿಯಂ.

೮. ವನ್ದಿತ್ವಾ ದಕ್ಖಿಣದ್ವಾರೇ, ಸಯನೇ ಭೂಮಿಸನ್ಥತೇ;

ಸಯಿತ್ವಾ ದಕ್ಖಿಣಪಸ್ಸೇನ, ಸೋ ಮಹಾಥೂಪ ಮುತ್ತಮಂ.

೯. ಸಯಿತ್ವಾ ವಾಮಪಸ್ಸೇಸ, ಲೋಹಪಾಸಾದ ಮುತ್ತಮಂ;

ಪಸ್ಸನ್ತೋ ಸುಮನೋ ಆಸಿ, ಭಿಕ್ಖುಸಙ್ಘಪುರೇಕ್ಖತೋ.

೧೦. ಗಿಲಾನಪುಚ್ಛನತ್ಥಾಯ, ಆಗತಾಹಿ ತತೋ ತತೋ;

ಛನ್ನವುತಿಕೋಟಿಯೋ ಭಿಕ್ಖೂ, ತಸ್ಮಿಂ ಆಸುಂ ಸಮಾಗಮೇ.

೧೧. ಗಣಸಜ್ಝಾಯಮಕರುಂ, ವಗ್ಗಬನ್ಧೇನ ಭಿಕ್ಖವೋ;

ಥೇರಪುತ್ತಾಭಯಂ ಥೇರಂ, ತತ್ಥಾ’ದಿಸ್ವಾ ಮಹೀಪತಿ.

೧೨. ಅಟ್ಠವೀಸ ಮಹಾಯುದ್ಧಂ, ಯುಜ್ಝನ್ತೋ ಅಪರಾಜಯಂ;

ಯೋ ಸೋ ನ ಪಚ್ಚುದಾವತ್ತೋ, ಮಹಾಯೋಧೋ ವಸೀ ಮಮ.

೧೩. ಮಚ್ಚುಯುದ್ಧಮ್ಹಿ ಸಮ್ಪತ್ತೇ, ದಿಸ್ವಾ ಮಞ್ಞೇ ಪರಾಜಯಂ;

ಇದಾನಿ ಸೋ ಮಂ ನೋ ಪೇತಿ, ಥೇರೋ ಥೇರಪುತ್ತಭಯೋ.

೧೪. ಇತಿ ಚಿನ್ತಯಿ ಸೋಥೇರೋ, ಜಾನಿತ್ವಾ ತಸ್ಸ ಚಿನ್ತಿತಂ;

ಕರಿನ್ದನದಿಯಾ ಸಿಸೇ, ವಸಂ ಪಞ್ಜಲಿಪಬ್ಬತೇ.

೧೫. ಪಞ್ಚಖೀಣಾಸವಸತ-ಪರಿವಾರೇನ ಇದ್ಧಿಯಾ;

ನಭಸಾಗಮ್ಮ ರಾಜಾನಂ, ಅಟ್ಠಾಸಿ ಪರಿವಾರಿಯ.

೧೬. ರಾಜಾ ದಿಸ್ವಾ ಪಸನ್ನೋ ತಂ, ಪುರತೋ ಚ ನಿಸೀದಿಯ;

ತುಮ್ಹೇ ದಸಮಹಾಯೋಧೇ, ಗಣ್ಹಿತ್ವಾನ ಪುರೇ ಅಹಂ.

೧೭. ಯುಜ್ಝಿಂ ಇದಾನಿ ಏಕೋ’ವ, ಮಚ್ಚುನಾ ಯುದ್ಧಮಾರಭಿಂ;

ಮಚ್ಚುಸತ್ತುಂ ಪರಾಜೇತುಂ, ನ ಸಕ್ಕೋಮೀ’’ತಿ ಆಹ ಚ.

೧೮. ಆಹ ಥೇರೋ ‘‘ಮಹಾರಾಜ-ಮಾ ಭಾಯಿ ಮನುಜಾಧಿಪ;

ಕಿಲೇಸಸತ್ತುಂ ಅಜಿತ್ವಾ, ಅಜೇಯ್ಯೋ ಮಚ್ಚುಸತ್ತುಕೋ.

೧೯. ಸಬ್ಬಮ್ಪಿ ಸಙ್ಖಾರಗತಂ, ಅವಸ್ಸಂಯೇವ ಭಿಜ್ಜತಿ;

‘‘ಅನಿಚ್ಚಾ ಸಬ್ಬಸಙ್ಖಾರಾ’’, ಇತಿ ವುತ್ತಂಹಿ ಸತ್ಥುನಾ.

೨೦. ಲಜ್ಜಾ ಸಾರಜ್ಜರಹಿತಾ, ಬುದ್ಧೇಪೇ’ತಿ ಅನಿಚ್ಚತಾ;

ತಸ್ಮಾ ಅನಿಚ್ಚಾ ಸಙ್ಖಾರಾ, ದುಕ್ಖಾ’ನತ್ತಾತಿ ಚಿನ್ತಯ.

೨೧. ದುತಿಯೇ ಅತ್ತಾಭಾವೇಪಿ, ಧಮ್ಮಚ್ಛನ್ದೋ ಮಹಾಹಿತೇ;

ಉಪಟ್ಠಿತೇ ದೇವಲೋಕೇ, ಹಿತ್ವಾ ದಿಬ್ಬಂ ಸುಖಂ ತುವಂ.

೨೨. ಇಧಾಗಮ್ಮ ಬಹುಂ ಪುಞ್ಞಂ, ಅಕಾಸಿ ಚ ಅನೇಕಧಾ;

ಕರಣಮ್ಪೇಕರಜ್ಜಸ್ಸ, ಸಾಸನುಜ್ಜೋತನಾಯತೇ.

೨೩. ಮಹಾಪುಞ್ಞಕತಂ ಪುಞ್ಞಂ, ಯಾವಜ್ಜದಿವಸಾ ತಯಾ;

ಸಬ್ಬಂನುಸ್ಸರಮೇವಂ ತೇ, ಸುಖಂ ಸಜ್ಜು ಭವಿಸ್ಸತಿ.

೨೪. ಥೇರಸ್ಸವಚನಂ ಸುತ್ವಾ, ರಾಜಾ ಅತ್ತಮನೋ ಅಹು;

‘‘ಅವಸ್ಸಯೋ ಮಚ್ಚುಯುದ್ಧೇಪಿ, ತ್ವಂ ಮೇ ಸೀ’’ತಿ ಅಭಾಸಿತಂ.

೨೫. ತದಾ ಚ ಆಹರಾಪೇತ್ವಾ, ಪಹಟ್ಠೋ ಪುಞ್ಞ ಪೋತ್ಥಕಂ;

ವಾಚೇತುಂ ಲೇಖಕಂ ಆಹ, ಸೋ ತಂ ವಾಚೇಸಿ ಪೋತ್ಥಕಂ.

೨೬. ಏಕೂನಸತವಿಹಾರಾ, ಮಹಾರಾಜೇನ ಕಾರಿತಾ;

ಏಕೂನವೀಸಕೋಟೀಹಿ, ವಿಹಾರೋ ಮರಿಚ ವಟ್ಟಿ ಚ.

೨೭. ಉತ್ತಮೋ ಲೋಹಪಾಸಾದೋ,

ತಿಂಸಕೋಟೀಹಿ ಕಾರಿತೋ;

ಮಹಾಥೂಪೇ ಅನಗ್ಘಾನಿ,

ಕಾರಿತಾ ಚತುವೀಸತಿ.

೨೮. ಮಹಾಥೂಪಮ್ಹಿ ಸೇಸಾನಿ, ಕಾರಿತಾನಿ ಸುಬುದ್ಧಿನಾ;

ಕೋಟಿಸಹಸ್ಸಂ ಅಗ್ಘನ್ತಿ, ಮಹಾರಾಜಾ’’ತಿ ವಾಚಯಿ.

೨೯. ‘‘ಕೋಟ್ಠನಾಮಮ್ಹಿ ಮಲಯೇ, ಅಕ್ಖಕ್ಖಾಯಿಕ ಛಾತಕೇ;

ಕುಣ್ಡಲಾನಿ ಮಹಗ್ಘಾನಿ, ದುವೇ ದತ್ವಾನ ಗಣ್ಹಿಯ.

೩೦. ಖೀಣಾಸವಾನಂ ಪಞ್ಚನ್ನಂ, ಮಹಾಥೇರಾನ ಮುತ್ತಮೋ;

ದಿನ್ನೋ ಪಸನ್ನಚಿತ್ತೇನ, ಕಙ್ಗುಅಮ್ಬಿಲಪಿಣ್ಡಕೋ.

೩೧. ಚೂಳಙ್ಗನಿಯ ಯುದ್ಧಮ್ಹಿ, ಪರಾಜಿತ್ವಾ ಪಲಾಯತಾ;

ಕಾಲಂ ಘೋಸಾಪಯಿತ್ವಾನ, ಆಗತಸ್ಸ ವಿಹಾಯಸಾ.

೩೨. ಖೀಣಾಸವಸ್ಸ ಯತಿನೋ, ಅತ್ತಾನಮನಪೇಕ್ಖಿಯ;

ದಿನ್ನಂ ಸರಕಭತ್ತ’ನ್ತಿ, ವುತ್ತೇ ಆಹ ಮಹೀಪತಿ.

೩೩. ವಿಹಾರಮಹಸತ್ತಾಹೇ, ಪಾಸಾದಸ್ಸ ಮಹೇತಥಾ;

ಥೂಪಾರಮ್ಭೇ ತು ಸತ್ತಾಹೇ, ತಥಾ ಧಾತುನಿಧಾನಕೇ.

೩೪. ಚಾತುದ್ದಿಸಸ್ಸ ಉಭತೋ, ಸಙ್ಘಸ್ಸ ಉಭತೋ ಮಯಾ;

ಮಹಾರಹಂ ಮಹಾದಾನಂ, ಅವಿಸೇಸಂ ಪವತ್ತಿತಂ.

೩೫. ಮಹಾವೇಸಾಖಪೂಜಾ ಚ, ಚತುವೀಸತಿ ಕಾರಯಿ;

ದೀಪೇ ಸಙ್ಘಸ್ಸ ತಿಕ್ಖತ್ತುಂ, ತಿಚೀವರಮದಾಪಯಿ.

೩೬. ಸತ್ತಸತ್ತ ದಿನಾನೇವ, ದೀಪೇ ರಜ್ಜಮಹಂ ಇಮಂ;

ಪಞ್ಚಕ್ಖತ್ತುಂ ಸಾಸನಮ್ಹಿ, ಅದಾಸಿಂ ಹಟ್ಠಮಾನಸೋ.

೩೭. ಸತತಂ ದ್ವಾದಸಠಾನೇ, ಸಪ್ಪಿನಾ ಸುದ್ಧವಟ್ಟಿಯಾ;

ದೀಪಸಹಸ್ಸಂ ಜಾಲೇಸಿಂ, ಪೂಜೇನ್ತೋ ಸುಗತಂ ಅಹಂ.

೩೮. ನಿಚ್ಚಂ ಅಟ್ಠಾರಸಠಾನೇ, ವಜ್ಜೇಹಿ ವಿಹಿತಂ ಅಹಂ;

ಗಿಲಾನ ಭತ್ತಭೇಸಜ್ಜಂ, ಗಿಲಾನಾನಮದಾಪಯಿಂ.

೩೯. ಚತುತ್ತಾಲೀಸಠಾನಮ್ಹಿ, ಸಙ್ಖತಂ ಮಧುಪಾಯಸಂ;

ತತ್ತಕೇಸ್ವೇವ ಠಾನೇಸು, ತೇಲುಲ್ಲೋಪಕಮೇವ ಚ.

೪೦. ಘತೇ ಪಕ್ಕೇ ಮಹಾಜಾಲ, ಪೂವೇ ಠಾನಮ್ಹಿ ತತ್ತಕೇ;

ತಥೇವ ಸಹ ಭತ್ತೇಹಿ, ನಿಚ್ಚ ಏಮವ ಅದಾಪಯಿಂ.

೪೧. ಉಪೋಸಥೇಸು ದಿವಸೇಸು, ಮಾಸೇ ಮಾಸೇ ಚ ಅಟ್ಠಸು;

ಲಂಕಾದೀಪೇ ವಿಹಾರೇಸು, ದೀಪ ತೇಲಮದಾಪಯಿಂ.

೪೨. ಧಮ್ಮದಾನಂ ಮಹನ್ತನ್ತಿ, ಸುತ್ವಾ ಅಮಿಸದಾನತೋ;

ಲೋಹ ಪಾಸಾದತೋ ಹೇಟ್ಠಾ, ಸಙ್ಘಮಜ್ಝಮ್ಹಿ ಆಸನೇ.

೪೩. ‘‘ಓಸಾರೇಸ್ಸಾಮಿ ಸಙ್ಘಸ್ಸ, ಮಙ್ಗಲಸುತ್ತ’’ಮಿಚ್ಚಹಂ;

ನಿಸಿನ್ನೋ ಓಸಾರಯಿತುಂ, ನಾಸಕ್ಖಿಂ ಸಙ್ಘಗಾರವಾ.

೪೪. ತತೋಪ್ಪಭುತಿ ಲಂಕಾಯ, ವಿಹಾರೇಸು ತಹಿಂ ತಹಿಂ;

ಧಮ್ಮಕಥಂ ಕಥಾಪೇಸಿಂ, ಸಕ್ಕರಿತ್ವಾನ ದೇಸಕೇ.

೪೫. ಧಮ್ಮಕಥಿಕ ಸ್ಸೇಕಸ್ಸ, ಸಪ್ಪಿಫಾಣಿತಸಕ್ಖರಂ;

ನಾಳಿಂ ನಾಳಿಮದಾಪೇಸಿಂ, ದಾಪೇಸಿಂ ಚತುರಙ್ಗುಲಂ.

೪೬. ಮುಟ್ಠಿಕಂ ಯಟ್ಠಿಮಧುಕಂ, ದಾಪೇಸಿಂ ಸಾಟಕದ್ವಯಂ;

ಸಬ್ಬಂಪಿಸ್ಸರಿಯೇ ದಾನಂ, ನಮೇ ಹಾಸೇಸಿ ಮಾನಸಂ.

೪೭. ಜೀವಿತಂ ಅನಪೇಕ್ಖಿತ್ವಾ, ದುಗ್ಗತೇನ ಸತಾ ಮಯಾ;

ದಿನ್ನ ದಾನ ದ್ವಯಂಯೇವ, ತಂ ಮೇ ಹಾಸೇಸಿ ಮಾನಸಂ.

೪೮. ತಂ ಸುತ್ವಾ ಅಭಯೋ ಥೇರೋ, ತಂ ದಾನದ್ವಯಮೇವ ಸೋ;

ರಞ್ಞೋ ಚಿತ್ತಪ್ಪಸಾದತ್ಥಂ, ಸಂ ವಣ್ಣೇಸಿ ಅನೇಕಧಾ.

೪೯. ತೇಸು ಪಞ್ಚಸು ಥೇರೇಸು, ಕಙ್ಗುಅಮ್ಬಿಲಗಾಹಕೋ;

ಮಲಿಯ ದೇವ ಮಹಾಥೇರೋ, ಸುಮನಕೂಟಮ್ಹಿ ಪಬ್ಬತೇ.

೫೦. ನವನ್ನಂ ಭಿಕ್ಖುಸತಾನಂ, ದತ್ವಾ ತಂ ಪರಿಭುಞ್ಜಿ ಸೋ;

ಪಥವೀಚಾಲಕೋ ಧಮ್ಮ, ಸುತ್ತಥೇರೋ ತು ತಂ ಪನ.

೫೧. ಕಲ್ಯಾಣಿಕವಿಹಾರಮ್ಹಿ, ಭಿಕ್ಖೂನಂ ಸಂವಿಭಾಜಿಯ;

ದಸದ್ಧಸ ತಸಙ್ಖಾನಂ, ಪರಿಭೋಗ ಮಕಾಸಯಂ.

೫೨. ತಲಙ್ಗರ ವಾಸಿಕೋ ಧಮ್ಮ, ದಿನ್ನತ್ಥೇರೋ ಪಿಯಙ್ಗುಕೇ;

ದೀಪೇ ದಸಸಹಸ್ಸಾನಂ, ದತ್ವಾನ ಪರಿಭುಞ್ಜಿತಂ.

೫೩. ಮಙ್ಗಣವಾಸಿಕೋ ಖುದ್ದ, ತಿಸ್ಸತ್ಥೇರೋ ಮಹಿದ್ಧಿಕೋ;

ಕೇಲಾಸೇ ಸಟ್ಠಿಸಹಸ್ಸಾನಂ, ದತ್ವಾನ ಪರಿಭುಞ್ಜಿ ತಂ.

೫೪. ಮಹಾಬ್ಯಗ್ಘೋ ಚ ಥೇರೋ ತಂ, ಉಕ್ಕನಗರವಿಹಾರಕೇ;

ದತ್ವಾ ಸತಾನಂ ಸತ್ತಾನಂ, ಪರಿಭೋಗಮಕಾಸಯಂ.

೫೫. ಸರಕಭತ್ತಗಾಹೀ ತು, ಥೇರೋ ಪಿಯಙ್ಗುದೀಪಕೇ;

ದ್ವಾದಸ ಭಿಕ್ಖುಸಹಸ್ಸಾನಂ, ದತ್ವಾನ ಪರಿಭುಞ್ಜಿತಂ.

೫೬. ಇತಿ ವತ್ವಾ’ಭಯತ್ಥೇರೋ, ರಞ್ಞೋ ಹಾಸೇಸಿ ಮಾನಸಂ;

ರಾಜಾ ಚಿತ್ತಂ ಪಸಾದೇತ್ವಾ, ತಂ ಥೇರಂ ಇಧ ಮಬ್ರುವಿ.

೫೭. ‘‘ಚತುವೀಸತಿವಸ್ಸಾನಿ, ಸಙ್ಘಸ್ಸ ಉಪಕಾರಕೋ;

ಅಹ ಮೇವಂ ಹೋತು ಕಾಯೋ’ಪಿ, ಸಙ್ಘಸ್ಸ ಉಪಕಾರಕೋ.

೫೮. ಮಹಾಥೂಪ ದಸ್ಸನಠಾನೇ, ಸಙ್ಘಸ್ಸ ಕಮ್ಮಮಾಳಕೇ;

ಸರೀರಂ ಸಙ್ಘದಾಸಸ್ಸ, ತುಮ್ಹೇ ಝಾಪೇಥ ಮೇ’’ಇತಿ.

೫೯. ಕನಿಟ್ಠಂ ಆಹ ‘‘ಭೋ ತಿಸ್ಸ, ಮಹಾಥೂಪೇ ಅನಿಟ್ಠಿತಂ;

ನಿಟ್ಠಾಪೇಹಿ ತುವಂ ಸಬ್ಬಂ, ಕಮ್ಮಂ ಸಕ್ಕಚ್ಚ ಸಾಧುಕಂ.

೬೦. ಸಾಯಂ ಪಾತೋ ಚ ಪುಪ್ಫಾನಿ, ಮಹಾಥೂಪಮ್ಹಿ ಪೂಜಯ;

ತಿಕ್ಖತ್ತುಂ ಉಪಹಾರಞ್ಚ, ಮಹಾಥೂಪಸ್ಸ ಕಾರಯ.

೬೧. ಪಟಿಯಾದಿತಞ್ಚ ಯಂ ವತ್ತಂ, ಮಯಾ ಸುಗತ ಸಾಸನೇ;

ಸಬ್ಬಂ ಅಪರಿಹಾಪೇತ್ವಾ, ತಾತ ವತ್ತಯ ತಂ ತುವಂ.

೬೨. ಸಙ್ಘಸ್ಸ ತಾತ ಕಿಚ್ಚೇಸು, ಮಾ ಪಮಜ್ಜಿತ್ಥ ಸಬ್ಬದಾ’’;

ಇತಂ ತಂ ಅನುಸಾಸಿತ್ವಾ, ತುಣ್ಹೀ ಆಸಿ ಮಹೀಪತಿ.

೬೩. ತಙ್ಖಣಂ ಗಣಸಜ್ಝಾಯಂ, ಭಿಕ್ಖುಸಙ್ಘೋ ಅಕಾಸಿ ಚ;

ದೇವತಾ ಛ ರಥೇ ಚೇವ, ಛಹಿ ದೇವೇಹಿ ಆನಯುಂ.

೬೪. ಯಾಚುಂ ವಿಸುಂ ವಿಸುಂ ದೇವಾ, ರಾಜಾನಂ ತೇ ರಥೇ ಠಿತಾ;

‘‘ಅಮ್ಹಾಕಂ ದೇವಲೋಕಂ ತ್ವಂ, ಏಹಿ ರಾಜಮನೋರಮಂ’’.

೬೫. ರಾಜಾ ತೇಸಂ ವಚೋ ಸುತ್ವಾ, ‘‘ಯಾವ ಧಮ್ಮಂ ಸುಣೋಮಹಂ;

ಅಧಿವಾಸೇಥ ತಾವಾ’’ತಿ, ಹತ್ಥಾಕಾರೇನ ವಾರಯಿ.

೬೬. ವಾರೇತಿ ಗಣಸಜ್ಝಾಯ, ಮೀಭಿ ಮನ್ತ್ವಾನ ಭಿಕ್ಖವೋ;

ಸಜ್ಝಾಯಂ ಠಪಯುಂ ರಾಜಾ, ಪುಚ್ಛಿತಂ ಠಾನಕಾರಣಂ.

೬೭. ‘‘ಆಗಮೇಥಾ’’ತಿ ಸಞ್ಞಾಯ, ದಿನ್ನತ್ತಾ’ತಿ ವದಿಂಸು ತೇ;

ರಾಜಾ ‘‘ನೇತಂ ತಥಾ ಭನ್ತೇ’’, ಇತಿ ವತ್ವಾನ ತಂ ವದಿ.

೬೮. ತಂ ಸುತ್ವಾನ ಜನಾ ಕೇಚಿ, ‘‘ಭೀತೋ ಮಚ್ಚುಭಯಾ ಅಯಂ;

ಲಾಲಪ್ಪತೀ’’ತಿ ಮಞ್ಞಿಂಸು, ತೇಸಂ ಕಙ್ಖಾವಿನೋದನಂ.

೬೯. ಕಾರೇತುಂ ಅಭಯತ್ಥೇರೋ, ರಾಜಾನಂ ಏವಮಾಹ ಸೋ;

‘‘ಜಾನಾಪೇತುಂ ಕಥಂ ಸಕ್ಕಾ, ಆನೀತಾ ತೇ ರಥಾ’’ಇತಿ.

೭೦. ಪುಪ್ಫದಾನಂ ಖಿಪಾಪೇಸಿ, ರಾಜ ನಭಸಿ ಪಣ್ಡಿತೋ;

ತಾನಿ ಲಗ್ಗಾನಿ ಲಮ್ಬಿಂಸು, ರಥೀಸಾಸು ವಿಸುಂ ವಿಸುಂ.

೭೧. ಆಕಾಸೇ ಲಮ್ಬಮಾನಾನಿ, ತಾನಿ ದಿಸ್ವಾ ಮಹಾಜನೋ;

ಕಙ್ಖಂ ಪಟಿವಿನೋದೇಸಿ, ರಾಜಾ ಥೇರಮಭಾಸಿತಂ.

೭೨. ‘‘ಕತಮೋ ದೇವಲೋಕೋ ಹಿ,

ರಮ್ಮೋ ಭನ್ತೇ’’ತಿ ಸೋ ಬ್ರುವಿ;

‘‘ತುಸಿನಾನಂ ಪುರಂ ರಾಜ,

ರಮ್ಮಂ’’ಇತಿ ಸತಂ ಮತಂ.